1. ¿Tleka sekimej tokniuan momachiliaj inselti?

XAMO tinochtin ualeua toselti timomachiliaj. Sekimej amo nochipa ijkon momachiliaj pero oksekimej kitaj oui ayakmo ijkon momachiliskej. Sekimej maski katej iuan miakej momachiliaj inselti. Oksekimej ijkuak yikin ajsitiuij itech okse tlanechikol kitaj oui momatiskej. Oksekimej ken nochipa katej iuan infamilia, momachiliaj inselti ijkuak oksekan yauij. Oksekimej oixpoliuik se akin okitlasojtlayaj uan sapanoua kilnamikij. Sekimej tlen yikin omochijkej tokniuan momachiliaj inselti porque infamilia noso inyolikniuan ayakmo kinnotsaj noso kintlajyouiltiaj porque omochijkej iTlaixpantijkauan Jehová.

2. ¿Tlen tlajtlanilmej tikinnankiliskej itech nin tlamachtil?

² Jehová kuali techixmati uan techajsikamati. Ye kimatij keman timomachiliaj toselti uan kineki techpaleuis. Itech nin tlamachtil tiknankiliskej eyi tlajtlanilmej: ¿Ken techpaleuia Jehová amo ma timomachilikan toselti? ¿Tlen uelis tikchiuaskej tla timomachiliaj toselti? ¿Ken uelis tikinpaleuiskej tokniuan tlen inmiuan timonechikouaj amo ma momachilikan inselti?

3. ¿Ken okipaleui Jehová Elías?

³ Jehová kineki itekipanojkauan ma yolpakikan. Ye touan kajki ijkuak sapanoua timotekipachouaj uan timoyolkokouaj (Sal. 145:18, 19). Ma tikitakan ken okipaleui profeta Elías. Ye okatka ijkuak itekipanojkauan Jehová okintlajyouiltiayaj uan noijki okinekiayaj kimiktiskej Elías (1 Rey. 19:1, 2). Ye noijki sapanoua omotekipacho  porque omokuayejyeko san ye okatka iprofeta Jehová (1 Rey. 19:10). San niman Jehová itlaj okichi para kipaleuis Elías: okititlanili se ángel ma kilui amo okatka iselti uan ma kilui ok okatkaj miakej israelitas tlen okitekichiuilijtokaj Jehová (1 Rey. 19:5, 18).

4. ¿Ken kiteititia Marcos 10:29, 30 Jehová kintlasojtla akinmej ayakmo kinpaleuiaj infamiliares uan inyolikniuan?

⁴ Jehová kimati yotikajtejkej miak tlamantli para okachi tiktekichiuiliskej. Xamo axkan ayakmo techpaleuiaj tofamiliares uan toyolikniuan porque yejuan amo iTlaixpantijkauan Jehová. Se tonal apóstol Pedro xamo omotekipachojtoka, ik non, okilui Jesús: “Tejwah otikkajtejkeh nochi tlan otikpiayah iwa mowah tikateh. ¿Tlan tikpiaskeh?” (Mat. 19:27). Jesús okinmilui tokniuan tlen inmiuan monechikoskiaj yetoskiaj ken infamilia (xiktlajtolti Marcos 10:29, 30). Jehová yokijto kinpaleuis akinmej kitekichiuiliaj (Sal. 9:10). Ma tikitakan ken techpaleuia para amo timomachiliskej toselti.

5. ¿Tleka moneki timokuayejyekoskej ken techpaleuijtok Jehová?

⁵ Ma timokuayejyekokan ken techpaleuia Jehová (Sal. 55:22). Non techpaleuis ma timokuayejyekokan ken moneki. Se tokni tlen iselti uan motokayotia Carol, * ye iTlaixpantijka Jehová uan ifamilia amo. Ye okijto: “Nimokuayejyekoua ken yonechpaleui Jehová ijkuak nitlajyouia, ijkon amo nimomachilia noselti. Non nechititia ye amo keman nechkauas”.

6. ¿Ken techyolchikauas 1 Pedro 5:9, 10 akinmej timomachiliaj toselti?

⁶ Ma timokuayejyekokan ken Jehová kinpaleuia oksekimej tokniuan tlen momachiliaj inselti (xiktlajtolti 1 Pedro 5:9, 10). Se tokni tlen itoka Hiroshi yikipia miak xiuitl iTlaixpantijka Jehová uan ifamilia amo, ye okijto: “Tokniuan tlen inmiuan nimonechikoua nikita noijki tlajyouiaj. Nikita nochtin mochijchikauaj kitekichiuiliskej Jehová,  non nechyolchikaua maski nofamilia amo iTlaixpantijka Jehová”.

7. ¿Ken techpaleuia timotlatlaujtiskej?

⁷ Nochipa ma timotlatlaujtikan, ma timomachtikan Biblia uan ma timonechikokan. Moneki ma tikiluikan Jehová tlen tikpiaj itech toyolo uan ken timomachiliaj (1 Ped. 5:7). Ma tikitakan tlen okipanok se tokni ichpochtli tlen itoka Massiel. Ijkuak opejki kitekichiuilia Jehová omomachili iselti porque ifamilia amo ijkon okichi. Ye okijto: “Sapanoua oniktlatlaujti Jehová para amo nimomachiliskia noselti. Onikitak ken notajtsin. Nochipa iuan onimotlapouiaya uan onikiluiaya ken onimomachiliaya”.

8. ¿Ken techpaleuia tiktlajtoltiskej uan timokuayejyekoskej tlen kijtoua iTlajtol toTajtsin Dios?

⁸ Noijki nochipa ma tiktlajtoltikan Biblia uan ma timokuayejyekokan kanin kiteititia Jehová sapanoua techtlasojtla. Ma tikitakan tlen kipanoua se tokni tlen itoka Bianca. Ifamilia nochipa kiluia miak tlamantli tlen kiyolkokoua, ye okijto: “Nechpaleuia niktlajtoltis uan nimokuayejyekos tlen ijkuilitok itech Biblia, kanin kijtoua tlen okinpanok yiuejkika itekipanojkauan Jehová. Noijki nechpaleuia niktlajtoltis tlen axkan kinpanotok tokniuan porque noijki tlajyouiaj”. Sekimej tokniuan momachtiaj seki textos tlen kinyolchikaua para satepan kilnamikiskej, ken Salmo 27:10 uan Isaías 41:10. Oksekimej moyektlaliaj para ijkuak monechikoskej uan kitekitiltiaj grabaciones ika audio uan noijki ijkuak momachtiaj Biblia. Yokitakej non kinpaleuia amo ma momachilikan inselti.

9. ¿Ken mitspaleuia timonechikos?

⁹ Nochipa ma timonechikokan porque non techpaleuia ma timoyolchikauakan iuan tokniuan uan okachi ma tikinmixmatikan (Heb. 10:24, 25). Massiel tlen itech yotimotlapouijkej itech párrafo 7, okijto: “Maski onipinauaya onikijto nochipa nimonechikos uan nitlanankilis. Non onechpaleui okachi ma nimouika iuan tokniuan”.

10. ¿Tleka moneki okachi timouikaskej iuan akinmej nochipa kitekichiuiliaj Jehová?

¹⁰ Ma timouikakan iuan akinmej nochipa kitekichiuiliaj Jehová. Ma timouikakan iuan tokniuan tlen okachi techpaleuiskej ma tikpiakan chikauak totlaneltokilis. Maski yikipiaj miak xiuitl noso okachi telpokamej uan ichpokamej noso oksekan inmialtepe. Biblia kijtoua akinmej yikipiaj miak xiuitl ixtlamatkej (Job 12:12). Yejuan noijki uelis  momachtiskej miak tlamantli tlen kimatij telpokamej uan ichpokamej. David okatka telpochtli uan Jonatán yokipiaya miak xiuitl pero kuali omouikayaj (1 Sam. 18:1). Nochipa omopaleuijkej para kitekichiuiliskej Jehová ijkuak sapanoua otlajyouijkej (1 Sam. 23:16-18). Ma tikitakan se tokni tlen itoka Irina. Ye iTlaixpantijka Jehová uan ifamilia amo. Ye okijto: “Akinmej noijki kichiuaj ken Cristo uelis yetoskej tokniuan uan noijki ken totatajuan. Jehová kichiua yejuan ma yetokan ken tofamilia uan amo ma timomachilikan toselti”.

11. ¿Tlen moneki tikchiuaskej para timouikaskej iuan tokniuan?

¹¹ Xamo sekimej kinchiuilia oui kinmixmatiskej oksekimej uan inmiuan mouikaskej porque pinauaj. Ma tikitakan tlen okipanok se tokni tlen itoka Ratna. Ye opinauaya uan ijkuak opejki momachtia Biblia oksekimej okualankej. Ye okijto: “Onikitak omonekiaya nikselis ma nechpaleuikan tokniuan tlen onikinmitaya ken nofamilia”. Xamo tikitaj oui tikinmiluiskej tokniuan ken timomachiliaj pero tla tikinmiluiaj non techpaleuis inmiuan ma timouikakan. Yejuan kinekij techyolchikauaskej uan techpaleuiskej pero moneki tikinmiluiskej ken timomachiliaj para techpaleuiskej.

12. ¿Tlen techpaleuia ma timouikakan iuan tokniuan?

¹² Tla titetlapouiaj iuan oksekimej tokniuan, techpaleuis inmiuan ma timouikakan. Carol tlen itech otimotlapouijkej itech párrafo 5, okijto: “Opejki nimouika iuan tokniuan siuamej porque inmiuan nitetlapouia uan san sekan tikchiuaj okseki tlamantli para tikueyichiuaskej Jehová. Ye nochipa kinyolinia para ma nechpaleuikan ijkuak moneki”. Ik non, moneki timochijchikauaskej timouikaskej iuan akinmej kitekichiuiliaj Jehová. Ye kinyolinia tokniuan ma techpaleuikan ijkuak timomachiliaj toselti (Prov. 17:17).

13. ¿Tlen moneki tinochtin tikchiuaskej?

¹³ Tinochtin ma tikintlasojtlakan tokniuan uan ma titlapaleuikan nochtin kuali ma timouikakan. Ijkon amikaj momachilis iselti (Juan 13:35). Tlen tikijtoskej ma kinyolchikaua oksekimej. Se tokni kilnamiki: “Ijkuak opejki nimomachtia tlen kijtoua Biblia, tokniuan omochijkej nofamilia. Yejuan onechpaleuijkej ma nimochiua iTlaixpantijka Jehová”. ¿Tlen uelis tikchiuaskej para amo ma momachilikan inselti tokniuan tlen infamilia amo iTlaixpantijka Jehová?

14. ¿Ken uelis timouikaskej iuan akinmej yikin touan monechikouaj?

¹⁴ Inmiuan ma timouikakan. Kuali ma tikinselikan akinmej yikin touan monechikouaj (Rom. 15:7). Pero amo san moneki kuali tikintlajpaloskej. Satepan noijki inmiuan ma timouikakan. Ma tikinmititikan tikintlasojtlaj uan tiknekij tikinpaleuiskej. Ma tikinmajsikamatikan tlen kintlajyouiltia pero amo ma tikintlajtlanikan itlaj tlen amo moneki. Xamo sekimej kitaj oui kijtoskej ken momachiliaj, ik non, amo ma tikinchiualtikan ma tlapouakan. Ma tikintlajtlanikan san tlen moneki pero ma tikinmititikan tikintlasojtlaj uan kuali ma tikinkakikan. Uelis ijkon tikchiuaskej tla tikintlajtlaniaj ken opejkej momachtiaj Biblia.

15. ¿Ken uelis tlapaleuiskej tokniuan tlen kipiaj chikauak intlaneltokilis?

 ¹⁵ Tlayekankej noso oksekimej tokniuan kiteititiaj kintlasojtlaj tokniuan tlen inmiuan monechikouaj uan yejuan okachi mochikaua intlaneltokilis. Ijkon okipanok Melissa. Ye okijto: “Sapanoua nikintlasojkamatilia tokniuan porque yimiak xiuitl katej ken notatajuan. Nochipa ikaj nechkaki ijkuak nikneki itlaj nikijtos”. Ma tikitakan tlen okipanok Mauricio. Ye omomachili iselti ijkuak akin okimachtiaya ayakmo otetlapouiaya, ye okijto: “Onechpaleui miak ijkuak onikinmitak tlayekankej nechtlasojtlaj. Nochipa nouan omotlapouiayaj, nouan otetlapouiayaj, onechiluiayaj itlaj tlen omomachtijkej itech Biblia uan hasta nouan omauiltiayaj”. Axkan Melissa uan Mauricio okachi kitekichiuilijtokej Jehová

16, 17. ¿Ken uelis tikinpaleuiskej sekimej tokniuan?

¹⁶ Ma tikinpaleuikan (Gál. 6:10). Se misionero tlen itoka Leo amo kajki iuan ifamilia, uejka kitekichiuilia Jehová, ye okijto: “Ualeua moneki ikaj ma mitsititi kineki mitspaleuis. Nikilnamiki ijkuak onikpixki se accidente ika nocarro. Ijkuak oniajsito nokalijtik sapanoua onimotekipachouaya. Pero se tokni uan isiua onechyolejkej inmiuan ma nitlakuati. Amo nikilnamiki tlen otikkuajkej pero kema nikilnamiki kuali onechkakej uan satepan kuali onimomachili”.

¹⁷ Tinochtin techpaktia timonechikotiuij iuan tokniuan, ken itech uejueyij nechikolmej porque timotlapouiaj tlen ompa tikkakij. Carol tlen itech yotimotlapouijkej okijto: “Nimomachilia noselti ijkuak nio uejueyij nechikolmej maski nika iuan miakej porque nikita nochtin tokniuan katej iuan infamilia”. Sekimej tokniuan kitaj oui yaskej se ueyi nechikol ijkuak yikin oixpoliuik innamik noso insiua. ¿Tikixmatij ikaj tlen ijkon kipanotok? ¿Uelis tikyoleuaskej touan ma yeto ijkuak okse tonal timonechikoskej?

18. ¿Ken uelis tikchiuaskej tlen kijtoua 2 Corintios 6:11-13?

¹⁸ Inmiuan ma tiyetokan. Ma tikinyoleuakan  tokniuan ijkuak tikchiuaskej seki tlamantli para timoyolpaktiskej pero noijki ma tikinyoleuakan akinmej momachiliaj inselti. Yejuan noijki ma tikinmititikan tikintlasojtlaj (xiktlajtolti 2 Corintios 6:11-13). MeIissa tlen itech yotimotlapouijkej itech párrafo 15 okijto: “Otiyolpakiayaj ijkuak sekimej tokniuan otechyoleuayaj inkalijtik noso oksekan ma tipaxialotij”. ¿Uelis tikyoleuaskej tokalijtik ikaj tlen touan monechikoua?

19. ¿Keman moneki tiyetoskej iuan sekimej tokniuan?

¹⁹ Ualeua tokniuan kinekij inmiuan ma tiyetokan. Sekimej tokniuan kitaj oui yetoskej iuan infamilia porque amo iTlaixpantijkauan Jehová uan iluichiuaj seki tonal. Oksekimej kitaj oui sejse xiuitl porque kilnamikij ijkuakon oixpoliuik se akin okitlasojtlayaj. Ijkuak timochijchikauaj tiyetoskej iuan tokniuan tikteititiaj melauak tikintlasojtlaj (Filip. 2:20).

20. ¿Ken uelis techpaleuis tlen okijto Jesús itech Mateo 12:48-50 ijkuak timomachiliaj toselti?

²⁰ Onka miak tlamantli tlen uelis kichiuas tokniuan ma momachilikan inselti. Pero ma tikilnamiktokan Jehová kuali kimati ken timomachiliaj. Ye kinyolinia tokniuan para ma techpaleuikan (xiktlajtolti Mateo 12:48-50). Ma tikteititikan tiktlasojkamatij Jehová porque tikinpiaj tokniuan, ik non, ma timochijchikauakan tikinpaleuiskej. Maski ualeua amo kuali timomachiliaj, ma tikilnamikikan amo tikatej toselti, Jehová nochipa touan kajki.