1. Busanaki abaghombe ba Yehova bakanayowa omo mbwera omo katambi kalebe?

KIKANAHIKA abalebe b’okwitwe ibayowa omo mbwera. Oko bandu balebe embwera eyo siyiribya ya mughulu muli. Aliwe oko bandi yikanabugha mughulu muli. Twanganayowa omo mbwera nibya itunatimbirweko n’abandu bangyi. Kikanakala oko bandi eribana abanywani omo ndeko yabo nyihya. Abandi bakayowa omo mbwera kundi babirihumira hali oko bandu abomo kihanda kyabo. N’abandi babiriherya omundu oyo babya banzire. N’Abakristo balebe, kangyi-kangyi abahya-bahya bakanayowa omo mbwera omughulu aboko kihanda kyabo abatekolera Yehova kutse abira babo ba kera bakabaghana kutse ibab’enderererya.

2. Tukendisubirya oko mabulyo wahi?

² Yehova asi obuli mwatsi okw’itwe. Omughulu tukayowa omo mbwera anasi ndeke ngoko tukayowa kandi anzire erituwatikya. Yehova akatuwatikaya ati? Twangayiwatikya tuti? Kandi twangawatikya tuti abomo ndeko yetu abakayowa omo mbwera? Muleke tubane ebisubiryo oko mabulyo ayo.

3. Yehova mwakangania ati ngoko atsomene Eliya?

³ Yehova anzire abaghombe biwe bosi ibabya n’obutseme. Yehova ali hakuhi n’obuli mughuma w’okwitwe kandi akaminya omughulu tukayowa muhanda kutse omughulu tubunikire mutima. (Esy. 145:18, 19) Terilengekania ngoko Yehova atsomana eriyowa lya Eliya kandi ngoko amuwatikaya. Omulume mutaleghula oyo abyaho omughulu e Israeli yabya omo mughulu mubi. Abaghombe ba Yehova babya omw’endereribwa elikalire. Abandu  b’obutoki omo Israeli abatabya bakakolera Yehova mubendererya ababya bakakolera Yehova, n’eryo mubasonda erita Eliya (1 Bam. 19:1, 2) N’ekindi, Eliya mwalengekania ng’abirisighala iyuwene oko baminyereri abakakolera Yehova. Neryo ekyo mukyamubuna mutima (1 Bam. 19:10) Eriwatikya Eliya, oMungu mwakola luba. Yehova mwatuma omumalaika erisyabwira omuminyereri wiwe ngoko syali iyuwene​—omumalaika mwabwira Eliya ati, hane abandi ba Israeli bangyi abanemukolera Yehova butaleghula!​—1 Bam. 19:5, 18.

4. Mariko 10:29, 30 yikakanganaya yiti ngoko Yehova atsomene abaghombe biwe abakaheraya obuwatikya obwabandu b’omo kihanda kutse obw’abira babo?

⁴ Yehova anasi ngoko omughulu tukasombola erimukolera, kikanasaba abaghuma b’okwitwe eriherera emyatsi mingyi. Omughuma w’oko myatsi eyo twangaherera, b’obuwatikya obw’abandu b’oko kihanda kyetu kutse abanywani betu abatekolera Yehova. Alinga omo mulenge w’erihangya-hangya Petero mwabulya Yesu ati: “Itwe twabirisiga ebyosi twamakukwama, nikwa twasyabanaki kwehi?” (Mat. 19:27) Omo mulenge owahehere Yesu mwasubirya abakwenda biwe ati endeko yo yikendibya kihanda kyabo. (Soma Mariko 10:29, 30.) Kandi Yehova Tata wetu w’elubula mwalagha ati akendisyawatikya abosi abakendisyamukolera. (Esy. 9:10) Tukanaye oko myatsi milebe eyo wangakola utoke eribana obuwatikya bwa Yehova omughulu ukayowa iwamabya omo mbwera.

5. Busanaki ni ky’omughaso eribya tukalengekania ngoko Yehova enemutuwatikya?

⁵ Uhire amalengekania waghu w’oko ebyo Yehova anemukukolera erikuwatikya. (Esy. 55:22) Ekyo kikendikuwatikya erilangira ngoko siwuli iwuwene. Mwali wetu musimbi oyukahulawa mo Carol *, oyuli iyuwene omo kwenene omo kihanda kiwe, akabugha ati: “Ngabya nalengekania ngoko Yehova angwatikaya omo maligho, ngalangira ngoko siniri ingyuwene. Kandi ekyo kikaleka inaminya ngoko Yehova akendisyabya naghe n’omo biro bikasa.”

6. 1 Petero 5:9, 10 yikawatikaya yiti abakayowa nga bali ibibene?

⁶ Ubye ukalengekania ngoko Yehova anemuwatikya abaghala n’abali betu abakayowa nga  bali ibibene. (Soma 1 Petero 5:9, 10.) Mughala wetu Hiroshi, oyuwabugha emyaka mingyi iniane omo kwenene mw’iyuwene omo kihanda kiwe akabugha ati: “Omo ndeko kyolobire erilangira ngoko itwe bosi tunawite amaligho wetu. Eriminya ngoko itwe bosi tunemuyikasa erikolera Yehova, ekyo kikahira omuhwa omo baghala n’abali betu abali ibibene omo kwenene.”

7. Omusabe akakuwatikaya ati?

⁷ Isiwaleka eribya ukasaba, erisoma eBiblia, n’erihindana n’abaghala n’abali betu. Nibughambu, litolere eribwira Yehova ngoko ukayowa. (1 Pet. 5:7) Mwali wetu Massiel akabugha ati: “Omughuma w’oko myatsi eyaniwatikaya erikinda embwera yaghe ingasaba Yehova butumbya.” Omughulu mwali wetu oyu ayisogha erikolera Yehova, mwayowa ng’ali iyuwene, kundi abandu ab’omo kihanda kiwe isibaliramaya Yehova. Akatomekako ati: “Yehova mwabya Tata waghe, ingamusaba kangyi-kangyi omo musibo erimubwira ngoko ngayowa.”

8. Erisoma Ekinywa ky’oMungu n’erilengekania kukyo kikatuwatikaya kiti?

⁸ Ubye ukasoma Ekinywa ky’oMungu kyo kangyi-kangyi, n’erilengekania oko myatsi eyiri mukyo eyikakanganaya ngoko Yehova akwanzire. Mwali wetu Bianc, oyukayiyinaya busana n’ebinywa ebikabuna mutima ebikalua oko bandu b’ekihanda kiwe, akabugha ati: “Erisoma n’erilengekania oko myatsi eyiri omo Biblia, n’emikania ya maisa w’abaghombe ba Yehova abalola oko maligho awali ngawongalolako, kikaniwatikaya.” Abakristo balebe bakahamba amasako w’omo mutwe awakasubaya mutima ng’ Esyonyimbo 27:10 ne Isaya 41:10. Abandi babeghere erihulikirira emilenge eyahambawa omo kanimba ey’emyatsi eyo bakasonda erigha. Bakabugha bati erikola batya kikababugha kw’embwera omughulu bakateghekanaya emihindano, kutse omughulu bakasoma eBiblia.

9. Eribya ukasa oko mihindano kikakuwatikaya kiti?

⁹ Uyikase eribya ukahika oko mihindano. Eprograme y’emihindano yikendikusubya mutima, kandi ukendiminya ndeke abaghala n’abali betu. (Ebr. 10:24, 25) Massiel, oyotulyakanayako akatasyatomekako ati: “Nomo nanabya mukutu, iningayikasa erihika oko buli muhindano w’endeko n’erisubirya mugho. Ekyo mukyaniwatikya eriyowa haghuma n’abaghala n’abali betu omo ndeko.”

10. Busanaki kyuwene eribya n’obwira n’aBakristo bataleghula?

¹⁰ Ukole obwira n’aBakristo bataleghula. Ukole obwira haghuma n’abaghala n’abali betu omo ndeko abangabya eky’erileberyako ekyuwene okw’iwe. Banganabya ini balere okw’iwe kutse ini bakulu okw’iwe, kutse ibakulira omo yindi mibere. EBiblia yikatubwira yiti, “abasyakulu  bobawite amenge.” (Yobu 12:12) Abasyakulu nabo banganigha myatsi mingyi oko balwana abataleghula omo ndeko. Dawidi abya mulere kutsibu kwilaba Yonatani, aliwe ekyo mukitabakakirya eribya banywani. (1 Sam. 18:1) Dawidi na Yonatani mubawatikania erikolera Yehova n’omo banabya omo maligho awakalire. (1 Sam. 23:16-18) Mwali wetu Irina oyuli iyuwene omo kwenene akabugha ati: “Abaghala n’abali betu banganabya babuti betu b’obunya-kirimu kutse ibabya b’oko kihanda kyetu eky’obunya-kirimu. Yehova anganakolesyabo ibabya kihanda kyetu ekyo tulayireko.”

11. Twangakolaki tutoke eribya n’obunywani obuwatire?

¹¹ Kyanganakala eriyira abira bahya-bahya, kangyi-kangyi wamabya ighuli mukutu. Mwali wetu mukutu ye Ratna, oyuwasa omo kwenene n’omo anabya akendereribwa kutsibu akabugha ati: “Munalangira ngoko nilayire oko buwatikya bw’abaghala n’abali betu omo ndeko.” Kyanganakala eribwira oghundi mundu ngoko tukayowa. Aliwe, twamamubwira ngoko tukayowa, omundu oyo anganabya mwira wetu kutsibu. Abira betu bakanza eritusubya mutima n’erituwatikya, aliwe tutolere itwabakangania ngoko bangakola batoke erituwatikya.

12. Omubírí w’eritulira anganakuwatikya ati eribya n’abira abuwene?

¹² Enzira nguma ey’erikola obwira, ly’eribya ukatulira n’aBakristo balikyenyu. Mwali wetu Carol, oyotulyakanayako akabugha ati: “Erilabya endambi n’abaghala n’abali betu omo mubírí w’eritulira n’eyindi mibírí y’ekiteokrasi, ekyo kyabirileka inabana abira bangyi. Yehova abiriniwatikya omo myaka mingyi erilabira abira abo.” Eriwatya obwira n’aBakristo bataleghula kikaletera endundi nene mughulu wosi. Yehova akakolesaya abira abali ngabo erikuwatikya omughulu wabiribunika mutima, kutse omughulu wabiriyowa nga uli iwuwene.​—Emi. 17:17.

13. Itwe bosi tuwite olusunzo lwahi omo ndeko?

¹³ Obuli mundu omo ndeko ali n’olusunzo lw’erisangira oko lwanzo n’obuholo omo ndeko, neryo isihabya omundu uyukendiyowa ngali iyuwene. (Yoa. 13:35) Ebyo tukabugha n’erikola byanganawatikya abandi bo kutsibu! Mwali wetu mughuma akabugha ati: “Omughulu nigha ekwenene endeko muyabya kihanda kyaghe. Ngabataniwatikaya kumbe lino siniri Mwimiri wa Yehova.” Wangakola uti utoke eriwatikya abali omo kwenene mw’ibibene batoke eriyowa mo baghuma b’oko ndeko?

14. Twangakolaki tutoke erikola obwira n’abahya-bahya?

¹⁴ Ubye w’erimbere erikola obwira n’abahya-bahya omo ndeko. Wanganatsuka erikokya n’omuhwa munene abahya-bahya omo ndeko. (Rom. 15:7) Aliwe, hane n’ekindi ekyo litolere itwakola. Tutolere itwakola nabo obwira b’omughulu muli. Ukanganaye abahya-bahya ngoko ubatsomene. Usonde eriminya amaligho awo bakalabamo, aliwe isiwasonda eriminya emyatsi yabo eyitakulebirye. Abandi kikanabakalako eribugha ngoko bakayowa. Busana n’ekyo isiwabahatikana eribugha. Iwunabasikirye, ubabulaye amabulyo awate angaleka ibayowa muhanda kandi uhulikirire ndeke ebisubiryo byabo. Wanganababulya ngabaminya ekwenene yo bati.

15. Abakristo abawite obwikirirya obuwatire bangawatikya bati abandi omo ndeko?

¹⁵ Obwikirirya b’obuli mundu omo ndeko bukawata omughulu tukakanganaya ngoko tutsomene abandi. Kutsibu-tsibu bikabya bitya omughulu abasyakulu b’endeko kutse abandi Bakristo abakulire bakakola batya. Mwali wetu Melissa, oyowakangiriribawa eBiblia na mama wiwe akabugha ati: “Ngasima kutsibu baghala betu ababya ng’obo tata okwingye, ibakalabaya endambi haghuma naghe n’erinitsomana.  Omughulu nabya nganza erikania n’omundu isiniribula oyukanihulikirira.” Mughala wetu Mauricio, oyowabya akayowa ngali iyuwene omughulu oyuwamukangiriraya eBiblia ahighawa omo ndeko akabugha ati: “Abasyakulu b’endeko mubakangania ngoko banitsomene. Ekyo mukyaniwatikya kutsibu. Ibakakanaya naghe kangyi-kangyi. Ibakaghenda naghe omo mubírí w’eritulira, ibakanikaniraya oko ebyo balyabana omo busomi bwabo bw’eBiblia, kandi ibakatsanga naghe.” Lino mwali wetu Melissa na mughala wetu Mauricio ni bapainia b’omughulu wosi.

16-17. Ni mwatsi wahi owo twangakola tutoke eriwatikya abandi?

¹⁶ Ukole omwatsi mulebe owangawatikya. (Gal. 6:10) Mughala wetu yo Leo oyuli omo mubírí w’obumisyonere omo kihugho ekiri hali n’ekihanda kiwe akabugha atya: “Kangyi-kangyi ekyotulayireko ly’eritukolera ekyuwene omughulu tulayire kukyo.” Akatasyabugha ati: “Kiro kighuma munakola ekisida omo mutoka. Munanatayikolya eka, aliwe nabya inabirihangya-hangya kutsibu. Neryo mughala wetu na mukali wiwe mubanikokya eka wabo oko kalyo. Sinikibukire ebyo twalya, aliwe ekyo ngibuka, mubanihulikirira ndeke n’oko nduli munayowa ndeke!”

¹⁷ Itwe bosi tukatsema omughulu tukahindana n’abaghala n’abali betu neryo itwakania oko myatsi eyo twabiryowa, ng’eyotwigha oko mihindano minene-minene. Aliwe, mwali wetu Carol, oyo tulyakanayako akabugha ati: “Ngayowa omo mbwera oko mihindano minene-minene.” Akabugha atya busanaki? Akasubiraya ati: “Nomo ngabya ininatimbireko amaghana kutse amaelfu w’abaghala n’abali betu, abosi bakabya ibanikere n’abomo kihanda kyabo, neryo omughulu ngalangira nitya, ngayowa nga niri ingyuwene.” Kikanakala oko bandi eriya oko mihindano minene-minene enyuma sy’eriherya omulume kutse omukali wabo omo luholo. Unasi omundu mulebe oyukalaba omo maligho ng’ayo? Wanganamukokya oko wundi muhindano munene owakasa neryo inikala haghuma n’ekihanda kyaghu.

18. Wangakolesya uti 2 Abanya Korinto 6:11-13 omughulu ukakokaya abandi?

¹⁸ Ubye ukalabya endambi haghuma n’abandi. Ubye ukalabya endambi haghuma n’abaghala n’abali betu mbiriri-mbiriri kangyi-kangyi abakayowa nga bali ibibene. Ni ky’omughaso  ‘eritendihatatana omo mitima yetu’, kutsibu-tsibu oko bandu abalingabo. (Soma 2 Abanya Korinto 6:11-13.) Mwali wetu Melissa oyo tulyakanayako akatasyabugha ati: “Itukatsema kutsibu omughulu abaghala n’abali betu bakatukokaya eka wabo erilabya nabo endambi kutse erilendera nabo.” Omo ndeko yenyu mune omundu mulebe oyo wangakolera utya?

19. Ni mughulu wahi ogho baghala betu banganatsema kutsibu erilabya endambi yo haghuma netu?

¹⁹ Hanganabya akatambi ako baghala betu banganatsemera kutsibu twamabilabya nabo endambi. Kyanganakala oko bandi erilabya endambi yo haghuma n’abandu b’omo kihanda kyabo abate Bimiri ba Yehova, omughulu bakakola ebisendebele ebitetsemesaya Yehova. N’abandi bakayowa muhanda omughulu ekiro eky’omundu oyo babya banzire oyo abirihola kikahika. Omughulu tukalabaya endambi haghuma n’abaghala n’abali betu abakalaba omo maligho awali ngayo, tukakanganaya ngoko ‘tubatsomene’.​—Flp. 2:20.

20. Ebinywa bya Yesu ebikabanika omo Matayo 12:48-50 bikatuwatikaya biti omughulu twamayowa nga tuli itwibene?

²⁰ Hali myatsi mingyi eyikaleka Omukristo iniayowa ng’ali omo mbwera. Aliwe, omughulu tukayowa omo mbwera tuminye ngoko Yehova anasi ngoko tukayowa. Kangyi-kangyi Yehova akakolesaya abaghala n’abali betu erituha ebyo tulaghireko. (Soma Matayo 12:48-50.) Netu omughulu tukakola ngoko twangatoka eriwatikya abaghala n’abali betu tukabya itwamakangania ngoko tukasima Yehova erituha endeko. Nomo twangayowa tuti, tuminye ngoko situli itwibene kundi Yehova ane haghuma netu!