1. Ke ka baka la’ng ka dinako tše dingwe bahlanka ba Jehofa ba ikwa ba lewa ke bodutu?

BA BANTŠI ba rena re fela re ikwa re lewa ke bodutu. Ba bangwe ba ka ikwa ka tsela yeo ka nakwana mola ba bangwe ba ka ikwa ka tsela yeo ka nako e telele. Re ka ikwa re lewa ke bodutu le ge re na le batho ba bangwe. Ba bangwe ba thatafalelwa ke go ba le bagwera phuthegong yeo ba sa tšwago go fihla go yona. Mola ba bangwe bao ba tšwago ka malapeng ao a tlwaetšego go dira dilo a le gotee, ba ikwa ba lewa ke bodutu ge ba yo dula kgole le malapa a gabo bona. E bile ba bangwe ba dula ba gopola batho ba gabo bona bao ba hlokofetšego. Bakriste ba bangwe, kudukudu bao ba sa tšwago go ithuta therešo, ba ka ikwa ba le noši ge e ba bagwera ba bona goba batho ba gabo bona bao ba sa hlankelego Jehofa ba se sa ba amogela goba ba ba tlaiša.

2. Re tlo araba dipotšišo dife sehlogong se?

² Jehofa o a re kwešiša e bile o tseba se sengwe le se sengwe ka rena. O a bona ge re ikwa re lewa ke bodutu e bile o ikemišeditše go re thuša. Jehofa o re thuša bjang? Re ka dira’ng ge re lewa ke bodutu? Le gona re ka thuša bjang ba bangwe ka phuthegong bao ba ikwago ba lewa ke bodutu? A re boledišaneng ka dikarabo tša dipotšišo tše.

3. Jehofa o ile a bontšha bjang gore o na le taba le Eliya?

³ Jehofa o nyaka gore bahlanka ba gagwe ka moka ba thabe. O rata yo mongwe le yo mongwe wa rena e bile o a bona ge re  nyamile. (Ps. 145:18, 19) Nagana kamoo Jehofa a bego a tshwenyegile ka gona ka moporofeta Eliya. Eliya o be a botega e bile o phetše nakong e thata mehleng ya Baisiraele. Ka nako yeo, batho bao ba bego ba sa hlankele Jehofa ba be ba tlaiša bahlanka ba gagwe e bile ba nyaka go bolaya Eliya. (1 Dikg. 19:1, 2) Le gona Eliya a ka ba a ile a nyamišwa ke gore o be a nagana gore ke yena moporofeta wa Jehofa a nnoši yo a šetšego. (1 Dikg. 19:10) Jehofa o ile a dira’ng gore a thuše Eliya kapelapela? O ile a romela morongwa wa gagwe go kgonthišetša Eliya gore o be a se a šala a nnoši, le gore go be go sa na le Baisiraele ba bantši bao ba bego ba sa hlankela Jehofa ka go botega.—1 Dikg. 19:5, 18.

4. Mareka 10:29, 30 e bontšha bjang gore Jehofa o hlokomela bahlanka ba gagwe bao bagwera ba bona le batho ba gabo bona bao ba sa hlankelego Jehofa ba se sa ba thekgago?

⁴ Jehofa o a tseba gore ba bangwe ba rena ge re kgetha go mo hlankela, re swanelwa ke go tlogela dilo tše dingwe. Se se ka akaretša gore bagwera ba rena le batho ba gabo rena bao ba sa hlankelego Jehofa ba ka tlogela go re thuša. Mohlomongwe ka ge Petro a be a tshwenyegile, o ile a botšiša Jesu a re: “Re tlogetše dilo ka moka gomme ra go latela; gabotsebotse re tla hwetša’ng?” (Mat. 19:27) Jesu o ile a kgonthišetša balatedi ba gagwe gore ba be ba tla hwetša ba gabo bona ka phuthegong. (Bala Mareka 10:29, 30.) Le gona Jehofa yoo e lego Tatago rena wa legodimong o tshepišitše gore o tla hlokomela batho bao ba mo hlankelago. (Ps. 9:10) Nagana ka dilo tšeo wena o ka di dirago go dumelela Jehofa gore a go thuše ge o ikwa o lewa ke bodutu.

5. Ke ka baka la’ng re swanetše go dula re nagana ka dilo tšeo Jehofa a re thušago ka tšona?

⁵ Dula o nagana ka dilo tšeo Jehofa a go thušago ka tšona. (Ps. 55:22) Go dira bjalo go tla go thuša go bona gore ga o noši. Carol * yo a sego a nyalwa e bile e le Hlatse ya Jehofa a nnoši ka gabo o re: “Ge ke nagana ka tsela yeo Jehofa a nthušitšego ka yona ge ke be ke na le mathata, seo se nthuša go bona gore ga ke noši. E bile se se nkgonthišetša gore Jehofa o tla dula a nthekga.”

6. Petro wa Pele 5:9, 10 e ka kgothatša bjang bao ba ikwago ba lewa ke bodutu?

 ⁶ Nagana kamoo Jehofa a thušago bana babo rena le dikgaetšedi bao ba ikwago ba lewa ke bodutu. (Bala 1 Petro 5:9, 10.) Ngwanabo rena Hiroshi yo a bilego Hlatse a nnoši ka gabo ka mengwaga e mentši o re: “Go bonolo go bona gore ka phuthegong motho yo mongwe le yo mongwe o na le mathata a gagwe. Ge re dira sohle seo re ka se kgonago go hlankela Jehofa, seo se ka kgothatša bao e lego Bakriste ba nnoši ka gabo bona.”

7. Go rapela go ka go thuša bjang?

⁷ Eba le lenaneo le lebotse la go ithuta ka Jehofa gomme o le latele. Se se akaretša go botša Jehofa kamoo o ikwago ka gona. (1 Pet. 5:7) Kgaetšedi Massiel o re: “Selo se sengwe sa bohlokwa seo se ilego sa nthuša gore ke se sa ikwa ke le noši ke go bolela le Jehofa ka mehla. Ke Tate wa ka wa kgonthe, ke be ke mo rapela ka mehla ke mmotša kamoo ke ikwago ka gona.” Ka morago ga gore kgaetšedi yo wa mofsa a kgethe go hlankela Jehofa, o ile a ikwa a se sa na segwera se se tiilego le ba gabo bao e sego Dihlatse tša Jehofa.

8. Go bala Beibele le go naganišiša ka seo o se balago go ka go thuša bjang?

⁸ Bala Beibele ka mehla gomme o naganišiše ka dipego tšeo di bontšhago gore Jehofa o a go rata. Bianca yo a ilego a kgotlelela ge ba gabo ba be ba mo ganetša o re: “Go bala le go naganišiša ka dipego tša ka Beibeleng le go ithuta ka mehlala ya bahlanka ba Jehofa bao ba ilego ba kgotlelela mathata a go swana le a ka, go nthuša kudu.” Bakriste ba bangwe ba swara ka hlogo ditemana tšeo di kgothatšago kudu, go swana le Psalme 27:10 le Jesaya 41:10. Ba bangwe ba bone gore go theetša mmalo wa Beibele le dikgatišo tše di rekhotilwego ge ba lokišeletša diboka, go ba thuša gore ba se ke ba ikwa ba le noši.

9. Go ba gona dibokeng ka mehla go ka go thuša bjang?

⁹ Dira sohle seo o ka se kgonago gore o be gona dibokeng ka mehla. O tlo kgothatšwa ke seo o ithutago sona dibokeng e bile o tlo tsebana le bana babo rena le dikgaetšedi gakaone. (Baheb. 10:24, 25) Massiel yo re boletšego ka yena pejana o re: “Le ge ke be ke na le dihlong, ke be ke e ba gona dibokeng ka mehla e bile ke araba. Se se nthušitše gore ke ikwe ke le karolo ya phuthego.”

10. Ke ka baka la’ng go le bohlokwa go ba le bagwera ka phuthegong?

¹⁰ Eba le bagwera ka phuthegong. Eba le bagwera bao o ka ithutago dilo tše dingwe go bona, e ka ba e le ba bagolo goba ba banyenyane go wena goba bao ba godišitšwego ka tsela yeo e sa swanego le ya gago. Beibele e re gopotša gore bohlale bo ‘hwetšwa gare ga batšofadi.’  (Jobo 12:12) Batho bao ba godilego le bona ba ka ithuta se sengwe go bafsa ka phuthegong. Dafida e be e le yo monyenyane kudu go Jonathane, eupša seo ga se sa ba thibela gore e be bagwera. (1 Sam. 18:1) Ba ile ba thušana gore ba kgone go hlankela Jehofa le ge ba be ba na le mathata a mantši. (1 Sam. 23:16-18) Kgaetšedi Irina yoo e lego Hlatse a nnoši ka gabo o ile a dira maiteko a gore a gwerane le Bakristegotee le yena. O re: “Bana babo rena le dikgaetšedi ka phuthegong e ka ba batswadi, bobuti le bosesi ba rena. Jehofa a ka diriša bana babo rena bao gore ba re thekge.”

11. O ka dira’ng gore o be le bagwera ba nnete?

¹¹ Go ba le bagwera ga go bonolo, kudukudu ge e ba o na le dihlong. Kgaetšedi Ratna yo a nago le dihlong yo a ilego a ithuta therešo le ge ba bangwe ba be ba mo ganetša o re: “Ke ile ka lemoga gore ke hloka thušo ya bana babo rena le dikgaetšedi ka phuthegong.” Ga go bonolo go botša motho yo mongwe ka tsela yeo o ikwago ka yona, eupša go boledišana le motho yoo go ka dira gore e be mogwera wa gago wa nnete. Bagwera ba gago ba ikemišeditše go go thekga le go go kgothatša, eupša gore ba kgone go dira seo o swanetše go ba botša kamoo o ikwago ka gona.

12. Go ya tšhemong go ka go thuša bjang gore o be le bagwera ba babotse?

¹² Tsela e nngwe e kaone ya go ba le bagwera ke ka go ya tšhemong le Bakristegotee le wena. Kgaetšedi Carol yo re boletšego ka yena pejana o re: “Go ya tšhemong le dikgaetšedi tše dingwe le go dira mediro e mengwe ya ka phuthegong le tšona go nthušitše gore ke be le bagwera ba bantši ba babotse. Jehofa o be a dutše a nthuša a diriša bagwera bao.” Re holega kudu ge re na le bagwera ba babotse ka phuthegong. Jehofa o diriša bagwera bao gore ba re matlafatše ge re ikwa re le noši.—Die. 17:17.

13. Ka moka ga rena re na le boikarabelo bofe?

¹³ Ka moka ga rena re na le boikarabelo bja go dira gore go be le khutšo ka phuthegong le go bontšha ba bangwe gore re a ba rata gore ba se ke ba ikwa ba le noši. (Joh. 13:35) Selo seo re se dirago goba re se bolelago se ka kgothatša ba bangwe kudu! Kgaetšedi yo mongwe o re: “Ge ke be ke ithuta therešo, bana babo rena le dikgaetšedi ba ile ba thoma go ba ba lapa la gešo. Ge nkabe e be e se ka thušo ya bona, nkabe ke se yo mongwe wa Dihlatse tša Jehofa.” O ka thuša bjang bao e lego Dihlatse tša Jehofa ba nnoši ka malapeng a bona goba a gabo bona go lemoga gore bana babo rena le dikgaetšedi ka phuthegong ba a ba rata?

14. O ka dira’ng gore o gwerane le batho bao ba sa tšwago go fihla ka phuthegong?

¹⁴ Leka go gwerana le batho bao ba sa tšwago go fihla ka phuthegong. Re ka thoma ka go ba amogela. (Baroma 15:7) Ga se ra swanela go no ba dumediša feela ka semaele. Re nyaka gore mafelelong e tle e be bagwera ba rena ba nnete. Re ka ba bontšha botho le gore re na le taba le bona. O se ke wa ba botšiša dipotšišo tše dintši kudu, eupša leka go kwešiša mathata ao ba nago le ona. Ba bangwe ga go bonolo gore ba go botše ka tsela yeo ba ikwago ka yona, ka gona o swanetše go hlokomela gore o se ke wa ba gapeletša gore ba go botše dilo ka moka. Go e na le moo, ba botšiše dipotšišo ka bohlale gomme o ba theetše ka go se fele pelo. Ka mohlala, o ka ba botšiša gore go tlile bjang gore ba tle ka phuthegong.

15. Bakriste bao ba nago le phihlelo ba ka thuša bjang ba bangwe ka phuthegong?

¹⁵ Bana babo rena le dikgaetšedi ba tla ba le  tumelo e tiilego ge e ba Bakriste bao ba nago le phihlelo, kudukudu bagolo, ba ba botša gore ba a ba rata. Melissa yoo mmagwe a mo godišeditšego ka phuthegong o re: “Ga ke na mantšu a go leboga bana babo rena bao ba bilego bjalo ka botate go nna. Ge ke hloka motho yoo nka bolelago le yena, ke a tseba gore nka ya kae.” Mauricio, e lego ngwanabo rena wa mofsa, o ile a ikwa a lahlegile ka morago ga gore motho yo a mo rutilego Beibele a tlogele go hlankela Jehofa. O re: “Bagolo ba ile ba mpontšha gore ba na le taba le nna gomme seo se ile sa nthuša kudu. Ba be ba boledišana le nna ka mehla, ba eya le nna tšhemong, ba mpotša dilo tšeo ba ithutilego tšona ka Beibeleng e bile ka dinako tše dingwe re be re bapala mmogo.” Ga bjale Melissa le Mauricio ba hlankela Jehofa tirelong ya nako e tletšego.   

16-17. Ke’ng se sengwe seo re ka se dirago go thuša ba bangwe?

¹⁶ Thuša ba bangwe. (Bagal. 6:10) Leo yoo e lego moromiwa nageng ya kgole le ga gabo o re: “Ka dinako tše dingwe re hloka gore batho ba re bontšhe botho. Ka letšatši le lengwe ge ke be ke hweditše kotsi ya koloi, ke ile ka fihla gae ke swere ke stress. Eupša ka moragonyana ga moo, banyalani ba bangwe ba ile ba mmema legaeng la bona gore ke tlo ja le bona. Ga ke gopole gore re ile ra ja eng, eupša ke no gopola gore ba ile ba ntheetša. Mafelelong ke ile ka ikwa ke le kaone kudu!”

¹⁷ Re thabela go fetša nako re na le bana babo rena le dikgaetšedi gomme re boledišana ka seo re ithutilego sona kopanong. Carol yo re boletšego ka yena pejana o re: “Ke ikwa ke le noši ge ke le kopanong.” Ke ka baka la’ng a ikwa ka tsela yeo? O re: “Le ge re na le bana babo rena le dikgaetšedi ba bantši, bontši bja bona ba dula le malapa a gabo bona. Ge ke ba bona ba dutše gotee ke ikwa ke lahlegile.” Ba bangwe go ba thata gore ba be gona dikopanong ka morago ga gore ba hlokofalelwe ke balekane ba bona. Na go na le motho yo o mo tsebago yoo a ikwago ka tsela yeo? Ge e ba go le bjalo, o ka mo kgopela gore a tle a dule le lapa la gago goba la geno kopanong.

18. Bakorinthe ba Bobedi 6:11-13 e ka re thuša bjang ge re nyaka go amogela ba bangwe?

¹⁸ Fetša nako le Bakristegotee le wena. Fetša  nako le bana babo rena le dikgaetšedi, kudukudu bao ba ikwago ba le noši. Re nyaka go bontšha batho ba bangwe gore re ba rata ka dipelo tša rena ka moka, kudukudu bao ba ikwago ba le noši. (Bala 2 Bakorinthe 6:11-13.) Melissa yoo re boletšego ka yena pejana o re: “Re be re thaba kudu ge bana babo rena le dikgaetšedi ba re mema go tla magaeng a bona goba go ya maeto le bona.” Na go na le yo mongwe ka phuthegong yoo o nyakago go mo mema?

19. Ke neng moo re ka fetšago nako re na le Bakristegotee le rena?

¹⁹ Go na le dinako tšeo Bakristegotee le rena ba ka thabelago go di fetša ba na le rena. Ka mohlala, go ka ba thata go Bakriste ba bangwe go fetša nako le ba gabo bona bao e sego Dihlatse tša Jehofa nakong ya matšatši a maikhutšo. Ba bangwe ba ka ikwa ba nyama kudu ge letšatši leo batho ba gabo bona ba hlokofetšego ka lona le fihla. Ge e ba re fetša nako le bana babo rena le dikgaetšedi bao ba nago le mathata a go swana le a, re tla be re bontšha gore re tloga re ba rata.—Bafil. 2:20.

20. Mantšu a Jesu ao a lego go Mateo 12:48-50 a ka re thuša bjang ge re ikwa re le noši?

²⁰ Go na le mabaka a mantši ao a ka dirago gore Mokriste a ikwe a le noši. Le gona re swanetše go dula re gopola gore Jehofa o tseba kamoo re ikwago ka gona. Gantši o diriša bana babo rena le dikgaetšedi go re thuša. (Bala Mateo 12:48-50.) Re ka bontšha gore re leboga seo Jehofa a re direlago sona ka go thekga Bakristegotee le rena. Go sa šetšwe tsela yeo re felago re ikwa ka yona, re swanetše go gopola gore Jehofa o tlo dula a na le rena e bile a ka se re tlogele.