NKHANI YAKUPFUNZA 23
Muli Lini Mwekha, Yahova Anamwe
‘Yahova ali pafupi na wentse omwe ambamucemera.’ —PSALYMO 145:18.
NYIMBO 28 Kukhala Xamwali wa Yahova
BZOMWE TIN’PFUNZA *
1. Thangwe ranyi atumiki wa Yahova nthawe zinango ambabzibva kuti ali okha?
NTHAWE zinango, tentsenefe timbabzibva kuti tiri tekha. Kuna wanthu winango makumbukidwe yamweya yambafulumiza kumala, tsono kuna winango yambamala lini mangu. Ndipo nthawe zinango ifepano tingabzibve kuti tiri tekha napo tikakhala tiri pakati pa wanthu azinji. Abale winango bzimbawanesa kucita uxamwali na wanthu winango m’gwere lipsa. Wanthu winango adacokera m’banja lomwe lina wanthu omwe ambacitira bzinthu pabodzi, tsono akafulukira ku dziko linango ambabzibva kuti ali kutali na adzinza wawo. Ndipo wanthu winango ambasuwa kuceza na wanthu omwe akhawafuna omwe adasaika. Ndipo Akristau winango, maka-maka wale omwe apfunza tsapanopa cadidi ca m’Bibliya, ambabzibva kuti ali okha pomwe wanthu wa m’banja mwawo ayai axamwali wawo omwe ni Mboni lini za Yahova akuwalamba ayai akuwaboneresa.
2. Kodi mu nkhani ino tin’tawira mibvunzo iponi?
2 Yahova ambadziwa ndipo ambabvesesa bzinthu bzentse bzomwe bzimbacitika pa moyo wathu. Tikabzibva kuti tiri tekha, iye ambadziwa momwe tikubvera ndipo ambafuna kutithandiza kumalisa makumbukidwe yamweya. Kodi Yahova ambatithandiza tani? Kodi ni bzinthu bziponi bzomwe ifepano tingacite kuti bzitithandize? Ndipo tingathandize tani winango m’gwere omwe akubzibva kuti ali okha? Mbatiwoneni mitawiro ya mibvunzoyi.
YAHOVA AMBACITA NAFE THUPO
Yahova adatuma anjo kuti akauze Eliya kuti akhali lini yekha (Onani ndime 3)
3. Kodi Yahova adalatiza tani kuti akhana thupo na Eliya?
3 Yahova ambafunisisa kuti wanthu wentse omwe ambamunamata akhale wakukondwa. Yahova ali pafupi na ali-wentse wa ifepano, ndipo iye ambawona tikakhala tasunama ayai tikakhala na thupo. (Psalymo 145:18, 19) Kumbukirani momwe Yahova adacitira thupo na mpolofeta Eliya na momwe adamuthandizira. Mwamuna wakukhulupirikayu adakhala mu nthawe yomwe bzinthu bzikhanesa pa moyo wa Ajirayeri. Wanthu wamphanvu mu Jirayeri omwe akhanamata lini Yahova, akhaboneresa wale omwe akhatumikira Yahova ndipo akhafuna kupha Eliya. (1 Wamambo 19:1, 2) Cinthu cinango comwe cikhaboneresa Eliya, yakhali makumbukidwe yakuti ndiye yekha mpolofeta wa Yahova omwe akhadasala na moyo. (1 Wamambo 19:10) Tenepo Mulungu adamuthandiza mwakamfulumize. Yahova adatuma anjo kuti akauze Eliya kuti akhali lini yekha. Anjoyo adauza Eliya kuti pakhana Ajirayeri azinji omwe akhatumikira Yahova mwakukhulupirika!—1 Wamambo 19:5, 18.
4. Kodi Marko 10:29, 30 ambalatiza tani kuti Yahova ambacita thupo na wale omwe wanthu wa m’banja mwawo ayai axamwali ambalamba kuwathandiza?
4 Yahova ambadziwa kuti ifepano tikasankhula kumutumikira, winango wa ifepano ambaluza bzinthu bzinango. Cibodzi mwa bzinthubzo, ndiko kusaya kuthandizidwa na wanthu wa m’banja mwathu ayai na axamwali wathu omwe ambatumikira lini Yahova. Mwa ciratizo, Pedru thangwe ra thupo, adabvunza Jezu kuti: ‘Onani! Ifepano tasiya bzinthu bzentse ndipo takutewerani, kodi ni phindu liponi lomwe tin’dzakhala nalo?’ (Mateu 19:27) Jezu adauza anyakupfunza wace mwakudeka mtima kuti gwere lingadadzakhala ninga wanthu wa m’banja mwawo. (Werengani Marko 10:29, 30. *) Ndipo Yahova Baba wathu wa kudzulu ambatiuza kuti an’dzathandiza wale omwe ambafuna kumutumikira. (Psalymo 9:10) Onani bzinthu bzinango bzomwe imwepo mungacite kuti Yahova akuthandizeni mukabzibva kuti muli mwekha.
BZOMWE MUNGACITE MUKABZIBVA KUTI MULI MWEKHA
5. Kodi ni phindu liponi lomwe limbabwera mukambakumbukira kuti Yahova ambakuthandizani?
5 Mbakumbukirani momwe Yahova ambakuthandizirani. (Psalymo 55:22) Bzimwebzi bzin’dzakuthandizani kuwona kuti muli lini mwekha. Mpfumakazi yomwe ikanati kulowodwa yakucemeredwa Carol, * yomwe adzinza wace ni Mboni lini, idalewa kuti: “Kukumbukira momwe Yahova adandithandizira kupirira mabvuto kumbandithandiza kubzibva kuti ndiri lini ndekha ndipo kumbanditsimikizira kuti Yahova nthawe zentse an’dzandithandiza.”
6. Kodi 1 Pedru 5:9, 10 angalimbikise tani wale omwe ambabzibva kuti ali okha?
6 Mbakumbukirani momwe Yahova akuthandizira abale na mpfumakazi omwe ambabzibva kuti ali okha. (Werengani 1 Pedru 5:9, 10. *) M’bale Hiroshi, omwe adamala magole mazinji ali yekha Mboni ya Yahova m’banja mwace, adalewa kuti: “M’gwere bzimbapusa kuwona kuti tentsenefe timbagumana na mabvuto. Tsono kudziwa kuti tikucita bzomwe tingakwanise kuti titumikire Yahova, kungalimbikise wale omwe m’banja mwawo ndiwo okha Mboni ya Yahova.”
7. Kodi mpembo umbakuthandizani tani?
7 Nthawe zentse mbapembani, mbawerengani Bibliya na kuyenda ku mitsonkhano. Bzimwebzi bzikuphatanidzambo kumbakhala wakutsudzuka kumufotokozera bwino-bwino Yahova momwe mukubvera. (1 Pedru 5:7) Mpfumakazi Massiel, idalewa kuti: “Cinthu cibodzi pa bzinthu bzakufunika kwene-kwene bzomwe bzidandithandiza kukunda makumbukidwe yakubzibva kuti ndiri ndekha, ndico kupemba kwa Yahova na mtima wentse.” Pomwe mpfumakaziyi idasankhula kutumikira Yahova, ikhabzibva kuti iri yokha thangwe rakuti adzinza wace ambatumikira lini Yahova. Iyo idadzalewa pomwe kuti: “Yahova akhali Pai wangu caiye ndipo ndikhapemba kwa iye nthawe zizinji ntsiku zentse na kumuuza momwe ndikhabvera.”
Kubva audiyo za nkhani za m’Bibliya na za mabukhu yathu kungathandize wale omwe ambabzibva kuti ali okha (Onani ndime 8) *
8. Kodi Kuwerenga Fala la Mulungu na kukumbukira bzomwe mwawerengabzo kumbakuthandizani tani?
8 Mbawerengani Bibliya ntsiku zentse ndipo mbakumbukirani nkhani zomwe zimbalatiza kuti Yahova ambakufunani. Mpfumakazi Bianca, yomwe idapirira mafala yakugobolesa m’mabondo yomwe yakhalewedwa na adzinza wace, idalewa kuti: “Kuwerenga na kukumbukira nkhani za m’Bibliya zakulewa bza atumiki wa Yahova omwe akhagumana na mabvuto ninga yangu kudandithandiza kwene-kwene.” Akristau winango ambakoya mu msolo bzinembo bzomwe bzimbawatsangalaza, ninga Psalymo 27:10 na Zaiya 41:10. Ndipo wanthu winango ambawona kuti kubva audiyo yakugravaridwi ya nkhani yakupfunza pomwe akukonzekera mitsonkhano ayai akuwerenga Bibliya, kumbawathandiza kucepesa makumbukidwe yakubzibva kuti ali okha.
9. Kodi kuyenda ku mitsonkhano kumbakuthandizani tani?
9 Citani ciri-centse comwe mungakwanise kuti mumbayende ku mitsonkhano kawiri-kawiri. Mitsonkhanoyo in’dzakulimbikisani ndipo mun’dzadziwanambo na abale na mpfumakazi zanu. (Wahebereu 10:24, 25) Massiel, omwe wafotokozedwa m’mbuyomu ule, adalewa kuti: “Napo kuti ndikhabva manyazi kwene-kwene, ndikhayenda basi ku mtsonkhano uli-wentse wa gwere ndipo ndikhapereka mtawiro. Bzimwebzi bzidandithandiza kubzibva kuti nimbacitambo mbali ya gwere.”
10. Thangwe ranyi mpsakufunika kucita uxamwali na Akristau wakukhulupirika?
10 Citani uxamwali na Akristau wakukhulupirika. Citani uxamwali na wanthu omwe angakupfunziseni bzinthu bzizinji napo akhale wale omwe mudasiyana nawo magole ayai cikhalidwe. Bibliya limbatikumbusa kuti pakati pa acikulire ‘pambagumanika nzeru.’ (Djobi 12:12) Acikulirembo angapfunze bzinthu bzizinji na maswaka yakukhulupirika. Davide akhali mng’ono kusiyana na Jonatani, tsono bzimwebzi bziribe kuphingiza kuti iwo akhale pa uxamwali bwakulimba. (1 Samuweri 18:1) Davide na Jonatani akhathandizana kutumikira Yahova napo kuti akhagumana na mabvuto. (1 Samuweri 23:16-18) Mpfumakazi Irina, yomwe ndiyo yokha Mboni ya Yahova m’banja mwace, idalewa kuti: “Abale na mpfumakazi zathu zacikristau angakhaledi ninga abereki wathu ayai abale wathu wa mimba ibodzi. Yahova angawaphatise basa kuti atipase bzomwe tikusaya.”
11. Kodi tingacite ciyani kuti tikhale pa uxamwali na wanthu winango?
11 Bziribe kupusa kukhala na axamwali apsa maka-maka bzikakhala kuti ndiwe munthu wa manyazi. Mpfumakazi Ratna, yomwe idapfunza cadidi napo kuti ikhaboneresedwa na wanthu winango, idalewa kuti: “Ndidawona kuti ndikhafunikira thandizo la abale na mpfumakazi zangu mu gwere.” Bzinganese kufotokozera munthu winango momwe mukubvera, tsono mukacita bzimwebzi munthuyo angakhale xamwali wanu wakuti ponda-ndipondembo. Axamwali wanu akufuna kukulimbikisani na kukuthandizani. Tsono kuti acite bzimwebzi, imwepo mun’funika kuwafotokozera momwe mukubvera.
12. Kodi utumiki bumbatithandiza tani kukhala na axamwali wabwino?
12 Njira ibodzi pa njira zabwino kwene-kwene zomwe zingatithandize kukhala pa uxamwali na wanthu winango, ni kupalizira na Akristau anzathu. Carol, omwe tamufotokoza kale ule, adalewa kuti: “Ndakhala na axamwali azinji wabwino mwa kupambula nthawe yakumbaceza na mpfumakazi mu utumiki na kumbacita nawo pabodzi mabasa ya Yahova. Ndipo papita magole mazinji Yahova akundithandiza mwakuphatisa basa axamwaliwa.” Nthawe zentse bzimbakhala bwino kwa ifepano kucita uxamwali na Akristau wakukhulupirika. Yahova ambaphatisa basa axamwaliwo kuti akulimbikiseni mukakhala mwagoboka m’mabondo, maka-maka mukabzibva kuti muli mwekha.—Mimwani 17:17.
THANDIZANI WINANGO KUTI AMBABZIBVE KUTI AKUCITA MBALI YA BANJA LATHU
13. Kodi wentse m’gwere ana udindo buponi?
13 Wentse m’gwere ana udindo bwa kuthandizira kuti gwerelo likhale mbuto ya mtendere yomwe palibe munthu ali-wentse omwe angabzibve kuti ali yekha. (Juwau 13:35) Bzomwe ifepano timbalewa na kucita bzingalimbikise kwene-kwene winango. Onani bzomwe mpfumakazi inango idalewa: “Pomwe ndidapfunza cadidi, gwere lidakhala banja langu. Bzingadakhala kuti abale na mpfumakazi alibe kundithandiza, inepano ningadakhala lini Mboni ya Yahova.” Kodi imwepo mungathandize tani wale omwe ali okha m’cadidi kuti abzibve kuti ambacita mbali ya gwere?
14. Kodi imwepo mungacite ciyani kuti mucite uxamwali na wanthu omwe mumbawadziwa lini?
14 Yezerani kucita uxamwali na wanthu omwe mumbawadziwa lini. Tingayambe kucita bzimwebzi mwa kumbatambira na manja mawiri wanthu omwe ni kuyamba kubwera m’gwere. (Waroma 15:7) Tsono tin’funika kucita bzizinji sikuti kundowamusa mwa ntsangala basi. Ifepano tikufuna kucita uxamwali bomwe na kupita kwa nthawe bungadzakhale bwakulimba. Tenepo, khalani wakudeka mtima ndipo latizani kuti mumbacita thupo na wanthu omwe mumbawadziwa lini. Mwakusaya kuwapasa mibvunzo yomwe ingawacitise manyazi, yezerani kubvesesa mabvuto yomwe iwo akugumana nayo. Winango bzingawanese kufotokoza momwe akubvera, tenepo lekani kuwangingimiza kuti akufotokozereni basi. Mwakusiyana na bzimwebzi, mwakudeka mtima, citani mibvunzo mwanzeru ndipo tetekerani mitawiro yawo mwakupirira. Mwa ciratizo, imwepo mungawabvunze kuti mudziwe kuti iwo adafika tani pakudziwa cadidi.
15. Kodi abale wakukhwima angathandize tani winango m’gwere?
15 Cikhulupiro ca ali-wentse m’gwere cimbalimba tikambalatiza kuti timbacitirana thupo, maka-maka akulu wa gwere na abale wakukhwima akambacita bzimwebzi. Melissa, omwe adakuzidwa acipfunzisidwa na mai wace adalewa kuti: “Nimbatenda kwene-kwene abale omwe akhali ninga pai kuna inepano magole mazinji. Iwo akhambapambula nthawe yakumbaceza nande na kulatiza kuti akhacita nande thupo. Pa nthawe iri-yentse yomwe ndikhafuna kulewalewa, pakhana munthu wakunditetekera.” Mulumbwana munango wakucemeredwa Mauricio akhabzibva kuti ali yekha thangwe rakuti mpfunzisi wace wa Bibliya adasiya cadidi. Iye adalewa kuti: “Akulu wa gwere adalatiza kuti akhacita nande thupo ndipo bzimwebzi bzidandithandiza kwene-kwene. Iwo akhaceza nande kawiri-kawiri, akhapalizira nande, kundifotokozera bzinthu bzomwe agumana pa pfunziro lawo la pa okha, na kumenya nande bola.” Tsapano Melissa na Mauricio akucita utumiki bwa nthawe zentse.
Kodi mu gwere mwanu muna munthu omwe angakomedwe mukapambula nthawe kuti muceze naye mwalufoyi? (Onani ndime 16-19) *
16-17. Kodi mpsiponi bzinthu bzinango bzomwe tingacite kuti tithandize winango?
16 Thandizani anzanu sikuti na mafala yokha. (Wagalata 6:10) M’bale Leo, omwe akutumikira ninga misiyonario ku dziko lomwe liri kutali na adzinza wace, adalewa kuti: “Kawiri-kawiri bzomwe munthu ambafuna n’kumucitira bzinthu mwakudeka mtima pomwe iye akufunikira bzimwebzo. Ndikukumbukira ntsiku inango pomwe ndidacita ngozi na karo. Pomwe ndidafika kumui ndikhabzibva lini bwino. Tsono banja libodzi lidandicemera kuti ndikadye nalo kumui kwawo. Ndikukumbukira lini bzomwe tidadya, koma ndikukumbukira kundidekera mtima komwe iwo adandilatiza. Ndipo kuphampha kwa macezayo ndidabzibva bwino kwene-kwene.”
17 Tensenefe timbakomedwa tikakhala pabodzi na abale winango ticimbaceza nawo bzomwe tabva pa mitsonkhano ya dera na pa mitsonkhano ya cigawo. Tsono Carol, omwe wafotokozedwa kale ule adalewa kuti: “Ndikakhala ndiri pa mitsonkhano ya dera na ya cigawo nimbabzibva lini bwino.” Thangwe ranyi? Iye adati: “Napo kuti nimbakhala ndiri pakati pa abale na mpfumakazi zizinji, kawiri-kawiri wentsenewo ambakhala ali pabodzi na adzinza wawo. Ndikawanyang’anisa nimbabzibva kuti ndiri ndekha.” Winango bzimbawanesa kuyenda ku mtsonkhano wa cigawo ayai wa dera bzikakhala kuti mwanzawo wa m’banja wasaika tsapanopa. Kodi imwepo mukudziwa munthu omwe akugumana na mabvuto ninga yamweya? Penu n’tenepo, mucemereni kuti mudzakhale naye pabodzi pa mtsonkhano omwe mun’dzakhala nawo kutsogolo.
18. Mwakubverana na 2 Wakolinto 6:11-13, kodi tingalatize tani mtima wakutambira alendo?
18 Mbapambulani nthawe kuti mumbaceze na wanthu winango. Mbapambulani nthawe kuti mumbaceze na abale na mpfumakazi zakusiyana-siyana, maka-maka wale omwe ambabzibva kuti ali okha. Ifepano tikufuna kufungula ‘kwene-kwene mitima [yathu],’ maka-maka kuna abale na mpfumakazi amwewa. (Werengani 2 Wakolinto 6:11-13. *) Melissa, omwe wafotokozedwa kale ule, adalewa pomwe kuti: “Bzikhali bzakutsangalaza pomwe axamwali akhaticemera kuti tikawazungire na kuyenda kukazunga nawo.” Kodi m’gwere mwanu muna munthu omwe mungamulatize kuti muna mtima wakutambira alendo?
19. Kodi ni nthawe iponi maka-maka yomwe tingafunike kumbaceza na Akristau anzathu?
19 Tikambapambula nthawe yakuti timbaceze na Akristau anzathu, iwo an’dzakomedwa kwene-kwene. Winango bzimbawanesa kukhala pabodzi na adzinza wawo pa nthawe yomwe adzinzawo akusekerera ntsiku za feriado. Winango angasuname kwene-kwene pa ntsiku yomwe adzinza wawo ambakumbukira ntsiku yomwe m’bale wawo adasaika. Tenepo, tikambapambula nthawe ya kumbaceza na abale na mpfumakazi omwe akugumana na mabvuto ninga yamweya, timbalatiza kuti timbacita nawo thupo.—Wafiripo 2:20.
20. Kodi mafala ya Jezu yomwe yali pa Mateu 12:48-50, yangatithandize tani tikabzibva kuti tiri tekha?
20 Pana mathangwe mazinji yomwe yangacitise Mkristau kubzibva kuti ali yekha. Napo bziri tenepo, tin’funika lini kuyebwa kuti Yahova ambabvesesa tikabzibva kuti tiri tekha. Iye ambatipasa bzomwe ifepano timbafunikira mwakuphatisa basa Akristau anzathu. (Werengani Mateu 12:48-50. *) Ndipo tikambacita nyongo kuti tithandize abale na mpfumakazi zathu ifepano timbalatiza Yahova kuti timbatenda thangwe ra kutipasa gwere. Bziribe basa momwe tingabvere, ifepano tiri lini tekha thangwe Yahova nthawe zentse ali kumbali yathu.
NYIMBO 46 Tinkukutendani Yahova
^ ndi. 5 Kodi imwepo nthawe zinango mumbabonera na makumbukidwe yakubzibva kuti muli mwekha? Penu bziri tenepo, dziwani kuti Yahova ambadziwa momwe mukubvera, ndipo akufuna kukuthandizani. Mu nkhani ino tiniwona bzomwe imwepo mungacite kuti mumalise makumbukidwe yakubzibva kuti muli mwekha. Ndipo tin’pfunzambo momwe mungalimbikisire abale na mpfumakazi, omwe ambabzibva kuti ali okha.
^ ndi. 4 Madzina yanango yacinjidwa.
^ ndi. 5 Marko 10:29 Jezu adati: “Cadidi ndikukuuzani kuti: Palibe munthu omwe adasiya nyumba ayai abale ayai mpfumakazi ayai mai ayai baba ayai wana ayai minda thangwe ra inepano na thangwe ra bzipsa bzabwino, 30 acisaya kutambira bzizinji kubwerezera maulendo dzana, mu nthawe ino, nyumba, abale, mpfumakazi, azimai, wana, minda, na mazunzo, ndipo mu nthawe yakutsogolo acidzatambira moyo wakusaya kumala.
^ ndi. 6 1 Pedru 5:9 Tsono imwe khalani wakulimba m’cikhulupiro ndipo mulimbane naye, pakudziwa kuti anzanu m’gulu lentse la abale, akugumanambo na madede ninga yamweya. 10 Tsono pambuyo pa kubonera mwa kanthawe, Mulungu wa kudeka mtima kwene-kwene, omwe adakucemerani kuti mudzakhale na mbiri pabodzi na Kristu, an’dzamaliza kukupfunzisani; ndipo iye an’dzakulimbikisani na kukupasani mphamvu.
^ ndi. 18 2 Wakolinto 6:11 Takhala ticilewalewa mwakusaya kubisa fala kuna imwe Wakolinto ndipo tina mtima wakufunguka. 12 Palibe comwe cingatitazise kukulatizani lufoyi, koma lufoyi lanu ndakucepa kuna ifepano. 13 Tenepo ninga mtawiro ndikulewalewa namwe ninga wana wangu, fungulanimbo kwene-kwene mitima yanu.
^ ndi. 20 Mateu 12:48 Pakutawira munthuyo, iye adabvunza kuti: “Kodi mai wangu mbani, ndipo abale wangu mbani?” 49 Iye adafuthula boko lace acilata anyakupfunza wace ndipo adalewa kuti: “Awa ndiwo mai wangu na abale wangu! 50 Thangwe ali-wentse omwe ambacita bzomwe Pai wangu wa kudzulu ambafuna, umweyo ndiye m’bale wangu, mpfumakazi yangu na mai wangu.”
^ ndi. 64 BZOMWE BZIKUCITIKA PA CITHUNZI-THUNZI: M’bale omwe adafedwa mkazace akugumana phindu mwa kubva audiyo za Bibliya na za nkhani yakupfunza.
^ ndi. 66 BZOMWE BZIKUCITIKA PA CITHUNZI-THUNZI: M’bale pabodzi na mwana wace wacikazi akuzungira m’bale wacikulire wa m’gwere mwawo ndipo akumulatiza kuti ambamufuna.
