1. Nongwa yafiki utubalilo tumo ababombi ba Yehova bikwipilika ukuti bali bene?

UTUBALILO tumo twebingi tukwipilika ukuti tuli twibene. Bamo batikukindilila ukwipilika ukuti bali bene, loli bamo pikwegha akabalilo akatali. Loli bamo ukwipilika ukuti bali bene kubaghile ukukindilila kwa kabalilo. Tubaghile ukwipilika ukuti tuli twibene nalinga ukuti tuli pabupipi na bandu. Bamo bikutamiwa ukuti babaghe abamanyani ku kipanga iki basamile. Bamo bakulile mu mbumba iyi babombelagha pampene ifindu loli babaghile ukwipilika ukuti bali bene linga bikwikala kubutali na ba mu mbumba yabo. Loli bamo bikwipilika ukuti bali bene panongwa yakuti bikutoliwa ukwangala nu mwinabo uwa mbweghi papo afwile. Kangi Abakristu aba bamanyile mwalululu ubwanaloli, babaghile ukwipilika ukuti bali bene linga aba mu mbumba nabamanyani babo bikubakana nu kubanyoza.

2. Ngimba malalusyo ghaliku agha tukuya pakwamula?

² Yehova ikumanya syosa isi tukwaghana nasyo. Linga tukwipilika ukuti tuli twibene, ikumanya muno tukwipilikila kangi ikulonda ukututula ukuti tulimbane naminong’ono agha. Ngimba Yehova ikututula bulebule? Ngimba tukulondiwa ukubomba isyafiki ukuti twitule twibene? Kangi ngimba tubaghile ukubatula bulebule abangi nkipanga kitu aba bikwipilika ukuti bali bene? Isagha tuyobesanie amaansala gha malalusyo agha.

3. Ngimba Yehova anangisye bulebule ukuti ampasikisyagha Eliya?

³ Yehova ikulonda ukuti ababombi bake bosa bayeghe balusekelo. Umwene alipipi na aliwesa wa uswe kangi ikumanya linga tusulumenie pamo tuwile amaka. (Sal. 145:18, 19) Inong’onela  muno Yehova anangisyile ukuti ampasikisyagha unsololi wake Eliya. Umundu unsubiliwa uyu, aliko nkabalilo aka ubumi bwali bwakutamya fiyo ku Baisraeli. Utubalilo twingi, ababombi ba Yehova bafwimiwagha kangi abalughu bamaka aba bansusyagha Kyala balondagha ukungogha Eliya. (1 Banyaf. 19:1, 2) Eliya abaghile ukuti atamiwagha fiyo naminong’ono panongwa yakuti asyele mwene unsololi uyu ambombelagha Yehova. (1 Banyaf. 19:10) Mwanakalinga, Kyala abombilepo simo ukuti antule Eliya. Yehova alintumile uwandumi ukuti akansimikisyile unsololi wake ukuti akaya mwene loli balimo Abaisraeli bingi aba bakindililagha ukumbombela Yehova mbusubiliwa.—1 Banyaf. 19:5, 18.

4. Ngimba pa Marko 10:29, 30 pikunangisya bulebule ukuti Yehova ikubapasikisya ababombi bake aba lumo batikutuliwa na binabo?

⁴ Yehova asimenye ukuti linga tusalile ukumbombela, bamo bikulondiwa ukwiyipa fiyo. Isi sibaghile ukupangisya ukuti aba mu mbumba na bamanyani bitu aba batikumbombela Yehova baleke ukututula. Panongwa yakuti apasyagha, akabalilo kamo untumiwa Peteri alindalusisye Yesu ukuti: “Keta uswe tufilekile fyosa tukukongile yuyuwe; potukukabagha fiki lelo?” (Mat. 19:27) Mwakisa Yesu abasimikisyile abafundiwa bake ukuti abakamu na balumbu bisakuyagha ba mu mbumba yabo ya mwambepo. (Belenga Marko 10:29, 30.) Kangi Yehova, Tata witu wakumwanya, afingile ukuti ikuya pakubatula bosa aba bikulonda ukumbombela. (Sal. 9:10) Inong’onela ifindu fimo ifyakulondiwa ifi mubaghile ukubomba ukuti mwambilile ubutuli bwa Yehova linga mukulimbana naminong’ono aghakwipilika ukuti muli mwibene.

5. Ngimba tukusayiwa bulebule linga tukwinong’onela muno Yehova ikututulila?

⁵ Mwinong’oneleghe muno Yehova ikubatulila. (Sal. 55:22) Isi sikuya pakubatula ukuketa ukuti mukaya mwibene. Umulumbu Carol, * uyu akaya pabweghi, kangi aba mu mbumba yake bakaya baketi atile: “Linga ngwinong’onela muno Yehova andulile ukwifimbilisya akabalilo ka ndamyo, sikundula ukuketa ukuti ngaya  nimwene. Kangi ndinulusubilo losa ukuti Yehova ikuya pakuya nanine akabalilo kosa.”

6. Ngimba pa 1 Peteri 5:9, 10 pikubakasya bulebule aba bikwipilika ukuti bali bene?

⁶ Mwinong’oneleghe muno Yehova ikubatulila Abakristu abininu aba bikwipilika ukuti bali bene. (Belenga 1 Peteri 5:9, 10.) Unkamu Hiroshi uyu kwa fyinja fingi ali Nketi mwene mu mbumba yabo atile: “Nkipanga, kupepe fiyo ukuketa ukuti aliwesa ikwaghana ni ndamyo. Tusimenye ukuti twesa tukughelaghela ukumbombela Yehova kangi isi sikutukasya uswe tuli twibene mbwanaloli.”

7. Ngimba ulwiputo lukubatula bulebule?

⁷ Akabalilo kosa muyeghe nimbatiko inunu iyakubomba ifindu ifya mwambepo. Isi sikongelelapo ukumbula Yehova muno mukwipilikila. (1 Pet. 5:7) Massiel atile, “Ikindu kimo ikyakulondiwa iki kindulile ukuti ningiketagha ukuti nili nimwene ko kwiputa kwa Yehova ukufuma pasi pandumbula.” Bo umulumbu uyu asalile ukumbombela Yehova, ipilikagha ukuti ali mwene panongwa yakuti aba mu mbumba yake bakambombelagha Yehova. “Niputagha kwa Yehova isiku lililyosa, akabalilo kosa kangi nambulagha muno nipilikilagha.”

8. Ngimba ukubelenga Amasyu gha Kyala nu kwinong’onelapo kukubatula bulebule?

⁸ Akabalilo kosa mubelengeghe Amasyu gha Kyala nu kwinong’onelapo inkhani isi sikunangisya ukuti Yehova abaghanile. Umulumbu Bianca, uyu ikwifimbilisya ku isi aba mu mbumba yake bikumbombela atile: “Ukubelenga nu kwinong’onelapo inkhani isya mu Baibolo ni nkhani isyakulingania isya bumi bwa babombi ba Yehova aba bope balifimbilisye indamyo isyakufwana na isi ngwaghana nasyo, kundulile fiyo.” Abakristu bamo bikusungila pandumbula amalemba aghakukasya bo Salimo 27:10 na Yesaya 41:10. Bamo bikupilikisya inkhani isyakujambula linga bikwitendekesya ingomano pamo bikubelenga Ibaibolo. Isi sikubatula ukuti bangipilikagha ukuti bali bene.

9. Ngimba ukufika pangomano kukubatula bulebule?

⁹ Utubalilo tosa mughelegheleghe ukufika pangomano. Mukuya pakukasiwa nipulogilamu iya pangomano kangi mukuya pakukasania na bakamu na balumbu. (Hib. 10:24, 25) Massiel, uyu tunjobile pabwandilo atile: “Nalinga ukuti nali wasoni loli naghelaghelagha ukwaghiwapo pangomano syosa isya kipanga nu kwamulapo. Isi syalindulile ukuti niye pabupipi na bakamu na balumbu.”

10. Nongwa yafiki kwakulondiwa ukuya pabumanyani bwamaka na Bakristu abasubiliwa?

¹⁰ Muyeghe pabumanyani ubwamaka na Bakristu abasubiliwa. Muyeghe na bamanyani nkipanga aba mubaghile ukumanyilako kumyabo nalinga ukuti mukindene ifyinja ninyiho. Ibaibolo likutukumbusya ukuti amahala “ghikwaghiwa  mu bandu abakusi.” (Jobu 12:12) Abandu abakusi bope babaghile ukumanyilako ku banini aba basubiliwa. Davidi ali nnini ukukinda Yonatani loli isi sikabapangisye ukuti baleke ukuya pabumanyani ubwamaka. (1 Samu. 18:1) Davidi na Yonatani batulanagha pakumbombela Yehova nalinga ukuti baghanagha ni ndamyo. (1 Samu. 23:16-18) Umulumbu Irina uyu Nketi mwene mu mbumba yabo atile, “Abakamu na balumbu bitu babaghile ukuya bapapi pamo ba mu mbumba yitu ya mwambepo. “Yehova abaghile ukubabombela abene ukuti batutuleghe.”

11. Ngimba mukulondiwa ukubomba isyafiki ukuti mukasyeghe ubumanyani bwinu?

¹¹ Ukuti mubaghe abamanyani abapya kukaya kupepe fiyofiyo linga muli basoni. Ratna umulumbu uyu ali nisoni uyu amanyile ubwanaloli nalinga ukuti asusiwagha atile, “Nalondiwagha ukwitikisya ukuti ngulondiwa ubutuli ukufuma ku bakamu na balumbu.” Kubaghile ukuya kukafu ukumbula umundu yumo muno kwipilikila loli linga mukuyobesania numundu uyu mubaghile ukuya pabumanyani ubwamaka. Abamanyani binu bikulonda ukubakasya nu kubatula loli mukulondiwa ukubabula ukuti babatule.

12. Ngimba imbombo iyakufumusya yikubatula bulebule ukuti mubaghe abamanyani abanunu?

¹² Injila yimo inunu iyakubagha abamanyani ko kufumusya pampene na Bakristu abinitu. Carol, uyu tunjobile pabwandilo atile: “Mbaghile abamanyani bingi abanunu mwakuya na kabalilo akakubombela pampene ubufumusi ni mbombo isingi isya Bunyafyale. Yehova andulile kwa fyinja fingi ukwendela mu bamanyani aba.” Ukuya pabumanyani ubwamaka na Bakristu abasubiliwa kwakulondiwa fiyo. Yehova ikubombela abamanyani aba ukuti batutule ukulimbana naminong’ono aghakwipilika ukuti tuli twibene.—Mbu. 17:17.

13. Ngimba budindo buliku ubu aliwesa nkipanga ali nabo?

¹³ Aliwesa nkipanga ali nubudindo ubwakunangisya ulughano nu lutengano ukuti angayangapo uwakwipilika ukuti ali mwene. (Yoh. 13:35) Isi tukubomba nu kuyoba sibaghile ukubakasya fiyo abangi. Keta isi umulumbu yumo ayobile. Umwene atile: “Bo mmanyile ubwanaloli, abakamu na balumbu bali bafwanagha ba mu mbumba yangu. Ngabaghile ukuya yumo wa Baketi ba Yehova kisita butuli bwabo.” Ngimba mukulondiwa ukubomba isyafiki ukuti mubatule aba bali bene mbwanaloli ukuti bipilikeghe ukuti mubaghanile fiyo?

14. Ngimba mubaghile ukubomba isyafiki ukuti muye pabumanyani na bapya?

¹⁴ Mughelegheleghe ukuya pabumanyani ubwa maka na bapya. Tubaghile ukubomba isi mwakubambilila mwalughano linga bisile ku ngomano. (Rom. 15:7) Loli tukulondiwa ukubomba nyingi ukukinda ukubaponia itolo. Tukulondiwa ukuya nabo pabumanyani ubwamaka akabalilo kosa. Yonongwa yake tukulondiwa ukuya bakisa nu kunangisya ukuti tukubapasikisya abapya. Komma ukubalalusya amalalusyo agha ghabaghile ukubakosya isoni. M’malo mwake mughelegheleghe ukupilikisya indamyo isi bikwaghana nasyo. Bamo kubaghile ukuya kukafu ukubabula muno bikwipilikila. Yonongwa yake mutikulondiwa ukubafimbilisya ukuti bayobe. M’malo mwake, mubapilikisyeghe mwakisa mwakubalalusya amalalusyo mwamahala nu kupilikisya mbololo linga bikwamula. Mwakifwanikisyo, mubaghile ukubalalusya muno babumanyile ubwanaloli.

15. Ngimba Abakristu abakusi mwambepo babaghile ukubatula bulebule abangi nkipanga?

¹⁵ Bosa nkipanga bikuya pakukindilila ukukula mwambepo linga Abakristu aba bali  nulwitiko ulwamaka, fiyofiyo abakulumba bakipanga bikubapasikisya abangi. Melissa aleliwe na mama wake mwene kangi mama wake ali mbwanaloli. Umwene atile: “Ngubandaghisya fiyo abakamu aba bikufwana batata bangu, aba bayagha nakabalilo akakundula nu kumbasikisya kwa fyinja fingi. Linga ngulonda ukuyoba simo, alipo umundu yumo uyu ambilikisyagha.” Unkamu uwakilumyana uyu ingamu yake yo Mauricio iketagha ukuti ali mwene bo uyu amanyilagha nawe Ibaibolo alekile ubwanaloli. Umwene atile: “Abakulumba ba kipanga bambasikisyagha kangi bandulagha fiyo. Akabalilo kosa bayobesaniagha nanine. Babukagha nanine mubufumusi, bambulagha ifundo isi bamanyile pakumanyila kwabo kwa pabene kangi bakomagha nanine ibola.” Melissa na Mauricio bosa bikumbombela Yehova mububombeli ubwa padela.

16-17. Ngimba mo munjila siliku inunu isi tubaghile ukubatula abangi?

¹⁶ Mubatuleghe munjila inunu. (Gal. 6:10) Leo uyu ikubomba ubumishonale ku kisu ikyakubutali na ba mu mbumba yake atile, “Utubalilo twingi mukulondiwa ukubomba ifindu fimo mwakisa pakabalilo akanunu. Ngukumbuka akabalilo kamo aka napangile ingozi ya galimoto. Bo mfikile pakaya, natamiwe fiyo naminong’ono. Loli imbumba yimo yalingolile ku kaya kabo ukuti ngalye nabo ifyakulya. Ndikukumbuka ifi twalile loli ngukumbuka ukuti balimbilikisye mwakisa. Ukufuma apo, nalyandile ukwipilika kanunu.”

¹⁷ Twesa tukuhoboka ukuya pampene na Baketi abinitu nu kuyobesania inkhani isya mu Baibolo isi tupilikisye palukomano. Loli Carol, uyu tunjobile pabwandilo atile, “Linga ndi palukomano ngwipilika ukuti ndinimwene.” Nongwa yafiki? Umwene atile, “Nalinga ukuti nguya pabupipi na bakamu na balumbu bingi, loli utubalilo twingi bikuya nimbumba syabo. Linga ngubabona, ngwipilika ukuti ndinimwene.” Bamo kukuya kukafu ukwaghiwapo palukomano akakwanda linga umwinabo uwa mbweghi afwile. Ngimba mummenye yumo uyu ikwaghana ni ndamyo bo isi? Mubaghile ukunkolela ukuti musaye nawe pa findu fimo ifya mwambepo pa mbumba yinu.

18. Ngimba tubaghile ukukonga bulebule ubulongosi bwa pa 2 Bakorinti 6:11-13 linga tukulonda ukubakolela abangi ku nyumba yitu?

 ¹⁸ Muyeghe na kabalilo akakwangala pampene. Mughelegheleghe ukwangala na bakamu na balumbu abakukindanakindana, fiyofiyo aba bikwipilika ukuti bali bene. Tukulondiwa “ukwighula indumbula syitu,” ku bandu aba bikwipilika ukuti bali bene. (Belenga 2 Bakorinti 6:11-13.) Melissa, uyu tunjobile pabwandilo ikukumbuka ukuti, “Utubalilo tosa nahobokagha linga abakamu na balumbu bangolile ku nyumba syabo ukuti tukangale nimbumba syabo pamo ukubuka nabo ku malo ghamo. Ngimba alimo yumo nkipanga kyinu uyu mubaghile ukunkolela ku nyumba yinu?

19. Ngimba kabalilo kaliku aka kubaghile ukuya kwakutula linga tukwangala na Bakristu abinitu?

¹⁹ Abakristu abinitu babaghile ukundaghisya fiyo linga tukuya nakabalilo akakwangala nabo. Bamo kubaghile ukuya kukafu ukuya pabupipi na ba mu mbumba yabo aba bakaya Baketi ba Yehova pakabalilo ka maholide. Bamo babaghile ukusulumania linga isiku ili ungani wabo afwile lifikile. Linga tukuya nakabalilo akakwangala na bakamu na balumbu aba bikwaghana nindamyo bo isi, tukunangisya ukuti “tukubinong’onela bununu.”—Filip. 2:20.

20. Ngimba amasyu gha Yesu agha ghali pa Matai 12:48-50 ghabaghile ukututula bulebule linga tukwipilika ukuti tuli twibene?

²⁰ Filipo ififukwa fingi ifi Abakristu babaghile ukwipilika ukuti bali bene. Loli tungibwagha ukuti Yehova ikumanya syosa isi tukwaghana nasyo. Utubalilo tosa, umwene ikutupa ifi tukulondiwa ukwendela mu Bakristu abinitu. (Belenga Matai 12:48-50.) Tukunangisya ukuti tukundaghisya kwa Yehova panongwa ya lubatiko lwake ulwa lughano linga tukughelaghela ukubatula abakamu na balumbu bitu. Kisita kwinong’onela muno tukwipilikila, loli tukaya twibene panongwa yakuti akabalilo kosa Yehova ikuya pakuya nanuswe.