1. Mukunda natshi matangua ako akombeledi a Yehowa ako ana gudivua hakhawo?

MATANGUA ako mukut’etu agasue tuana gudivua hakhetu. Athu ako matangi a luholo elu ana guazula ndo masugu avula. Uvi athu ako ana gushipha nu matangi a luholo elu. Tuajiya gudivua hakhetu ikhale tudi mukatshi dia athu. Yana khala lamba gudi athu ako ha gujidila mu hungu dihe-dihe. Athu ako ana gudizumba muavula nu enya fami yawo, hene gila aya gualeha ana gudivua hakhawo. Uvi athu ako ana gudivua hakhawo gula afuisa muthu ana guzumba muavula. Aphangi ako akatuga gubatijiwa ana gudivua hakhawo, tangua enya fami jiawo nga mafuta awo anyi ashigo Matemue a Yehowa ana guasagesa nga guatuna.

2. Tuza muheta mvutu gu mihu itshi?

² Yehowa wana jiya nu wana kotelesa ndaga jiagasue jiatutadila. Tangua tuana gudivua hakhetu, muene wana jiya nu wana tshigina gutukuatesa ha gubinga matangi ene. Luholo lutshi Yehowa wana gutukuatesa? Luholo lutshi tuajiya gudikuatesa? Luholo lutshi tuajiya gukuatesa aphangi ako mu hungu anyi adi gudivua hakhawo? Tuza muheta mvutu jia mihu eyi mu longo edi.

3. Luholo lutshi Yehowa wamonesele egi wadihagele ha fundo dia Eliya?

³ Yehowa wana tshigina egi akombeledi’enji agasue akhale nu gusuanguluga. Wana khala hehi nu muthu wagasue mukatshi dietu. Muene wana gujiya tangua tuana gudisagesa nga gula tualeba muila. (Ngi. 145:18, 19) Tutadilenu luholo Yehowa  wadihagele ha fundo dia profete Eliya nu luholo gamukuatesele. Profete owu wa gujinginyina wajingile mu sungi ya lamba gu Isalele. Akombeledi a Yehowa akhalele musagesewa muavula. Mbalagaji jia Nzambi jiakhalele mukamba gushiya Eliya. (1 Maf. 19:1, 2) Hene, Eliya walebele diago muila handaga watangijile egi phamba muene profete mumoshi wasala ha gukombelela Yehowa. (1 Maf. 19:10) Nzambi wamukuatesele mu tangua diene. Watumile muanjelo wenji ha guwambela profete Eliya egi ashigo hakhenji, uvi gudi nji nu enya Isalele avula ana guvuila Nzambi woma.—1 Maf. 19:5, 18.

4. Ha gutadila Mako 10:29, 30, luholo lutshi Yehowa ana gukuatesa akombeledi’enji anyi ana tunyiwa gudi enya fami jiawo nga gudi mafut’awo?

⁴ Yehowa wana jiya egi tangua tuana tomba ha gumukombelela, athu ako mukatshi dietu ajiya gutagana nu malamba avula. Enya fami yetu nga mafut’etu anyi ashigo Matemue a Yehowa ajiya gutuna gutukuatesa. Yajiya gukhala egi Phetelo wakhalele gudisagesa hene wahudile Yesu egi: ‘Tuabembelele ima yagasue ha gugulandula; na itshi mbatuheta?’ (Mat. 19:27) Yesu wawambelele alandudi’enji nu gisemo giagasue egi, mbamuheta fami yakoma ya mu nyuma. (Tanga Mako 10:29, 30.) Yehowa Fumu wa fami yetu ya mu nyuma walayele egi, mbawukuatesa athu agasue adi mutshigina gumukombelela. (Ngi. 9:10) Tutadilenu ndaga wajiya gukalagala ha guheta ukuateshi wa Yehewa gula udi gudivua hakhaye.

5. Mukunda natshi idi ndaga yabonga ha gutangigiza luholo Yehowa wana gutukuatesa?

⁵ Khala mutangiza luholo Yehowa wana gutukuatesa. (Ngi. 55:22) Gutshita ngenyi mbagugukuatesa ha gukhala nu matangi abonga gula watagana nu lamba. Phangi wa mukhetu Carol, * khenji azudiwego mu ulo. Enya fami yenji ashigo Matemue a Yehowa. Udi muzuela egi: “Gula ngatangigiza luholo Yehowa wangukuatesele mu malamba ami, yana gungutuma ha gumona egi ngushigo hakhami. Yana gungukuatesa nji ha gusha mutshima egi Yehowa mbashigo gungubemba mu masugu adi muza.”

6. Luholo lutshi 1 Phetelo 5:9, 10 yajiya gukuatesa athu anyi adi mutangiza egi adi hakhawo?

 ⁶ Tangigiza luholo Yehowa wana kuatesa aphangi’etu Aklisto anyi ana gudivua hakhawo. (Tanga 1 Phetelo 5:9, 10.) Phangi Hiroshi muene hakhenji wakhalele Temue wa Yehowa mu fami yawo ivo yavula. Udi muzuela egi: “Ngakotelesele egi aphangi agasue mu hungu ana tagana nu malamba. Gujiya egi mukut’etu agasue tuana tshita ngolo ha gukombelela Yehowa guajiya gukuatesa aphangi anyi enya fami jiawo ashigo Matemue a Yehowa.”

7. Luholo lutshi gisambu giajiya gugukuatesa?

⁷ Khala mukalagala ndaga jia mu nyuma tangua diagasue. Udi naye guwambela Yehowa mu gisambu luholo udi gudivua. (1 Phet. 5:7) Phangi Massiel udi muvuala mumoshi wa mukhetu, wakhalele gudivua hakhenji hajiyile muene giamatshidia. Udi muzuela egi: “Gutoga Yehowa tangua diagasue mu gisambu guangukuatesele ha gubinga matangi’ene. Yehowa wakhalele diago Tata mukunda nu ame. Ngakhalele gumusamba lusugu nu lusugu. Matangua avula ngakhalele gumuwambela luholo ngakhalele gudivua.”

8. Luholo lutshi gutanga Biblia nu gutangigiza ndaga jiene guajiya gugukuatesa?

⁸ Khala mutanga Biblia lusugu nu lusugu. Khala nji mutangigiza mene jia mu Biblia jidi mumonesa egi Yehowa wana guguzumba. Phangi wa mukhetu Bianca, walebele muila mukunda nu ndaga jianazuela enya fami yenji. Udi muzuela egi: “Gutanga nu gutangigiza mene jia akombeledi a Yehowa jidi mu Biblia anyi atagenele nu malamba a luholo lumoshi nu ame guana gungukuatesa muavula.” Aphangi ako ana kuata mu muto verse jiana hana gikhesa gifua Ngimbo 27:10 nu Yeshaya 41:10. Ako ana mona egi gutegelela ba enregistrement audio a mikanda tuana longuga guana guakuatesa ha gutuna gudivua hakhawo tangua ana gulondega gudibungisa gua mu hungu nga tangua ana tanga Biblia.

9. Luholo lutshi guya mu gudibungisa gua mu hungu guajiya gugukuatesa?

⁹ Khala mutshita yagasue ha guya mu gudibungisa gua mu hungu phoso nu phoso. Mbawusuanguluga nu programe jiana hana gikhesa nu mbawujiya aphangi a mala nu a akhetu. (Heb. 10:24, 25) Phangi Massiel tuazuelela guthunda udi muzuela egi: “Ngatshima ngakhalele muenya sonyi, ngazudile desizio dia guya mu gudibungisa gua mu hungu phoso nu phoso nu guhana ba komantere. Gutshita ngenyi guangukuatesele ha gukhala nu ufuta wakola nu aphangi.”

10. Mukunda natshi idi nu ndando ha gukuata ufuta nu aphangi’etu a mu hungu?

¹⁰ Kuata ufuta nu aphangi a mu hungu. Kamba  gukuata ufuta nu aphangi a mu hungu anyi wajiya gulonguga ndaga jiavula gudi ene, ngatshima ashigo gindongo gimoshi nu aye nga akatugile mu ifutshi iko. Biblia idi muzuela egi, gutema guana khala ‘gudi athu a gukula.’ (Yobo 12:12) Athu a gukula ajiya gulonguga nji ndaga jiavula gudi mavuala mu hungu. Davidi wakhalele galenge gutuama dia Yonatana, uvi yaakangelego njila ha gukhala nu ufuta wakola. (1 Sam. 18:1) Davidi nu Yonatana adikuatesele ha gukombelela Yehowa ngatshima atagenele nu malamba akola. (1 Sam. 23:16-18) Phangi wa mukhetu Irina udi Temue wa Yehowa hakhenji mu fami yawo. Udi muzuela egi: “Aphangi a mala nu a akhetu ajiya diago gubua mvuaji jietu jia mu nyuma nga enya fami yetu. Yehowa wajiya guakadigila ha gutukuatesa.”

11. Itshi udi naye gutshita ha gukolesa ufuta waye nu aphangi?

¹¹ Gukuata mafuta ahe-ahe guakhalago ndaga yaleba gula wana khala muenya sonyi. Phangi Ratna wana khala muenya sonyi, walongugile giamatshidia ngatshima wataganele nu usageshi. Udi muzuela egi: “Ngakhalele mujiya egi ngudi nu funu ya ukuateshi gudi aphangi a mu hungu.” Yajiya gukhala lamba ha guwambela muthu muko luholo udi gudivua, uvi gila wamuwambela, mbamubua diago mafuta akola nu muthu muene. Mafut’aye mbaaguhana gikhesa nu mbaagukuatesa gila wawambela luholo udi gudivua.

12. Luholo lutshi mudimo wa gulongesa wajiya gugukuatesa ha guheta mafuta abonga?

¹² Luholo luabonga lua gukuata mafuta ludi, guya mu mudimo wa gulongesa nu aphangi’etu Aklisto. Phangi Carol tuazuelela guthunda udi muzuela egi: “Ngahetele mafuta avula abonga luholo ngana balegesa tangua hamoshi nu aphangi a akhetu mu mudimo wa gulongesa nga mu ndaga jiko jia mu nyuma. Yehowa wakalegele mafuta ene ha gungukuatesa ivo yavula.” Gukuata ufuta nu aphangi Aklisto a gujinginyina gudi diago ndaga yawaha. Yehowa wana kalegela mafuta ene ha gugukuatesa gula udi nu gikenene nga gula udi gudivua hakhaye.—Ish. 17:17.

13. Ginemo gitshi muthu wagasue mu hungu gadi nagio?

¹³ Aphangi agasue a mu hungu ana khala nu ginemo gia gukuatesa hungu ha gukhala mu guhuima nu gudizumba hagula nga muthu mumoshi gadivuigo hakhenji. (Yone 13:35) Ndaga tuana kalagala nu tuana zuela jiajiya guhana athu ako gikhesa. Phangi mumoshi wa mukhetu udi muzuela egi: “Tangua ngalongugile giamatshidia, aphangi a mu hungu abuile gifua enya fami yami. Angukuatesele ha gubua Temue wa Yehowa.” Itshi wajiya gutshita ha gukuatesa aphangi anyi enya fami jiawo ashigo mu giamatshidia ha gudivua egi adi mukatshi dia fami yetu ya mu nyuma?

14. Ndaga itshi wajiya gukalagala ha gukuata ufuta nu athu ahe-ahe?

¹⁴ Kamba gukuata ufuta nu aphangi ahe-ahe. Tuajiya gusendesa guyamba athu ahe-ahe adi muza mu hungu nu gisemo giagasue. (Lomo 15:7) Uvi, tushigo naye gusuga phamba ha guayamba. Tudi naye gukolesa ufuta wetu nawo tangua diagasue. Khala guamonesela gisemo nu gumonesa egi wana guazumba. Ha fundo dia guahula mihu yajiya guahana musonyi, kamba gujiya malamba adi mutagana nawo. Yajiya gukhala lamba gudi athu ako ha guguwambela luholo adi gudivua. Hene, washinjigago ha guzuela. Uvi nu gisemo giagasue, ahule mihu nu gutema. Gungima, nengenena mvutu jiawo nu guhuiminyina guagasue. Ha gufezegesa, wajiya guahula luholo ajiyile giamatshidia.

15. Luholo lutshi aphangi a gukula mu nyuma ajiya gukuatesa aphangi ako mu hungu?

 ¹⁵ Athu agasue mu hungu ajiya gukolesa gutshigina guawo gula aphangi a gukula mu nyuma nu akulu adi gudisagesa mukunda nu ene. Phangi Melissa, wakudile mu giamatshidia handaga mama wenji wakhalele Temue wa Yehowa. Udi muzuela egi: “Ngana suanguluga muavula luholo aphangi a mu hungu ana gukhala gifua a tata ami. Ana balegesa tangua nu ame nu ana gudisagesa mukunda nu ame. Ngana khala tangua diagasue nu muthu wajiya gungutegelela tangua ngudi mutshigina gumuwamela ndaga.” Phangi Mauricio wadivuile hakhenji tangua muthu wamulongesele Biblia wazolewe mu hungu. Udi muzuela egi: “Akulu angukuatesele diago muavula. Tuakhalele muta nawo maga tangua diagasue. Tuakhalele muya nawo mu mudimo wa gulongesa, akhalele gunguwambela matangi a ndando akhalele muheta mu gulonguga guawo gua Biblia. Tuakhalele nji mutshita nawo saga jia gudikenesa.” Mangino phangi Melissa nu phangi Mauricio adi mu mudimo wa tangua diagasue.

16-17. Mu maluholo atshi tuajiya gukuatesa athu ako?

¹⁶ Khala mukuatesa athu ako. (Gal. 6:10) Phangi Leo udi misionere gualeha nu enya fami yenji. Udi muzuela egi: “Muthu wagasue wana khala nu funu ya ukuateshi mu tangua diatagana. Ngudi muwunguluga luko tangua ngatshitshile aksida. Ngadisagesele muavula tangua ngavutugile gu inzo. Uvi phangi mumoshi wa yala nu mukaji’enji angutamegele gumbo diawo ha gudia nawo. Ngushigo muwunguluga luko ima tuadile uvi ngudi mujiya egi angutegelele nu gisemo giagasue gungima ngadivuile kiawaha.”

¹⁷ Mukut’etu agasue tuana suanguluga nu ndaga jia mu nyuma gifua ba asamble, handaga tuana balegesa tangua nu athu ako ha guzuelela ndaga jiabonga tualonguga. Uvi phangi Carol tuazuelela guthunda udi muzuela egi: “Ngana gudivua diago hakhami gu ba asamble.” Mukunda natshi? Udi muzuela egi: “Ngatshima ngana khala mukatshi dia aphangi avula a mala nu a akhetu, uvi aphangi ene ana khala fundo dimoshi nu fami jiawo. Tangua ngana guamona ngana gudivua diago hakhami.” Yana khala lamba gudi athu ako  ha guya gu asamble gungima dia gufuisa mulumi’enji nga mukaji’enji. Udi mujiya muthu mumoshi udi mutagana nu malamba a luholo elu ba? Wajiya gumutamega gumbodi’aye ha gukalagala nenji hamoshi ndaga jia mu nyuma nu fami yaye.

18. Luholo lutshi tuajiya gukalegela 2 Kolinto 6:11-13 tangua tudi mumonesa khadilo dia guyamba?

¹⁸ Khalenu mubalegesa tangua hamoshi. Khala mutamega aphangi a gudisha ha gubalegesa nawo tangua hamoshi. Uvi khala mutamega muavula gubalega aphangi anyi adi gudivua hakhawo. Tudi naye ‘gukangula mitshima [yetu]’ ha guzuela nu athu a luholo elu. (Tanga 2 Kolinto 6:11-13.) Phangi Melissa tuazuelela guthunda udi muzuela luko egi: “Tuakhalele musuanguluga muavula tangua aphangi akhalele gututamega gu jinzo jiawo ha gubalegesa nawo tangua hamoshi.” Gudi nu phangi mumoshi mu hungu dienu yonu wajiya gumonesela khadilo dia guyamba ba?

19. Mu ba okazio atshi gubalegesa tangua hamoshi nu aphangi Aklisto guajiya gukhala nu ndando?

¹⁹ Gutamega aphangi Aklisto ha gubalegesa nawo tangua hamoshi guana khala nu ndando. Yajiya gukhala lamba gudi aphangi ako ha gubalegesa tangua hamoshi nu enya fami jiawo anyi ashigo Matemue a Yehowa tangua adi mukalagala mawano awo. Ako ajiya gudisagesa muavula tangua enya fami jiawo ana kalagala mawano a guwunguluga athu afuile gale anyi akhalele muzumba. Hene, tangua tuana tamega aphangi anyi ana tagana nu malamba a luholo elu ha gubalegesa nawo tangua hamoshi, tuana guamonesa egi ‘tuana gudisagesa muavula mukunda nu ene.’—Fili. 2:20.

20. Luholo lutshi mbimbi jia Yesu jidi mu Matayo 12:48-50 jiajiya gutukuatesa tangua tudi gudivua hakhetu?

²⁰ Gudi nu ndaga jiavula jiajiya gutshita egi Muklisto adivue hakhenji. Uvi, tushigo naye gujimbila egi Yehowa wana jiya luholo tuana gudivua. Wana kalegela aphangi’etu Aklisto ha gutukuatesa. (Tanga Matayo 12:48-50.) Tuana monesa egi tuana suanguluga nu ndaga Yehowa wana kalagala, tangua tuana tshita yagasue ha gukuatesa aphangi’etu Aklisto. Ikhale lamba ditshi tudi mutagana nadio, tujimbilago egi tushigo hakhetu handaga Yehowa wana khala nu esue tangua diagasue.