1. Why nao samfala brata and sista savve lonely?

STAKA lo iumi savve feel lonely samfala taem. Samfala savve lusim datfala feeling for lonely, and olketa narawan maet nomoa. Staka reason stap why iumi savve lonely. Olsem example, hem no isi for samfala garem olketa niu fren taem olketa joinim nara kongregeson. Olketa narawan savve feel lonely taem olketa muv go lo nara ples bikos olketa misstim tumas famili blo olketa. Samfala narawan barava lonely bihaen hasband or waef dae. And samfala brata and sista wea just kam insaed lo truth savve lonely taem samfala lo famili and olketa fren againstim olketa.

2. Olketa wanem kwestin nao bae iumi ansarem lo disfala study?

² Jehovah hem savve gud lo iumi. Hem luksavve taem iumi lonely and hem laek for helpem iumi. Hao nao hem duim datwan? Wanem nao iumi savve duim taem iumi lonely? And hao nao iumi savve helpem olketa brata and sista wea lonely? Bae iumi ansarem thrifala kwestin hia.

3. Wanem nao Jehovah duim wea showimaot hem tingim Elijah?

³ Jehovah laekem iumi wea worshipim hem for hapi. Hem luksavve taem iumi sorre or wikdaon and hem  barava laek for helpem iumi. (Sams 145:18, 19) Tingim hao Jehovah helpem profet Elijah. Elijah stap lo taem wea pipol persecutim olketa Israelite from olketa worshipim Jehovah. And tu, king and queen barava laek for killim dae Elijah. (Fas Kings 19:1, 2) Elijah feel wikdaon bikos evri nara profet dae finis, and hem tingse hemseleva nomoa worshipim Jehovah. (Fas Kings 19:10) God lukim datwan and duim samting for helpem Elijah. Hem sendem wanfala angel for talem Elijah staka Israelite gohed faithful for worshipim Jehovah, and no hemseleva nomoa!—Fas Kings 19:5, 18.

4. Hao nao Mark 10:29, 30 showimaot Jehovah tingim olketa wea famili or fren les lo olketa?

⁴ Jehovah luksavve taem iumi disaed for kamap Christian bae iumi deal witim samfala hard samting. Olsem example, maet samfala lo famili or olketa fren les lo iumi. Luk olsem Peter warim kaen samting olsem from hem sei lo Jesus: “Bat waswe long mifala? Mifala lusim evri samting and followim iu.” (Matt. 19:27) Jesus encouragem olketa disaepol taem hem sei olketa bae garem wanfala big spiritual famili. (Readim Mark 10:29, 30.) Dadi blo iumi Jehovah promis for helpem iumi. (Sams 9:10) Bae iumi storyim samfala samting wea iumi savve duim for kasem help from Jehovah taem iumi lonely.

5. Why nao hem gud for tingim hao Jehovah helpem iu?

⁵ Tingim hao Jehovah helpem iu. (Sams 55:22) Datwan bae helpem iu for luksavve Jehovah hem stap witim iu. Carol, * wanfala singol sista wea no garem famili lo truth sei: “Mi savve ting go bak lo olketa taem wea Jehovah helpem mi lo olketa hard samting wea mi kasem. Datwan helpem mi for no tingse mi stap seleva and for sure Jehovah bae gohed for sapotim mi.”

6. Hao nao toktok lo 1 Peter 5:9, 10 savve encouragem olketa wea lonely?

 ⁶ Tingim hao Jehovah gohed helpem olketa brata and sista wea lonely. (Readim 1 Peter 5:9, 10.) Hiroshi, wanfala brata wea hemseleva nomoa insaed lo truth for longfala taem sei: “Mi luksavve evriwan lo kongregeson kasem hard samting. Nomata olsem, olketa gohed for worshipim Jehovah. Datwan encouragem mi for no givap nomata no eni relative blo mi lo truth.”

7. Hao nao prea savve helpem iu?

⁷ Gohed for prea, readim Bible, and attendim meeting. Hem important for prea lo Jehovah. (1 Pet. 5:7) Wanfala young sista Massiel wea niu lo truth savve lonely bikos no eniwan lo famili insaed truth. Hem sei: “Wanfala samting wea barava helpem mi taem mi lonely hem for talem feeling blo mi lo Jehovah. Hem kamap olsem Dadi blo mi, and staka taem lo day mi savve storyim feeling blo mi lo hem.”

8. Taem iu readim Bible and ting raonem, hao nao datwan helpem iu?

⁸ Readim Bible evriday and ting raonem story wea savve helpem iu luksavve Jehovah lovem iu. Bianca, sista wea famili blo hem tok spoelem hem bikos hem wanfala Witness sei: “Samting wea helpem mi hem for readim and ting raonem samfala story lo Bible and laef story blo olketa brata and sista wea kasem semkaen samting olsem mi.” Samfala Christian baeheartim scripture wea comfortim olketa, olsem Sams 27:10 and Aesaea 41:10. Olketa narawan lisin lo audio recording blo Watchtower, Meeting Book, or Bible reading taem olketa prepare for meeting. Datwan mekem olketa for no feel lonely tumas.

9. Hao nao olketa meeting savve helpem iu?

⁹ Traem best for attendim evri meeting bikos datwan bae encouragem iu and bae helpem iu for savve gud lo olketa brata and sista. (Heb. 10:24, 25) Massiel, wea iumi storyim finis sei: “Nomata mi savve shame tumas, mi disaed for attendim evri meeting and for evritaem givim koment. Datwan helpem mi for fren gud witim olketa lo kongregeson.”

10. Why nao hem important for garem olketa gudfala fren lo kongregeson?

¹⁰ Chusim olketa gudfala fren lo kongregeson. Garem olketa fren wea savve encouragem iu, nomata olketa wanem age or culture. Hem gud for olketa young wan fren witim olketa olo wea “waes.” (Job 12:12) And olketa olo savve lanem  samting tu from olketa young wan wea gohed faithful. David hem barava young winim Jonathan bat tufala barava fren gud. (Fas Samuel 18:1) Taem David and Jonathan kasem olketa hard samting, tufala helpem each other for gohed worshipim Jehovah. (Fas Samuel 23:16-18) Irina, wanfala sista wea no garem eni relative lo truth sei: “Olketa lo kongregeson kamap spiritual mami, dadi, brata, and sista blo iumi. Jehovah iusim olketa for kamap famili blo iumi.”

11. Wanem nao bae helpem iu for fren witim olketa narawan?

¹¹ Sapos iu savve shame, maet hem no isi for fren witim olketa narawan. Ratna, wanfala sista wea famili againstim hem taem hem lanem truth sei: “Mi savve shame, bat mi luksavve mi needim olketa brata and sista for helpem and sapotim mi.” Maet iu hol bak for storyim feeling blo iu lo olketa narawan, bat taem iu duim olsem datwan bae helpem iu for fren witim olketa. Hem gud for talem olketa fren blo iu wanem iu needim bikos olketa laek for encouragem and helpem iu.

12. Hao nao preaching waka savve helpem iu for garem olketa gudfala fren?

¹² Wanfala gud wei for garem olketa fren hem for duim preaching waka witim olketa difren pablisa. Carol wea iumi storyim finis sei: “Mi garem staka gudfala fren bikos mi preach witim olketa and duim olketa nara spiritual samting witim olketa. Mi luksavve Jehovah iusim olketa fren hia for helpem and sapotim mi.” Hem gud samting for fren witim olketa lo kongregeson. Jehovah iusim olketa brata and sista hia for helpem olketa wea lonely.—Provebs 17:17.

13. Evriwan lo kongregeson mas duim wanem?

¹³ Evriwan lo kongregeson mas showimaot love lo each other and mek sure no eniwan tingse hem stap seleva. (John 13:35) Hem important for duim and talem samting for encouragem each other! Wanfala sista sei: “Taem mi studyim Bible, olketa lo kongregeson kamap famili blo mi. From olketa barava encouragem mi, mi laek for kamap wanfala Jehovah’s Witness.” Wanem nao iumi savve duim for helpem olketa brata and sista wea lonely?

14. Hao nao iumi savve kamap fren blo olketa wea joinim kongregeson?

¹⁴ Kamap fren blo olketa wea joinim kongregeson. Hem gud for welkamim olketa wea joinim kongregeson blo iumi. (Rome 15:7) Iumi laek for sei hello lo olketa, bat iumi laek for fren gud witim olketa tu, and datwan savve tek taem. So kaen and showimaot iumi tingim olketa. No poke nose lo bisnis blo olketa, bat showimaot iumi laek for helpem olketa lo eni samting wea olketa needim. Hem gud for askem samfala kwestin and lisin gud lo olketa. Olsem example, iumi savve askem olketa hao nao gogo olketa lanem truth. Bat sapos olketa hol bak for storyim eni samting, no trae for forcem olketa.

15. Hao nao olketa mature Christian savve helpem olketa lo kongregeson?

¹⁵ Taem olketa mature Christian, especially olketa elder, showimaot olketa tingim olketa lo kongregeson, datwan bae strongim faith blo olketa brata and sista. Melissa, wea hem and mami nomoa insaed truth sei: “Mi tinghae tumas  lo olketa brata wea kamap olsem dadi blo mi. Taem mi laek for storyim eni samting mi savve olketa bae willing for lisin.” Mauricio, wanfala young brata, barava sorre taem brata wea study witim hem kamap inactive. Mauricio sei: “Samting wea helpem mi nao hem hao olketa elder barava tingim mi and evritaem encouragem mi. Olketa go preaching witim mi, storyim olketa naes point from Bible reading blo olketa, and pleim sports witim mi.” Gogo Melissa insaed Bethel, and Mauricio tu.

16-17. Wanem nao iumi savve duim for helpem narawan?

¹⁶ Duim samting for helpem narawan. (Gal. 6:10) Leo, wanfala missionary wea stap lo kantri wea farawe from famili blo hem sei: “Taem samwan duim smol samting for helpem iumi lo barava taem wea iumi needim, datwan savve barava encouragem iumi. Mi tingim taem mi insaed lo wanfala car accident. Bihaen datwan mi barava stress. Bat then wanfala hasband and waef sei olketa redyim lelebet kaikai for mifala. Distaem mi no savve tingim wanem mifala kaikaim, bat mi tingim yet hao tufala barava lisin gud taem mi story and datwan mekem mi for feel gud moa!”

¹⁷ Lo assembly and convention, iumi evriwan enjoyim taem wea iumi spendem witim olketa brata and sista for storyim program. Bat Carol wea iumi storyim finis sei: “Nomata staka thousand brata and sista savve hipap lo olketa assembly and convention, taem mi lukim olketa famili sidaon tugeta mi savve feel lonely.” Olketa narawan, wea hasband or waef just dae savve lonely tu taem olketa attendim assembly or convention. Sapos iu savve lo eni brata or sista wea kasem samting olsem, hem bae gud for talem hem for kam sidaon witim famili blo iu lo next assembly or convention.

18. Hao nao iumi savve followim wanem 2 Corinth 6:11-13 storyim?

¹⁸ Spendem taem witim olketa narawan. Hem gud for invaetem olketa brata  and sista wea feel lonely for spendem taem witim iumi. Datwan bae showimaot iumi “barava lovem” olketa. (Readim 2 Corinth 6:11-13.) Melissa wea iumi storyim finis sei: “Mi hapi tumas taem olketa brata and sista invaetem mitufala mami lo haos blo olketa for kaikai, or for go witim olketa lo nara ples.” Hem gud for invaetem olketa wea lonely for kam lo haos blo iumi.

19. Wanem taem nao samfala brata and sista maet barava lonely?

¹⁹ Hem gud for spendem taem witim olketa nara Christian lo taem wea olketa maet barava lonely. Olsem example, lo taem blo olketa celebration olsem Christmas, olketa relative maet hipap tugeta and brata or sista bae stap seleva. Or, brata or sista wea famili member hem dae, savve tingim hem tumas lo datfala date each year. Sapos iumi spendem taem witim olketa brata and sista wea kasem kaen samting olsem, iumi showimaot iumi “barava tingim and lukaftarem” olketa.—Phil. 2:20.

20. Hao nao toktok blo Jesus lo Matthew 12:48-50 savve encouragem iumi taem iumi feel lonely?

²⁰ Staka reason stap why olketa Christian savve lonely. Bat iumi sure Jehovah tingim olketa hia. Staka taem Jehovah iusim olketa brata and sista for helpem olketa wea lonely. (Readim Matthew 12:48-50.) Iumi sapotim disfala arrangement blo Jehovah taem iumi willing for duim samting for spiritual famili blo iumi. Nomata samfala taem maet iumi feel lonely, no tingse iumi stap seleva bikos Jehovah hem stap witim iumi!