1. Jehoväta wakin sirweqkunaqa, ¿imanirtan japallankuna këkäyanqanta pensayan?

HÖRA HÖRAQA, llapantsikmi japallantsik këkanqantsikta pensantsik. Tsënö pensarpis, wakinkunaqa rasllam qonqariyan. Peru wakinkunaqa manam qonqëta puëdiyantsu. Wakinkunanam, mëtsikaq nunakunapa chowpinchö këkarnimpis, japallankuna këkäyanqanta pensayan. Wakimpaqnam, juk congregacionman ëwayanqanchö fäciltsu yachakäyänan. Wakinnam familiankunawan alläpa kuyanakurnin, karu markata täraq ëwakurninqa alläpa llakikuyan. Wakinkunanam kuyashqa kastankunata wanupakushqa karnin alläpa llakikuyan. Y tsëllaraq bautizakushqa kaqkunaqa, Jehoväpa testïgunkuna kayanqampita chikipäyaptinmi llakikuyan.

2. ¿Ima tapukuykunapitatan këchö yachakushun?

² Jehoväqa allim reqimantsik y musyanmi imanö këkanqantsikta. Pëqa musyanmi, japallantsik këkanqantsikta imë höra pensanqantsikta y yanapamënintsiktam munan. Këchöqa, kë tapukuykunapitam yachakushun: ¿imanötan Jehoväqa japallantsik këkanqantsikta pensanqantsik höra yanapamantsik?, ¿imatatan ruranantsik japallantsik këkanqantsikta pensashqaqa? y ¿imatatan rurashwan japallankuna këkäyanqanta pensaq wawqi panikunata yanapanapaq?

3. ¿Imanötan Jehoväqa Elïaspaq yarpachakunqanta rikätsikurqan?

³ Jehoväqa yarpachakunmi llapan sirweqninkuna imanö këkäyanqanman. Pëqa llapantsiktam rikëkämantsik y musyanmi imë höra llakikur qelananqantsikta (Sal. 145:18, 19). Willakoqnin Elïaspaq yarpachakunqanta rikärishun. Pëqa israelïtakuna mana alli tiempuchö kawayanqan  witsanmi kawarqan. Diospa sirweqninkunata sufritseqkunam, Elïastapis wanutsita munayarqan (1 Rëy. 19:1, 2). Elïasqa, Jehoväta japallanllana sirwikanqanta pensarmi, alläpa llakikurqan (1 Rëy. 19:10). Jehoväqa, jinan höram Elïasta yanapëta procurarqan, y juk angeltam mandarqan japallan këkanqanta mana pensanampaq y juk israelïtakunapis Diosta sirwikäyanqantaraq musyatsinampaq (1 Rëy. 19:5, 18).

4. Marcus 10:29 y 30 ninqannöpis, ¿imanötan Jehoväqa familiankuna o amïgunkuna contran churakashqa kaqkunata yanapan?

⁴ Jehoväqa musyanmi pëta sirwinantsikpaq imëka rurashqantsikta. Itsa Jehoväta mana sirweq familiantsikkuna y amïguntsikkuna contrantsik churakäyashqa. Juk kutin apostol Pëdrupis alläpa yarpachakurnin kënö nirqan: “¡Rikë! Noqakunaqa llapan imëkakunatam jaqiyarqö y qamta qatiyarqoq; tsëqa, ¿imataq noqakunapaq kanqa?” (Mat. 19:27). Jesusqa, qateqninkunata kuyarninmi, Diospa mëtsika sirweqninkunawan juk familianölla kayänampaq kaqta nirqan (leyi Marcus 10:29, 30). Jehoväqa sirweqninkunata yanapanampaq kaqtam änikun (Sal. 9:10). Japallantsik këkanqantsikta pensanqantsik höra imanö yanapamanqantsikta rikärishun.

5. ¿Imanirtan yarpachakushwan Jehovä imanö yanapëkämanqantsikman?

⁵ Jehovä imanö yanapëkämanqantsikman pensashun (Sal. 55:22). Tsëqa yanapamäshun, imatapis Jehovä rikanqannö rikänapaqmi. Familianchö Jehoväta japallanlla sirweq pani Cärolmi * kënö nin: “Japallä këkanqäta mana pensanäpaqqa yanapaman, imëkapa pasanqäkunachö Jehovä yanapamanqanta yarpanqämi. Tsëmi yarpätsiman Jehovä imëpis mana dejamänampaq kaqta”.

6. ¿Imanötan 1 Pëdru 5:9 y 10 ninqan japallankuna këkäyanqanta pensaqkunata yanapanman?

⁶ Japallankuna këkäyanqanta pensaqkunata, Jehovä imanö yanapanqanman pensashun (leyi 1 Pëdru 5:9, 10). Mëtsika watakunapa Jehoväpa testïgun japallanlla kashqa wawqintsik Hiröshim kënö nin: “Creikoq mayintsikkunapis  imëka mana allikunapa pasayanqantaqa rikantsikmi, puëdiyanqanmannö Jehoväta sirwiyänampaq kallpachakuykaqkunata rikëqa, Jehoväta japallantsik sirweqkunatam alläpa yanapamantsik”.

7. Qamtaqa, ¿imanötan Diosman mañakunqëki yanapashunki?

⁷ Jehoväta mañakuyta, Bibliata estudiëta y reunionkunaman ëwëta ama jaqishuntsu. Imanö këkanqantsikta llapan shonquntsikwan Jehoväta willashun (1 Pëd. 5:7). Jövinllaraq këkaq panintsik Massiel Jehoväpa testïgun tikrariptinmi, familian contran churakärirqan. Tsë witsan ima yanapanqanta yarparninmi kënö willakun: “Japallä këkanqäta pensanqä höraqa, llapan shonqüwan Jehoväta mañakunqämi yanapamarqan. Pëqa rasumpa Teytänömi karqan. Pëwanqa llapan junaqkunam atska kuti parlaq kä, y imanö këkanqätam willaq kä”.

8. Y qamtaqa, ¿imanötan Diospa Palabranta leyi y leyinqëkiman yarpachakuy yanapashunki?

⁸ Jina Diospa Palabrantam cada junaq leyinantsik, y unë witsan nunakunata kuyëpa imanö tratanqanman pensanqantsikmi yanapamäshun. Jehoväpa testïgun kanqampitam, panintsik Biancata familian mana allipa parlapan. Pëmi kënö willakun: “Noqa pasëkanqä problëmakunapa Bibliachö willakunqan nunakunapita, y Jehoväta kanan witsan sirweqkunapaq revistakunachö willakunqanta leyi y tsëkunaman yarpachakunqämi alläpa yanapaman”. Wakin wawqi panikunaqa Salmus 27:10 y Isaïas 41:10 o juk textukunatam dememoria yarpäyan. Wakinnam, wiyanapaq grabacionkunawan Bibliata leyiyan o reunionkunapaq preparakuyan. Tsëkunam japallankuna këkäyanqanta pensaqkunata yanapan.

9. Y qamtaqa, ¿imanötan reunionkunaman ëwanqëki yanapashunki?

⁹ Reunionkunamanqa mana faltëpam ëwanantsik. Tsëchöqa wawqi panintsikkunatam mas reqintsik y tsarakur sïguinapaqmi kallpata tarintsik (Heb. 10:24, 25). 7 kaq pärrafuchömi, panintsik Massielpaq parlarqantsik, pëmi kënö nin: “Alläpa mantsakoq karnimpis llapan reunionkunaman ëwanäpaq y tsëchö parlakunäpaqmi churapakarqä. Tsëmi yanapamarqan, congregacionchö nana turikuna familiä kayanqanta yarpänäpaq”.

10. ¿Imanirtan Diosta unëna sirweqkunawan amïgu kanantsik?

¹⁰ Unëpana Diosta sirweqkunawan amïgu kashun. Edä mayintsik o juk costumbrikunayoq mana kayaptimpis, yanapamänapaq kaq wawqi panikunawan amïgu kashun. Bibliachöqa, edäna kaqkuna  yachaq kayanqantam nin (Job 12:12). Peru mayor kaqkunapis jövin kaqkunapitaqa imëkatam yachakuyta puëdiyan. Kaq edälla mana karnimpis, Davidwan Jonatanqa alli amïgum kayarqan (1 Sam. 18:1). Imëka mana allikunapa pasëkarpis, Jehoväta ishkan sirwiyänampaqmi yanapanakuyarqan (1 Sam. 23:16-18). Familianchö Jehoväta japallanlla sirweq Irïna jutiyoq panim kënö nin: “Creikoq mayintsikkunaqa, teytantsikkunanö o nana turintsikkunanömi kayan. Pëkunataqa, familiantsik cuenta yanapamänapaqmi Jehovä churashqa”.

11. ¿Imatatan ruranantsik alli amïgukunayoq kanapaqqa?

¹¹ Wakimpaqqa, mantsakoq kayaptinmi wakinkunawan amïgu këqa fäciltsu. Ratna jutiyoq panintsikpa familianmi, Bibliapita yachakur qallëkuptin contran churakäyarqan. Pëmi kënö willakun: “Familiänö turi nanakuna yanapayämänantam alläpa wanarqä. Itsa imanö këkanqantsikta wakinta willëqa fäciltsu kanman, peru alli amïgu kanantsikpaqqa tsëtam ruranantsik. Amïguntsikkunaqa yanapamënintsiktam munayan, peru tsëta imanö rurayänampaq kaqtam musyatsinantsik”.

12. ¿Imanötan Diospita yachatsikunqantsikqa alli amïgukunata tarinapaq yanapamantsik?

¹² Wawqi panintsikkunawan Diospita yachatsikunqantsikchömi alli amïgukunata tarintsik. Pitsqa kaq pärrafuchömi panintsik Cärolpaq parlarqantsik, pëmi kënö nin: “Diospita yachatsikunqächö, y mas yanapakunäpaq churapakanqächömi mas yanasakunata tarirqö. Watakuna pasanqanmannömi, Jehoväqa kë yanasäkunawan yanapamashqa”. Wawqi panintsikkunawan amïgu kanapaq kallpachakunqantsikqa yanapakunmi. Jehoväqa, japallantsik këkanqantsikta pensanqantsik höra o imëka mana allikunapa pasanqantsik höram pëkunawan yanapamantsik (Prov. 17:17).

13. ¿Imatatan llapantsikpis ruranantsik?

¹³ Congregacionchö yamë y kuyanakurnin kawakunantsikpaqqa, llapantsikmi yanapanakunantsik. Tsëta rurashqaqa, manam ni pipis japallan këkanqanta pensanqatsu (Juan 13:35). Imata ruranqantsik o imata ninqantsikqa yanapakunmanmi. Juk panim këta yarpan: “Diospita yachakur qallëkuptïqa, congregacionchö kaqkunam familiä cuenta tikrariyarqan. Pëkuna mana yanapayämashqa kayaptinqa, manachi Jehoväpa testïgun këman chämantsu karqan”. Jehoväta japallankuna sirweqkuna congregacionchö kaqkunata familiantanö rikäyänampaqqa, ¿imanötan yanapashwan?

14. ¿Imanötan tsëllaraq bautizakushqa kaqkunapa amïgunkuna kashwan?

¹⁴ Llapankunapa amïgun kanapaq churapakäshun. Tsëllaraq bautizakushqakunata congregacionchö kuyëpa chaskishun (Rom. 15:7). Peru manam kushishqallatsu saludarinantsik. Tsëpa rantinqa, tiempu pasanqanmannömi pëkunapa amïgun këta procuranantsik. Tsëpaqqa, shumaq parlapäshun y pëkunapaq yarpachakushun. Vïdankunaman mana mëtikushllapa, ima problëmakunapa pasëkäyanqanchö yanapashun. Itsa wakinkunaqa, imanö këkäyanqanta parlakuyta mantsakuyan. Tsëqa, ama kutin kutin tapupäshuntsu tsëpa rantinqa, shumaqlla tapupäshun y ima niyanqanta shumaqlla wiyashun. Itsa Jehoväpita yachakur imanö qallayanqanta tapupärishwan.

15. Diosta unëpana sirweq wawqi panikunaqa, ¿imanötan wawqi panikunata yanapayanman?

 ¹⁵ Diosta unëpana sirweqkuna y masqa creikoqkunata rikaqkuna wawqi panikunapaq yarpachakuyaptinqa, pëkunaqa mas allim Jehoväta sirwiyanqa. Melïssataqa mamäninmi Diospita yachatsirnin winatsirqan, pëmi kënö nin: “Alläpam agradecikü watakuna pasanqanmannö turikunaqa teytäkuna cuenta yanapayämanqampita. Imallapitapis parlëta munaptïqa, pëkunaqa listum këkäyan wiyayämänampaq”. Jövin wawqi Mauriciu cuentakunqanta rikärishun. Bibliata estudiatsishqa kaq wawqi Jehoväpa testïgun këta qelanäkuriptinmi, alläpa llakikur japallan këkanqanta pensarqan. Pëmi kënö willakun: “Creikoqkunata rikaqkuna noqapaq yarpachakuyanqanmi masqa yanapamarqan. Noqawan parlayänampaq, Diospita yachatsikuyänäpaq, Bibliachö yachakuyanqanta willayämänampaq y imallatapis pukllayänäpaqmi tiempunkunata patsätsiyaq”. Panintsik Melïssa y wawqintsik Mauriciuqa, Jehovä Diosnintsiktam llapan tiempunkunawan sirwikäyashqa.

16, 17. ¿Imakunata rurartan wawqi panintsikkunata yanaparishwan?

¹⁶ Wanayanqanmannö yanapakushun (Gäl. 6:10). Familiampita karuchö täraq Leo jutiyoq misionëru wawqim kënö nin: “Llakikunqëki höra qampaq imallatapis rurayämunqanqa alläpa allim. Juk kutim, cärrüwan ëwëkarnin accidentäkurqä, y wayïman chärirqä alläpa mantsakashqam këkarqä. Tsënö këkaptïmi, warminwan juk wawqiqa, wayinman mikoq ëwanäpaq niyämarqan. Imata qarayämanqantaqa manam yarpätsu, peru shumaq wiyayämanqantaqa yarpämi. Tsënö wiyayämanqanqa alläpam yanapamarqan. Parlar ushariyaptïqa, mas allinam këkarqä”.

¹⁷ Reunionkunaman ëwëqa llapantsiktam gustamantsik, y masran asamblëakunaman ëwënäqa. Tsëchöqa, yachakunqantsikpitam wawqi panintsikkunawan shumaq parlakurintsik. Tsënö kaptimpis, näqa parlanqantsik panintsik Cärolqa kënömi willakun: “Asamblëakunaman ëwëqa noqapaqqa manam fäciltsu. Mëtsika turi nanakuna kayaptimpis, cäsi llapankunam familiankunawan këkäyan. Japallä  këkanqäta pensarmi alläpa llakikü”. Wakimpaqqa, majankuna wanushqa kaptinmi, asamblëakunaman ëwëqa alläpa llakikuypaq. ¿Pillatapis tsënö këkaqta reqintsikku? ¿Manatsuraq qateqnin reunionchö o asamblëachö noqantsikwan täkunampaq nirishwan?

18. 2 Corintius 6:11 a 13 ninqannö, ¿imanötan wawqi panintsikkunata yanapashwan?

¹⁸ Pëkunawan imallatapis rurashun. Imallatapis rurarqa, ama kaq wawqi panikunallataqa invitashuntsu, masqa japallankuna këkäyanqanta pensaq wawqi panikunata invitashun. Pëkunapaqmi ‘shonquntsikta chipyëpa kichaq’ cuenta kanantsik (leyi 2 Corintius 6:11-13). 15 kaq pärrafuchömi panintsik Melïssapaq parlarqantsik, pëmi këta yarpan: “Wakin turi nanakunaqa wayinkunaman o pëkunawan viajayänäpaqmi invitayämaq”. ¿Manatsuraq congregacionnintsikchö mëqan wawqi panintsikkunallatapis imata ruranapaqpis invitarishwan?

19. ¿Imë junaqkunatan wawqi panintsikkunata imallatapis ruranapaq invitarishwan?

¹⁹ Wakin wawqi panintsikkunaqa, wakinkuna imatapis celebrayaptin o mana Testïgu familiankuna Bibliapa contran fiestakunata rurayaptinmi, pëkunawan imallatapis ruranata wanayan. Itsa wakinqa, mana Testïgu familiankuna fiestakunata rurayaptin, o majanta wanupakushqa wawqi panikuna casakuyanqan junaqta yarparnin, japallankuna karnin llakikuyan. Tsë junaqkuna pëkunawan imallatapis rurarmi, pëkunapaq yarpachakunqantsikta rikätsikuntsik (Filip. 2:20).

20. Mateu 12:48 a 50 ninqannöpis, ¿imanötan Jesus ninqanqa japallantsik këkantsik höra yanapamantsik?

²⁰ Imëkarëkurmi wakin wawqi panintsikkunaqa japallankuna këkäyanqanta pensayan, peru yarpäshun, Jehoväqa musyanmi pëkuna imanö këkäyanqanta. Pëqa, wananqantsikkunachömi wawqi panintsikkunawan yanapamantsik (leyi Mateu 12:48-50). Tsë llapampita agradecikurmi, wawqi panintsikkunata yanapanapaq masraq kallpachakunantsik. Höra höraqa japallantsik këkanqantsiktam pensantsik peru yarpäshun, Jehovä Diosnintsikqa läduntsikchö këkaq cuentam këkan.