1. ¿Imanasqataq wakin iñiqmasinchikkuna sapallanku hina tarikunku?

YAQA llapallanchikmi wakinpiqa sapallanchik hina tarikunchik. Wakinkum ichaqa sapa punchaw chayna tarikunku. Hukkunaqa achka runakunawan kaspankupas sapallanku hinam tarikunku. Wakin iñiqmasinchikkunañataqmi chayna tarikunku huklawman ripukuspanku chaypi kaq iñiqmasinchikkunata allinta mana riqsispanku, ayllunkumanta karupi kaspanku, ayllunku wañukuptin utaq Diosta servisqankurayku ayllunku chiqniptin.

2. ¿Ima tapukuykunamantam kay yachachikuypi yachasun?

² Jehova Diosqa allintapunim riqsiwanchik. Chaymi sapallanchik hina tarikuptinchikqa yanapaykuyta munawanchik. Kay yachachikuypim yachasun kay tapukuykunamanta: ¿Imaynatam taytanchik Jehova Diosqa yanapawanchik sapallanchik hina mana tarikunapaq? ¿Imatam ruwachwan chayna tarikuspa? ¿Imaynatam sapallanku hina tarikuq iñiqmasinchikkunata yanapachwan?

3. ¿Imaynatam yachanchik Eliasta Dios mana qunqarusqanta?

³ Diosqa munan llapallan serviqninkuna kusisqa kananchiktam. Payqa yachanmi sapallanchik hina tarikusqanchikta, chaymi yanapaykuwanchik (Sal. 145:18, 19). Ñawpaq tiempopi willakuqnin Eliastapas Jehova Diosqa manam qunqarurqachu. Chay tiempopi Diospa serviqninkunatam llumpayta chiqnirqaku, chaymi Eliastapas wañurachiyta munarqaku (1 Rey. 19:1, 2). Payqa piensarqa Diospa willakuqninkunamanta  payllaña kasqantam, chaymi llumpay hukmanyasqa karqa (1 Rey. 19:10). Chayna tarikuptinmi Diosqa angelninta kacharqa Eliasta kallpanchaykunanpaq. Chay angelmi nirqa Diosman sunqu runakunaqa achkaraq kasqanta (1 Rey. 19:5, 18).

4. ¿Imaynatam Marcos 10:29, 30 nisqan qawachiwanchik serviqninkunata Dios mana qunqaruwasqanchikta?

⁴ Jehova Diosqa yachanmi payta servinanchikpaq tukuyta ruwasqanchikta. Ichapas ayllunchikkuna utaq amistadninchikkuna ñuqanchikmanta karunchakurunku. Huk kutipim Jesusta llakisqa hina Pedro nirqa: “Ñuqaykuqa tukuy imata saqiruspam qamta qatichkaykiku, ¿imataq ñuqaykupaqqa kanqa?”, nispa (Mat. 19:27). Chaynata niptinmi Jesusqa llapallan qatiqninkunata kuyakuywan nirqa lliw iñiqmasinku ayllunku hina kananmanta (qaway Marcos 10:29, 30). Kikin taytanchik Jehova Diostaqmi niwanchik serviqninkunataqa mana haykapipas qunqaruwananchikmanta (Sal. 9:10). Qatiqninpiyá yachaykusun sapallanchik hina tarikuptinchik Dios yanapawananchikpaq imakuna ruwanamanta.

5. ¿Imanasqataq Jehova Dios yanapawasqanchikpi yuyaymanananchik?

⁵ Jehova Dios imayna yanapawasqanchikpim yuyaymanananchik (Sal. 55:22). Chaypi yuyaymanaymi yanapawasun mana sapallanchik hina tarikunapaq. Ayllunmanta sapallan Diosta serviq iñiqmasinchik Carolmi * nin: “Sasachakuykunapi tarikuptiy Jehova Dios yanapawasqanta yuyariymi yanapawan mana sapallay hina tarikunaypaq hinaspa qipakunamanpas pay yanapawananmanta mana iskayrayanaypaq”, nispa.

6. ¿Imaynatam 1 Pedro 5:9, 10 nisqan yanapawachwan sapallanchik hina tarikuqkunata?

⁶ Sapallanku hina tarikuqkunata Dios imayna yanapasqanpim yuyaymanananchik (qaway 1 Pedro 5:9, 10). Ayllunmanta unay wata sapallan Diosta serviq iñiqmasinchik Hiroshim nin: “Iñiqmasinchikkunaqa llapallanku sasachakuyniyuq kaspankupas anchatam kallpanchakunku Diosta servinankupaq. Chaymi kallpanchawanchik  ayllunchikmanta sapallanchik Diosta serviqkunatapas”, nispa.

7. ¿Imaynatam qamta yanapasunki Diosta mañakuy?

⁷ Diostam mañakunanchik, bibliatam ñawinchananchik hinaspapas huñunakuykunamanmi hamunanchik. Tukuy sunqumanta Diosta mañakuspam imayna tarikusqanchikta willananchik (1 Ped. 5:7). Massiel sutiyuq iñiqmasinchiktam Diosta serviyta qallaykuptin ayllunkuna qipancharurqa. Paymi nin: “Sapallay hina tarikuspaymi Jehova Diosta tukuy sunquywan mañakuq kani. Paymanqa kuyasqay taytayman hinam sapa punchaw imayna tarikusqayta achka kutikama willakuq kani”, nispa.

8. ¿Imaynatam qamta yanapasunki bibliata ñawinchaspa chaypi yuyaymanay?

⁸ Chaymantapas, Diospa palabranta sapa punchaw ñawinchayninchik hinaspa ñawpaq tiempopi serviqninkunata Dios imayna yanapasqanpi yuyaymanayninchikmi yanapawasun Dios kuyawasqanchikmanta mana iskayrayanapaq. Bianca sutiyuq iñiqmasinchiktam Diosta servisqanrayku ayllun tukuyta nin. Chaykunawan mana hukmanyarunanpaq ima yanapasqanmantam nin: “Ñawpaq tiempopi Diosman sunqu runakunamantam bibliapi ñawinchani. Ñawinchanitaqmi sasachakuypi tarikuq kunan tiempopi iñiqmasinchikkunamantapas, hinaspam Jehova Dios paykunata imayna yanapasqanpi yuyaymanani”, nispa. Wakin iñiqmasinchikkunañataqmi mana hukmanyarunankupaq bibliapi Salmos 27:10, Isaias 41:10 nisqanta utaq huk textokunata umallamanta yachanku. Wakinkunañataqmi huñunakuypaq estudiaspanku utaq bibliata ñawinchaspanku grabasqa kaqkunata uyarinku. Chaynapim mana sapallanku hinachu tarikunku.

9. ¿Imaynatam yanapasunki huñunakuykuna?

⁹ Huñunakuykunamanmi sapa semana hamunanchik. Huñunakuyninchikkunam anchata kallpanchawanchik, hinaspapas iñiqmasinchikkunawanmi astawan riqsinakunchik (Heb. 10:24, 25). Iñiqmasinchik Massielmi nin: “Pinqakuq kaspaypas huñunakuykunaman sapa semana rinaypaq hinaspa chaypi rimarinaypaqmi kallpanchakurqani. Iñiqmasiykunawan kaspayqa manam sapallay hinachu tarikuq kani”, nispa.

10. ¿Imanasqataq Diosman sunqu iñiqmasinchikkunawan astawan hukllawakunanchik?

¹⁰ Diosman sunqu iñiqmasinchikkunawanmi astawan hukllawakunanchik. Chayna iñiqmasinchikkunawan amistad kaspanchikqa paykuna hinam kasunchik. Amistadqa kananchik manam llaqtamasillanchikwanchu utaq wiñaymasillanchikwanchu. Bibliam niwanchik yachayqa yuyaqkunapi  kasqanta (Job 12:12). Yuyaqkunapas yachanmankum Diosman sunqu musu-sipaskunamanta. Bibliam niwanchik Jonatanqa karu sullkan kachkaptinpas Davidwan amistad kasqanmanta (1 Sam. 18:1). Paykunaqa ima sasachakuyña kaptinpas Diosman sunqu kanankupaqmi yanapanakurqaku (1 Sam. 23:16-18). Ayllunmanta sapallan Diosta serviq Irinam nin: “Iñiqmasinchikkunaqa kanku tayta-mamanchik utaq turi-ñañanchik hinam. Paykunawanmi Jehova Diosqa yanapawanchik mana sapallanchik hina tarikunapaq”, nispa.

11. ¿Imatam ruwananchik iñiqmasinchikkunawan allin amistad kanapaq?

¹¹ Wakiqninchikpaqqa manchapakuq kasqanchikraykum sasa kanman iñiqmasinchikkunawan hukllawakuy. Ratna sutiyuq iñiqmasinchikmi Diosmanta yachayta qallaykuspan sasachakuypi tarikurqa. Paymi nin: “Manchapakuq kaspaypas iñiqmasinchikkunawanmi astawan hukllawakurqani, chaynapi paykuna yanapawanankupaq”, nispa. Iñiqmasinchikkunaqa yanapaykuytam munawanchik, chaypaqqa manchapakuq utaq pinqakuq kaspanchikpas imayna tarikusqanchiktam willakunanchik. Chayta ruwaspaqa paykunawanmi allin amistad kasun.

12. ¿Imanasqataq ancha allin iñiqmasinchikkunawan Diosmanta willakuyninchik?

¹² Chaymantapas, iñiqmasinchikkunawan kuska Diosmanta willakuspam paykunawan allin amistad kasun. Carolmi nin: “Achka ñañaykunawan Diosmanta willakuspaykum hinaspa Jehova Diospaq imatapas kuska ruwaspaykum astawan riqsinakurqaniku. Chay amistadniykunawanmi Jehova Diosqa ima sasachakuypi kaptiypas yanapaykuwarqa”, nispa. Arí, Diosman sunqu iñiqmasinchikkunawan amistad kayqa allinninchikpaqmi. Paykunawanmi Diosqa yanapaykuwanchik sapallanchik hina tarikuptinchik utaq ima sasachakuypi kaptinchikpas (Prov. 17:17).

13. ¿Imapaqmi llapallanchik kallpanchakunanchik?

¹³ Llapallanchikmi kallpanchakunanchik iñiqmasinchikkunawan kuyanakuspa huk sunqulla kananchikpaq, chaynapim mana mayqanninchikpas sapallanchik hinachu tarikusun (Juan 13:35). Ruwasqanchikwan utaq rimasqanchikwanmi iñiqmasinchikkunata kallpanchachwan. Huk iñiqmasinchikmi nin: “Diosmanta yachayta qallaykuptiymi lliw iñiqkuna aylluy hina anchata kuyawarqaku. Paykuna mana yanapawaptinqa manachá Jehova Diospa testigon kaytaqa atiymanchu karqa”, nispa. Qatiqninpiyá yachaykusun ayllunkumanta sapallanku Diosta serviqkunata imayna yanapanamanta.

14. ¿Imatam ruwachwan hukkunapa amistadnin kanapaq?

¹⁴ Paykunapa amistadnin kanapaq kallpanchakusun. Huñunakuyman chayllaraq hamuqkunata, huklawmanta hamuq iñiqmasinchikkunata hinaspa chayllaraq bautizasqa kaqkunatam kuyakuywan chaskiykunanchik (Rom. 15:7). Ichaqa manam chayllatachu ruwananchik. Paykunata allinta riqsinanchikpaqmi kallpanchakunanchik. Kuyakuywanmi tapuykunanchik imayna tarikusqankumanta. Ichaqa manam tukuy imamantachu tapunanchik, wakinninkuqa manchakunkum imayna tarikusqankumanta willakuyta. Manam hikutananchikchu imatapas willawananchikpaqqa. Rimayta qallaykunapaqqa ichapas bibliamanta imayna yachay qallaykusqanmanta tapuchwan, hinaspam kuyakuyllawan uyariykunanchik.

15. ¿Imaynatam iñiyninkupi allin takyasqa iñiqmasinchikkuna hukkunata yanapanmanku?

 ¹⁵ Iñiqkunapi punta apaqkuna hinaspa iñiyninkupi allin takyasqa iñiqmasinchikkuna hukkunata yanapaykuq kaptinkuqa llapallanchikmi iñiyninchikpi allin kanchik. Melissatam mamallan yanaparqa Diosta servinanpaq. Paymi nin: “Iñiqmasinchikkunatam anchata agradecekuni warma kasqaymantaraq papay hina yanapaykuwasqankumanta. Imamanta rimayta munaptiypas paykunam uyariwanku”, nispa. Mauriciopas sapallan hinam tarikurqa bibliamanta yachachiqnin Diosmanta karunchakuruptin. Paymi nin: “Chayna tarikuptiymi iñiqkunapi punta apaqkuna anchata yanapawarqa. Paykunaqa ñuqawan rimanankupaqmi tiempochakuqku. Diosmanta willakuqpas kuskam riq kaniku, bibliata estudiaspankupas ima yachasqankumantam willawaq, hinaspapas ñuqawan kuskam pukllaqku”, nispa. Kunanqa Melissawan Mauricioqa tukuy tiemponkuwanmi Diosta servichkanku.

16, 17. ¿Imaynatam yanapachwan sapallanku hina tarikuq iñiqmasinchikkunata?

¹⁶ Imapipas yanapaykusun (Gal. 6:10). Nacionninmanta karupi Diosmanta willakuq iñiqmasinchik Leom nin: “Necesitasqanchik punchawpi pipas yanapaykuwaptinchikqa anchatam kusikunchik. Huk kutipim carroywan accidente pasaruwarqa, chaymi mancharisqallaña wasiyman chayarurqani. Chayna kachkaptiymi casarasqa iñiqmasinchikkuna mikunaykupaq wasinman qayaykuwarqa. Manam yuyanichu ima mikuyta quwasqankutaqa, kuyakuywan sumaqta uyariykuwasqankutam ichaqa mana qunqanichu”, nispa.

¹⁷ Hatun huñunakuykunapi iñiqmasinchikkunawan kuska kaspanchik hinaspa paykunawan parlaspanchikmi anchata kusikunchik. Wakin iñiqmasinchikkunam ichaqa mana chaynachu tarikunku. Carolmi nin: “Achka-achka iñiqmasinchikkuna kaptinpas llapallankutam qawani sapakama ayllunkuwan kaqta, chaymi sapallay hina tarikuni”, nispa. Qusanku utaq warmichanku wañukusqanku qipakunallaman hatun huñunakuypi kayninkuqa wakin iñiqmasinchikkunapaqqa sasam. Ichapas riqsinchik chaynakunapi tarikuq iñiqmasinchikkunata. ¿Nichwanchu qatiqnin hatun huñunakuypi ñuqanchikwan kuska kanankupaq?

18. 2 Corintios 6:11-13 nisqanqa, ¿imapaqmi kallpanchawanchik?

 ¹⁸ Kuska kanapaq tiempochakusun. Imapipas kusirikuspaqa iñiqmasinchikkunatayá nisun ñuqanchikwan kuska kanankupaq, astawanraqyá sapallanku hina tarikuqkunataqa. Bibliapa nisqanman hinam paykunapaqqa ‘sunqunchikta kicharinanchik’ (qaway 2 Corintios 6:11-13). Melissam nin: “Anchatam kusikuq kaniku wakin iñiqmasinchikkuna wasinta rinaykupaq niwaptinku utaq paykunawan kuska maytapas rinaykupaq niwaptinku”, nispa. Ñuqanchikpas, ¿mayqin iñiqmasinchiktapas nichwanchu kuska mikunapaq utaq imatapas ruwanapaq?

19. ¿Ima punchawkunataq allin kanman iñiqmasinchikkunawan kuska kayninchik?

¹⁹ Ayllunkumanta sapallanku Diosta serviq iñiqmasinchikkunaqa runakunapa fiestakuna ruwasqanku punchawkunapim sapallanku hina tarikunmanku. ¿Manachu paykunata nichwan chay punchawkuna ñuqanchikwan kuska kanankupaq? Wakin iñiqmasinchikkunañataqmi kuyasqanku ayllunkupa wañukusqan punchaw chayamuptin ancha llakisqa tarikunku. Chayna tarikuq iñiqmasinchikkunata kuyaspanchikqa paykunapaqmi tiempochakunanchik (Filip. 2:20).

20. Mateo qillqapi Jesuspa nisqanqa, ¿imaynatam yanapawanchik sapallanchik hina tarikuptinchik?

²⁰ Llapallanchikmi wakinpiqa sapallanchik hina tarikuchwan, ichaqa manam qunqananchikchu Jehova Diosqa imayna tarikusqanchikta allintapuni yachasqanta. Chaymi iñiqmasinchikkunawan yanapaykuwanchik (qaway Mateo 12:48-50). Tukuy chaykunamanta agradecekusqanchiktam qawachichwan iñiqmasinchikkunata yanapaspa. Sapallanchik hina wakinpi tarikuptinchikpas taytanchik Jehova Diosmi ñuqanchikwan kachkan.