Dža ko sadržaj

Dža ko sadržaj

23. ČLANKO PROUČIBASE

Ked tano o Jehova tuvaja niked na hijan kokri

Ked tano o Jehova tuvaja niked na hijan kokri

O Jehova tano paše uzo sa okola so rodena le (PS. 145:18)

ĐILI 28 Te ova e Jehovase amala

SOSTAR KA VAĆERA *

1. Sebepi kola buća e Devlese sluge šaj podijekh puti te osetinen pe usamljeno?

BUT amendar podijekh puti osetinaja amen usamljeno. Koro disave, odola osećanja sigate nakhena. Ama, koro avera on dugo trajinena. Amen šaj te osetina amen usamljeno čak hem ked hijam maškaro but manuša. Disavenđe tano pharo te arakhen pese amalen ked avena ki nevi skupština. Avera osetinena pe usamljeno ked selinena pe dur andi pi porodica sose sikljilje but buća te ćeren zajedno. Disavenđe tano but pharo sose našalđe nekas. Disave osetinena pe soj tane kokri ked olengi porodica hem olenge amala, kola na služinena e Jehovase, odbacinena len ja protivinena pe olenđe.

2. Ko kola pućiba ka dobina odgovor?

2 O Jehova đanela hem haljola sar osetinaja amen. Ked hijam usamljena, ov đanela sar osetinaja amen hem mangela te pomožini amenđe. Sar o Jehova pomožini amenđe? Sar šaj te pomožina kokri amenđe ked osetinaja amen usamljeno? Sar šaj te pomožina averenđe ki skupština kola osetinena pe usamljeno? Hajde te dikha o odgovorija ko akala pućiba.

O JEHOVA BRININI PE AMENDAR

O Jehova bićhalđa jekhe anđele te uverini e Ilija so nane kokri (Dikh o 3. odlomko)

3. Sar o Jehova mothovđa so brininđa pe ando Ilija?

3 O Jehova mangela sa olese sluge te oven bahtale. Ov tano paše uzo amende hem dikhela ked hijam tužna ja obeshrabrime (Ps. 145:18, 19). Razmislin ando odova sar o Jehova mothovđa so brininđa pe ando odova sar osetini pe oleso prorok, o Ilija hem sar pomožinđa lese. Akava verno manuš živinđa ko vreme ked e Izraelcenđe hine but pharo. But moćna manuša ko Izrael kola na manglje e Jehova progoninđe okolen kola služinđe e Jehovase, a posebno e Ilija hem čak manglje te mudaren le (1. Kralj. 19:1, 2). O Ilija hine pana pobuter obeshrabrimo odolese so mislinđa soj tano ov jedino proroko kova služini e Jehovase (1. Kralj. 19:10). O Jehova odmah ćerđa diso te pomožini lese. Ov bićhalđa jekhe anđele te uverini e Ilija so ov nane kokri hem so isi pana Izraelcija kola verno služinena e Jehovase (1. Kralj. 19:5, 18).

4. Sar o lafija ando Marko 10:29, 30 mothovena kobor o Jehova brinini pe okolendar kas i porodica hem o amala na pomožinena?

4 O Jehova đanela so ked odlučinđam te služina lese, disave amendar valjanđe te ćeren bare žrtve. Šaj amari porodica hem amare amala kola na služinena e Jehovase više na mangena te pomožinen amenđe. Šaj o apostol Petar, odolese so brininđa pe, pućlja e Isuse: „Amen sa aćhavđam hem pođinđam palo tute. So ka dobina odolese?“ (Mat. 19:27). O Isus ko jekh ljubazno način phenđa pe učenikonenđe so i skupština ka ovel olengi porodica. (Čitin Marko 10:29, 30.) O Jehova, amaro nebesko Dad, obećini so ka pomožini okolenđe kola služinena lese (Ps. 9:10). Hajde te dikha disave korisna buća kola šaj te ćere te bi o Jehova pomožini tut ked osetineja tut usamljeno.

SO ŠAJ TE ĆERE AKO OSETINEJA TUT USAMLJENO?

5. Sose tano šukar te razmisline ando odova sar o Jehova pomožini tut?

5 Razmislin ando odova sar o Jehova pomožini tut (Ps. 55:22). Odova ka pomožini tut te dikhe so na hijan kokri. I Karol *, i phen koja nane ko brako hem kasi porodica na služini e Jehovase, phenela: „Ked razmislinava ando odova sar o Jehova pomožinđa maje ko pharo vreme, odova pomožini man te haljovav so na hijum kokri. Isto ađahar, odova uverini man so o Jehova niked na ka aćhavi man.“

6. Sar šaj o lafija andi 1. Petrova 5:9, 10 te ohrabrinen okolen kola osetinena pe usamljeno?

6 Razmislin ando odova sar o Jehova pomožini te phralenđe hem te phenjenđe kola osetinena pe usamljeno. (Čitin 1. Petrova 5:9, 10.) O phral Hiroši, kova tano beršencar jedino Svedoko ki pi porodica, phenela: „Ki skupština šaj lokho te dikhel pe so sare isi len problemija. Amen đanaja so svako amendar dela poklo najšukar e Jehovase hem odova šaj te ohrabrini okolen kasi porodica na služini e Jehovase.“

7. Sar i molitva pomožini tut?

7 Redovno molin tut, čitin i Biblija hem đa ko sastankija. Tu valjani te phene e Jehovase sar tačno osetineja tut (1. Petr. 5:7). Jekh phen koja vićini pe Masijel, phenela: „Odova so često molinđum man e Jehovase, pomožinđa man te na osetinav man usamljeno.“ Ked akija terni phen odlučinđa te služini e Jehovase, oj osetinđa pe usamljeno odolese so olaki porodica na služinđa e Jehovase. Oj pana phenela: „O Jehova hine maje sar pravo dad. Molinđum man lese but putija svako dive hem phenđum lese sar osetinava man.“

Okolenđe kola osetinena pe usamljeno šaj te pomožini ked šunena o audio-snimkija ando amaro sajt (Dikh o 8. odlomko) *

8. Sar pomožini tut odova so čitineja i Biblija hem so hor razmislineja ando odova so čitinđan?

8 Redovno čitin e Devleso Lafi hem razmislin ando izveštaja kola mothovena kobor o Jehova mangela tut. I phen, i Bjanka koja tani istrajno, iako šunela andi pi porodica o lafija kola obeshrabrinena la, phenela: „Ked čitinava hem hor razmislinava ando e biblijake izveštaja hem o iskustvija ando e Jehovase sluge kola hine len slična problemija sar mekle, odova ćaće pomožini man.“ Disave hrišćanija napamet sikljona o stihija kola but utešinena len, sar soj tane Psalam 27:10 hem Isaija 41:10. Disave šunena o audio-snimkija ando amaro sajt hem odova pomožini len te na osetinen pe usamljeno.

9. Sar tuće pomožinena o sastankija?

9 De sa tutar te đa redovno ko sastankija. Uduri pošukar ka penđare te phralen hem te phenjen hem odova so šuneja ka ohrabrini tut (Jevr. 10:24, 25). I Masijel, kolatar angleder vaćerđam, phenela: „Iako hijum but lađutni, odlučinđum te đav ko svako sastanko hem te dav komentari. Odova pomožinđa maje te osetinav man so hijum deo andi skupština.“

10. Sose tano važno te ova amala amare phralencar hem phenjencar ki skupština?

10 Ov amal e phralencar hem e phenjencar. Rode amalen ki skupština kolendar šaj te sikljove, bizo obzir kobor berš isi len ja andi koja kultura avena. I Biblija podsetini amen soj tani i „mudrost maškaro phure manuša“ (Jov 12:12). Ama, hem o phure phralja hem phenja šaj but te sikljon ando terne. O David hine but poterno ando Jonatan, ama odova na ćhinavđa len te oven but paše amala (1. Sam. 18:1). On pomožinđe jekh jekhese te služinen e Jehovase ko phare okolnostija (1. Sam. 23:16-18). I phen, i Irina, koja tani jedino Svedoko ki pi porodica, phenela: „Ki skupština ćaće šaj te arakha amalen kola šaj te oven amenđe sar dada, daja, phralja hem phenja. O Jehova šaj prekalo lende te del amen odova so valjani amenđe.“

11. So valjani te ćera te šaj te ovel amen paše amala?

11 Te ove amal nekasa šaj te ovel but pharo, pogotovo ako hijan lađutno. Jekh lađutni phen, koja vićini pe Ratna hem koja hine la protivljenje sebepi o ćaćipe, phenela: „Haljiljum so valjanđa maje pomoć ando me phralja hem phenja ki skupština.“ Šaj te ovel pharo te vaćere nekase sar osetineja tut, ama ako ćereja odova tu šaj te ove paše amal odola osobaja. Te amala mangena te ohrabrinen tut hem te pomožinen tut, ama tu valjani te phene lenđe so mučini tut.

12. Sar šaj i služba te pomožini tut te ovel tut šukar amala?

12 Jekh ando najšukar način sar šaj te ova amala e phralencar hem e phenjencar tano ađahar so ka đa ki služba olencar. I Kerol, kolatar angleder vaćerđam, phenela: „Odova so đeljum ki služba e phralencar hem e phenjencar hem so zajedno ćerđam hem avera buća ki služba e Jehovase, pomožinđa maje te ovel man but šukar amala. Beršencar o Jehova koristinđa len te bi pomožini maje.“ Ćaće vredini te trudine tut te ove amal e phralencar hem e phenjencar. O Jehova koristini len te pomožini tut ked hijan obeshrabrimo, sar na primer ked osetineja tut usamljeno (Posl. 17:17).

POMOŽIN AVERENĐE TE OSETINEN PE SOJ TANE DEO ANDI AMARI PORODICA

13. Koja odgovornost svako amendar isi le ki skupština?

13 Sare isi amen odgovornost ki skupština te ovel mir hem te mothova mangipe jekh premalo jekheste. Ako odova ćeraja, niko na ka osetini pe usamljeno (Jov. 13:35). Odova so ćeraja hem so phenaja šaj ćaće te ohrabrini averen. Zapazin so phenđa jekh phen: „Ked upoznajinđum o ćaćipe, i skupština ulji mi porodica. Ked ne bi o phralja hem o phenja pomožinena man, me ne bi šaj te ovav e Jehovaso svedoko.“ So šaj te ćere te bi pomožineja okolenđe kasi porodica nane ko ćaćipe te osetinen pe soj tane deo andi skupština?

14. So šaj te ćere te ove amal okolencar kola tane neve?

14 Trudin tut te ove amal okolencar kola tane neve ki skupština. Ki početka, amen valjani vilestar te dočekujina okolen kola tane neve ki skupština (Rimlj. 15:7). Ama, amen mangaja te ćera pana diso. Na mangaja samo te pozdravina len već mangaja te ova paše amala olencar. Odolese, ov ljubazno hem mothov so ćaće brinineja tut ando neve ki skupština. Pokušin te haljove kole problemencar borinena pe, ama pazin te na khuve ki olengi privatnost. Disavenđe šaj te ovel pharo te phenen sar osetinena pe, odolese ma ćhiv len zorjeja te vaćeren tuvaja. Umesto odova, ov taktično đi pućeja len diso hem pažljivo šun len đi vaćerena. Na primer, šaj te puće len sar upoznajinđe o ćaćipe.

15. Sar šaj o zrela hrišćanija te pomožinen averenđe ki skupština?

15 Sare ki skupština ka oven ohrabrime ako o zrela hrišćanija, posebno o starešine, mothovena so brininena pe olendar. I Melisa, kasi daj ando tiknipe sikavđa la o ćaćipe, phenela: „Me hijum but zahvalno e phralenđe kola hine maje sar dada, kola provodinđe vreme mancar hem kola beršencar brininđe pe mandar. Ked god mangljum te vaćerav nekasa, on hine othe te šunen man.“ O Maurisio, jekh terno phral kova osetinđa pe usamljeno ked oleso učitelj ulo neaktivno, phenela: „O starešine mothovđe so brininena pe mandar hem odova but pomožinđa maje. On redovno vaćerđe mancar. Đelje mancar ki služba, vaćerđe maje so arakhlje đi proučinđe i Biblija hem čak družinđe pe mancar.“ I Melisa hem o Maurisio, akana tane ki punovremeno služba.

Da li isi neko ki ti skupština kase bi posebno značini te odvojine vreme? (Dikh kotar 16. đi o 19. odlomko) *

16-17. Sar šaj te pomožina averenđe?

16 Pomožin ko praktično način (Gal. 6:10). O Leo, kova služini sar misionari ki jekh phuv koja tani but dur andi olesi porodica, phenela: „Često sa so valjani te ćere tani jekh tikni buti ko pravo vreme. Setinava man ked hine man udes. Ked resljum ćhere, hijum le ko baro stres. Ama, tegani jekh bračno par vićinđa man ko ručko. Na setinava man so haljam, ama setinava man kobor hine ljubazna hem kobor pažljivo šunđe man. Palo odova, osetinđum man but pošukar.“

17 Sare amen uživinaja ko amare pokrajinska sastankija hem kongresija. Tegani hijam zajedno amare phralencar hem phenjencar hem šaj te vaćera ando govorija kola šunđam. Ama, i Kerol, kolatar vaćerđam angleder, phenela: „Me osetinava man but usamljeno ko pokrajinska sastankija hem kongresija.“ Sose osetini pe ađahar? Oj phenela: „Iako hijum maškaro stotine ja hiljade phralja hem phenja, često on bešena zajedno pe porodicaja hem odolese ked dikhava len osetinava man pana pobuter usamljeno.“ Disavenđe kola našalđe pe bračno amale šaj te ovel but pharo ked valjani prvo puti te aven ko pokrajinsko sastanko ja ko kongres bizo leste. Da li penđareja nekas ko isi le asavke problemija? Sose na bi vićineja le te avel tuvaja hem te porodicaja ko aver pokrajinsko sastanko ja ko kongres?

18. Sar šaj te primenina o lafija andi 2. Korinćanima 6:11-13 ked vićinaja nekas te avel koro amende?

18 Provodin vreme averencar. Amen mangaja te ovel amen „pana pobuter mangipe“, pogotovo premalo okola kola osetinena pe usamljeno. Odolese, mangaja te provodina vreme olencar. (Čitin 2. Korinćanima 6:11-13.) I Melisa, kolatar angleder vaćerđam, phenela: „Hijam le but bahtale ked o phralja hem o phenja vićinđe amen koro peste ja te đa negde zajedno olencar.“ Da li isi neko ki ti skupština kas šaj te vićine te avel koro tute?

19. Ked disave phralenđe hem phenjenđe posebno ka značini te ova olencar?

19 Podijekh puti, disave phralenđe hem phenjenđe značini ked avera odvojinena vreme te oven olencar. Disavenđe šaj te ovel pharo te oven ćhere ked olengi porodica slavini nesave praznikija. Avera šaj te oven posebno tužna ko disavo posebno dive ko berš, sar na primer ko dive ked mulo neko kas manglje. Ked provodinaja vreme e phralencar hem e phenjencar kola isi len asavke problemija, amen mothovaja so ćaće brininaja amen olenđe (Fil. 2:20).

20. Sar e Isusese lafija ando Matej 12:48-50 šaj te pomožinen amen ked osetinaja amen usamljeno?

20 Isi but razlogija sose dijekh phral ja phen podijekh puti šaj te osetini pe usamljeno. Ama, na valjani te bistra so o Jehova đanela sar osetinaja amen. Ov često koristini amare phralen hem phenjen te del amen odova so valjani amenđe. (Čitin Matej 12:48-50.) Te bi mothovaja e Jehovase so ceninaja odova so ćerela amenđe, amen valjani te da sa amendar te pomožina amare phralenđe hem phenjenđe. Bizo obzir sar podijekh puti osetinaja amen, amen niked na hijam kokri odolese soj tano o Jehova amencar.

ĐILI 46 O hvala Jehova

^ odl. 5 Da li podijekh puti osetineja tut usamljeno? Ako ja, ov sigurno so o Jehova đanela sar osetineja tut hem mangela te pomožini tut. Ko akava članko, ka dikha so šaj te ćere ako osetineja tut usamljeno. Isto ađahar, ka dikha sar šaj te ohrabrine e phralen hem e phenjen kola osetinena pe ađahar.

^ odl. 5 Disave anava tane menjime.

^ odl. 60 SO DIKHAJA KO SLIKE: Jekhe phralese, kasi romni mulji, pomožini odova so šunela o audio-snimkija ando amaro sajt.

^ odl. 62 SO DIKHAJA KO SLIKE: Jekh phral hem olesi ćhaj mothovena so mislinena upro jekh phuro phral andi skupština.