1. Sostar daștinas le slujitori le Iehovasche te simțon-pe corcore po iechdata?

BUT anda amende simțosaras-ame corcore po iechdata. Anda unii cadal sentimentea nachen sigo, tha anda aver daștin te încăren mai but. Daisaras te simțosaras-ame corcore chiar cana sam mașcar but manușa. Anda chichiva si pharo te arachen pengo than ande iech nevi congregația. Aver muchisaile dur catar lenghe familii savendar sas-le zurales pașarde. Aver phrala hai pheia hasarde ando merimos varecas drago hai si lenghe zurales doro lendar. Hai aver slujitori le Iehovasche, sar si codola cai sile neve ando ciacimos, simțosaren-pe corcore cana lenghi familia sau codola cai sas lenghe amala mechen-le sau așen lenghe contra.

2. Ca ce pușimata va arachaia o răspunso?

² O Iehova prinjianel-ame hai hachiarel-ame mișto. Cana simțosaras-ame corcore, vo jianel cadaia hai camel te ajutil-ame. Sar ajutil-ame o Iehova? Sar daisaras-ame te ajutisaras-ame? Hai sar daisaras te ajutisaras averen anda amari congregația cai simțosaren-pe corcore? Te dichas o răspunso cadale pușimatande.

3. Sar lea sama o Iehova po Ilie?

³ O Iehova camel ca sea lesche slujitori te aven fericime. Vo silo pașă fiesavestar anda amende hai dichel cana simțosaras-ame perade. (Ps. 145:18, 19) Te dichas chichi de but lea sama o Iehova pe pesco profeto o Ilie cai traisardea ande iech timpo zurales pharo anda istoria le Israeloschi. Le slujitori le Devlesche sas-le zurales persecutime le bare dușmanendar le Iehovasche hai o Ilie sas o iechto  cas camle te mudaren. (1 Regi 19:1, 2) Mai but daștil-pe că peradea-les vi o gândo că așilea o corcoro profeto cai slujilas le Iehovasche. (1 Regi 19:10) O Del dichlea sar simțosarelas-pe o Ilie hai cărdea sigo vareso caște ajutil-les. Vo bișaldea ieche îngeros leste caște phenel lesche că ci sas-lo corcoro hai că mai sas but israeliți cai slujinas le Iehovasche. (1 Regi 19:5, 18)

4. Sar sicavel-pe ando Marcu 10:29, 30 că o Iehova lel sama codolendar cai sas-le mechle catar lenghe familii hai lenghe amala?

⁴ O Iehova jianel că atunci cana alosaras te slujisaras lesche chichiva anda amende trebul te cheras bare sacrificii. Sar exemplo, daisaras te hasaras o ajutorii amare neamurengo sau amare amalengo cai ci slujin le Iehovasche. Iech data, daștil-pe că o apostolo Petru sas îngrijorime hai anda codoia pușlea le Isusos: „Ame mechleam sea hai avileam pala tute. Cadea că so va avela te primisaras?”. (Mat. 19:27) Pherdo lașimos o Isus phendea pesche discipolenghe că va avela-le iech bari familia spiritualo. (Citisar Marcu 10:29, 30.) Hai o Iehova, amaro dad cerisco, phenel că va avela sea o timpo pașa codola cai slujin lesche. (Ps. 9:10) Te dichas mai dur chichiva buchia cai daisaras te cheras-le caște primisaras o ajutorii le Iehovasco cana simțosaras-ame corcore.

5. Sostar si mișto te gândisaras-ame că o Iehova ajutil-ame?

⁵ Gândisar-tu sar ajutil-tu o Iehova. (Ps. 55:22) Cadaia va cherela-tu te diches că ci san corcoro. Iech phei po anav Carol *, cai nai-li măritime hai lachi familia na-i co ciacimos, phenel: „Cana gândiv-ma sar ajutisardea-ma o Iehova andel zumaimata, dav mânri seama că ci som corcori. Mai but, si man pachiamos că o Iehova va avela pașa mande vi mai dur”.

6. Sar daștin le versetea anda 1 Petru 5:9, 10 te zuriaren codolen cai simțosaren-pe corcore?

⁶ Gândisar-tu sar ajutil o Iehova le phralen cai simțosaren-pe corcore. (Citisar 1 Petru 5:9, 10.) O Hiroshi, iech  phral cai but bărșa sas-lo o corcoro Martoro anda peschi familia, phenel: „Andi congregația, si ușoro te diches că savoren sile pharimata. Codola cai lenghe familii nai-le ando ciacimos, cadea sar me, sile zuriarde te jianen că fiesavo slujitoro le Iehovasco del sea peschi zor caște slujil lesche chichi mai mișto”.

7. Sar ajutil-tu i rugăciunea?

⁷ Cher tuche iech lașio programo andal activități spiritualo. Mașcar cadala si i rugăciunea. Phen le Iehovasche sea so si ande chio ilo. I Massiel, iech tărni phei cai simțosardea-pe corcori anda codoia că lachi familia duriardea-pe latar cana lea i decizia te slujil le Iehovasche, phenel: „Iech andal mai importanto buchia cai ajutisardea-ma te na mai simțosarav-ma corcori sas te pâtrav mânro ilo angla o Iehova andi rugăciunea. Vo sas sar iech ciacio Dad anda mande, rughisarde-ma lesche mai butivar ande iech ghies hai phendem lesche sea so sas ande mânro ilo”.

8. Sar ajutil-tu cana citisares anda o Cuvânto le Devlesco hai meditosares leste?

⁸ Citisar o Cuvânto le Devlesco ande fiesavo ghies hai meditosar ca le relatări cai sicaven i iubirea le Iehovaschi caring tute. I Bianca, iech phei ca lachi familia prasal-la, phenel: „Ajutil-ma but cana citisarav hai meditosarav ca le relatări biblico hai ca le experiențea le slujitorenghe le Iehovasche cai nachle prin sea codol situații sar me”. Unii phrala încăren andi goghi versetea cai zuriaren-le sar avelas o Psalmo 27:10 hai Isaia 41:10. Aver dichle că cana așunen le înregistrări audio anda le materialea, ajutin-le te na simțon-pe cadea de corcore cana pregătin-pe anda le întruniri sau cana citisaren anda i Biblia.

9. Sar ajutil-tu o fapto te jias ca le întruniri?

⁹ Cher sea so daștis caște jias ca fiesavi întrunirea. O programo va zuriarela-tu hai va daștia te prinjianes mai mișto le phralen hai le pheian andai congregația. (Evr. 10:24, 25) I Massiel, anda savi deam duma mai anglal, phenel: „Chiar cana somas zurales lajiavuni, somas hotârăme te jiav ca fiesavi întrunirea hai te dav iech răspunso. Cadaia ajutisardea-ma te simțosarav că cherav partea andai congregația”.

10. Sostar si importanto te avas amala amare phralența?

¹⁰ Te avas amala amare phralența. Rode te aves amal codolența andai congregația castar daștis te sichios vareso, chiar cana sile mai tărne sau mai phure sar tu sau  aven anda iech medio diferime. I Biblia anel amenghe amintea că „codola phure sile goghiaver”. (Iov 12:12) Vi codola mai phure daștin te sichion but buchia le phralendar mai tărne. O David sas but mai tărno sar o Ionatan, tha cadaia ci așadea-le te avel-le iech amalimos chidino. (1 Sam. 18:1) Von ajutisarde-pe iech averes te slujin le Iehovasche chiar cana nachle prin bare pharimata. (1 Sam. 23:16-18) I Irina, cai si i corcori Martora ande lachi familia, phenel: „Amare phrala hai pheia daștin te aven anda amende sar amare dada, phrala hai pheia. Cadea o Iehova del-ame i familia cai trebul amenghe”.

11. So trebul te cheres caște aven-tu amalimata zurale averența?

¹¹ Na-i ușoro te cheres tuche amala vi mai but cana san lajiavuno. I Ratna, iech phei lajiavuni cai acceptosardea o ciacimos chiar cana aver așile lache contra, phenel: „Dem mânri sama că sas-ma nevoia te avav ajutime mânre phralendar hai pheiandar andai congregația”. Daștil te avel tuche pharo te phenes varecasche sea so simțosares, tha cana pâtres chio ilo, cadaia va cherela te avel-tume iech amalimos zuralo. Che amala camen te zuriaren-tu hai te aven pașa tute, tha trebul te phenes lenghe sar daștin te ajutin-tu.

12. Sar daștil te ajutil-ame i lucrarea de predicare te cheras amenghe lașe amala?

¹² Iech andal mai lașe moduri te cheras amenghe amala si te jias andi predicarea amare phralența. I Carol, anda savi deam duma mai anglal, phenel: „Cărdem manghe but lașe amala cana gălem le pheianța andi predicarea hai cana cărdeam vi aver buchia teocratico ande iech than. O Iehova ajutisardea-ma andel bărșa cai nachle prin cadal amala”. Si ande amaro miștimos te cheras eforturi caște avas amala amare phralența, anda codoia că o Iehova zuriarel-ame prin lende cana sam perade, sar exemplo cana simțosaras-ame corcore. (Prov. 17:17)

13. So trebun te cheren savore andai congregația?

¹³ Savore andai congregația trebun te sicaven iubirea hai pacea ca chonic te na simțosarel-pe corcoro. (Ioan 13:35) So phenas hai so cheras daștil te zuriarel but averen. Dichen so phendea iech phei: „Cana prinjiandem o ciacimos i congregația cărdilea mânri familia, ci daisardemas te cărdiovav iech andal Martori le Iehovasche bi o ajutorii le phralengo”. So daștis te cheres caște ajutis codolen cai sile corcore ando ciacimos te simțosaren că cheren partea andai congregația?

14. Sar daisaras te cheras amenghe amala anda codola neve?

¹⁴ Te cheras amenghe amala anda codola neve. O iechto paso si te primisaras anda ilo codolen neve andi congregația. (Rom. 15:7) Cu sea cadala, camas te cheras mai but sar te salutisaras-le. Camas te sicavas iech ciacio intereso codolenghe neve, ca ando timpo, te daștil te avel-ame iech amalimos chidino lența. Bi te șios-tu ande lenghi viața, încercosar te hachiares prin ce pharimata nachen. Anda unii anda lende daștil te avel mai pharo te phenen so si ando lengo ilo. Anda codoia le sama te na cheres-le te den duma cana ci camen. Mai mișto avelas te ajutis-le te pâtren pengo ilo cana șios lenghe pușimata mai discreto hai cana ascultis pherdo răbdarea so sile  te phenen. Sar exemplo, daștis te pușes-le sar prinjiande o ciacimos.

15. Sar daștin le phrala maturi te ajutin averen andai congregația?

¹⁵ Savore andai congregația bariuvas spiritualo cana le phrala maturi sar avenas le phure, sicaven intereso caring amende. I Melissa, cai sas-li bariardi ando ciacimos laca deiatar, phenel: „Ci daștiv te phenav ande cuvintea chichi de cuci si anda mande o ajutorii le phralengo, cai andel bărșa cai nachle sas-le sar niște dada anda mande. Cana camav te dav duma varecasa jianav că si varecon cai ascultil-ma”. O Mauricio, iech tărno phral cai simțosardea-pe corcoro cana codo casa studiisardea i Biblia mechlea o ciacimos, phenel: „Le phure andai congregația line sama pe mande hai cadaia ajutisardea-ma but. Butivar denas duma manța, găle manța andi predicarea, sicade manghe le idei cai arachle-le ande pengo studio personalo hai chiar cărdeam sporto ande iech than”. Aghies vi i Melissa hai vi o Mauricio, slujin le Iehovasche cu timp integral.

16, 17. So mai daisaras te cheras caște ajutisaras averen?

¹⁶ Te cheras vareso anda aver. (Gal. 6:10) „Butivar sea so trebul te cheras si te sicavas lașimos ca o momento lașio”, phenel o Leo, cai slujil sar misionaro ande iech them dur pesca familiatar. „Anav manghe amintea că ande iech ghies sas-ma iech accidento. Cana arăslem ji la urma chăre somas zurales stresome. Tha pala codoia, iech familia phralenghi acharde-ma te has ande iech than. Ci anav manghe amintea so haleam tha jianav că sicade manghe lașimos hai ascultisarde-ma. Ji la urmă, simțosardem-ma but mai mișto.”

¹⁷ Savore anda amende bucurisaras-ame te jias ca le evenimentea teocratico sar avenas le congresea. Ande cadal ocazii dichas-ame avere phralența hai zuriaras-ame cana das duma andal temea catar o congreso. Tha ita so phenel i Carol, anda savi deam duma mai anglal: „Ci si manghe ușoro te jiav ca le congresea. Chiar cana pașa mande si șăla sau chiar mii phrala, butivar von beșen ande  iech than penghe familiența. Anda codoia, cana dichav-le simțosarav-ma vi mai corcori”. Anda aver si zurales pharo te jian ca o congreso i iechto data pala soste mulea lengo rrom sau romni. Prinjianes varecas cai nachel prin cadal pharimata? Atunci daștis ca o congreso cai avel, te achares-les te beșel ande iech than tusa hai chia familiaia.

18. Sar daisaras te cheras sar phenel-pe ando 2 Corinteni 6:11-13 cana sicavas ospitalitatea?

¹⁸ Beș ande iech than le phralența. Cana cheres destinderi încercosar te achares diferime phralen hai pheian, vi mai but codolen cai simțosaren-pe corcore. Camas ‘te pâtras buhles amare ile’ vi mai but caring cadala phrala. (Citisar 2 Corinteni 6:11-13.) I Melissa, anda savi deam duma mai anglal, phenel: „Me hai mânri dei samas zurales bucurime cana amare amala acharenas-ame lende chăre sau găleamas lența ande excursii”. Avel tuche andi goghi varecon andai congregația caring caste daștis te pâtres buhles chio ilo hai te sicaves lesche ospitalitatea?

19. Cana trebul te beșas mai but amare phralența?

¹⁹ Si anumime ghiesa cana amare phralen sile mai bari nevoia te beșas ande iech than lența. Cana si le sărbatori, anda unii si pharo te beșen codolența anda lenghi familia cai ci slujin le Iehovasche. Aver sile zurales duchade ande fiesavo bărș ando ghies cana mulea lenghe varecon drago. Cana beșas ande iech than le phralența cai nachen prin cadal pharimata sicavas că ‘las sama ciaces lendar’. (Filip. 2:20)

20. Sar daștin te ajutin-ame le cuvintea le Isusosche scriime ando Matei 12:48-50 cana simțosaras-ame corcore?

²⁰ Si but buchia cai cheren ieche creștinos te simțol-pe po iechdata corcoro. Tha, ci trebul te bâstras că o Iehova jianel mișto so si ande amaro ilo. Vo del-ame o ajutorii cai trebul amenghe butivar prin amare phrala. (Citisar Matei 12:48-50.) Sa cadea, vi ame sam recunoscători anda leschi grijia hai iubirea, cana cheras sea so daisaras caște ajutisaras amare phralen. Chiar cana simțosaras-ame po iechdata perade, ame ci sam corcore niciechdata. O Iehova silo sea o timpo pașa amende!