1. Bulya gurhi hali mango abakozi ba Yehova bakaciyumva nka bali kahumba?

HALI amango banji ba muli rhwê baciyumva nka bali kahumba. Bantu baguma baguma, banaciyumve ntyo hisanzi hisungunu. Cikone, haligi n’abandi bohe baciyumva ntyo kasanzi kanji. Ciru n’amango rhuli haguma n’abandi rhwanaciyumva nka rhuli kahumba. Bantu baguma baguma bajira amazibu g’okulonza abîra omu cigamba cihyahya. Hali n’abandi balilamire omu mulala gubamo ecinyabuguma, na ntyo erhi bakalama kuli na bene wabo b’omulala banaciyumve bali kahumba. N’abandi banaciyumve kahumba enyanya z’okubona bafîrirwe n’omuzigirwa wabo. Hali na Bakristu baguma baguma, ci bwenene balya barhacijira nsiku nyinji omu okuli, baciyumva bali kahumba erhi balahirwa erhi kulibuzibwa na bene wabo erhi abîra babo barhali Bahamirizi.

2. Madoso gahi rhwashuzako?

² Yehova aba amanyire anaba ahugûsirwe ngasi kantu karhuyerekire. Anabone akasanzi rhuli rhwaciyumva nka rhuli kahumba, anaba alonzize akarhurhabala lyo rhuhashilwisa entanya za ntyo. Gurhi Yehova arhurhabalamwo? Bici rhwene rhwakajira lyo rhulwisa entanya za ntyo? Na gurhi rhwakarhabala abandi bali omu cigamba bakaciyumva nka bali kahumba? Rhuganirire amashuzo g’ago madoso.

3. Gurhi Yehova ayerekinemwo oku ashibirire Eliya?

³ Yehova aba alonzize abakozi bage boshi babe n’omwishingo. Aba hofi na ngasi muguma wirhu, ananabone amango rhuli rhwaciyumva kubi enyanya z’entanya z’okurhuvuna omurhima. (Enna. 145:18, 19) Rhuganirire kunganaci Yehova ashibiriraga omulebi wage Eliya. Oyo mulume mwishwekerezi alilamire omu kasanzi kazibu k’ishanja ly’aba Israheli. Muli ako kasanzi abakozi ba Yehova balibuzibwa bwenene, na Eliya ye walishimbirwe bwenene n’abakulu bakagilonza okuhagalika Nnamahanga. (1 Bam. 19:1, 2) N’okundi kwarhumaga Eliya aja aciyumva kubi,  kuli kubona oku akagirhanya oku yene mulebi wa Yehova ocisigire. (1 Bam. 19:10) Ho n’aho Yehova ajira kantu kalebe ly’orhabala Eliya. Arhuma malahika ayereka oyo mulebi Wage n’obwalagale oku arhali yene waciri mulebi wa Yehova, haciri abandi ba Israheli bakagikolera Nnamahanga n’obwishwekerezi!​—1 Bam. 19:5, 18.

4. Gurhi olwandiko lwa Marko 10:29, 30 luyerekine entanya za Yehova lugenda abantu balesirwe okurhabalwa n’abandi?

⁴ Yehova aba amanyire oku erhi rhucishoga oku rhwamukolera, banji ba muli rhwê banahikire aha baleka bintu binji. Ebyo bintu bihiziremo oburhabale bakagihâbwa n’abantu bw’omu mulala gwabo erhi n’abîra babo barhali Bahamirizi. Nkaba ciru oko ko kwarhumaga entumwa Petro yadosa Yezu ntya: “Rhwalesire byoshi, rhwakushimba, bici rhwanahâbagwe obwo?” (Mt. 19:27) Yezu abwira abanafunzi bage n’obwalagale oku babà n’omulala gw’ekiroho gw’omw’igulu lyoshi. (Osome Marko 10:29, 30.) Na Yehova, Larha wirhu w’omu mpingu, alaganyize oku agendekera arhabala balya boshi balonzize okumukolera. (Enna. 9:10) Rhulolage bintu biguma na biguma wankajira ly’ohâbwa oburhabale bwa Yehova amango oli walwisa entanya z’okuciyumva kahumba.

5. Bunguke buhi wakaba nabo erhi wakakasegeza obwenge bwawe kw’ebi Yehova ali ajira ly’akurhabala?

⁵ Osegeze obwenge kw’ebi Yehova ali ajira ly’akurhabala. (Enna. 55:22) Okujira ntyo kwanakurhabala ogenderere waba n’entanya nyinja kuyereker’akanga olimo. Mwali wirhu muguma ohamagalwa Carol, * ociri mulamba oba yene Muhamirizi omu mulala gwage, adesire ntya: “Erhi nkengera ebyagezire n’okurhanya kunganaci Yehova antabire amango nali omu mazibu, oko kunantabale ntaciciyumvagya nka ndi kahumba. Na kandi oko kunanyemeze n’obwalagale oku Yehova agendekera antabala.”

6. Gurhi olwandiko lwa 1 Petro 5:9, 10 lwakaha omurhima bala bajira entanya z’okuciyumva bali kahumba?

⁶ Orhanye kunganaci Yehova ali arhabala bene wirhu na bali birhu bakaciyumwa bali kahumba. (Osome 1 Petro 5:9, 10.) Mwene wirhu Hiroshi, wajiraga myaka minji ali Muhamirizi yene omu mulala gwage, adesire ntya: “Biba bilembu  okubona oku omu cigamba, ntaye orhajira mazibu. Okuhungûkwa oku ngasi muguma wirhu anakajira okwage koshi ly’akolera Yehova kwanaha omurhima bala ba muli rhwê babà bone omu okuli.”

7. Gurhi isala likurhabalamwo?

⁷ Obe n’enkomêdu nyinja y’okujira ebintu by’ekiroho. Eyo nkomêdu ehiziremo okubwira Yehova n’obwalagale oku oli waciyumva. (1 Pt. 5:7) Mwali wirhu Massiel adesire ntya: “Okushenga Yehova ngasi mango ko kantu kw’obulagirire kantabire okulwisa entanya zani z’okuciyumva ndi kahumba.” Erhi oyo mwali wirhu ahiga okukolera Yehova akaciyumva nk’ali kahumba, bulya nta muntu w’omu mulala gwage wali Muhamirizi. Ayushwire ntya: “Yehova ali Larha wani w’okunali, nanakagimushenga ngasi lusiku, nakagijira ntyo kanji-kanji omu lusiku lyo mmubwira oku ndi naciyumva.”

8. Gurhi okusoma Akanwa ka Nnamahanga n’okurhanya kw’ebi oli wasoma kukurhabalamwo?

⁸ Okasoma Akanwa ka Nnamahanga ngasi lusiku n’okurhanya oku myanzi eyerekine kunganaci Yehova akuzigira. Mwali wirhu muguma ohamagalwa Bianca, walembire enderho z’okuvuna omurhima z’abantu bw’omu mulala gwage, ahugwîre ntya: “Okusoma n’okurhanya lugenda emyanzi eri omu Bibliya eganirire abakozi ba Yehova bagezire omu mazibu gashushine n’agani kunantabale bwenene.” Bakristu baguma na baguma banabike omu bukengere bwabo Amandiko gakabaha oburhulirize, kwa lwiganyo olwandiko lwa Ennanga 27:10 n’olwa Izaya 41:10. Abandi babwine oku okuyumvirhiza e anrejistrema y’ecitabu bali bayigiramo amango bali barheganya entimanano erhi amango bali basoma Ebibliya kunabarhabale barhaciciyumvagya bali kahumba.

9. Gurhi okuja oku ntimanano kukurhabalamwo?

⁹ Okacihangana oje oku ntimanano ngasi mango. Wanayunguka bwenene n’eprograme y’okuhâna omurhima erhaganyizibwe olo lusiku, na kandi wanamanya bene winyu na bali binyu bwinja. (Hb. 10:24, 25) Massiel rhwaganiriraga embere, adesire ntya: “Ciru akaba nali muntu wa nshonyi, nakagijira okwani koshi lyonja oku ntimanano zirhu zoshi z’ecigamba n’okuhâna amashuzo. Oko kwantabala narhondera okuciyumva oku mba muguma w’omu bantu b’omu cigamba.”

10. Bulya Gurhi kuli kwa bulagirire okujira obwîra haguma n’abirhu Bakristu bishwekerezi?

¹⁰ Ojire obwîra haguma n’Abakristu bishwekerezi. Olongereze abîra omu cigamba wakayiga olwiganyo lwabo, wanalonza ciru n’aba murhagwerhi myaka miguma nabo erhi aba murhaburhagwa haguma. Ebibliya erhukengizize oku “abashosi bo bajira” obumanye. (Ayu. 12:12, Mashi Bible) Cikone abashosi nabo banaciyigiriza binji kugerera emisole mishwekerezi.  Daudi ali musole bwenene kulusha Yonatani, cikone oko kurhabahanzagya okujira obwîra bwa hofi-hofi. (1 Sam. 18:1) Daudi na Yonatani barhabalana lyo bagendekera bakolera Yehova ciru akaba bali omu mazibu manji. (1 Sam. 23:16-18) Mwali wirhu ohamagalwa Irina oba Muhamirizi wa Yehova yene omu mulala gwage adesire ntya: “Bene wirhu na bali birhu banahikira aha babà babusi birhu erhi bene wirhu na bali birhu b’ekiroho. Yehova anabakolesa lyo bahikiriza amalagirire girhu.”

11. Bici oshinganine ojire ly’oba n’obwîra bwa hofi-hofi haguma n’abandi?

¹¹ Okucijirira abîra bahyahya kurhakaba kulembu, bwenene erhi akaba oba muntu wa nshonyi. Mwali wirhu Ratna okayumva enshonyi waciyigirizagya okuli ciru ankaba akagihagalikwa, adesire ntya: “Nahikira aha nayemera oku ndagirire oku burhabale bw’omulala gwani gw’ekiroho.” Kwanaba kuzibu okuganirira owundi oku oli waciyumva, cikone okujira enganîro za ntyo, g’oguba murhondero gw’okurhondeza obwîra busezire. Abîra bawe babà balonzize okukuha omurhima n’okukurhabala, kobinali banacifinja obabwire oku oli waciyumva lyo bakurhabala.

12. Gurhi omukolo gw’amahubiri gwakakurhabala ocijirire abîra binja?

¹² Okukaja omu mahubiri haguma n’abirhu Bakristu, eba njira nguma nyinja y’omu njira z’okucijirira abîra. Carol rhwaganiriraga embere, adesire ntya: “Nahikira aha naba na bîra banji erhi nkageza kasanzi kanji omu mahubiri n’omu yindi mikolo y’eciteokrasi. Kugerera abo bîra, Yehova antabire muli eyi myaka yoshi.” Okujira obwîra bwa hofi-hofi haguma n’abirhu Bakristu bishwekerezi kunarhulerhere bunguke bunji. Yehova anakolesa abîra ba ntyo lyo bakurhabala olwise entanya nzibu, kwa lwiganyo nk’okuciyumva oli kahumba.​—Mig. 17:17.

13. Mukolo guhi ngasi muntu w’omu cigamba agwerhe?

¹³ Ngasi muntu w’omu cigamba agwerhe omukolo g’okugendekeza omurhula n’obuzigire omu cigamba lyo nta muntu yeshi-yeshi waciyumvagya nk’ali kahumba. (Yn. 13:35) Enderho n’ebijiro birhu byanaha abandi omurhima! Orhanye kw’ebi mwali wirhu muguma aderhaga: “Erhi nciyigiriza okuli, ecigamba gwaba mulala gwani. Ntakahikire okuba muguma w’omu Bahamirizi ba Yehova buzira burhabale bwa bene wirhu na bali birhu.” Bici wakajira ly’orhabala balya babà bone omu okuli lyo bagendekera baciyumva oku nabo bali baguma b’omu cigamba?

14. Gurhi wakajira ly’orhondeza obwîra haguma n’abaciri bahyahya?

¹⁴ Obe murhanzi okurhondeza obwîra haguma n’abandi. Rhwanajira ntyo omu kukayankirira n’obushagaluke abantu bahyahya bayishire omu cigamba cirhu. (Rm. 15:7) Cikone rhwanajira binji kulusha okulamusanya kone. Rhulonzize rhujire obwîra busêzire haguma n’abandi enyuma za kazanzi kalebe. Co cirhumire okashagalukira abahyahya onayerekane oku obashibirire. Olonze okumanya gurhi bayosire na mazibu maci bali barhimanana nago, cikone orhajaga omu bintu byabo bibonekine nk’ihwè. Baguma na baguma ba mulibo banaba n’amazibu gw’okubwira abandi entanya zabo, co cirhumire, orhabasezagya oku baganire haguma na nawe. Lubero n’oko, wanabadosa amadoso garhakarhuma bakubwira ihwè lyabo, n’amango bali bakushuza wanabayumvirhiza onarhuzize. Kwa lwiganyo, wanabadosa gurhi bamanyagamwo okuli.

15. Gurhi Abakristu bakuzire kiroho bakarhabala abandi omu cigamba?

¹⁵ Abantu boshi omu cigamba banahikira aha bakula kiroho amango Abakristu bakuzire kiroho, ci bwenene abagula, bali bayerekana oku  babashibirire. Melissa, walereragwa omu okuli na nnina, adesire ntya: “Ntakahashihugûla kunganaci mba nshagalukire bene wirhu bakagintabala nka ba larha b’ekiroho kasanzi ka myaka minji. Ngasi mango erhi nakagiba ngwerhe obulagirire b’okuganira, nakagiba ngwerhe muntu mulebe wakanyumvirhiza.” Mwene wirhu Mauricio waciyumvagya kahumba erhi omwalimu wage w’Ebibliya aleka okuli, adesire ntya: “Abagula bakayerekana oku banshibirire n’oko kwakampa omurhima bwenene. Bakanganiza ngasi mango. Bakandusa omu mukolo gw’amahubiri n’okunganirira oku buhirhi bw’ekiroho bakuzire omu busomi bwabo bw’Ebibliya, ciru banakagiyisha rhuje oku sporo haguma nabo.” Melissa na Mauricio bayishija omu mukolo gw’akasanzi koshi.

16-17. Bindi bici rhwakajira lyo rhurhabala abandi?

¹⁶ Okaha abandi oburhabale balagirirekwo. (Gl. 6:10) Leo oba misiyonere omu cihugo ciba kuli n’omulala gwage adesire ntya: “Kanji-kanji ebi wakaba olagirireko, ciba cijiro cinja cisungunu cijijirwe omu kasanzi kashinganine. Nkengire lusiku luguma najiraga e aksida y’omutuga. Erhi ngaluka aha ka, nakaciyumva kubi bwenene. Cikone mwene wirhu muguma na mukage bampamagala oku rhugend’ishangira ecijumbu haguma nabo. Ntacikengiri bici rhwalire olo lusiku, cikone nkengire oku banyumvirhiza bwinja; n’oko kwarhuma narhondera okuciyumva bwinja!”

¹⁷ Rhweshi rhunashagalukire entimanano zirhu z’eciteokrasi, nk’entimanano zirhu nkulu, zinarhurhabale rhugeze akasanzi haguma na bene wirhu na bali birhu, na kandi rhunashagalukire okuganira haguma nabo okubiyerekire ehotuba rhwayumvirhe. Cikone, Carol rhwaganiriraga embere, adesire ntya: “Kanji-kanji oku ntimanano nkulu ko nkaciyumva nka ndi kahumba.” Bulya gurhi aciyumva ntyo? Acibiriderha erhi: “Ciru ankaba nambe nzungulusirwe na bene wirhu na bali birhu banji, bohe banakaba badamire haguma n’abantu b’omu mulala gwabo. Erhi mbona badamire haguma ntyo, nanciyumve ndi kahumba bwenene.” Abandi bajira amazibu gw’okuja oku ntimanano nkulu erhi oku ntimanano y’ecigamba olusiku lurhanzi enyuma z’okufîrwa n’omuzigirwa wabo. Ka hali omuntu omanyire oli walwisa amazibu ga ntyo? Wanamulalika ayishishagalukira programe nguma y’eciteokrasi haguma n’omulala gwawe.

18. Gurhi rhwakakolesa ihano liri omu lwandiko lwa 2 Abakorinti 6:11-13 amango rhuyegerezize lebe?

 ¹⁸ Okageza akasanzi haguma n’abandi. Olonze gurhi wakakahamagala bene wirhu na bali birhu mberuluka lyo mugeza akasanzi haguma, ci bwenene balya balugiciyumva bali kahumba. Rhulonzize ‘rhuyigule omurhima gwirhu gwoshi,’ ci bwenene kuli abo bantu baciyumva bali kahumba. (Osome 2 Abakorinti 6:11-13.) Melissa rhwaganiriraga embere, akengire ntya: “Rhwakagishagaluka bwenene erhi abîra birhu bakarhulalisire oku rhubalambagirire emwababwe kandi erhi kubalama haguma nabo.” K’omu cigamba cinyu muli omuntu wakayegereza aha mwawe?

19. Mangaci okugeza akasanzi haguma n’abirhu Bakristu bwakaba kwa bulagirire bwenene?

¹⁹ Hali amango abirhu Bakristu bashagalukira bwenene okugeza akasanzi haguma nirhu. Baguma na baguma banabone oku kurhali kwinja okugeza akasanzi haguma na bene wabo b’omulala barhali Bahamirizi omu mango g’ensiku nkulu z’ecipagani. N’abandi hali ensiku baciyumva kubi bwenene, kwa lwiganyo, erhi olusiku omuzigirwa wabo afâga luhika. Erhi rhwakakageza akasanzi haguma na bene wirhu na bali birhu bali balwisa amazibu ga ntyo, rhwanayerekana oku kobinali rhuba ‘rhubashibirire.’​—Fl. 2:20.

20. Gurhi enderho za Yezu ziri omu Mateyo 12:48-50, zakarhurhabala amango rhuli rhwaciyumva rhuli kahumba?

²⁰ Hali bintu binji byakarhuma mango maguma na maguma Omukristu aciyumva ali kahumba. Cikone, rhurhashinganini rhuyibagire oku Yehova aba ahugûsirwe akanga rhulimo. Anarhuhe ebi rhulagirireko, kanji-kanji kugerera abirhu Bakristu. (Osome Mateyo 12:48-50.) Na nirhu rhwanayereka Yehova oku rhushagalukire ogo mupango g’obuzigire ahiragaho, nka rhwakajira okwirhu koshi lyo rhurhabala bene wirhu na bali birhu. Kasanzi kalebe rhuciyumve bwinja erhi rhuciyumve kubi, ngasi mango rhukakengera oku rhurhali kahumba bulya Yehova ali haguma na nirhu ensiku zoshi!