1. Bwakinyi ingi nsaa bafubi ba Yehowa abepushaa bupenka?

INGI nsaa, be bungi bakwatudi abepushaa bupenka. Bwa bangi, bino t’abikambaa kwata mafuku e bungi nya. Bwa bangi namu, abapusha bino munda mwa mafuku e bungi. Twi kwipusha bupenka sunga twekala munkatshi mwa bantu. Abyelelaa bangi bukopo bwa kupeta ba kuuku mu kakongye kapya. Bangi abatukila mu kifuko akikuminaa kukita myanda pamune, anka nsaa y’abende kula na bena kifuko kyabo, abepushaa bupenka. Bangi abepushaa bushiye bwa muntu abadi bafwishe. Bangi bena Kidishitu, bikishekishe bano baki bapya mu bya binyibinyi, abepushaa bupenka nsaa y’abebasumbushena sunga kwibakyengyesha kwi bena kifuko na ba kuuku babo bashi balangwidi ba Yehowa.

2. Nkonko kinyi y’atwalula?

² Yehowa auku na apushaa myanda yoso yatudi nayo. Nsaa y’atwipusha bupenka, Yehowa auku, na akumina kwitukwasha bwa kunyingila luno lukalakashi. Mushindo kinyi awitukwashaa Yehowa? Twi kukita kinyi bwa kwikwasha atwe banabene? Na twi kukita kinyi bwa kukwasha bangi mu kakongye abepusha bupenka? Twaluleyi ku ino nkonko.

3. Mushindo kinyi ubadi Yehowa muleshe’shi, apasukila Eliya?

³ Yehowa akuminaa’shi bafubi baye bekale na muloo. E pepi na oso a kwatudi na amonaa nsaa yoso yatudi benyongole sunga babofule kwishimba. (Mis. 145:18, 19) Tala mushindo ubadi Yehowa mupasukile mutemuki Eliya. Uno muntu  sha lulamato badi kwanka mu kipungo kibadi Isaleele mu nshalelo e bukopo. Bantu basha matalwa ba mu Isaleele abadi ababingabinga balangwidi b’Efile Mukulu, bikishekishe, abadi abakimbi kwipaa mpa na Eliya. (1 Bf. 19:1, 2) Na dingi, Eliya badi apwandjikisha’shi, naye mutemuki umune bashala afubila Yehowa, na bino bibadi binyishe ku mu bofusha. (1 Bf. 19:10) Musango umune, Yehowa badi mukite kintu kampanda bwa kukwasha Eliya. Yehowa badi mutume mwikeyilu bwa kushinkamisha Eliya’shi t’ebupenka nya. Mwikeyilu bamulungwile’shi, kwi bangi bena Isaleele be bungi baky’abatungunuka na kufubila Yehowa na lulamato!​—1 Bf. 19:5, 18.

4. Mushindo kinyi aulesha Maako 10:29, 30 shi, Yehowa apasukilaa bafubi baye babadi basumbushene kwi bifuko na ba kuuku babo?

⁴ Yehowa auku’shi nsaa y’atusangula bwa ku mufubila, bangi ba kwatudi abesumina ingi miloo. Kimune kya ku bintu kyatudi balombene kushimisha, nyi bukwashi bwa bena kifuko sunga ba kuuku betu. Mutumibwa Mpyele badi pangi ekalakasha, pabayipwishe Yesu’shi: “Twi balekye byooso twakulonda. Byaabya nkinyi akikeekala kwanka bwetu?” (Mat. 19:27) Yesu badi mushinkamishe balongi baye’shi, abakapete kifuko kikata kya mu kikudi. (Badika Maako 10:29, 30.) Na Yehowa Mfumu a kifuko kyetu kya mu kikudi, mmulee’shi akwasha boso abakumina kumufubila. (Mis. 9:10) Tala myanda yodya kukita bwa kupeta bukwashi bwa Yehowa pwepusha bupenka.

5. Bwakinyi bi buwa kunangushena pabitale mushindo ukwete kwitukwasha Yehowa?

⁵ Nangushena ku mushindo ukwete aukukwasha Yehowa. (Mis. 55:22) Bino abikukwasha bwa kwikala na mweneno e buwa pabitale mwanda obe. Mukwetu mukashi Carol * e bukupi, sha bena kifuko bashi mu bya binyibinyi amba’shi: “Pantentekyesha mafuku ashale na panangushena mushindo unkwashe Yehowa mu nkalakashi, abinkwasha bwa kupela kwipusha bupenka. Na abinshinkamisha’shi, Yehowa ekala nka kwanka bwa kunkwasha mu mafuku aafiki.”

6. Mushindo kinyi wi 1 Mpyeele 5:9, 10, ayingisha baba boso abepusha bupenka?

 ⁶ Nangushena pabitale mushindo ukwete Yehowa kukwasha bangi bena Kidishitu abepusha bupenka. (Badika 1 Mpyeele 5:9, 10.) Hiroshi mukwetu mulume badi Temwe a Yehowa bupenka munda mwa bipwa bi bungi mu kifuko kyabo, amba’shi: “Mu kakongye, mbibofule kumona’shi, bantu boso be’nka na nkalakashi. Kuuka’shi, atwe boso tukwete atwitatshisha bwa kufubila Yehowa, nkulombene kunyingisha oso a kwatudi epusha bupenka mu bya binyibinyi.”

7. Luteko alukukwashaa naminyi?

⁷ Lama byubishi bi buwa bya mu kikudi. Abitungu olungule Yehowa byoso bywepusha. (1 Mp. 5:7) Massiel amba’shi: “Kimune kya ku bintu bi na muulo kinkwashe bwa kupela kwipusha bupenka, nyi nkuteka Yehowa n’eshimba dyoso. Badi bu nshami, na nadi na mutekye efuku dyoso misango i bungi, na nadi namulungula byanepusha.” Pabadi uno mukwetu mukashi ki nsongwa, badi epusha bupenka mwanda kifuko kyaye ta kibadi akifubila Yehowa.

8. Kubadika Bible na kumunangushena akukukwashaa naminyi?

⁸ Badika Eyi dy’Efile Mukulu efuku dyoso, na onangushene pa myanda ayishimika kasele pa kifulo kya Yehowa b’obe. Bianca mukwetu mukashi badi munyingile kusabulwa na kifuko kyaye amba’shi: “Kubadika Eyi dy’Efile Mukulu na kunangushena myanda i mwanka, ya bafubi ba Yehowa abadi bapete myanda i mumune na yande, kunkwashe ngofu.” Bangi bena Kidishitu mbalamine bifundwe abibanyingisha bu Misambo 27:10 na Yeeshaya 41:10. Bangi namu abamonaa’shi, bi buwa kutemesha mikanda ikobolwe ya kulonga mu bisangilo nsaa y’abelumbula sunga nsaa y’ababadika Bible bwa kupela kwipusha bupenka.

9. Kutwela mu bisangilo akukukwashaa naminyi?

⁹ Ekitshishe bwa kutwela mu bisangilo misango yoso. Programe a bisangilo a kunyingisha, na dingi akukwasha bwa kwiukena na bakwetu balume na bakashi kalolo. (Eb. 10:24, 25) Massiel atatupwile kutemuna amba’shi: “Sunga binadi na buufu, nadi mwate kitshibilo kya kutwela bisangilo byoso na kutusha lwalulo. Bino bibadi binkwashe bwa kwipusha bu mwina kakongye.”

10. Bwakinyi bi na muulo kudya bu kuuku na bena Kidishitu basha lulamato?

¹⁰ Dya bu kuuku na bena Kidishitu ba sha lulamato. Kimba ba kuuku mu kakongye balombene nkukwasha, byabekala bakukudile, bena bobe, na sunga bekela na bipikwa bilekene na byobe. Bible etutentekyesha’shi bantu “bakulu nyi bena binangu.” (Yob. 12:12,  EEM) Na bantu bakulu namu, bekulongyela bi bungi kwi ba nsongwa ba sha lulamato. Davide badi mukinga ngofu pe Yonatane, anka bino ta mbibakutshishwe kwikala ba kuuku. (1 Sam. 18:1) Davide na Yonatane abadi abekwashena bwa kufubila Yehowa sunga bibabadi na nkalakashi. (1 Sam. 23:16-18) Irina mukwetu mukashi e bupenka Temwe a Yehowa mu kifuko kyabo amba’shi: “Bakwetu bena Kidishitu mbalombene kufika baledi betu ba mu kikudi sunga bu bakwetu ba mu kifuko. Yehowa mulombene kwibafubisha bwa kukumbasha nkalo yetu.”

11. Nkinyi akitungu’shi okite bwa kwikala mu kipwano ki bukopo na bangi?

¹¹ Kupeta ba kuuku bapya ta nkubofule nya, bikishekishe su we na buufu. Ratna mukwetu mukashi mulongye bya binyibinyi mu nkalakashi amba’shi: “Bibadi abitungu’shi ntekye kifuko kyande kya mu kikudi bukwashi.” Mbilombene kwikala bukopo bwa kulungula muntu bywepusha, anka p’atwisamba mbilombene kwitukwasha bwa kwikala ba kuuku. Ba kuuku b’obe abakumina nkunyingisha na nkukwasha, anka abitungu w’ebalungule bwa’shi baukye kyabadya kukita.

12. Mudimo wa bulungudi wi nkukwasha bwa kudya bu kuuku na bangi naminyi?

¹² Ungi mushindo wi buwa wa kudya bu kuuku, nyi nkutuka mu bulungudi na bangi bena Kidishitu. Carol atatutemwine amba’shi: “Ne mupete ba kuuku be bungi be buwa pa kutuka mu bulungudi na bakwetu bakashi, na pa kukita ingi midimo ya mu kikudi. Yehowa mmukwasha munda mwa bipwa bi bungi kukidila kwi bano ba kuuku.” Kudya bu kuuku na bena Kidishitu basha lulamato akwikalaa na muulo. Yehowa afubishaa bano ba kuuku bwa nkukwasha nsaa ywepusha bupenka.​—Nki. 17:17.

13. Muntu oso mu kakongye mulombene kukita kinyi?

¹³ Muntu oso e kukwasha bwa’shi mu kakongye mwikale kifulo na butaale, na bwa’shi muntu su ngumune t’epushanga bupenka. (Yo. 13:35) By’atukitshi na by’atwakula mbilombene kunyingisha bangi ngofu! Pusha abyakula ungi mukwetu mukashi: “Pa nadi nalongo bya binyibinyi, kakongye kabadi kafikye kifuko kyande. Ntshi nadi mulombene kufika Temwe a Yehowa kushi bukwashi bwabo.” We kukita kinyi bwa kukwasha baba abepusha bupenka, bwa’shi b’epushe bu bena kakongye?

14. We kukita kinyi bwa kudya bu kuuku na bantu bapya?

¹⁴ Ata mpángo ya kudya bu kuuku na bantu bapya. Twi kwibikita pa kwibakukila na muloo oso ku bisangilo. (Lom. 15:7) Anka, ta twimenanga nka penda pa kwi bakukila na muloo nya. Abitungu tunyingishe bu kuuku bwetu nsaa yoso. Byabya, ikala na kalolo na oleshe’shi opasukila bantu bapya. Pamutwe pa kutwelakana mu myanda yabo ibatale abo banabene, nkimba bwa kuuka myanda yabadi nayo. Bangi, abibelelaa bukopo bwa kwakula by’abepusha, byabya dimukila kwibakitshisha bwa’shi baakule. Anka, ebele tu nkonko na mayele oso na otemeshe ngalulo yabo na lwishinko. Bu kileshesho, we kwibepusha byabadi baukye bya binyibinyi.

15. Bena Kidishitu basha lukumino lunyingye mbalombene kukwasha bangi bena kakongye naminyi?

¹⁵ Lukumino lwa muntu oso mu kakongye alunyingi su atukitshi myanda ayilesha’shi atupasukila bangi. Bikishekishe su bakulu na baba banyingye ngofu mu lukumino abebikitshi. Melissa abadi bakushe mu bya binyibinyi kwi nyinaye, amba’shi: “Natumbula ngofu bakwetu balume abadi bu ba nshami,  abadi abakisha nami nsaa pamune na bampasukile munda mwa bipwa. Nsaa yoso inadi na mwanda, kubadi muntu a ku ntemesha.” Mauricio mukwetu ki nsongwa badi mwipushe bupenka nsaa ibadi mulongyeshi aye a Bible mukatukye mu bya binyibinyi amba’shi: “Mushindo ubadi bakulu bampasukile, ubadi unkwashe ngofu. Abadi abesamba nami nsaa yoso. Abadi abatuku nami mu bulungudi, kundungula myanda i na muulo yabadi bapete mu kwilongyela kwabo, na kwasha nami maasha pamune.” Melissa na Mauricio be mu mudimo wa nsaa yoso.

16-17. Mu mishido kinyi modi mulombene kukwasha bangi?

¹⁶ Ebakwashe mu mishindo ilekene. (Nga. 6:10) Mukwetu Leo badi mufube mwiumbo di kula na kifuko kyaye amba’shi: “Kyoso kyodya kwikala nakyo lukalo nyi kikitshino kya kalolo pa nsaa i buwa. Natentekyesha efuku dinadi mupete masaku na motoka. Nakafikile ku nshibo, anka nadi mukalakashwe byabya. Anka, ungi mulume na mukashi abangitamine kwabo bwa nkadya nabo. Tantekyesha kibatudi badye nya, kadi natentekyesha bibabadi bantemeshe na kalolo. Ku nfudilo nadi mwipushe kalolo byabya!”

¹⁷ Atwe boso atusangelaa myanda ya mu kikudi bu bikongeno, mwanda atukishaa nsaa pamune, na kwisamba myanda ibatulongo. Anka, Carol atatupwile kutemuna amba’shi: “Nepushaa bupenka ku bikongeno.” Bwakinyi? Amba’shi: “Sunga nekala mwifunyishwe na nkama sunga binunu bya bakwetu balume na bakashi, ke bungi abekalaa nka na bifuko byabo. Nsaa yammono byabya, nanyisha kwipusha bupenka.” Bangi abibelelaa bukopo bwa kwenda ku kikongeno su bakyabakatuka mu kufwisha mwina dibaka nabo. Ouku muntu e mu luno lukalakashi su? Su mbyabya, mwitamine bwa’shi nukite myanda ya mu kikudi pamune mu kifuko kyobe.

18. Mushindo kinyi watudya kutumikila 2 Bena-Kodinda 6:11-13 nsaa y’atwitamina bantu ku nshibo kwetu?

¹⁸ Kishayi nsaa pamune. Tompa kukisha nsaa pamune na bakwetu balume na bakashi belekene, bikishekishe bano abepusha bupenka. Abitungu ‘twibafungwile mashimba etu,’ bikishekishe bano bakwetu. (Badika 2 Bena-Kodinda 6:11-13.) Melissa atatutemwine  atentekyesha’shi: “Tubadi na muloo nsaa ibadi bakwetu balume na bakashi abetwitamina ku maabo bwa kukisha nabo nsaa pamune na bifuko byabo, sunga kwenda mu kutemba pamune.” Kwi muntu mu kakongye odi mulombene kwitamina kobe bwa kukisha naye nsaa pamune su?

19. Bwakinyi kukisha nsaa na bena Kidishitu mu kipungo kampanda kwi kwibakwasha ngofu?

¹⁹ Kwi kipungo kilombene bena Kidishitu netu kwikala na muloo su twebetamina bwa kukisha nabo nsaa pamune. Bikwelela bangi bukopo bwa kwikala munkatshi mwa bena bifuko nabo bashi ba Temwe ba Yehowa nsaa y’abakitshi misangelo ya bipwilo bya madimi. Bangi abepushaa bi bubi ngofu, apakumbana efuku dibadi difwe muntu abadi bafule. P’atukisha nsaa pamune na bakwetu balume na bakashi be mu luno lukalakashi, atulesha’shi ‘atwikalakasha’ bwabo.​—Fid. 2:20.

20. Mayi a Yesu e mu Mateo 12:48-50 aetukwasha naminyi nsaa y’atwipusha bupenka?

²⁰ Kwi tubingilo twi bungi twi kufikisha mwina Kidishitu mu kwipusha bupenka. Anka, tatulubanga’shi Yehowa auku kalolo mwanda oso watudi nao. Etupeya kyoso kyatudi nakyo lukalo, ke bungi ku bukwashi bwa bakwetu bena Kidishitu. (Badika Mateo 12:48-50.) Ku lwetu lupese, atulesha’shi atusankila ino mpángo ya kifulo yate Yehowa, pa kukita mwetu moso bwa kukwatshishena kifuko kyetu kya mu kikudi. Sunga twepusha naminyi, ta twi bupenka mwanda Yehowa enka netu!