1. Faandi mbei dee dinima u Jehovah sa ta fii so juu taa de dë de wanwan?

 GAANSË fuu ta fii taa u dë u wanwan so juu. So sëmbë an ta fii sö u wan longi pisiten, ma wotowan sa ta fii sö u wan möön longi pisiten. Aluwasi u ku hia sëmbë dë makandi, tökuseei u sa fii taa u dë u wanwan. A ta taanga da so sëmbë u de feni mati te de go a wan woto kemeente. Wotowan bi dë a wan famii di bi lobi u du soni makandi, ma u di de bi musu foloisi go a wan longi kamian mbei de bi ko ta fii taa de dë de wanwan. Wotowan ta hangi wan sëmbë u de di dëdë, di de bi lobi seei. Boiti di dë, so Keesitu sëmbë sa ta fii taa de dë de wanwan, te dee famii u de ku dee mati u de di an ta dini Jehovah an ta nama ku de möön, nasö te de ta du ku de. Dee Keesitu sëmbë aki sa ta fii sö, möönmöön te de dë njunjun a di biibi.

2. Un hakisi woo piki?

² Jehovah sabi hii soni fuu, nöö a ta fusutan u te dou. Te u ta fii taa u dë u wanwan, nöö a ta fusutan unfa u ta fii, nöö a ta kë heepi u. Unfa Jehovah ta heepi u? Andi u sa du u heepi useei? Söseei unfa u sa heepi wotowan a di kemeente di ta fii taa de dë de wanwan? Boo piki dee hakisi aki.

3. Unfa Jehovah bi lei taa a bi ta booko hën hedi ku Elia?

³ Jehovah kë u hii dee dinima fëën ta dë waiwai. Jehovah dë zuntu ku hiniwan fuu, nöö a ta si te u ta fii tjali nasö te u ta fii bookosaka (Ps. 145:18, 19). Pakisei unfa Jehovah bi ta booko hën hedi ku di tjabukama fëën de kai Elia. Di womi aki bi ta  libi a wan ten ka soni an bi ta waka bunu a Isaëli. Wanlö sëmbë bi dë a Isaëli di bi abi makiti, söseei di an bi lobi Jehovah. Dee sëmbë aki bi ta du ku dee sëmbë dee bi ta dini Jehovah, nöö de bi kë kii Elia (1 Kön. 19:1, 2). Elia bi si tu kuma hën bi da di wan kodo tjabukama a di ten dë di bi ta dini Jehovah jeti. Di soni dë bi mbei a möön lasi hati (1 Kön. 19:10). Jehovah Gadu bi du wan soni wantewante u heepi Elia. A bi manda wan ëngëli go piki di tjabukama fëën taa an bi dë hën wanwan. Di ëngëli bi piki Elia taa sömëni woto Isaëli sëmbë bi dë jeti di bi ta dini Jehovah ku hii de hati!​—1 Kön. 19:5, 18.

4. Unfa Maikusi 10:29, 30 ta lei unfa Jehovah ta booko hën hedi tjika ku dee sëmbë dee lasi famii ku mati di bi ta heepi de?

⁴ Jehovah sabi taa te woo ko dini ën, nöö so fuu o lasi sömëni soni. Wan u dee soni dee u ta lasi, sa dë di heepi di dee famii fuu ku dee mati fuu di an ta dini Jehovah, bi ta heepi u. Kandë u di apösutu Petuisi bi ta booko hën hedi, mbei a bi hakisi Jesosi wan daka taa: „Uu bi disa hii soni seei ko ta waka a i baka, nöö un paima u o feni?” (Mat. 19:27) Jesosi bi piki dee bakama fëën a wan lobihati fasi taa dee sëmbë u di kemeente bi o dë kuma wan gaan famii da de. (Lesi Maikusi 10:29, 30.) Nöö Jehovah, di hedima u di gaan famii aki, bi paamusi u taa a bi o heepi dee sëmbë dee kë dini ën (Ps. 9:10). Luku andi da wantu soni di i sa du u Jehovah sa heepi i te i ta fii taa i dë i wanwan.

5. Faandi mbei a bunu fii ta buta pakisei a di fasi fa Jehovah ta heepi i?

⁵ Buta pakisei a di fasi fa Jehovah ta heepi i (Ps. 55:22). Di soni dë o heepi i fii si taa ja dë ju wanwan. Carol, b da wan sisa di an tööu, nöö an abi famii a di tuutuu lei. A bi taki taa: „Te mi ta pakisei unfa Jehovah bi heepi mi u mi hoi dou te soni bi ta taanga da mi, nöö di soni dë ta heepi mi u mi si taa ma dë mi wanwan. A ta heepi mi tu u mi dë seiki taa hii juu Jehovah o ta heepi mi.”

6. Unfa 1 Petuisi 5:9, 10 sa da sëmbë taanga, te de ta fii taa de dë de wanwan?

⁶ Pakisei unfa Jehovah ta heepi dee baaa ku  dee sisa dee ta fii taa de dë de wanwan. (Lesi 1 Petuisi 5:9, 10.) Wan baaa de kai Hiroshi, bi dë di wan kodo sëmbë fu hën famii di bi dë a di tuutuu lei, nöö di soni dë bi dë sö sömëni jaa longi. Di baaa aki bi taki taa: „A di kemeente a dë gbelingbelin u si taa hii sëmbë ta abi u de bookohedi. U sabi taa hii u tuu ta mbei möiti fuu sa dini Jehovah ka u sa dini ën dou, nöö di soni dë sa da so fuu taanga ee wa abi famii a di tuutuu lei.”

7. Unfa di begi di i ta begi ta heepi i?

⁷ Du dee soni dee i musu ta du a di dini u Jehovah. I musu ta piki Jehovah gbelingbelin unfa i ta fii (1 Pet. 5:7). Di wan njönku sisa de kai Massiel bi ko a di tuutuu lei, nöö a bi ta fii taa a dë hën wanwan, u di dee famii fëën an bi ta dini Jehovah. A bi taki taa: „Wan u dee soni di heepi mi gaanfa u ma fii möön taa mi dë mi wanwan, da di begi di mi bi ta begi Jehovah fajafaja. Mi bi ta fii taa a dë wan Tata da mi tuutuu. Mi bi ta begi ën sömëni pasi a wan daka dendu, nöö mi bi ta konda dëën unfa mi bi ta fii.”

8. Unfa di lesi di i ta lesi di Wöutu u Gadu, ta kai pakisei nëën, ta heepi i?

⁸ I musu ta lesi di Wöutu u Gadu hiniwan daka, söseei i musu ta kai pakisei a dee woto u Bëibel dee ta lei taa Jehovah lobi i. Dee famii u wan sisa de kai Bianca bi ta piki ën soni di bi ta mbei a fii bookosaka. Bianca bi taki taa: „Mi bi ta lesi dee woto u Bëibel, nöö mi bi ta pakisei fundu u de. Söseei mi bi ta lesi woto u dinima u Jehovah u di ten aki, di bi abi dee seei bookohedi kuma mi. Dee soni dë bi heepi mi seei.” So baaa ku sisa ta hoi tëkisi a hedi di ta da de kötöhati seei. Tu u dee tëkisi aki da Psalöm 27:10 ku Jesaaja 41:10. Wotowan ta haika dee buku fuu di dee baaa lesi, te de ta seeka deseei da dee komakandi, nasö te de ta haika di Bëibel seei. De ta taki taa di soni dë ta heepi de u de an fii sö möön taa de dë de wanwan.

9. Unfa di go di i nango a dee komakandi ta heepi i?

⁹ Mbei möiti fii nango a dee komakandi hii juu. Dee soni dee joo lei a komakandi, o da i taanga. Söseei joo ko sabi dee baaa ku sisa fii möön bunu (Heb. 10:24, 25). Sisa Massiel, di u bi taki soni fëën a fesi, bi taki taa: „Mi bi dë wan sëmbë di bi ta sen. Ma tökuseei mi bi buta taa mi bi o nango a hii dee komakandi, söseei taa mi bi o ta da wan piki. Di soni dë bi heepi mi u mi fii taa miseei dë wan sëmbë u di kemeente tu.”

10. Faandi mbei a dë fanöudu fuu ko dë mati ku baaa ku sisa di lobi Jehovah tuutuu?

¹⁰ Ko dë mati u baaa ku sisa di lobi Jehovah tuutuu. Suku mati a di kemeente di i sa lei soni a de, aluwasi i ku de an abi di wan jaa nasö  aluwasi de dë sëmbë u wan woto föluku. Di Bëibel ta taki taa „sëmbë di ko gaandi kaa abi köni” (Jöpu 12:12). Dee baaa ku dee sisa dee ko gaandi kaa sa lei soni a dee möön njönkuwan tu. Dafiti bi njönku gaanfa möön Jonatan, ma tökuseei di soni dë an bi tapa de u de an ko dë gaan mati (1 Sam. 18:1). Dafiti ku Jonatan bi ta heepi deseei u de dini Jehovah, hii fa so juu soni bi ta taanga da de (1 Sam. 23:16-18). Irina da wan sisa di an abi famii a di tuutuu lei. A bi taki taa: „Dee baaa ku dee sisa fuu a di biibi sa ko dë kuma u mama, u tata, u baaa nasö u sisa. Jehovah sa tei de u heepi u.”

11. Andi i musu du fii ku wotowan sa ko dë gaan mati?

¹¹ A sa taanga pikisö fii ko abi njunjun mati, möönmöön te i de wan sëmbë di ta sen. Ratna da wan sisa di ta sen, nöö a bi ko a di tuutuu lei hii fa sëmbë bi ta du ku ën. A bi taki taa: „Mi bi musu ko ta si taa a dë fanöudu u dee baaa ku dee sisa u mi heepi mi.” A sa dë wan taanga soni fii konda da wan woto sëmbë unfa i ta fii, ma te i du sö, nöö i ku di sëmbë dë sa ko dë gaan mati. Dee mati fii kë da i taanga, söseei de kë heepi i, ma a dë fanöudu fii mbei de ko sabi unfa de sa du di soni dë.

12. Unfa di peleikiwooko sa heepi i fii ko abi bunu mati?

¹² Wan u dee möön bunu fasi fa i sa ko abi mati, da te i ta peleiki ku woto baaa ku sisa. Sisa Carol di u bi taki soni fëën kaa, bi taki taa: „Mi bi ko abi sömëni bunu mati, u di mi ku woto sisa bi ta peleiki makandi, söseei u di u bi ta du woto soni makandi a di dini u Jehovah. Jehovah bi tei dee mati aki u de heepi mi a dee jaa dee pasa.” Te u mbei möiti fuu ko dë mati ku baaa ku sisa di lobi Jehovah, nöö hii juu u ta feni wini fëën. Jehovah ta tei de lö mati dë u de heepi i te i ta fii bookosaka, möönmöön te i ta fii taa i dë i wanwan.​—Nöng. 17:17.

13. Un faantiwöutu hii dee sëmbë u di kemeente abi?

¹³ Hiniwan sëmbë a di kemeente abi di faantiwöutu u du soni sö taa lobi ku fiifii libi sa dë a di kemeente. A sö wan fasi, sëmbë an o dë di ta fii taa a dë hën wanwan (Joh. 13:35). Dee soni dee u ta du ku dee soni dee u ta taki, sa da wotowan taanga tuutuu! Luku andi wan sisa bi taki. A bi taki taa: „Di mi ko sabi soni u di tuutuu lei, nöö dee sëmbë u di kemeente bi ko dë mi famii. Ma bi o sa ko dë wan kotoigi u Jehovah ee de an bi heepi mi.” Andi i sa du u heepi dee sëmbë dee an abi famii a di tuutuu lei, u de sa fii taa deseei da sëmbë u di kemeente tu?

14. Andi i sa du fii ko dë mati ku dee njunjun sëmbë dee ta ko a di kemeente?

¹⁴ Mbei möiti fii ko dë mati ku dee njunjun sëmbë dee ta ko a di kemeente. Di fosu soni di u sa du, hën da u sa wai ku de te de ko a di kemeente (Lo. 15:7). Ma u musu du woto soni jeti, boiti di da di woo da de odi ku piizii. U kë faa dë taa pikipiki, u ku de ta ko dë möön gaan mati. Fëën mbei wai ku dee sëmbë dee ko njunjun a di kemeente, nöö lei de taa i ta booko i hedi ku de tuutuu. Mbei möiti fii ko sabi un bookohedi de abi. Ma na hakisi de soni di sa mbei de fii wan fasi. A sa taanga da so u de u de konda da i unfa de ta fii. Fëën mbei na duwengi de u de fan. Ka fii du sö, nöö a bi o bunu fii hakisi de soni ku köni, nöö i haika bunu te de ta piki i. Kandë i sa hakisi de unfa de du ko sabi soni u di tuutuu lei.

15. Unfa dee Keesitu sëmbë dee taanga a di biibi sa heepi wotowan a di kemeente?

¹⁵ Hii sëmbë a di kemeente o nango a fesi a di biibi, te dee baaa ku dee sisa dee taanga a di biibi kaa ta buta pakisei a de, möönmöön dee gaanwomi. Melissa da wan sisa fuu, nöö  hën mama kiijëën a di tuutuu lei. A bi taki taa: „Mi ta tei ën u bigi seei taa wanlö baaa bi heepi mi. De bi dë kuma tata da mi a di biibi. De bi ta dë makandi ku mi, söseei de bi ta buta pakisei a mi a hii dee jaa de pasa. Te mi bi kë fan ku wan sëmbë, nöö de bi ta dë kabakaba u haika mi.” Mauricio da wan njönku baaa di bi ta fii taa a dë hën wanwan di di sëmbë di bi ta lei ën soni u Bëibel kumutu a di tuutuu lei. A bi taki taa: „Dee gaanwomi bi lei taa de bi ta booko de hedi ku mi, nöö di soni dë bi heepi mi gaanfa seei. Hii juu de bi ta fan ku mi. De bi ta peleiki ku mi, de bi ta konda da mi andi da dee bunu soni di de bi feni di de bi lei soni u Bëibel, söseei de bi ta du sport makandi ku mi.” Melissa ku Mauricio tuu ta du di hii-ten diniwooko nöunöu.

16-17. Un woto soni u sa du u heepi wotowan?

¹⁶ Du wan soni u heepi wotowan. (Gal. 6:10). Wan baaa de kai Lao, di ta du di sëndëlengiwooko a wan longi köndë ka dee famii fëën an dë, bi taki taa: „So juu, kë nöö i ta kë u wotowan du wan piki soni u lei taa de lobi i. Mi ta mëni jeti taa wan daka, mi bi naki ku wagi. Di mi go dou a wosu, ma bi saandi mi bi musu du. Hën wan baaa ku hën mujëë kai mi ko a de pisi fuu sa njan wan piki soni makandi. Ma ta mëni andi u bi njan di daka dë möön, ma mi ta mëni jeti taa de bi haika mi ku pasensi. Te u kaba fëën, mi bi ko ta fii möön bunu!”

¹⁷ Hii u tuu lobi dee keling-komakandi ku dee könklësi fuu, u di u sa ta dë makandi ku wotowan, söseei u sa ta taki u dee soni dee u lei. Ma sisa Carol, di u bi taki soni fëën kaa, bi taki taa: „Mi ta fii seei taa mi dë mi wanwan te u dë a dee keling-komakandi nasö a dee könklësi.” Faandi mbei a ta fii sö? Wë a bi taki taa: „A dë sö tuu taa mi ta dë a höndöhöndö nasö dusudusu baaa ku sisa mindi, ma möön gaanfa de ta ko ku dee famii u de. Te mi ta si de, nöö mi ta fii seei taa mi dë mi wanwan.” Te so sëmbë manu nasö de mujëë lasi libi, nöö a ta taanga da de te de o go a wan könklësi nasö a wan keling-komakandi de wanwan u di fosu pasi. I sabi wan sëmbë di dee soni aki ta miti ö? Kandë i sa hakisi ën fii ku ën ku dee sëmbë fii go makandi a di woto gaan komakandi di o hoi.

18. Unfa u sa du di soni di sikifi a 2 Kolenti 6:11-13?

¹⁸ Du soni makandi ku wotowan. Mbei möiti  fii ta du soni makandi ku woto baaa ku sisa, möönmöön dee ta fii taa de dë de wanwan. U kë ’jabi u hati’ da wotowan, möönmöön da dee sëmbë aki. (Lesi 2 Kolenti 6:11-13.) Sisa Melissa, di u bi taki soni fëën a fesi, bi taki taa: „Hii juu a bi ta dë wan piizii soni da u te dee mati fuu bi kai u fuu ko a de pisi, sö taa u bi sa dë makandi ku de ku dee sëmbë u de, nasö fuu bi sa go a kamian makandi ku de.” Wan sëmbë dë a di kemeente ka i dë di i bi o sa du soni makandi ku ën u?

19. Na un ten dee baaa ku dee sisa fuu bi o feni wini seei ee u dë makandi ku de?

¹⁹ Ten o dë ka dee baaa ku sisa fuu o wai seei ee u du soni makandi ku de. A sa taanga da so baaa ku sisa u de dë makandi ku dee famii u de dee an ta dini Jehovah, te de ta hoi dee piizii daka dee nama ku poipoi biibi, nasö di sëmbë ta hoi a di köndë u de. Wotowan sa ta fii tjali seei te so daka dou, kuma di daka di wan sëmbë di de bi lobi seei lasi libi. Te u ta suku fasi fuu dë makandi ku dee baaa ku dee sisa dee abi dee lö bookohedi aki, nöö u ta lei de taa u ta ’mëni de ku hii u hati’.​—Fil. 2:20.

20. Unfa dee soni dee Jesosi taki a Mateosi 12:48-50, sa heepi u te u ta fii taa u dë u wanwan?

²⁰ Sömëni soni dë di sa mbei wan Keesitu sëmbë sa ta fii taa a dë hën wanwan. Ma tökuseei, wa musu fëëkëtë taa Jehovah sabi tuutuu unfa u ta fii. A lo’ u wooko ku dee baaa ku dee sisa fuu, u da u dee soni dee u abi fanöudu. (Lesi Mateosi 12:48-50.) U ta lei Jehovah taa u ta tei ën u bigi taa a seti di kemeente, te u ta mbei hii möiti u heepi dee baaa ku dee sisa fuu. Aluwasi fa u ta fii, tökuseei nöiti u dë u wanwan, u di hii juu Jehovah ta dë ku u.