1. Khu ginani sithumi sa Jehovha dzimbe dzitepo si nga pwago wutundzu?

NYA vangi gwathu dzimbe dzitepo va ngupwa wutundzu. Ga vambe gudzipwa gogo kha gu hweyi gu vbindra. Ganiolu, vambe va ngu dzega tepo nyo laphe. Ganiolu, hi ngapwa wutundzu ambari na hi randredwe khu vathu nya vangi. Vambe si ngu va garadzeya gu gira dzipari libandlani nya liphya. Vambe va guta khomu nya dzindranga va golago gu gira silo vatshavbo, khu kharato va ngupwa wutundzu tepo va fulugago va ya khala hwindzo ni valongo vawe. Vambe va ngupwa wutunzu khu gu ba va fedwe khu muthu va mu haladzago. Nigu mambe Makristo ma gu maphya lisineni ma ngupwa wutundzu tepo ma wugedwago khu valongo ni vale va nga ba va ri dzipari dzawe gale.

2. Khu sevbini siwudziso hi na hlamulago avba nya ndrima yeyi?

² Jehovha a nguti ni gu pwisisa satshavbo si hi dugeleyago. Uye a ngu dziti tepo hi pwago wutundzu, nigu a ngu dzina gu hi phasa gu pala gudzipwa gogo. Ganiolu, Jehovha a gu hi phasa kharini? Ginani hi nga girago gasi hi dzi phasa? Nigu ginani hi nga girago gasi gu phasa vambe libandlani va pwago wutundzu? Hongoleni hi wona mihlamulo nya siwudziso sesi.

3. Jehovha yeyedzide kharini gu khuye a di gu khathala khu Eliya?

³ Jehovha a gu vbweta gu khuye satshavbo sithumi saye si tsaka. Uye womo vbafuvbi ga moyo ni moyo wathu nigu a ngu pwisisa tepo hi dzi pwago na hi vbede tshivba. (Ndzi. 145:18, 19) Wona edzi Jehovha a yeyedzidego khidzo gu khuye a di gu khathala khu muprofeti Eliya. Mwama yoyu nyo tumbege vbanyide  ndrani nya tepo nyo garadze ga matimo ya Israyeli. Vathu nya tshivba Israyeli va nga ba va si haladzi Jehovha va di gu wugeya sithumi saye nigu ngudzungudzu va di gu vbweta gu songa Eliya. (1 Dzipf. 19:1, 2) Gu diga isoso, Eliya a di gu pimisa gu khuye, khuye enga muprofeti wa Jehovha a tshadego nigu isoso si di gu mu vbedza ngudzu tshivba. (1 Dzipf. 19:10) Nya mba hweya Jehovha phaside Eliya. Jehovha a di rumeya ngilozi gasi yi ya tiyisegisa Eliya gu khiyo a di ri mwalo enga. Ngilozi yi di embeya Eliya gu khiyo gu di ngari ni Vaisrayeli nya vangi va nga ba va thumeya Jehovha khu gutumbega! — 1 Dzipf. 19:5, 18.

4. Libhuku la Marko 10:29, 30, lo yeyedza kharini edzi Jehovha a khathalago khidzo khu sithumi saye si pwago wutundzu?

⁴ Jehovha a ngu dziti gu khuye gasi gu mu thumeya, vambe gwathu si lombide gu va diga silo nya singi hwane. Si nga gira valongo vathu ni dzipari dzathu va si thumeyigo Jehovha na va emide gu hi seketeya. Adzina Pedro a di gu garadzega tepo a nga wudzisa Jesu khuye: “Ethu hi digide silo sathu satshavbo hi gu landra. Libhaso muni hi na gu li manago?” (Mat. 19:27) Jesu khu gwadi tiyisegiside vapizane gu khuye libandla li na ba li ri ndranga wawe. (Leri Marko 10:29, 30.) Nigu Jehovha, Papayi wathu wa ndzadzini a na phasa vale va vbwetago gu mu thumeya. (Ndzi. 9:10) Hongole hi wona silo nyo khaguri nya lisima u nga girago gasi gu pala wutundzu.

5. Khu ginani si gu sadi gu vega gupima avba nya edzi Jehovha a gu phasago khidzo?

⁵ Vega gupima gwago avba nya edzi Jehovha a gu phasago khidzo. (Ndzi. 55:22) Wa gu gira isoso, si na gu phasa gu wona gu khuwe u mwalo wenga. Ndriyathu moyo nya nyamayi a si gu tshadhigo nyo pwani khu Carol, * a gu enga lisineni wa ri khuye: “Nyo khedza hwane nyi dundrugeya edzi Jehovha a nyi phasidego khidzo ga dzitepo nyo garadze so nyi gira nyi tiyisega gu kheni nyi mwalo nyenga. Nigu Jehovha a na ba ari ni eni tepo yatshavbo.”

6. Libhuku la 1 Pedro 5:9, 10 li nga tiyisa kharini vale va pwago wutundzu?

⁶ Dundrugeya khedzi Jehovha a phasago khidzo vambe vandriyathu va pwago wutundzu.  (Leri 1 Pedro 5:9, 10.) Ndriyathu moyo nyo pwani khu Hiroshi, a thumeyago Jehovha khu tepo nyo laphe enga ndrangani gwawe wari khuye: “Libandlani, si ngu vbevbuga gu wona gu vatshavbo va ngu tshangana ni sigaradzo. Hi ngu dziti gu khethu hatshavbo ha gu dzi garadza gasi gu thumeya Jehovha, nigu isoso si nga tiyisa ava a gu avo vonga va thumeyago Jehovha ndrangani gwawe nya nga eni.”

7. Nombelo wu nga gu phasa kharini?

⁷ Gombeya tepo yatshavbo, u leri Bhibhiliya u bwe u hongola mitshanganoni. U yede gu bhuleya Jehovha edzi u dzipwago khidzo. (1 Ped. 5:7) Wona esi si ganedwego khu muphya moyo nya nyamayi nya Fakazi ya Jehovha nyo pwani khu Massiel. Kha nga olu a nga ba ari enga a hungidego gu thumeya Jehovha ndrangani gwawe, Massiel a di gupwa wutundzu. Uye wa ri khuye: “Egi gi nga ba gi nyi phasa gu emisana ni wutundzu, gu gombeya ga Jehovha khu monyo wangu watshavbo. Jehovha Papayi wangu nya lisine nigu nyi di gu gombeya tshigu ni tshigu nyi mu embeya edzi nyi nga ba nyi dzipwa khidzo.”

8. Gu leri Bhibhiliya ni gu dundrugeya khesi u leridego si nga gu phasa kharini?

⁸ Leri lito la Nungungulu tshigu ni tshigu, u bwe u dundrugeya khu matimo nyo kongome nya Bhibhiliya ma yeyedzago edzi Jehovha a gu haladzago khidzo. Ndriyathu moyo nyo pwani khu Bianca a timiseyago malito ma vbedzago tshivba ya valongo vaye wari khuye: “Gu leri Bhibhiliya ni matimo nya womi nya sithumi sa Jehovha sa gale si emisanidego ni gigaradzo nyo fane ni gyangu ni gu dundrugeya khayo si ngu nyi phasa ngudzu.” Mambe Makristo ma ngu vegisa hungoni milowo yi tiyisago nya nga Ndzimo 27:10 ni Isaya 41:10. Vambe vari khavo gu engiseya audhiyu nya guleri nya Bhibhiliya ni dzi audhiyu nya mabhuku ma na thumiswago mitshanganoni si ngu va phasa gu pala wutundzu.

9. Gu wona mitshangano si nga gu phasa kharini?

⁹ Gira satshavbo u si kodzago gasi u manega mitshanganoni tepo yatshavbo. Mitshangano yi na gu tiyisa, nigu u na bwe u ti gwadi vandriyathu. (Hebh. 10:24, 25) Massiel hi ganedego khuye gupheyani wari khuye: “Ambari olu nyi gu muthu nyo degule, nyi di hunga gu hongola mitshanganoni yatshavbo nyi bwe nyi dzi emiseya gu ningeya mihlamulo. Isoso si nyi phaside gu dzipwa na nyi gira gipandre nya libandla.”

10. Khu ginani si gu ni lisima gu manega ni wupari ni vandriyathu?

¹⁰ Gira wupari ni vandriyathu libandlani. Gira wupari ni vandriyathu libandlani va gu giyeyedzo nya gyadi, ambari nari vaphya, va nyo dandre khu tanga mwendro vandriyathu nya mafumbo nyo hambane. Bhibhiliya yi ngu hi  dundrugisa gu khiyo: “Guti gu na ni vale va gumbidego.” (Joba 12:12) Ambari ulolo ava va dandridego khu tanga va nga hevbula nya singi ga vaphya libandlani. Dhavhidhe a diri dugwana ngudzu ga Jonatane, ganiolu va khade dzipari nya dzi khongolo. (1 Sam. 18:1) Avo va phasanide gu thumeya Jehovha ambari olu va nga ba va emisana ni sigaradzo nya sikhongolo. (1 Sam. 23:16-18) Moyo nya ndriyathu nyo pwani khu Irina a thumeyago Jehovha enga ndrangani gwawe wari khuye: “Vandriyathu libandlani va nga khala nga vapapayi ni vandriyathu gwathu. Jehovha a nga va gira va khala ndranga hi yi vbwetago.”

11. Ginani u nga girago gasi gu manega ni dzipari nya dzadi?

¹¹ Kha si vbevbugi gu gira dzipari nya dziphya, ngudzungudzu wo ba uri muthu nyo degule. Ndriyathu moyo nya nyamayi nyo degule nyo pwani khu Ratna a hevbudego lisine ambari olu a nga ba a wugedwa, o tshamuseya gu khuye: “Eni nyi di yede gu dzumeya gu kheni nyi ngu vbweta giphaso ga ndriyathu va liphuvboni.” Ambari olu si si vbevbugigo gu bhuleya muthu nyo khaguri edzi u dzipwago khidzo, ganiolu wa gu gira isoso si na tiyisa wupari wago naye. Dzipari dzago dzi ngu dzina gu gu tiyisa ni gu gu phasa, ganiolu gasi gu gira isoso uwe u yede gu dzi phasedzeya guti edzi dzi nga girago khidzo isoso.

12. Thumo nyo tshumayele wu nga gu phasa kharini gu gira dzipari nya dzadi?

¹² Yimbe ndziya nyo gire khiyo dzipari gu patega thumoni nyo tshumayele ni vambe vandriyathu. Carol hi ganedego khuye gupheyani ganede khuye: “Gu patega thumoni nyo tshumayele ni yimbe mithumo ya liphuvboni ni vandriyathu si nyi phaside gu gira dzipari nya dzadi. Ndrani nya myaga yeyi, Jehovha a nyi phaside khu gu thumisa dzipari dzedzi.” Khu lisine, gwadi gu dzigaradzeya gu gira wupari ni vandriyathu. Jehovha o thumisa dzipari dzodzo gasi gu hi phasa gu pala sigaradzo nya nga wutundzu. — Mav. 17:17.

13. Ginani egi moyo ni moyo wathu a yedego gu gira libandlani?

¹³ Moyo ni moyo wathu a yede gu gira satshavbo a si kodzago gasi gu andrisa gurula libandlani ni gu yeyedza lihaladzo ga vatshavbo, iso si na phasago gu gu si manegi ni moyo a pwago wutundzu. (Joh. 13:35) Malito yathu ni esi hi girago si nga tiyisa vambe! Nga wona esi si ganedwego khu ndriyathu moyo nya nyamayi: “Tepo nyi nga hevbula lisine, vandriyathu libandlani va di khala valongo vangu. Gima na nya sa khala Fakazi ya Jehovha na ri khatshi kha nya phaswa khavo.” U nga phasa kharini oyu a gu enga lisineni gu dzipwa na gu haladzwa khu vandriyathu libandlani?

14. Ginani u nga girago gasi gu gira wupari ni ava va gu vaphya lisinini?

¹⁴ Zama gu gira wupari ni ava va gu vaphya lisineni. Hi nga pheya khu gu hakha gwadi ava va gu vaphya lisineni tepo va vbohago libandlani. (Rom. 15:7) Ambari ulolo, hi nga gira nya singi guvbindra basi gu va losa. Khu gu gimbiya nya tepo gu vbwetega hi khala dzipari dzawe nya dzikhongolo. Khu kharato, yeyedza wuwadi u bwe u yeyedza gu khuwe u ngu khathala khavo khu lisine. Zama gu pwisisa sigaradzo sawe, ganiolu u nga va giri siwudziso si na va girago vapwa dzitshoni. Dundruga gu khuwe, adzina vambe si nga va garadzeya gu ganeya edzi va dzipwago khidzo. Khu kharato, u nga va gurumedzi gu ganeya edzi va dzipwago khidzo. Va gire siwudziso khu ndziya nya yadi u bwe u engiseya gwadi tepo va hlamulago. Adzina giwudziso nya gyadi u nga girago khegi “u li tide kharini lisine”?

15. Vandriyathu va vidzidwego khu liphuvboni va nga phasa kharini vambe vadriyathu libandlani?

 ¹⁵ Tepo vandriyathu va vidzidwego khu liphuvboni, ngudzungudzu madhota, va yeyedzago gukhathala khu vambe, libandla la gu engedzeya gu tiya. Melissa a hevbudzidwego lisine khu mamayi waye gu khugeya wananani o tshamuseya gu khuye: “Nyi ngu va bonga ngudzu vandriyangu, kholu va khade nga vapapayi vangu ndrani nya myaga yeyi. Avo va di gu khathala kheni ni gu dzi ninga tepo nyo bhule ni eni. Tepo yatshavbo nyi nga ba nyi vbweta gu bhula, nyi di gu dziti gu kheni gu kheni gu na ni muthu nyo khaguri a na nyi engiseyago.” Maurìcio, muphya moyo a pwidego wutundzu tepo muhevbudzi waye nya Bhibhiliya a nga diga lisine wari huye: “Madhota ma yeyedzide gu khathala kheni ni gu isoso si nyi phaside ngudzu. Avo tepo yatshavbo va di gu ganeya ni eni. Avo va di gu hongola ni eni thumoni nyo tshumayele, va nyi bhuleya dzithomba va dzi manidego omu nya gihevbulo gyawe nya muthu enga va bwe va hagana ni eni.” Olu Melissa ni Maurìcio vo thumeya Jehovha omu nya thumo nya tepo yatshavbo.

16-17. Ginani gambe hi nga girago gasi gu phasa vambe?

¹⁶ Phasa vambe. (Gal. 6:10) Leo a thumago kha nga misiyonariyu hwindzo ni gaya wari khuye: “Gutala nya dzitepo egi hi gi vbwetago gu giredwa gilwanyana nya gyadi basi khu tepo yakone. Nyo dundruga litshigu nyi nga manana ni acidente nya movha. Nyi vbohide gaya na nyiri estresadhu ngudzu, ganiolu patwa moyo wu di nyi konvhidhari gasi gu ya hodza nawo gilogyo. Kha nyi gi dundrugi egi hi nga hodza ganiolu nyi gu dundruga gu kheni avo va nyi engisede gwadi tepo nyi nga ba nyi ganeya. Hwane nya isoso, nyi di dzipwa gwadi.”

¹⁷ Hatshavbo hi ngu yi gola mitshangano nya yikhongolo nya nga tshangano nya mughanga ni kongresu. Ga tepo yeyi hi nga khala ni vandriyathu hi bhula khesi hi si hevbudego avba nya dziganelo. Ganiolu, nga wona esi Carol hi ganedego khuye gu pheyani a ganeyago. Uye wari khuye: “Omu nya mitshangano nya mighanga ni dzikongresu nyi di gupwa wutundzu.” Khu ginani? Uye wari khuye: “Lisine gu nyi di randredwe khu mazanazana ya vandriyathu, ganiolu gu wona vatshavbo na va khade ni valongo vawe si di si vbevbugi gwangu,  khiyo tepo yoyo nyi nga ba nyipwa wutundzu.” Vambe si ngu va garadzeya gu hongola avba nya mitshangano yeyi hwane nyo fedwe khu pari yawe nya wugadzi. Ina u nguti muthu nyo khaguri a tshanganago ni sigaradzo sesi? Khu ginani u gu mba mu konvhidhari gasi u ta khala naye gumogo ni ndraga yago avba nya tshangano wu landreyago?

18. Hi nga thumisa kharini malito ma gomogo omu ga 2 Vakorinto 6:11-13, tepo hi konvhidharigo vandriyathu gaya gwathu?

¹⁸ Vbungadza navo. Vbungadza ni vandriyathu nyo hambanehambane, ngudzungudzu ava va pwago wutundzu. Gu vbwetega hi tula “myonyo yathu” ngudzungudzu ga vandriyathu va pwago wutundzu. (Leri 2 Vakorinto 6:11-13.) Melissa a khumbugidwego gupheyani wari khuye: “Hi di gu tsaka ngudzu tepo vandriyathu va nga ba va hi konvhidhari gasi gu hongola madzigaya gwawe gasi guya vbungadza navo hi bwe hi pasiyari navo.” Ina u ngu dundrugeya ndriyathu nyo khaguri wa libandlani gwago u nga hadzi mu konvhidhari gaya gwago gasi u ta vbungadza naye?

19. Khu ga sevbini siemo ngudzungudzu hi yedego gu dzi ninga tepo nyo khale ni vandriyathu?

¹⁹ Ga dzimbe dzitepo vandriyathu va na tsaka ngudzu ha gu dzi ninga tepo nya gu bhule navo. Vambe si ngu va garadzeya gu khala vbafuvbi ni valongo vawe va gu siri Dzifakazi dza Jehovha tepo va girago mibuzo yi gimbeleyanago ni wukhongeyi nya malipha. Vambe va ngupwa ngudzu guvbisa monyo tepo li vbohago litshigu a ngafa khilo muthu va mu golago. Ha gu dzi ninga tepo nyo khale vbafuvbi ni vandriyathu va tshanganago ni sigaradzo sesi, hi na yeyedza gu khethu hi ngu khatala khavo.— Filp. 2:20.

20. Malito ya Jesu ma gomogo omu ga Matewu 12:48-50, ma nga hi phasa kharini ha gu ba hipwa wutundzu?

²⁰ Kha nga hi si wonidego, gu na ni sighelo nya singi si girago vandriyathu nya vangi vapwa wutundzu. Ambari ulolo, kha hi yeli gu divala gu khethu Jehovha a ngu pwisisa gwadi edzi hi dzipwago khidzo. Gu diga isoso, Uye tepo yatshavbo a ngu hi phasa khu gu thumisa vandriyathu. (Leri Matewu 12:48-50.) gasi gu yeyedza gu khethu hi ngu bonga Jehovha khu gu ba a hi ningide libandla, hi yede gu gira satshavbo hi si kodzago gasi gu phasa vandriyathu. Ni ga gevbini giemo u gomogo ga igyo, dundruga gu khuwe kha wuri wenga. Jehovha tepo yatshavbo na ni uwe.