1. Nkaambo nzi babelesi ba Jehova zimwi ziindi ncobakonzya kulendelelwa?

BUNJI bwesu tulalendelelwa zimwi ziindi. Kuli bamwi, penzi eeli lilafwambaana kumana. Pele bamwi, lilakonzya kutola ciindi cilamfwu. Tulakonzya kulendelelwa nokuba kuti tuli akati kabantu banji. Bamwi cilabakatazya kujana balongwe mumbungano mpya. Bamwi bazwa mumukwasyi mobakamantene, aboobo balalendelelwa kapati ciindi nobalongela kulamfwu abanamukwasyi. Mpoonya bamwi balabayeeya kapati bayandwa babo bakafwa. Alimwi Banakristo bamwi, kwaambisya bapya, balimvwa kulendelelwa ciindi nobakakwa naa kupenzyegwa abanamukwasyi alimwi abaabo ibakali balongwe babo ibatali bakombi ba Jehova.

2. Mibuzyo nzi njotutiingule?

² Jehova ulizyi alimwi akumvwisya zintu zyoonse kujatikizya ndiswe. Ciindi notwalendelelwa, ulazyiba alimwi uyanda kutugwasya kulizunda penzi eeli. Ino Jehova utugwasya buti? Ncinzi ncotukonzya kucita kutegwa tuligwasye tobeni? Alimwi mbuti mbotukonzya kugwasya bamwi mumbungano ibalimvwa kulendelelwa? Atulange-lange bwiinguzi kumibuzyo eeyi.

3. Mbuti Jehova mbwaakatondezya kuti wakali kumubikkila maano Elija?

³ Jehova uyanda kuti bakombi bakwe boonse kabakkomene. Ulaafwaafwi kuli umwi aumwi wesu, alimwi ulabona ciindi notuuside anotutyompedwe. (Int. 145:18, 19) Amubone Jehova mbwaakamubikkilide maano musinsimi wakwe Elija. Mwaalumi ooyu uusyomeka wakapona muciindi cikatazya kapati mu  Israyeli yansiku. Bakombi ba Jehova bakali kupenzyegwa kapati, alimwi basinkondo balaanguzu ibakali kukazya Leza bakali kuyanda kumujaya Elija. (1Bam. 19:1, 2) Kuyungizya waawo, cimbi cakali kumukatazya Elija nkuyeeya kuti ngomusinsimi alikke wakaceede iwakali kubelekela Jehova. (1Bam. 19:10) Cakufwambaana Leza wakabweza ntaamu kutegwa amugwasye Elija. Wakatuma mungelo kwaambila musinsimi wakwe kuti tali alikke pe, akuti kwakali bana Israyeli bambi banji ibakacili kubelekela Jehova cakusyomeka.—1Bam. 19:5, 18.

4. Mbuti lugwalo lwa Marko 10:29, 30 mbolutondezya mbwababikkila maano Jehova aabo ibaleka kugwasyilizyigwa abanamukwasyi naa balongwe?

⁴ Jehova ulizyi kuti ciindi notusala kumubelekela, toonse tweelede kulyaaba kusiya zintu zimwi. Eeci cilabikkilizya akuleka kugwasyilizyigwa abanamukwasyi alimwi abalongwe ibatamubelekeli Jehova. Ambweni akaambo kakuti wakali kulibilika, mwaapostolo Petro wakabuzya Jesu kuti: “Twasiya zintu zyoonse akutobela nduwe; aboobo ino ncinzi ncotuyoojana?” (Mt. 19:27) Caluzyalo Jesu wakaambila basikwiiya bakwe kuti bakali kuyooba abanamukwasyi banji bakumuuya. (Amubale Marko 10:29, 30.) Alimwi Jehova, Silutwe wamukwasyi wakumuuya, usyomezya kuti unoobalanganya aabo ibayanda kumubelekela. (Int. 9:10) Atubone zintu zimwi zigwasya nzyomukonzya kucita kutegwa mutambule lugwasyo lwa Jehova ciindi nomulwana penzi lyakulendelelwa.

5. Nkaambo nzi ncocili cibotu kuyeeya mbwatugwasya Jehova?

⁵ Amuyeeye mbwamugwasya Jehova. (Int. 55:22) Kucita boobu kuyoomugwasya kububona munzila yeelede bukkale bwanu. Mucizyi Carol, * uuli aabanamukwasyi ibatali mukasimpe wakaamba kuti: “Ndalanga musyule akubona mbwaandigwasya Jehova mumasunko, mubwini ndilimvwa kuti tandili ndelikke pe. Alimwi eeci cindipa kuba alusyomo lwakuti Jehova unoondigwasya lyoonse.”

6. Mbuti lugwalo lwa 1 Petro 5:9, 10, mbolubakulwaizya aabo ibapenga akaambo kakulendelelwa?

 ⁶ Amuyeeye Jehova mbwabagwasya basyomima ibalendelelwa. (Amubale 1 Petro 5:9, 10.) Mukwesu Hiroshi, walo kwamyaka minji iwali Kamboni alikke mumukwasyi wakaamba kuti: “Mumbungano, boonse balijisi mapenzi. Kuzyiba kuti toonse tulasoleka kusikila mpotugolela kubelekela Jehova kulakonzya kutukulwaizya swebo notuli tolikke mukasimpe.”

7. Ino mupailo umugwasya buti?

⁷ Amube acilengwa cakucita zintu zyakumuuya. Eeci caamba kumwaambila Jehova bwini mbomulimvwa. (1Pet. 5:7) Mucizyi Massiel wakaamba kuti: “Cintu cimwi ciyandika kapati cakandigwasya kuzunda penzi lyakulendelelwa nkupaila kuli Jehova cakutaleka.” Ciindi mucizyi ooyu naakasala kubelekela Jehova, wakalimvwa kulendelelwa akaambo kakuti banamukwasyi tiibakali kumubelekela Jehova. Wakayungizya kwaamba kuti, “Jehova ngu Taata mwini-mwini, alimwi ndakali kupaila kulinguwe ziindi zinji abuzuba, kumwaambila mbondakali kulimvwa.”

8. Ino kubala Jwi lya Leza akuzinzibala kuyeeya nzyomubala kumugwasya buti?

⁸ Amubale Jwi lya Leza abuzuba, akuzinzibala kuyeeya zibalo zigaminide izitondezya kuti Jehova ulamuyanda. Mucizyi Bianca, iwakaliyumya kutwaambo tutyompya ntobakali kwaamba banamukwasyi, wakaamba kuti: “Kubala akuzinzibala kuyeeya zibalo zyamu Bbaibbele, alimwi amakani aakuluula aababelesi ba Jehova ibakali mubukkale bukozyenye abwangu kwakandigwasya kapati.” Banakristo bamwi balaswata magwalo aawumbulizya, mbuli lugwalo lwa Intembauzyo 27:10 alimwi a Isaya 41:10. Bamwi bajana kuti kuswiilila zibeela zyakalekkoodwa ciindi nobalibambila miswaangano naa nobabala Bbaibbele kulabagwasya kucesya-cesya kulendelelwa.

9. Ino kujanika kumiswaangano kumugwasya buti?

⁹ Amusolekesye kujanika lyoonse kumiswaangano. Muyoogwasyigwa kapati apulogilamu iikulwaizya, alimwi muyoobazyiba kabotu bakwesu abacizyi. (Heb. 10:24, 25) Mucizyi Massiel iwaambwa kale wakati: “Nokuba kuti ndilaansoni, ndakasala kuti kandijanika kumuswaangano wambungano uuli woonse akupa bwiinguzi. Eeci cakandigwasya kulimvwa kuba cibeela cambungano.”

10. Nkaambo nzi ncociyandika kuba acilongwe abasyomima basyomeka?

¹⁰ Amube acilongwe abasyominyoko. Amujane balongwe mumbungano ibakonzya kumuyiisya cintu cimwi, nobaba baabo mbomwiindene ciimo naa musyobo. Bbaibbele litwaambila kuti ‘busongo bulajanwa kubantu  bacembeede.’ (Job. 12:12) Abalo bapati balakonzya kwiiya zinji kuzwa kubana basyomeka. Davida wakali muniini kapati kuli Jonatani, pele eeci tiicakabalesya kuba acilongwe ciyumu. (1Sam. 18:1) Davida a Jonatani bakali kugwasyanya kubelekela Jehova nokuba kuti bakajisi mapenzi. (1Sam. 23:16-18) Mucizyi Irina, Kamboni uuli alikke mumukwasyi wakaamba kuti: “Bakwesu abacizyi balakonzya kuba bazyali besu bakumuuya alimwi abanabokwesu. Jehova ulakonzya kubabelesya kutugwasya muzintu nzyotuyandika.”

11. Ncinzi ncotweelede kucita kutegwa tube azilongwe ziyumu?

¹¹ Cilakonzya kukatazya kujana balongwe bapya, kwaambisya kuti kolaansoni. Ba Ratna, mucizyi ulaansoni iwakaiya kasimpe nokuba kuti wakali kukazyigwa wakaamba kuti: “Ndakazumina kuti ndakali kuyandika lugwasyo lwamukwasyi wangu wakumuuya.” Cilakonzya kukatazya kwaambila muntu umwi mbolimvwa, pele kuti wacita oobo, muntu ooyo ulakonzya kuba mulongwe. Balongwe banu bayanda kumukulwaizya akumugwasya, aboobo bayanda kuti mubaambile mbobakonzya kucita boobo.

12. Mbuti mulimo wakukambauka mboukonzya kumugwasya kuba abalongwe bali kabotu?

¹² Nzila imwi iinda kubota mbomukonzya kujana balongwe, nkwiinda mukukambauka antoomwe a Banakristoma. Ba Carol ibaambwa kale bakati: “Ndajana balongwe banji kwiinda mukubeleka abacizyi mumulimo wakukambauka alimwi amumilimo imwi yakumuuya. Kwamyaka minji, Jehova wandigwasya kwiinda mubalongwe aaba.” Kuba acilongwe a Banakristo basyomeka kulagwasya kapati. Jehova ulabelesya balongwe aabo kutegwa bamugwasye ciindi nomulimvwa kulendelelwa.—Tus. 17:17.

13. Mukuli nzi ngobajisi boonse mumbungano?

¹³ Boonse mumbungano balijisi mukuli wakupa kuti kakuli luumuno aluyando kutegwa kubule naba omwe uulimvwa kulendelelwa. (Joh. 13:35) Nzyotwaamba akucita zilakonzya kubakulwaizya kapati bamwi. Mucizyi umwi wakaamba kuti: “Nondakaiya kasimpe, basimbungano bakaba mukwasyi wangu. Nondatakaba umwi wa Bakamboni ba Jehova kakunyina lugwasyo lwabo.” Ncinzi ncomukonzya kucita kutegwa mugwasye baabo ibali balikke mukasimpe kutegwa balimvwe kuba cibeela cambungano?

14. Ncinzi ncomukonzya kucita kutegwa mupange cilongwe abapya?

¹⁴ Amusoleke kupanga cilongwe abapya. Tulakonzya kutalika kwiinda mukubatambula amaanza obilo bapya mumbungano. (Rom. 15:7) Nokuba boobo, nzinji nzyotweelede kucita kunze buyo lyakubaanzya cabulongwe. Tuyanda kuti mukuya kwaciindi tupange cilongwe ciyumu ambabo. Aboobo amube aluzyalo alimwi akutondezya kuzwa ansi aamoyo kuti mulabayanda bapya. Kwiinda mukutababuzya mibuzyo iijazya nsoni, amusole kuzyiba mapenzi ngobajisi. Bamwi cilakonzya kubakatazya kwaamba mbobalimvwa, aboobo amubikkile maano kutegwa mutabasinikizyi kwaambaula. Muciindi caboobo, amubabuzye mibuzyo njobakonzya kwaanguluka kwiingula alimwi amuswiilile kubwiinguzi bwabo cakukkazika moyo. Mucikozyanyo, mulakonzya kubabuzya mbobakaiya kasimpe.

15. Mbuti Banakristo basimide mbobakonzya kugwasya bamwi mumbungano?

¹⁵ Boonse mumbungano bayookomena kumuuya ciindi Banakristo basimide, kwaambisya baalu, nobatondezya luyando kulimbabo.  Mucizyi Melissa, iwakakomezyegwa mukasimpe abanyina, wakaamba kuti: “Ndilikkomene kapati akaambo kabakwesu ibakali mbuli bataata, ibakali kujana ciindi cakuba andime alimwi ibakali kundibikkila maano kwamyaka minji. Kufwumbwa ciindi nondiyanda kwaambaula, ndilijisi wakwaambila.” Mukwesu uucili mwana-mwana wazyina lya Mauricio, wakausa akulendelelwa ciindi mukwesu iwakali kumuyiisya Bbaibbele naakazwa mukasimpe. Mukwesu ooyu wakaamba kuti: “Baalu bakatondezya kuti bakali kundibikkila maano, aboobo eeco cakandigwasya kapati. Bakali kubandika andime ciindi aciindi. Bakali kubeleka andime mumulimo wakukambauka, kundaambila twaambo tupati-pati ntobakali kujana mukubala Bbaibbele kwabo, alimwi nokuba kusobana zisobano zimwi andime.” Ba Melissa aba Mauricio lino babelekela ku Beteli.

16-17. Muunzila nzi motukonzya kubagwasya bamwi?

¹⁶ Amubape lugwasyo ndobayandika. (Gal. 6:10) Ba Leo ibabeleka kabali bamisyinali kulamfwu abanamukwasyi bakaamba kuti: “Kanji-kanji iciyandika kapati milimo yaluzyalo aciindi ceelede. Ndilayeeya buzuba bumwi nondakaba antenda yamootokala. Ciindi nondakasika kuŋanda ndakalikopene mumizeezo. Mpoonya banabukwetene bamwi bakanditamba kuŋanda yabo kucakulya. Tandiciyeeyede ncotwakalya, pele ncondiyeeya buyo ncakuti bakandiswiilila. Kumamanino aamubandi, mizeezo yakakkalikana.”

¹⁷ Toonse tulazikkomanina ziindi notuswaangana a Bakamboni bambi akubandika makani ngotwaiya, mbuli amuswaangano wabbazu naa wacooko. Nokuba boobo, ba Carol ibaambwa kale bakati: “Ndilalendelelwa kapati lyamiswaangano yabbazu ayacooko.” Nkaambo nzi ncobakaambila boobo? Bakazumanana kwaamba kuti: “Nokuba kuti inga ndilizungulukidwe abakwesu abacizyi banji kapati, kanji-kanji inga bakkede amikwasyi yabo. Ciindi nondibona kabakkede boobo, ndilalendelelwa kapati.” Bamwi cilabakatazya kujanika kumuswaangano wacooko naa wabbazu ciindi cakusaanguna kuzwa nobakafwidwa muntu ngobakakwetene limwi. Sena kuli ngomuzyi uujisi buyumu-yumu buli boobu?  Amumutambe kuyookkala antoomwe amukwasyi wanu lyamuswaangano uutobela.

18. Mbuti mbotukonzya kulubelesya lugwalo lwa 2 Bakorinto 6:11-13 ciindi notusamausya bamwi?

¹⁸ Amujane ciindi cakuba ambabo. Amusoleke kujana ciindi cakuba abakwesu abacizyi baindene-indene, kwaambisya aabo ibalimvwa kulendelelwa. Tuyanda ‘kujalula myoyo yesu,’ ikapati kubantu bali boobu. (Amubale 2 Bakorinto 6:11-13.) Mucizyi Melissa iwaambwa kale wakati: “Lyoonse twakali kukkomana kapati ciindi bakwesu abacizyi nobakali kututamba kumaanda aabo kuyooizya ambabo alimwi amikwasyi yabo naa kuunka kuyakweendeenda antoomwe ambabo. Sena kuli muntu umwi mumbungano yanu ngomukonzya kusamausya?

19. Ndilili nocikonzya kugwasya kapati kujana ciindi cakuba a Banakristoma?

¹⁹ Kuli ziindi Banakristoma nobakonzya kulumba kuyanzana ambabo. Bamwi balakonzya kukatazyigwa kuba akati kabanamukwasyi ibatali Bakamboni ba Jehova ciindi nobasekelela mazuba aakulyookezya. Bamwi balakonzya kuusa kapati mumazuba aamwi, mbuli buzuba mbwaakafwa muyandwa wabo. Kuti twalyaaba kujana ciindi cakuba abakwesu abacizyi ibajisi buyumu-yumu buli boobu, tuyootondezya kuti ‘tulabalanganya bweelede.’—Flp. 2:20.

20. Mbuti majwi aa Jesu aali kulugwalo lwa Matayo 12:48-50 mbwaatugwasya ciindi notulimvwa kulendelelwa?

²⁰ Kuli twaambo tunji tukonzya kupa Munakristo kulimvwa kulendelelwa zimwi ziindi. Nokuba boobo, tatweelede kuluba kuti Jehova ulizyi mbotulimvwa. Kanji-kanji ubelesya bakwesu abacizyi kutupa nzyotuyandika. (Amubale Matayo 12:48-50.) Aboobo ciindi notucita kufwumbwa ncotukonzya kugwasya bakwesu abacizyi, tutondezya Jehova kuti tulalumba kububambe bwakwe bwaluyando. Tacikwe makani ambotukonzya kulimvwa zimwi ziindi, tatuli tolikke pe, nkaambo Jehova uli kulubazu lwesu lyoonse!