1. ¿Tuku xlakata makgapitsi xlakskujnin Jehová min kilhtamaku makgkatsikgo pi xʼakstukan wilakgo?

MINIT kilhtamaku kimputumkan makgkatsinitaw pi kiʼakstukan wilaw. Makgapitsi, akxni chuna makgkatsikgo ni lhuwa kilhtamaku makgapala. Pero amakgapitsi max lhuwa kilhtamaku makgapala chuna makgkatsikgo. Anankgo tiku makgkatsikgo pi xʼakstukan wilakgo maski lhuwa tiku katawilakgo. Makgapitsi tuwa makgkatsikgo nasmanikgo kxasasti congregación niku tapakgsikgo. Amakgapitsi, makgtapakgsikgo kʼakgtum familia nema lu tlan latalalinkgo chu nitlan makgkatsikgo akxni xlakan makgat ankgo. Wi tiku makgatsankgakgonit kkalinin tiku lu xpaxkikgo chu lu lakapastakkgo. Makgapitsi kstalaninanin Cristo, liwaka tiku nina makgas lakgapaskgonit Jehová, makgkatsikgo pi xʼakstukan wilakgolh xlakata xfamiliaskan chu xʼamigoskan tiku ni xtatayananin Jehová, kalakgmakgankgo chu kalakatakikgo.

2. ¿Tuku takgalhskinin nakgalhtiyaw kʼuma artículo?

² Jehová liwana kinkalakgapasan chu kinkaʼakgatekgsniyan. Wa xlakata, xla katsi akxni makgkatsiyaw pi kiʼakstukan wilaw chu kinkamakgtayaputunan. Kʼuma artículo nakgalhtiyaw umakgolh takgalhskinin: ¿la kinkamakgtayayan Jehová xlakata ni namakgkatsiyaw pi kiʼakstukan wilaw?, ¿tuku tlan natlawayaw komo makgkatsiyaw pi kiʼakstukan wilaw? chu ¿tuku tlan natlawayaw xlakata nakamakgtayayaw natalan xalak congregación tiku chuna makgkatsikgo?

3. ¿La limasiyalh Jehová pi kuentajtlawalh Elías?

³ Jehová lu lilakgaputsa pi tlan katawilakgolh xlakskujnin. Xla lakatsu kinkawilanin chu katsi akxni xlajwananaw (Sal.  145:18, 19). Kaʼakxilhwi la kuentajtlawalh palakachuwina Elías. Uma xlakskujni Dios tiku ni xmakgxtakga, latamalh akxni lu tuwa tuku xtitaxtuma xkachikin Dios, Israel. Xalakgtliwakgan xtalamakgasitsin Dios xkaputsastalanikgo xlakskujnin chu xmakgniputunkgo Elías (1 Rey. 19:1, 2). Elías xlakpuwan pi kajwatiya xʼakstu xpalakachuwina Jehová xtamakgxtakgnit, chu uma lu xlilakgaputsa (1 Rey. 19:10). Pero Jehová lakapala wi tuku tlawalh xlakata namakgtaya Elías: malakgachanilh chatum ángel xlakata nalimasiyani pi ni xʼakstu xwi chu xwilakgolhku lhuwa israelitas tiku ni xmakgxtakgkgo Dios (1 Rey. 19:5, 18).

4. ¿La masiya Marcos 10:29, 30 pi Jehová kalilakgaputsa tiku nialh kgalhikgo xtamakgtaykan xfamiliajkan chu xʼamigoskan?

⁴ Jehová katsi pi lhuwa tuku limakgxtakgnitaw xlakata nalakskujnaniyaw. Max kifamiliaskan chu kiʼamigoskan tiku ni skujnanikgo Jehová nialh kinkamakgtayakgoyan. Akgtum kilhtamaku, apóstol Pedro xlakgaputsama chu wanilh Jesús: «¡Kaʼakxilhti! Akinin putum kmakgxtakgnitaw tuku xakkgalhiyaw chu kkastalaninitan; wa xlakata, ¿tuku nakmakglhtinanaw?» (Mat. 19:27). Xatapaxuwan, Jesús kawanilh kstalaninanin pi xʼamakgolh makgtapakgsikgo kʼakgtum familia xaʼespiritual (kalikgalhtawakga Marcos 10:29, 30). Chu Jehová, kinTlatkan xalak akgapun, kamalaknuni pi nakamakgtaya tiku skujnanikgo (Sal. 9:10). Kaʼakxilhwi la tlan nalitamakgtayayaw uma komo makgkatsiyaw pi kiʼakstukan wilaw.

5. ¿Tuku xlakata tlan nakitaxtu komo nalilakpuwanaw la Jehová kinkamakgtayaman?

⁵ Nalilakpuwanaw la kinkamakgtayaman Jehová (Sal. 55:22). Uma nakinkamakgtayayan ni namakgkatsiyaw pi kiʼakstukan wilaw. Chatum tala tsumat tiku wanikan Carol, * tiku kajwatiya xla xtatayana Jehová kxfamilia, wan: «Akxni klilakpuwan la Jehová kimakgtayanit akxni wi tuku tuwa ktitaxtunit, uma lu kimakgtaya ni nakmakgkatsi pi kiʼakstu kwi. Uma limasiya pi Jehová ni kintimakgxtakgli kkilhtamaku nema aku mima».

6. ¿La tlan nakamakgpuwantini 1 Pedro 5:9, 10 tiku makgkatsikgo pi xʼakstukan wilakgolh?

⁶ Nalilakpuwanaw la Jehová kamakgtayama  amakgapitsi natalan tiku makgkatsikgo pi xʼakstukan wilakgolh (kalikgalhtawakga 1 Pedro 5:9, 10). Hiroshi, chatum tala tiku makgasata kajwatiya xla xtatayana Jehová kxfamilia, wan: «Kcongregación ni tuwa akxilhkan pi natalan tanu tanu tuku titaxtumakgo. Akxni katsiyaw pi tlawamanaw putum tuku matlaniyaw xlakata naskujnaniyaw Jehová, uma kinkamakgpuwantiniyan maski kifamiliajkan ni xtatayananin Jehová litaxtukgo».

7. ¿La makgtayayan oración?

⁷ Naliskujaw xlakata kintakanajlakan. Lu xlakaskinka nawaniyaw Jehová tuku wi kkinakujkan chu tuku makgkatsiyaw (1 Ped. 5:7). Kaʼakxilhwi tuku wan Massiel, chatum tala tsumat tiku xfamilia lakgmakgalh akxni xla laksakli nalakskujnani Jehová: «Xlakata xaktlawani oración Jehová xliputum kilitliwakga, wa uma pulaktum tuku kimakgtayalh ni nakmakgkatsi pi kiʼakstu kwi. Xla xlikana kinTlat litaxtulh, chali chali xaktachuwinan, makglhuwa xaktachuwinan akgtum kilhtamaku chu xakwani tuku xakmakgkatsi».

8. ¿La makgtayayan akxni likgalhtawakgaya chu lilakpuwana xTachuwin Dios?

⁸ Na xlakaskinka ankgalhin nalikgalhtawakgayaw xTachuwin Dios chu nalilakpuwanaw liʼakxilhtit nema nakinkamalakapastakayan la xlilhuwa kinkapaxkiyan Jehová. Bianca, chatum tala puskat tiku xfamilia lixkajnit lichuwinan, wan: «Lu kimakgtaya akxni klikgalhtawakga chu kkalilakpuwan tiku kalichuwinankan kBiblia chu xbiografiaskan xlakskujnin Jehová tiku na watiya taʼakglhuwit titaxtukgonit la akit». Makgapitsi natalan katsinikgo textos nema makgpuwantininankgo, chuna la Salmo 27:10 chu Isaías 41:10. Amakgapitsi lakkaxwilikgo tuku nataʼakxilha ktamakxtumit o maklakaskinkgo grabaciones xalak Biblia. Akxilhkgonit pi uma kamakgtaya xlakata ni namakgkatsikgo pi xʼakstukan wilakgo.

9. ¿La litamakgtayaya wix xlakata pina ktamakxtumit?

⁹ Lu kiliskujatkan xlakata ankgalhin naʼanaw ktamakxtumit xlakata uma kinkamakgpuwantiniyan chu kinkamaxkiyan talakaskin tlakg nakalakgapasaw kinatalankan (Heb. 10:24, 25). Massiel, tiku lichuwinaw kpárrafo 7, wan: «Maski lu xakmaxanan, klakkaxwililh nakkan kputum tamakxtumit chu nakmasta akgtum takgalhtin. Uma kimakgtayalh nakmakgkatsi pi kmakgtapakgsi kcongregación».

10. ¿Tuku xlakata xlakaskinka kiʼamigoskan nakalimaxtuyaw tiku ni makgxtakgkgo Dios?

¹⁰ Kiʼamigoskan kakalimaxtuw natalan tiku ni makgxtakgkgo Dios. Kiʼamigoskan kakalimaxtuw natalan tiku kinkawilinikgoyan tlan liʼakxilhtit, maski ni watiya kata kgalhikgo la akinin o tanu talismanin kgalhikgo. Biblia kinkamalakapastakayan pi «kgalhikgo liskgalala tiku linkgoya kata» (Job 12:12). Pero tiku linkgoya  kata, na lhuwa tuku nakatsinikgo xlakata lakgkgawasan tiku ni makgxtakgkgo Dios. Jonatán lu lhuwa kata xlipulanima David, pero lu tlan amigos litaxtukgolh (1 Sam. 18:1). Xchatiykan lamakgtayalh xlakata chuntiya kskujnanikgolh Jehová maski xtitaxtumakgolh tuku tuwa (1 Sam. 23:16-18). Irina, chatum tala puskat tiku kajwatiya xla xtatayana Jehová kxfamilia, wan: «Kinatalankan tlan nalitaxtukgo la kinatlatnikan o kinatalankan. Jehová tlan nakamaklakaskin xlakata nalitaxtukgo kifamiliajkan nema maklakaskinaw».

11. ¿Tuku tlan natlawayaw xlakata nakgalhiyaw xalaktlan amigos?

¹¹ Max makgapitsi tuwa makgkatsikgo naputsakgo xasasti amigos, liwaka komo ni lu chuwinamputunkgo. Kaʼakxilhwi tuku wan Ratna, chatum tala puskat tiku lu maxanan, tiku lakatakika akxni lakgapasli xaxlikana. Xla wan: «Kʼakgatekgsli pi xakmaklakaskin xtamakgtay kifamilia xaʼespiritual». Max tuwa namakgkatsiyaw nawaniyaw achatum tuku makgkatsiyaw, pero uma natlawa pi tlan nalatalalinaw. Kiʼamigoskan kinkamakgpuwantiniputunkgoyan chu kinkamakgtayaputunkgoyan, pero talakaskin nakawaniyaw la natlawakgo.

12. ¿La kinkamakgtayayan akxni lichuwinanaw Dios nakatekgsaw laktlan amigos?

¹² Komo akxtum nakatalichuwinanaw Dios amakgapitsi natalan, uma nakinkamakgtayayan kiʼamigoskan nakalimaxtuyaw. Carol, tiku lichuwinaw kpárrafo 5, wan: «Lhuwa amigos kkgalhi xlakata akxtum kkatalichuwinan Dios natalan chu kmakgtlawa atanu taskujut xla kintakanajlakan. Chuna la titaxtunit kilhtamaku, Jehová kamaklakaskinit umakgolh amigos xlakata nakimaxki xtamakgtay». Xlikana pi lu tlan kitaxtu akxni liskujaw kiʼamigoskan nakalimaxtuyaw natalan tiku ni makgxtakgkgo Dios. Jehová kalimaklakaskin xlakata nakinkamakgtayayan akxni tuwa tuku titaxtuyaw, akgtum liʼakxilhtit, akxni makgkatsiyaw pi kiʼakstukan wilaw (Prov. 17:17).

13. ¿Tuku talakgatay kgalhiyaw kimputumkan?

¹³ Kimputumkan tlan namakgtayananaw xlakata naʼanan takaksni chu tapaxkit kcongregación. Chuna niti katimakgkatsilh pi xʼakstu wi (Juan 13:35). Tuku wanaw chu tuku tlawayaw tlan nakamakgpuwantini amakgapitsin. Chatum tala lakapastaka: «Akxni kkatsinilh tuku xaxlikana, congregación wa kifamilia litaxtulh. Komo ni xkimakgtayakgolh, nila xtatayana Jehová xaklitaxtulh». ¿Tuku tlan natlawayaw xlakata natalan tiku xfamiliajkan ni skujnanikgo Jehová, namakgkatsikgo pi makgtapakgsikgo kcongregación?

14. ¿La tlan kiʼamigoskan nakalimaxtuyaw tiku aku tsukumakgo tamakxtumikgo?

¹⁴ Kaliskujwi xlakata nakaputsayaw xasasti amigos. Tlan nalimatsukiyaw akxni xatapaxuwan nakamakgamakglhtinanaw tiku aku tsukumakgo tamakxtumikgo kcongregación (Rom. 15:7). Pero ni kajwatiya xatapaxuwan nakamakgachipayaw, wata kiʼamigoskan kalimaxtuputunaw chuna la natitaxtu kilhtamaku. Wa xlakata, tlan kakalikatsiniw chu kakalimasiyaniw pi kalilakgaputsayaw tiku xalaksasti. Kaliskujwi xlakata naʼakgatekgsaw tuku tuwa titaxtumakgo, pero ni kamakgtanuw kxlatamatkan. Xlakata makgapitsi tuwa makgkatsikgo nawankgo tuku makgkatsikgo, kuenta katlawaw ni nakamafuerzajliniyaw nakinkawanikgoyan, wata kuenta katlawaw akxni wi tuku nakakgalhskinaw chu kaks kakakgaxmatniw. Akgtum liʼakxilhtit, tlan nakakgalhskinaw la katsinikgolh xlakata Jehová.

15. ¿La tlan nakamakgtayakgo natalan tiku tliwakga xtakanajlakan amakgapitsi natalan xalak congregación?

¹⁵ Akxni natalan tiku tliwakga kgalhikgo  xtakanajlakan, liwaka lakgkgolotsin, kalilakgaputsakgo amakgapitsin, putum natalan tatliwakglha xtakanajlakan. Melissa, tiku lata aktsujku xtse masiyanilh xlakata Biblia, wan: «Lu kpaxtikatsini pi putum umakgolh kata, anankgonit natalan tiku kilitaxtunikgonit chuna la kinatlatni. Akxni kchuwinamputun, ankgalhin wi tiku kinkgaxmatni». Kaʼakxilhwi tuku wan Mauricio, chatum tala kgawasa tiku makgkatsilh pi xʼakstu tamakgxtakgli akxni tiku limakgalhtawakgelh Biblia makgxtakgli xaxlikana. Xla wan: «Pulaktum tuku tlakg kimakgtayalh wa pi lakgkgolotsin kililakgaputsakgolh. Xlimaxtukgo kilhtamaku xlakata ankgalhin xkintachuwinankgolh, akxtum xʼankgo kintalichuwinankgo Dios, xkilitachuwinankgo tuku xtapalh xtekgskgo akxni xlikgalhtawakgakgo Biblia chu asta akxtum xakpaxuwayaw». Melissa chu Mauricio skujnanimakgo Jehová putum kilhtamaku.

16, 17. ¿La tlan xkamakgtayaw makgapitsi kinatalankan?

¹⁶ Kamastaw tamakgtay chuna la talakaskin (Gál. 6:10). Leo, chatum misionero tiku makgat skujnanima Jehová, niku ni anta wi xfamilia, wan: «Makglhuwa, kajwatiya maklakaskina tlan nalikatsinikana akxni xlilat. Klakapastaka tuku lalh akgtum kilhtamaku akxni wi tuku nitlan kiʼakgspulalh kkimputlaw. Akxni kchalh kkinchik, lu nitlan xakmakgkatsima. Pero alistalh akgtum tamakgaxtokgat kiwanikgolh pi xakkalh wayan kxchikkan. Ni klakapastaka tuku kimaxkikgolh, pero chuntiya klakapastaka pi lu tlan kilikatsinikgolh akxni kinkgaxmatnikgolh. Alistalh tlakg tlan xakmakgkatsi».

¹⁷ Kimputumkan lipaxuwayaw akxni kgalhiyaw xlakaskinka tamakxtumit, chuna la asambleas, xlakata akxtum katatawilayaw kinatalankan chu lichuwinanaw programa. Pero, kaʼakxilhwi tuku wan Carol tiku lichuwinanitawa: «Kmakgkatsi pi kiʼakstu kwi akxni kkan kʼasambleas, xlakata maski anta wilakgolh akglhuwa ciento o asta akglhuwa mil natalan, putum xlakan akxtum tatawilakgo xfamiliaskan. Akxni kkaʼakxilha kmakgkatsi pi kiʼakstu kwi». Makgapitsi, tiku nikgonita tiku xtamakgaxtokgkgo tuwa makgkatsikgo xlimakgtumku xʼakstukan naʼankgo kʼasamblea. ¿Lakgapasaw tiku nachuna titaxtuma? ¿Tlan xwaniw pi akxtum xkinkatatawilan klakaskinka tamakxtumit nema nakgalhiyaw?

18. Chuna la wan 2 Corintios 6:11-13, ¿la tlan nalimasiyayaw pi tlan kamakgamakglhtinanaw amakgapitsin?

 ¹⁸ Kakalimaxtuniw kilhtamaku. Akxni natlawayaw akgtum paskua, tanu tanu natalan kakawaniw, liwaka tiku makgkatsikgo pi xʼakstukan wilakgo. Kalimasiyaniputunaw pi “xlikana kapaxkiyaw” (kalikgalhtawakga 2 Corintios 6:11-13). Melissa, tiku lichuwinawa kpárrafo 15, lakapastaka: «Lu xaklakgatiyaw pi makgapitsi familias xkinkawanikgoyan pi xakkaw kxchikkan o xkinkalinkgoyan akxni xʼankgo paxialhnankgo». ¿Anan kkincongregacionkan tiku chuna tlan xlikatsiniw?

19. ¿Tuku kilhtamaku lu xlakaskinka akxtum nakatatawilayaw makgapitsi natalan?

¹⁹ Anan makgapitsi kilhtamaku nema natalan tlakg xlipaxuwakgolh komo xkalimaxtuniw kilhtamaku. Akgtum liʼakxilhtit, tiku kgalhikgo xfamiliaskan tiku ni xtatayananin Jehová max tuwa namakgkatsikgo akxni xlakan natlawakgo paskua xalak kachikin o atanu talismanin. Amakgapitsin lu nitlan makgkatsikgo akxni chin makgapitsi kilhtamaku, chuna la akxni lakgchan kilhtamaku akxni nilh tiku xpaxkikgo. Akxni kalimaxtuniyaw kilhtamaku umakgolh natalan, kalimasiyaniyaw pi xlikana kalilakgaputsayaw (Filip. 2:20).

20. ¿La tlan nakinkamakgtayayan xtachuwin Jesús nema tatekgsa kMateo 12:48-50 akxni namakgkatsiyaw pi kiʼakstukan wilaw?

²⁰ Anan pulaklhuwa tuku xlakata chatum kstalanina Cristo tlan xmakgkatsilh pi xʼakstu wi. Pero ni kilipatsankgatkan pi Jehová liwana katsi tuku makgkatsiyaw. Makglhuwa kamaklakaskin kinatalankan xlakata nakinkamaxkiyan tuku maklakaskinaw (kalikgalhtawakga Mateo 12:48-50). Chu akinin, tlan nalimasiyayaw pi paxtikatsiniyaw akxni nakamakgtayayaw kinatalankan. Maski namin kilhtamaku namakgkatsiyaw pi lu tuwa tuku titaxtumaw, nikxni kiʼakstukan wilaw, xlakata Jehová akxtum kinkatawilan.