1. Wai na sampela taim ol wokman bilong Jehova inap pilim olsem ol i stap wanpis?

SAMPELA taim yumi save pilim olsem yumi stap wanpis. Sampela inap pilim olsem inap sotpela haptaim. Ol narapela inap karim dispela hevi inap longpela taim. Na tu, yumi inap pilim olsem yumi stap wanpis maski yumi stap wantaim planti lain. Sampela i hatwok long painim ol pren long nupela kongrigesen. Ol narapela i pas gut wantaim famili bilong ol, tasol ol i pilim olsem ol i stap wanpis taim ol i muv i go longwe tru long famili bilong ol. Sampela ol i misim pasin pren ol i bin gat wantaim wanpela insait long famili husat i dai pinis. Na sampela Kristen em ol i nupela long tok i tru, ol i pilim wanpis taim ol famili bilong ol husat i no wanbilip na ol pren bilong ol long pastaim i no laikim ol moa o birua long ol.

2. Bai yumi kisim bekim bilong wanem ol askim?

² Jehova i save na em i kliagut long olgeta samting long yumi. Taim yumi pilim wanpis, em i save long dispela, na em i laik helpim yumi long winim dispela hevi. Jehova i save helpim yumi olsem wanem? Yumi ken mekim wanem bilong helpim yumi yet? Na hau yumi ken helpim ol narapela insait long kongrigesen em ol i pilim olsem ol i stap wanpis? Yumi ken kisim bekim bilong ol dispela askim.

3. Olsem wanem Jehova i soim olsem em i tingim Elaija?

³ Jehova i tingim tru i stap bilong olgeta wan wan wokman bilong em. Em i stap klostu long yumi olgeta wan wan, na em i luksave taim yumi bel hevi tru. (Sng. 145:18, 19) Olsem, Jehova i bin tingim tru profet Elaija na mekim ol samting bilong helpim em. Dispela bilipman i bin stap long wanpela haptaim  nogut bilong lain Israel bilong bipo. Ol man i gat bikpela namba na strong i mekim nogut long ol man i lotuim Jehova, na ol i laik tru long kilim i dai Elaija. (1 Kin. 19:1, 2) Na tu, Elaija i ting olsem em wanpela profet tasol i lotuim Jehova na dispela inap mekim em i bel hevi tru. (1 Kin. 19:10) Wantu God i mekim samting bilong strongim Elaija. Jehova i salim wanpela ensel i go bilong tokim profet bilong Em olsem em i no stap wanpis—i gat planti ol Israel i stap yet em ol i lotuim God!—1 Kin. 19:5, 18.

4. Olsem wanem tok bilong Mak 10:29, 30 i soim olsem Jehova i tingim tru ol lain em famili na ol pren bilong ol i no moa sapotim ol?

⁴ Jehova i save olsem taim yumi mekim disisen long lotuim em, sampela bilong yumi i save lusim sampela samting. Olsem, yumi inap lusim sapot bilong ol famili bilong yumi em ol i no wanbilip na ol pren bilong yumi long pastaim. Ating Pita i wari long dispela, olsem na em i askim Jisas olsem: “Mipela i lusim pinis olgeta samting na bihainim yu. Bai mipela i kisim wanem samting?” (Mat. 19:27) Long gutpela pasin Jisas i strongim ol disaipel bilong em olsem ol bai kisim bikpela lain famili. (Ritim Mak 10:29, 30.) Na Jehova, em Het bilong famili bilong yumi long sait bilong bilip, em i promis olsem em bai sapotim ol lain i laik lotuim em. (Sng. 9:10) Tingim sampela samting yu ken mekim na bai Jehova i ken helpim yu long daunim hevi bilong stap wanpis.

5. Bilong wanem em i bikpela samting long putim tingting long hau Jehova i wok long helpim yu?

⁵ Putim tingting long hau Jehova i wok long helpim yu. (Sng. 55:22) Dispela bai helpim yu long holim stretpela tingting long hevi bilong yu. Carol, * em wanpela singel sista na famili bilong em i no stap long tok i tru, em i tok: “Taim mi tingim hau Jehova i bin sambai long mi long ol taim bilong hevi, dispela i helpim mi long pilim olsem mi no stap wanpis. Na em i strongim mi olsem oltaim Jehova bai helpim mi.”

6. Olsem wanem tok bilong 1 Pita 5:9, 10 inap strongim ol lain em ol i pilim wanpis?

 ⁶ Tingim hau Jehova i wok long helpim ol wanbilip em ol i pilim wanpis. (Ritim 1 Pita 5:9, 10.) Hiroshi, em wanpela brata na inap planti yia em tasol long famili bilong em i Witnes, em i tok: “Insait long kongrigesen, yu inap lukim olsem olgeta wan wan i gat hevi bilong ol yet. Taim yumi save olsem yumi olgeta i givim bes bilong yumi long lotuim Jehova, dispela inap strongim yumi ol lain em ol famili bilong yumi i no stap long tok i tru.”

7. Olsem wanem beten i helpim yu?

⁷ Oltaim beten, ritim Baibel, na go long ol miting. Dispela i makim tu olsem yu mas tokim Jehova long tingting tru bilong yu. (1 Pita 5:7) Massiel em wanpela yangpela sista, em i tok: “Wanpela bikpela samting i helpim mi long karim hevi bilong i stap wanpis em pasin bilong beten oltaim long Jehova.” Taim em i mekim disisen long lotuim Jehova, em i pilim wanpis bikos famili bilong em i no lotuim Jehova. Massiel i tok: “Em i kamap Papa tru bilong mi, na mi beten long em long olgeta de, mi save beten planti taim long wanpela de na tokim em long tingting tru bilong mi.”

8. Olsem wanem pasin bilong ritim Tok Bilong God na tingim tingim long bel i helpim yu?

⁸ Ritim Tok Bilong God long olgeta taim, na tingim tingim long bel ol stori bilong Baibel we i kamapim klia pasin laikim bilong Jehova long yu. Bianca, em wanpela sista husat i karim hevi long ol tok i no stret famili bilong em i mekim long em, em i tok: “Taim mi ritim na tingim tingim long bel ol stori bilong Baibel na ol laip stori bilong ol wokman bilong Jehova husat i karim ol wankain hevi olsem mi, dispela i save helpim mi.” Sampela Kristen i save tingim ol skripsa bilong mekim isi bel, olsem Buk Song 27:10 na Aisaia 41:10. Sampela i tok taim ol i harim ol odio rekoding bilong ol hap bilong miting ol i redim na ol Baibel ritim, ol i no pilim olsem ol i stap wanpis.

9. Ol miting inap helpim yu olsem wanem?

⁹ Wok strong long go oltaim long ol miting. Bai yu kisim helpim long ol tok i kamap, na tu, bai yu save gut moa long ol bratasista bilong yu. (Hib. 10:24, 25) Massiel, em yumi bin stori pinis long em, em i tok: “Maski mi save sem, mi strongim tingting long go long olgeta miting bilong kongrigesen na bekim wanpela tok. Dispela i helpim mi long pilim olsem mi hap bilong kongrigesen.”

10. Wai na em i bikpela samting long kamap pren bilong ol bratasista long kongrigesen?

¹⁰ Kamap gutpela pren bilong ol wanbilip Kristen. Kisim ol pren insait long kongrigesen em yu inap lain long ol, maski krismas o bekgraun bilong yupela i no wankain. Baibel i tokim yumi olsem “ol lapun i gat savetingting.”  (Jop 12:12) Na ol lapun inap kisim skul tu long ol yangpela insait long kongrigesen. Devit em i yangpela moa long Jonatan, tasol dispela i no pasim tupela long kamap gutpela pren. (1 Sml. 18:1) Devit na Jonatan i helpim narapela narapela long lotuim Jehova maski ol i karim ol bikpela hevi. (1 Sml. 23:16-18) Wanpela sista nem bilong em Irina, em wanpela tasol long famili i Witnes, em i tok: “Ol bratasista inap kamap olsem papa na mama bilong yumi na ol brata na sista bilong yumi long sait bilong bilip. Jehova inap yusim ol long helpim yumi.”

11. Yu mas mekim wanem long kisim ol gutpela pren?

¹¹ Sapos yu gat pasin bilong sem, em bai hatwok long yu kisim ol nupela pren. Ratna em wanpela sista husat i gat pasin bilong sem na em i kisim save long tok i tru maski ol narapela i birua long em. Em i tok: “Mi luksave olsem mi nidim helpim bilong ol bratasista bilong mi insait long kongrigesen.” Yu inap pilim hatwok long kamapim bel na tingting bilong yu long ol narapela, tasol taim yu mekim olsem yu inap kamap gutpela pren bilong ol. Ol pren bilong yu i laik strongim yu na sapotim yu, tasol bilong ol i ken mekim olsem yu, yet i mas tokim ol long ol samting yu nidim helpim long en.

12. Olsem wanem wok autim tok inap helpim yu long kisim ol gutpela pren?

¹² Wanpela gutpela rot bilong kisim ol gutpela pren em long autim tok wantaim ol wanbilip Kristen. Carol, em yumi stori pinis long em, em i tok: “Mi kisim planti gutpela pren taim mi spendim taim wantaim ol sista long wok autim tok na mekim ol narapela wok lotu. Insait long ol yia i go pinis Jehova i helpim mi long rot bilong ol dispela pren.” Yu inap kisim helpim taim yu kamap pren bilong ol wanbilip Kristen. Jehova i save yusim kain ol gutpela pren long daunim ol bel hevi bilong yu, olsem bel hevi bilong stap wanpis.—Prov. 17:17.

13. Olgeta insait long kongrigesen i gat wanem wok?

¹³ Olgeta insait long kongrigesen i gat wok long kamapim bel isi na soim pasin laikim long narapela narapela. Long dispela rot, i no gat wanpela bai i pilim wanpis. (Jon 13:35) Ol toktok na pasin yumi mekim inap strongim tru ol narapela! Tingim tok wanpela sista i mekim, em i tok: “Taim mi kisim save long tok i tru, kongrigesen i kamap olsem famili bilong mi. Mi kamap wanpela Witnes Bilong Jehova bikos long sapot ol bratasista i givim long mi.” Yu ken mekim wanem bilong helpim ol lain i stap wanpis long tok i tru long pilim olsem ol i hap bilong kongrigesen?

14. Yu ken mekim wanem bilong kamap gutpela pren bilong ol narapela?

¹⁴ Go pas long kamap gutpela pren bilong ol narapela. Yumi ken mekim olsem long rot bilong welkamim ol nupela manmeri i kam long kongrigesen. (Rom 15:7) Tasol yumi laik mekim sampela samting moa na i no gritim ol tasol. Yumi laik kamap gutpela pren bilong ol na pas gut wantaim ol inap longpela taim. So mekim gutpela pasin long ol nupela na soim olsem yu tingim ol. No ken askim long ol pesenel samting bilong ol, tasol traim long kliagut long ol hevi ol i karim. Sampela inap pilim hatwok long kamapim ol hevi bilong ol, so no ken fosim ol long tokim yu. Bihainim savetingting taim yu givim ol askim na stap isi na putim gut yau long ol bekim bilong ol. Olsem, yu ken askim hau ol i kisim save long tok i tru.

15. Hau ol Kristen i gat strongpela bilip inap helpim ol narapela insait long kongrigesen?

¹⁵ Olgeta insait long kongrigesen inap kamap strong long bilip taim ol Kristen i gat  strongpela bilip, moa yet ol elda, i tingim ol. Melissa, em mama bilong em i mekim bikpela long em insait long tok i tru, em i tok: “Mi tenkyu tru long ol brata em ol i redi long stap olsem papa bilong mi long sait bilong bilip insait long ol yia i go pinis. Taim mi pilim olsem mi laik autim tingting bilong mi long ol narapela, oltaim wanpela i save redi long putim yau long mi.” Mauricio, em wanpela yangpela brata husat i bel hevi na pilim wanpis taim Baibel tisa bilong em i lusim tok i tru, em i tok: “Ol elda i soim olsem ol i tingim mi tru na dispela i helpim mi. Oltaim ol i save toktok wantaim mi. Ol i save autim tok wantaim mi, na tokim mi long ol gutpela samting ol i lainim long pesenel Baibel stadi bilong ol, na pilai spots wantaim mi.” Melissa na Mauricio wantaim i mekim fultaim sevis.

16-17. Yumi ken mekim wanem ol samting bilong helpim ol narapela?

¹⁶ Mekim ol samting bilong helpim ol narapela. (Gal. 6:10) Leo, em i mekim wok misineri long wanpela kantri i stap longwe long famili bilong em, em i tok: “Sampela taim, yu laik bai wanpela i mekim gutpela pasin long yu long taim stret. Mi tingim wanpela taim mi bin insait long kar eksiden. Bihain long dispela taim mi go kamap long haus, presa i daunim mi tru. Tasol tupela marit i invaitim mi long kaikai wantaim ol. Mi no inap tingim wanem samting mipela kaikai, tasol mi inap tingim ol i bin putim gut yau long mi. Bihain long dispela, mi bin pilim bel isi!”

¹⁷ Yumi olgeta i save amamas long ol tiokratik bung, olsem ol kibung, na wanpela risen em yumi save amamas long lusim taim long toktok wantaim ol narapela na stori long ol tok i kamap long program. Tasol Carol, em yumi stori pinis long em, em i tok: “Long taim bilong ol kibung, mi save pilim olsem mi stap wanpis.” Bilong wanem? Em i tok: “Maski mi stap namel long planti handret o tausen bratasista, planti taim ol i save sindaun o bung wantaim ol famili bilong ol yet. Olsem na mi save pilim olsem mi stap wanpis tru.” Ol narapela i pilim hatwok long go long fes kibung bihain long poroman marit bilong ol i dai. Yu save long wanpela i karim ol dispela kain hevi? Yu ting yu inap invaitim em long sindaun wantaim yu na famili bilong yu long neks kibung?

18. Hau yumi ken bihainim tok bilong 2 Korin 6:11-13 taim yumi mekim gutpela pasin long ol narapela?

 ¹⁸ Spendim taim wantaim ol narapela. Traim long singautim ol narapela narapela bratasista i kam long ol bung yu mekim, moa yet ol bratasista em ol i pilim wanpis. Yumi laik mekim “pasin laikim long bel bilong [yumi] i go bikpela moa,” moa yet long kain ol bratasista olsem. (Ritim 2 Korin 6:11-13.) Melissa, em yumi stori pinis long em, em i tok: “Mipela i save amamas taim ol pren i singautim mipela i go visitim ol na famili bilong ol o go raun wantaim ol.” I gat wanpela long kongrigesen bilong yu em yu inap mekim gutpela pasin long em?

19. Wanem taim i gutpela long spendim taim long bung wantaim ol wanbilip Kristen?

¹⁹ I gat sampela taim we ol wanbilip Kristen bai amamas long yumi spendim taim long bung wantaim ol. Taim ol famili em ol i no wanbilip i selebretim ol holide, dispela inap mekim na sampela i pilim hatwok long stap wantaim ol. Sampela i bel hevi tru taim wanpela ol i laikim tru i dai, na long ol yia bihain long dispela det ol i save bel hevi moa yet. Taim yumi spendim taim wantaim ol bratasista em ol i karim kain ol hevi, yumi soim olsem yumi “tingim tru” ol.—Fili. 2:20.

20. Olsem wanem tok bilong Jisas long Matyu 12:48-50 inap helpim yumi taim yumi pilim olsem yumi stap wanpis?

²⁰ I gat planti samting inap mekim na wanpela Kristen i pilim olsem em i stap wanpis. Tasol oltaim yumi mas tingim olsem Jehova i kliagut long ol wari bilong yumi. Em i save givim yumi ol samting yumi nidim, moa yet long rot bilong ol wanbilip Kristen. (Ritim Matyu 12:48-50.) Na yumi soim Jehova olsem yumi amamas long helpim yumi kisim long kongrigesen taim yumi givim bes bilong yumi long helpim ol bratasista bilong yumi. Maski sampela taim yumi inap pilim olsem yumi stap wanpis, yumi ken save tru olsem oltaim Jehova i stap wantaim yumi.