1. Иегованың бараалгакчылары боттарын чүге чааскаанзыргай кылдыр миннип болур?

ЧААСКААНЗЫРГАЙ чорук-биле улустуң хөй кезии таныш. Чамдык улус бичии када чааскаанзырап болур, а өске улус хөй чылдар дургузунда бодун чааскаанзыргай кылдыр миннип чоруур. Хөй улус аразынга тургаш безин, кижи бодун чааскаанзыргай кылдыр миннип болур. Чижээ, өске чыышче шилчий берген улуска эш-өөрнү тып алыры берге чадавас. Дыка найыралдыг өг-бүлеге өскен улус өске черже көже бергеш, чоок улузун сактып, чааскаанзырап болур. Чоок кижизин чидирип алгаш, чааскаанзырап чоруур улус база бар. Алыс шынны чаа билип алган улус, оларның өг-бүлези болгаш эштери бүзүреп турар чүүлүнге удурланырга, боттарын чааскаанзыргай кылдыр база миннип болур.

2. Кандыг айтырыгларны сайгарар бис?

² Иегова чүнү миннип турарывысты кымдан-даа артык эки билир. Сеткиливис ундараан үелерде Иегова бисти деткиирин күзеп турар. Ол биске канчаар дузалап турар? Чааскаанзыравазынга биске чүү дузалаар? Чыышта акы-угбаларга канчаар дузалап болур бис? Бо айтырыгларның харыызын көрүптээлиңер.

3. Илия муңгарай бээрге, Иегова ооң хей-аъдын канчаар көдүрген?

³ Иегова бараалгакчыларының шуптузу дээш сагыш аарып чоруур. Бистиң кайы-бирээвис муңгарай бээр болза, Ол дораан эскерип каар (Ыд. ыр. 144:18, 19). Бурунгу үеде чурттап чораан Илия медээчиге Иегованың кайы хире кичээнгейлиг болганын сактып кээлиңер. Илия дыка берге үеде бараалгап  чораан. Израиль чонну чагырып турган улус Иеговадан хая көрнүп, Ооң бараалгакчыларын истеп сүрүп эгелээн. Ылаңгыя Илияны олар ийи караа-биле көрбес турган (3 Хаан. 19:1, 2). Ооң кадында, Илия «мен чааскаан Иеговага бараалгап артып калган мен» деп бодап турган. Ынчаар бодангаш, ол бодун дыка чааскаанзыргай кылдыр миннип турган (3 Хаан. 19:10). Иегова ону эскергеш, дораан-на Илияже дээрниң төлээзин чоргузупкан. Ол ооң хей-аъдын көдүрүп, Израильде Бурганга шынчы улус ам-даа бар деп бүзүреткен (3 Хаан. 19:5, 18). Ынчап кээрге, Илия чааскаан эвес болган!

4. Марк 10:29, 30-ден алырга, төрелдериниң болгаш эш-өөрүнүң деткимчезин чидирип алган бараалгакчылары дээш Иегова канчаар сагыш човап турар?

⁴ Аңаа бараалгаар дээш, чамдык улус дыка хөй чүүлдерден ойталаан деп, Иегова дыка эки билип турар. Чижээ, чамдык улустуң чоок дөргүл-төрели болгаш эш-өөрү олардан хая көрнү берген. Бир катап Пётр Иисустан мынча деп айтырган: «Көрүңер даан, бис хамык бар чүвевисти каапкаш, Силерни эдерип чоруптувус. Ынчаарга биске ол дээш, чүү боорул?» (Мф. 19:27). Иисус ооң дүвүреп турарын көргеш, ону эдерген улус «чүс катап хөй... ха-дуңмалыг, аваларлыг, ажы-төлдүг» болур деп чугаалаан. (Номчуптуңар: Марк 10:29, 30.) Амгы үеде Иегова Аңаа бараалгаксап турар улусту деткимче чокка арттырбас деп аазап турар (Ыд. ыр. 9:11). Чааскаанзырап чоруур улус Иегованың деткимчезин алыр дээш, чүнү канчап болурун көрүптээлиңер.

5. Иегованың деткимчезин эскерери чүге чугула?

⁵ Иегованың деткимчезин эскериңер (Ыд. ыр. 54:23). Ону эскерер болзуңарза, байдалды долузу-биле көрүп шыдаптар силер. Кэрол * дээр бот угбавыстың төрелдериниң кайызы-даа Иеговага бараалгавайн турар. Ол мынча дээн: «Дыка берге үелерде Иегованың мени деткип чораанын сактып келгеш, чааскаанзыравайн баар чордум. Иегова мени келир үеде-даа чааскаандырзын кагбас деп ыяк бүзүрээр мен».

6. 1 Пётр 5-ки эгениң 9, 10 дугаар шүлүктерде сөстер чааскаанзырал-биле туржурунга канчаар дузалап турар?

⁶ Өске акы-угбаларга Иегованың канчаар дузалап турарын боданыңар. (Номчуптуңар:  1 Пётр 5:9, 10.) Хиросиниң төрелдери алыс шынны сонуургавайн турар-даа болза, ол Иеговага хөй чылдар дургузунда шынчы бараалгап чоруур. Ол мынча деп үлешкен: «Акы-угбаларның кайызын-даа сагыш амыр чурттап чоруур деп болбас. Ындыг турбуже, олар бүгү сагыш-сеткилинден Иеговага бараалгап чоруур. Ол бодал өг-бүлезинден Иеговага чааскаан бараалгап чоруур улусту сорук киирип болур».

7. Иеговага мөргүлдер силерге канчаар дузалап турар?

⁷ Үргүлчү мөргүңер, Библияны номчуңар, чыыштарже барыңар. Иеговага мөргүп тургаш, чүнү миннип турарыңарны ажыы-биле чугаалаңар (1 Пет. 5:7). Масиель дээр угбавыс Иеговага бараалгап эгелээрге, ооң өг-бүлези оон хая көрнү берген. Ол мынчаар үлешкен: «Чааскаанзыраар минниишкиннер-биле туржурунга меңээ изиг мөргүлдер дузалаан. Мен хүннүң-не сеткил-чүрээмде бар чүүлдү Иеговага хөй катап тө каап берип турган мен. Ол меңээ дыка чоок апарган».

8. Библияны номчууру болгаш ооң дугайында боданыры силерге канчаар дузалап турар?

⁸ Бурганның Сөзүн доктаамал номчуп, Иегова хууда силерге ынак дээрзинге бүзүредип турар үзүндүлерже тускай кичээнгейиңерни салыңар. Бьянка дээр угбавысты чоок улузу бо-ла чөптүг эвес чемелээр. Ол мынча дээн: «Мээң ышкаш бергелерге таваржып чоруур акы-угбаларның болгаш библейжи үелерде чурттап чораан Бурганның бараалгакчыларының дугайында боданырынга ынак мен. Ооң ачызында деткимчени ап турар мен». Чамдык акы-угбалар оларны оожургадып турар шүлүктерни доктаадып ап турар, чижээ, Ырлар 26:10 азы Исайя 41:10-ну. А өскелер хуралга белеткенип тургаш азы Библияны номчуп тургаш, боттарын чааскаанзыргай кылдыр миннивес дээш, аудиобижилгелерни дыңнап турар.

9. Чыыштар силерге кандыг ажык-дузаны чедирип турарыл?

⁹ Чаңгыс-даа чыыш үспес дээш кызыңар. Хурал үезинде билип алган билиглериңер силерни деткиир база акы-угбаларны оон-даа эки билип алыр силер (Евр. 10:24, 25). Кырында чугаалашканывыс Масиель мынча дээн: «Пөрүк турган-даа болзумза, чыыштарны үспес база сайгарылгага киржир деп шиитпирлеп алган мен. Ооң ачызында бодумну чыыштың бир кезии кылдыр миннир чордум».

10. Чыышта акы-угбалар-биле чоок эдержири чүге чугула?

¹⁰ Акы-угбалар-биле чоок эдержиңер. Чеже-даа харыңар дүүшпес азы язы-сөөгүңер ылгалып турар-даа болза, силер олардан дыка хөй чүүлге өөренип ап болур силер. Библияда улуг назылыг улусту хөй арга-дуржулгалыг деп турар (Иов 12:12). Ынчалза-даа олар аныяк улустан база хөй чүвеге өөренип ап болур. Давид Ионафандан оранчок бичии турган-даа  болза, оларның быжыг найыралынга ол чүүл шаптыктаваан (1 Хаан. 18:1). Олар берге үелерде деткижип, Иеговага шынчы артар дээш, бот-боттарынга дузалажып турган (1 Хаан. 23:16—18). Өг-бүлезинде амдыызында чааскаан Иеговага бараалгап чоруур Ирина дээр угбавыс үлешкен: «Чыышта эш-өөрүвүс биске кады-төрээн угбаларывыс, акыларывыс азы төрээн ада-иевис-биле дөмей апарып болур. Биске чедишпес чүүлдү Иегова шак ынчаар хандырып берип турар».

11. Быжыг найырал тургузуп алыр дизе, чүнү канчаар болза эки?

¹¹ Пөрүк болзуңарза, чаа эш-өөрнү тып алыры ылаңгыя берге. Удурланыышкыннар турза-даа, Иегованың Херечизи апарган Ратна дээр ыядыычал угбавыс ооң-биле чөпшээрежир. Ол мынча дээн: «Чыышта акы-угбаларның деткимчези болгаш дузазы кижиге дыка херек деп чүүлдү билген мен». Ийе, сагыш-сеткилди чамдыкта үндүр чугаалаары берге бооп болур, ынчалза-даа чоок найыралдыг болур деп бодаар болза, ажык чугаалажыры чугула. Эштериңер силерге быжыг чөленгииш болгаш деткимче көргүзүксеп чоруур, ынчалза-даа силер оларга чүнү-даа чугаалап бербес болзуңарза, олар силерге канчап дуза кадып шыдаарыл?

12. Чыыш иштинден эштерни тып алырынга биске чүү дузалаар?

¹² Ёзулуг эш-өөрнү тып алыр аргаларның бирээзи — оларның-биле кады суртаалдаары-дыр. Ооң мурнунда көргенивис Кэрол дээр угбавыс мынча деп үлешкен: «Кады суртаалдап, организацияның аңгы-аңгы ажыл-херээнге киржип турган угбаларым меңээ дыка чоок апарган. Хөй чылдар дургузунда Иегова мени ол эштерим таварыштыр деткип чоруур». Шынап-ла, чыышта акы-угбалар-биле чылыг-чымчак хамаарылганы сайзырадыры дыка чугула. Шак ынчаар Иегова бодун чааскаанзыргай кылдыр миннип чоруур улуска чоок эштерни тып алырынга дузалап турар (У. ч. 17:17).

13. Чыышта кижи бүрүзү кандыг харыысалгалыг?

¹³ Чыыш иштинге амыр-тайбыңны тургузар база кым-даа бодун чааскаанзыргай кылдыр миннивезинге дузалаар харыысалгалыг бис (Ин. 13:35). Бистиң чылыг-чымчак сөстеривис азы ажыл-херээвис бир-ле кижини сорук киирип болур! Бир угбавыс мынча дээн: «Мен Библияны өөренип турумда, чыышта акы-угбалар меңээ өг-бүлем ышкаш апарган. Оларның дузазы эвес болза, мен Иеговага бараалгап шыдавас турган ийик мен». Чоок улузу Иеговага бүзүревес акы-угбаларга чыыштың кежигүнү кылдыр бодун минниринге канчаар дузалап болур силер?

14. Чыыжыңарда чаа келген улус-биле найыралды канчаар тудуп болурул?

¹⁴ Найыралдажып алыр дээш, бирги базымны кылыңар. Библия өөренип турар, чоокта чаа сугга суктуруп алган улуска азы өске чыыштан шилчип келген акы-угбаларга чылыг-чымчак хамаарылганы көргүзүңер (Рим. 15:7). Ынчалза-даа оларның-биле чоок найыралдажып алырынга анаа-ла менди солчуру чедишпес. Ынчангаш оларга хууда кичээнгейиңерни көргүзүңер. Улустуң хууда чуртталгазынче киришпейн, эптиг-чөптүү-биле кандыг бергелерге таваржып чоруурун айтырып болур силер. Чамдык улуска боттарының сагыш-сеткилин үндүр чугаалаары берге. Ынчангаш эптиг-чөптүг айтырыглардан салып, оларны кичээнгейлиг дыңнаңар. Чижээ, оларның алыс шынны канчаар билип алганын айтырып болур силер.

15. Бүзүрели быжыг христианнар акы-угбаларга канчаар дузалап болур?

¹⁵ Чыышта акы-угбалар бот-боттары-биле чоок аралажыр болза, оларның бүзүрели дам быжыгар. Ылаңгыя бирги ээлчегде өскелерниң дугайында бүзүрели быжыг христианнар болгаш удуртукчулар сагыш човаар ужурлуг. Авазы алыс шынга кижизидип каан  Мелисса дээр угбавыс мынча дээн: «Чылдар дургузунда удуртукчу акылар меңээ ада дег хамаарылганы көргүзүп, үезин харамнанмайн турганнар. Ынчангаш бергелер тургустунуп кээрге-ле, ол акылар-биле үргүлчү чугаалажыр турган мен. Ол дээш оларга өөрүп четтирер-дир мен!» Маурисио дээр аныяк оолду өөредип турган акый суртаалдаарын соксадыптарга, ол бодун чааскаанзыргай кылдыр миннип эгелээн. «Ол үеде удуртукчу акылар мени дыка деткээн. Олар меңээ кичээнгейни көргүзүп, мээң-биле чугаалажып, кады суртаалдап база, хууда шинчилел кылгаш, кандыг солун бодалдарны билип алганын үлежип турганнар. Оон ыңай олар-биле сывыртанып турган мен». Мелисса-даа, Маурисио-даа амгы үеде долу бараалгап турар.

16, 17. Бисте өскелерге дузалап болур оон ыңай кандыг аргалар бар?

¹⁶ Ажыл-херээңер-биле дузалаңар (Гал. 6:10). Бодунуң төрээн черинден ыракта миссионер бооп бараалгап турар Лео акывыс мынча дээн: «Берге байдалда улус кижиге бичии-даа буянныг херек кылырга, дыка аянныг. Бир катап орук озал-ондаанга таварышкан мен. Коргунчуг шылап кааш, бажыңымга арай деп чедип кээримге, бир өг-бүле мени бажыңынче чалаан. Аңаа чүнү чип турганывысты безин сагынмас мен. Ынчалза-даа оларның меңээ көргүскен буянын болгаш мени кичээнгейлиг дыңнап турганын ам-даа сактыр мен. Ооң соонда сагыш-сеткилим чиигей берген».

¹⁷ Бис шуулганнарга дыка ынак бис. Аңаа акы-угбаларывыс-биле кады чыглып келгеш аралажып, программаны сайгарар аргалыг бис. Ынчалза-даа Кэрол угбавыска шуулганнарже баары белен эвес. «Шуулганга чедип кээрге, улустуң саны чүс азы муң-даа ажа бээр. Хөй кезиинде өг-бүлелиг азы ажы-төлдүг улустар боор, а мен кара чааскаан мен. Ындыг үелерде бодумну оон-даа артык чааскаанзыргай кылдыр миннир чордум» — деп, ол үлешкен. Кады чурттаан эжин чидирип алган акы-угбалар шуулганче бир дугаар чааскаан чедип келгеш, боттарын чааскаанзыргай кылдыр миннип болур. Бо азы өске чылдагаан-биле шуулганнарже баары берге акыңарны азы угбаңарны билир болзуңарза, өг-бүлеңер-биле кады ону дараазында шуулганче чалап ап болур силер.

18. Оюн-тоглаа эрттирер деп тургаш, 2 Коринфичилерге 6:11—13-те сөстерни канчаар ажыглап болур?

¹⁸ Үени кады эрттириңер. Бажыңыңарже азы оюн-тоглааже аңгы-аңгы акы-угбаларны,  ылаңгыя чааскаанзырап чоруур улусту, чалаңар. Доора уткалыг чугаалаар болза, чүректериңерни оларга ажыдып бериңер. (Номчуптуңар: 2 Коринфичилерге 6:11—13.) Мелисса дээр угбавыс мынча деп сагынган: «Чыышта эштеривис авам биле мени бажыңынче чалап азы шөлээ үезинде кандыг-бир черже кады дыштанырынче кыйгырарга, дыка өөрүнчүг турган». А силерниң чыыжыңарда шак мындыг кичээнгейни хереглеп турар улус бар бе?

19. Чыышта ылаңгыя кымга бистиң кичээнгейивис херек база кажан?

¹⁹ Чамдык үелерде акывыска азы угбавыска кичээнгей көргүзери ылаңгыя чугула. Төрелдери Библияга дүүшпес байырлалдар эрттирип турар үеде чамдык акы-угбаларга берге бооп болур. А оон өскелери ынак кижизин чидирип алган чылдаанында боттарын чааскаанзыргай кылдыр миннип болур. Ындыг үелерде оларны чааскаандырзын арттырбайн, үени кады эрттирер болзувусса, олар дээш сагыш човап турар боор бис (Флп. 2:20).

20. Матфей 12:48—50-де Иисустуң сөстери чааскаанзырап чоруур улусту кандыг чүүлге бүзүредип турар?

²⁰ Бурганның бараалгакчылары аңгы-аңгы чылдагааннар дээш чааскаанзырап болур. Ынчалза-даа Иегова бистиң чүрээвисти билип турар деп черле утпаалыңар. Иегова бисти кезээде деткип турар — колдуунда акы-угбалар таварыштыр. (Номчуптуңар: Матфей 12:48—50.) Бистиң кичээнгейивисти хереглеп турар акы-угбаларывыска дузавысты кадып, үевисти үндүрер болзувусса, Иегованың сагыш човаашкыны дээш өөрүп четтиргенивисти илередип турар боор бис. Кандыг-даа минниишкиннер бисти хөме ап келзе, Иегова кезээде бистиң чанывыста. Чааскаан эвес бис деп сактып чоруулуңар!