1. Малы Иеговалэн ужась-тыршисьёсыз шӧдо, соос огназы шуыса?

 ТРОСЭЗ куддыръя шӧдо, соос огназы шуыса. Кинлэн ке но таӵе шӧдонъёсыз дырын-дырын луо, нош кинлэн ке но трос аръёс ӵоже. Куд-огезлэн таӵе шӧдонъёсыз уг ортчо трос адямиос пӧлын но. Кылсярысь, кинлы ке но секыт дышыны выль кенешлы. Кинлэн ке но семьяеныз матысь кусыпъёсыз. Соин ик, мукет интые кошкыса, со туж мӧзме ӵыжы-выжыосызлэсь. Кинлэн ке но матысь адямиез кулӥз. Соин ик со шӧдэ, огназ кылиз шуыса. Нош кин ке но, тужгес но со зэмлыкен алигес тодматскиз ке, шӧдэ ассэ палэнтэмен, малы ке шуоно Инмарлы оскисьтэм ӵыжы-выжыосыз но эшъёсыз сое уг валало яке солы пумитъясько.

2. Кыӵе юанъёсты ми эскеромы?

² Иегова милемыз тодэ но котькинлэсь умойгес милесьтым шӧдонъёсмес вала. Куке ми шӧдӥськомы, ми огнамы шуыса, Инмар со сярысь тодэ, озьы ик солэн милемлы юрттэмез но потэ. Кызьы Иегова милемлы юрттэ? Мар карыны быгатӥськомы ми асьмеос, сыӵе шӧдонъёсты вормон понна? Кызьы ми быгатӥськомы юрттыны кенешысь вын-агайёслы но сузэр-апайёслы? Ойдолэ тодомы.

3. Кызьы Иегова Илия сярысь сюлмаськиз?

³ Иегова туж сюлмаське вань ужась-тыршисьёсыз сярысь. Со милемын ӵош. Со адӟе, куке кинлы ке но мӧзмыт яке куке кинлэн ке но мылкыдыз куашкамын (Пс. 144:18, 19). Ойдолэ тодамы ваёмы, кызьы Иегова Илия сярысь сюлмаськиз.  Та пророк ужаз-тыршиз, куке Израильын секыт югдур вал. Кивалтӥсьёс, кудъёсыз Иеговалэсь палэнскизы, солэсь ужась-тыршисьёссэ уйылӥзы-уллязы. Нош тужгес но соослэн Илияез виемзы потэ вал (3 Экс. 19:1, 2). Озьы ик Илия ачиз но малпаз, со сяна Инмарлы оскымон мукет пророкъёс ӧвӧл ини шуыса. Та малпан солэсь мылкыдзэ куашкатэ вал, дыр (3 Экс. 19:10). Иегова тае соку ик адӟиз но Илия доры кылчинэз ыстӥз. Кылчин сое оскытӥз, Израильын азьло сямен ик Инмарлы оскымон трос ужась-тыршисьёс вань шуыса (3 Экс. 19:5, 18). Озьыен, Илия огназ кылемын ӧй вал.

4. Марклэсь 10:29, 30 верамъя, кызьы Иегова сюлмаське аслаз ужась-тыршисьёсыз сярысь, кудъёсызлы ӵыжы-выжыоссы яке эшъёссы юрттэмысь дугдӥзы?

⁴ Иегова вала, куд-огъёсыз, солэн ужась-тыршисьёсыз луыса, троссэ кельтӥзы шуыса. Кылсярысь, кинлы ке но ӵыжы-выжыосыз но эшъёсыз юрттэмысь дугдӥзы. Одӥг пол апостол Пётр Иисуслэсь юаз: «Тани ми ваньзэ кельтӥмы но Тон сьӧры мыныны потӥмы. Со понна милемлы мар сётэмын луоз?» (Матф. 19:27). Пётрлэн кылъёсысьтыз сюлмаськемез шӧдӥськиз, дыр. Нош Иисус дышетскисьёссэ лякытэн оскытӥз, кенеш соослы семья кадь луоз шуыса. (Лыдӟе Марклэсь 10:29, 30.) Озьы ик Иегова но, инмысь Атаймы, кылзэ сётэ, юрттоз шуыса соослы, кинъёслэн солы ужамзы-тыршемзы потэ (Пс. 9:11). Иегова милемлы мед юрттоз шуыса, куд-ог вамышъёс лэсьтоно. Ойдолэ эскеромы, мар карыны луэ, куке огнамы кылимы шуыса шӧдӥськомы.

5. Кыӵе пайда вае Иеговалэн юрттэмез сярысь малпаськон?

⁵ Адӟыны тырше, кызьы Иегова тӥледлы юрттэ (Пс. 54:23). Та юрттоз тӥледлы валаны, тӥ огнады ӧвӧл шуыса. Кэрол b нимо бызьымтэ сузэр, кудӥзлэн ӵыжы-выжыосыз пӧлысь нокин но Иеговалы уг оскы, вера: «Мон малпаськисько со сярысь, кызьы Иегова юрттылӥз мыным шуг-секытъёс дыръя. Соку мон уг малпаськы ини, мон огнам шуыса. Та монэ оскытэ, Иегова азьланяз но монэ уз кельты шуыса».

6. Кызьы кылъёс, кудъёсыз гожтэмын 1 Пётрлэн 5:9, 10, юнматыны быгато соосты, кинъёс малпало, соос огназы шуыса?

 ⁶ Малпаське, кызьы Иегова юрттэ, мукет вын-агайёслы но сузэр-апайёслы. (Лыдӟе 1 Пётрлэсь 5:9, 10.) Хироси агай, кудӥзлэн ӵыжы-выжыосыз Иеговалы уг оско, трос аръёс ӵоже ини Иеговалы оскымон ужа-тырше. Со вера: «Учконо ке, кенешын котькинлэн шуг-секытъёсыз вань. Со дыре ик котькудӥз вань сюлмысьтыз Иеговалы ужа-тырше. Та малпан юнматыны быгатэ соосты, кинъёслэн ӵыжы-выжыоссы Иеговалэн Адӟись-Ивортӥсьёсыз уг луо».

7. Кызьы тӥледлы юрттэ вӧсяськон?

⁷ Ялан вӧсяське, Библиез лыдӟе но кенешлэн пумиськонъёсаз ветлэ. Иеговалы вӧсяськыкуды, одно ик вералэ солы шӧдонъёсты сярысь (1 Пётр 5:7). Куке Масиель нимо нылмурт Иеговалэн Адӟись-Ивортӥсез луиз, быдэс семьяез солэсь палэнскиз. Тани мар со вера: «Мон вань сюлмысьтым Иеговалы вӧсяськи. Та юрттӥз мыным, куке мон шӧдӥ, огнам кыли шуыса. Иегова мыным зэмос Атай луиз. Мон котькуд нунал трос пол солы вӧсяськи но, номыре ватытэк, ваньзэ солы вералляй».

8. Кызьы тӥледлы юрттэ Библиез лыдӟон но со вылын малпаськон?

⁸ Ялан лыдӟе Инмарлэсь Кылзэ. Тужгес но саклыктэс висъялэ со кылбуръёслы, кудъёсыз оскыто, Иегова тӥледыз яратэ шуыса. Бьянка нимо сузэр ялан кылзоно луэ, кызьы семьяез сое пыкылэ. Со вера: «Мыным кельше малпаськыны вашкала дыръя но асьме нуналъёсы улӥсь Инмарлэн ужась-тыршисьёсыз сярысь, кудъёсызлэн югдурзы мынам югдурелы тупа. Та монэ туж юнматэ». Куд-ог христианъёс дышето Библиысь кылбуръёсты, кудъёсыз соосты буйгато, кылсярысь, Псалтирез 26:10 но Исаиялэн 41:10. Нош мукетъёсызлы юрттэ таӵе амал: соос аудиогожтэмъёсты кылзо, куке кенешлэн пумиськонъёсызлы дасясько яке ас понназы Библиез лыдӟо.

9. Кыӵе пайда тӥледлы ваё кенешлэн пумиськонъёсыз?

⁹ Тырше кенешлэн котькуд пумиськоназ ветлыны. Тӥлесьтыд мылкыддэс ӝутоз со, мае тӥ кылоды, озьы ик тӥ эшшо но умойгес тодматскоды вын-агайёсын но сузэр-апайёсын (Евр. 10:24, 25). Масиель сузэр, кудӥз сярысь вераськиз ини, шуэ: «Мон туж возьдаськись вал. Озьы ке но мон ужпум кутӥ котькуд пумиськонэ ветлыны но эскеронэ пыриськыны. Та юрттӥз мыным вын-агайёсын но сузэр-апайёсын кусыпъёсме юнматыны».

10. Малы вын-агайёсын но сузэр-апайёсын эшъяськыны кулэ?

¹⁰ Эшъяське вын-агайёсын но сузэр-апайёсын. Утчалэ кенешысь сыӵе эшъёсты, кудъёсызлэсь тӥ малы ке но дышетскыны быгатоды, соос тӥлесьтыд пичигес яке бадӟымгес ке но, яке мукет калыкысь ке но. Библия милемлы тодамы вайытэ, арлыдоос улонэз умой тодо шуыса (Иов 12:12). Озьы ке но соос егитъёслэсь тросэзлы дышетскыны быгато. Давид Ионафанлэсь трослы пичигес вал, нош та соослы ӧз люкеты матысь эшъёс луыны (1 Экс. 18:1). Соос секыт дыръёсы ог-огзылы юрттӥськизы. Солы луыса соос Иеговалы оскымон кыльыны быгатӥзы (1 Экс. 23:16—18). Тани мар вера Ирина, кудӥзлэн ӵыжы-выжыосыз пӧлын Иеговалэн Адӟись-Ивортӥсьёсыз ӧвӧл на: «Кенешысь эшъёс асьме семья кадь луыны быгато. Озьы Иегова сётэ сое, мар милемлы кулэ».

11. Мар кароно, матысь эшъёс шедьтон понна?

 ¹¹ Выль эшъёсты шедьтыны капчи ӧвӧл, тужгес но тӥ возьдаськисесь ке. Тани мар со сярысь вера сыӵе ик сямо Ратна сузэр, кудӥз Адӟись-Ивортӥсь луиз, ӵыжы-выжыосызлэн пумитъяськемзы шоры учкытэк. Со шуэ: «Мон валай, мыным кенешысь вын-агайёслэн но сузэр-апайёслэн юрттэмзы туж кулэ шуыса». Куд-огъёсызлы шӧдонъёссы сярысь вераны секыт ке но, номыре ватытэк вераськон матысь эшъёс шедьтыны юрттэ. Эшъёстылэн тӥледлы юрттэмзы потэ. Нош кызьы соос тӥледлы юрттозы, тӥ асьтэ сярысь номыр ӧд вералэ ке?

12. Мар юрттоз милемлы кенешысь умой эшъёс шедьтыны?

¹² Кинэн ке эшъяськон понна, одӥгез тужгес но умой амал — соин ӵош ужаны-тыршыны. Кэрол сузэр, кудӥз сярысь вераськиз ини, шуэ: «Тросэз сузэръёс, кудъёсыныз ӵош мон Иеговалы йыбыртъянэн герӟаськем пӧртэм ужъёсы пыриськи, мыным матысь эшъёс луизы. Трос аръёс ӵоже Иегова мыным юрттэ та сузэръёс пыр». Зэм но, туж кулэ кенешысь вын-агайёсын но сузэр-апайёсын шуныт кусыпъёс будэтыны. Та эшшо одӥгез амал, кызьы Иегова милемлы юрттыны быгатэ, куке ми малпаськомы, ми огнамы шуыса (Мад. 17:17).

13. Мар карыны тыршоно кенешысь котькудӥзлы?

¹³ Ми пӧлысь котькудӥзлы тыршоно, кенешын тупаса улон мед луоз шуыса. Озьы ик ваньмызлы яратонмес возьматоно. Нокин но медаз шӧды, со огназ шуыса (Иоанн 13:35). Асьмелэн ӟеч кылмы яке ужмы кинэ ке бурдъяны быгатэ. Тани мар вера одӥг сузэр: «Куке мон Библиез дышетӥ, кенешысь вын-агайёс но сузэр-апайёс мыным аслам семьяе кадь луизы. Соос мыным ӧз юрттысалзы ке, мон Иеговалы ужаны-тыршыны ӧй кутскысал». Нош мар тӥ карыны быгатӥськоды, соос, кинъёслэн семьяязы Адӟись-Ивортӥсьёс ӧвӧл, мед шӧдозы, кенешын соосты ярато шуыса?

14. Мар кароно, кенешысьтыды выльёсыныз эшъяськон понна?

¹⁴ Тырше мукетъёсыныз эшъяськыны. Нырысь ик шуныт пумиталэ кенешысь выль адямиосты: дышетскисьёсты но, алигес пылатӥськемъёсты но, озьы ик соосты но, кинъёс кемалась ӧвӧл тӥ доры мукет кенешысь выжизы (Рим. 15:7). Но соосты шуныт пумитаны гинэ тырмыт ӧвӧл, малы ке шуоно милям ужпуммы — соосын матысь кусыпъёс будэтыны. Соин ик соосын сюлмысь тунсыкъяське. Мултэс юанъёс сётъятэк, тырше валаны, кыӵе соослэн шуг-секытъёссы вань. Эн вунэтэ: куд-огъёсызлы шӧдонъёссы сярысь вераны капчи ӧвӧл. Соин ик тае лыдэ басьтэ, тужгес но соку, куке юанъёс сётъяськоды. Лякытэн тунсыкъяське сыӵе адямиосын но соосты чидаса кылзэ.  Кылсярысь, юаны луоз, кызьы соос зэмлыкен тодматскизы.

15. Кызьы юн осконэн христианъёс юрттыны быгато вын-агайёслы но сузэр-апайёслы?

¹⁵ Кенешысь вын-агайёс но сузэр-апайёс ог-огенызы сюлмысь тунсыкъясько ке, соку котькудӥзлэн осконэз юнма. Нырысь ик мукетъёсыз сярысь сюлмаськыны кулэ юн осконэн христианъёс, тужгес но тӧроос. Мелисса сузэрез зэмлыклы анаез дышетӥз. Тани мае тодаз вае Мелисса: «Мон туж тау карисько кенешысь вын-агайёслы, кудъёсыз трос аръёс ӵоже мон сярысь атайёс кадь сюлмаськизы. Соос мыным дырзэс ӧз жалялэ но кулэ дыръяз монэ кылзыны дась вал». Маурисио нимо егит агай шӧдӥз, сое огназэ кельтӥзы шуыса, куке Адӟись-Ивортӥсь, кудӥз соин Библиез дышетӥз, тодытэмысь дугдӥз. Маурисио вера: «Мыным туж юрттӥзы тӧроос. Соос мыным саклыксэс висъязы, монэн ӵем вераськизы, монэн ӵош тодытӥзы, вераллязы тунсыко учыръёсты, кудъёссэ шедьтӥзы, асьсэ понна Библиез эскерыкузы. Ми ӵош шутэтскимы но». Табере Мелисса но, Маурисио но Иеговалы вань дырзэс сётыса ужало тыршо.

16, 17. Кызьы эшшо ми мукетъёсызлы юрттыны быгатӥськомы на?

¹⁶ Уж вылын юрттэ (Гал. 6:10). Лео агай, кудӥз вордскем палъёсызлэсь кыдёкын миссионер луыса ужа тырше, вера: «Ӵем дыръя самой кулэез — со дырыз дыръя лэсьтэм ӟеч уж. Одӥг пол мон аварие сюри. Куке мон дорам бертӥ, мон чылкак катьтэммемын вал ини. Соку одӥг кузпалъёс монэ ас доразы сиськыны ӧтизы. Мон уг тодӥськы ини, мае ми сиимы, но тодӥсько на, соос асьсэды лякытэн возизы но монэ сак кылзӥзы шуыса. Собере мон асме умойгес шӧдӥ ини».

¹⁷ Ваньмылы милемлы кельшо конгрессъёс. Отын милям луонлыкмы вань адӟиськыны вын-агайёсынымы но сузэр-апайёсынымы но ог-огмылы тунсыко малпанъёс вераны. Нош Кэрол сузэр понна конгрессъёс — со туж секыт дыр. Со валэктэ: «Конгрессъёсын мон кӧня ке сю, куддыръя кӧня ке сюрс адямиос пӧлын. Соос пӧлысь тросэз — кузпалъёс но семьяос, нош мон огнам. Сыӵе дыре мон тужгес но зол шӧдӥсько, мон огнам шуыса». Озьы ик секыт луыны быгатэ сыӵе вын-агайёслы но сузэр-апайёслы, кудъёсыз кузпалзытэк кылизы, тужгес  но соку, куке соос конгрессэ нырысетӥзэ огназы лыкто. Тодӥськоды-а тӥ кинэ ке, кинлы секыт конгрессъёсы ветлыны та яке мукет мугъёсын сэрен? Соку ӵектэ соослы вуонояз конгрессэ тӥледын но семьяеныды ӵош мыныны.

18. Кызьы уже кутыны луэ кылъёсты, кудъёсыз гожтэмын 2 Коринфъёслы 6:11—13, куке ми кинэ ке куное ӧтьыны малпаськомы?

¹⁸ Дырдэс ӵош ортчытъялэ. Пӧртэм вын-агайёсын но сузэр-апайёсын ӵош дырдэс ортчытъялэ, тужгес но соосын, кинъёс шӧдыны быгато, соос огназы шуыса. Сыӵе агайёслы но сузэръёслы сюлэмдэс паськыт усьтэ. (Лыдӟе 2 Коринфъёслы 6:11—13.) Мелисса тодаз вае: «Мон котьку но шумпотӥсько вал, куке эшъёсы монэ но анайме куное яке отпуске ӵош ветлыны ӧтьылӥзы». Нош вань-а тӥляд кенешады сыӵе вын-агайёс но сузэр-апайёс, кудъёсызлы тӥ саклыктэс висъяны быгатысалды?

19. Кенешысь кинъёслы тужгес но саклыкмес висъяно но ку?

¹⁹ Куддыръя вын-агайёслы но сузэр-апайёслы тужгес но кулэ, ми соос вӧзын мед луомы шуыса. Куд-огъёсызлы секыт луэ праздникъёс дыръя Адӟись-Ивортӥсь луисьтэм ӵыжы-выжыоссы пӧлын. Мукетъёсызлы туж секыт луэ куд-ог нуналъёсы, кылсярысь, матысь адямизылэн кулон нуналаз. Ми сыӵе вын-агайёслы но сузэр-апайёслы дырмес ӵош ортчытыны ӵектӥмы ке, соос адӟозы, ми соос сярысь вань сюлмысьтымы сюлмаськиськомы шуыса (Флп. 2:20).

20. Кызьы милемлы юртто кылъёс, кудъёсыз гожтэмын Матфейлэсь 12:48—50, куке ми малпаськомы, ми огнамы шуыса?

²⁰ Куддыръя Инмарлэн ужась-тыршисьёсыз шӧдыны быгато, соос огназы шуыса. Та трос мугъёсын сэрен луыны быгатэ. Озьы ке но ойдолэ ум вунэтэ: Иегова милемыз туж умой вала. Со милемыз котьку но буйгатэ, ӵем дыръя вын-агайёсмы но сузэр-апайёсмы пыр. (Лыдӟе Матфейлэсь 12:48—50.) Нош ми Иеговалы сюлмаськемез понна тау каронмес возьматомы, вын-агайёслы но сузэр-апайёслы вань кужмысьтымы юрттыны тыршимы ке. Кыӵе гинэ шӧдонъёсмы милям медам кылдэ, ми ноку но огнамы ум кыле, малы ке шуоно Иегова котьку но милемын ӵош!