1. Diesorọ idibo ri Jihova evo vwọ dia ẹdia ọruvwohwo ọke evo?

BUEBUN rẹ avwanre mrẹ oma rẹ avwanre vwẹ ẹdia ọruvwohwo ọke evo. Ihwo evo fobọ phi ẹdia na kparobọ. Efa sa dia ẹdia ọruvwohwo vwẹ ọke grongron. Avwanre sa dia ẹdia ọruvwohwo o da tobọ dianẹ ihwo riariẹ avwanre phiyọ. Ihwo evo mrẹ bẹnbẹn rẹ ayen vwo vwo igbeyan siẹrẹ ayen de kpo ukoko kpokpọ. Efa re vẹ ihwo rẹ orua rayen kpẹkpẹre mamọ mrẹ oma rayen vwẹ ẹdia rẹ ọruvwohwo ọke rẹ ayen da kua kpo asan ro sherabọ. Efa je herọ ri roro kpahen ohwo rẹ ayen vwo ẹguọnọ kpahen ro ghwuru. Inenikristi evo, ma rho kẹ e re mrẹ uyota na vughe obọ, je mrẹ oma rayen vwẹ ẹdia ọruvwohwo ọke rẹ ihwo rẹ orua yẹrẹ igbeyan re ga Jihova-a de muẹkpahen ayen.

2. Enọ vọ yen a cha kpahenphiyọ?

² Jihova vwo ẹruọ rẹ ẹdia rẹ avwanre hepha. Ọ riẹn siẹrẹ avwanre dahẹ ẹdia ọruvwohwo, ọ je guọnọ chọn avwanre uko vwo phi ẹdia na kparobọ. Mavọ yen Jihova chọn avwanre uko wan? Die yen avwanre se ru, vwọ chọn ihwo efa uko? Mavọ yen avwanre sa vwọ vwẹ ukẹcha kẹ iniọvo rẹ ukoko rẹ avwanre rehẹ ẹdia ọruvwohwo? E jẹ a mrẹ ẹkpahọnphiyọ rẹ enọ nana.

3. Mavọ yen Jihova vwo djephia nẹ o ni Ilaija so?

³ Jihova guọnọre nẹ oma vwerhen idibo rọyen eje. O sikẹrẹ avwanre ohwo vuọvo, o ji nẹ avwanre sua ọke rẹ ofu de dje avwanre. (Une 145:18, 19) Roro kpahen oborẹ Jihova nabọ vwo oniso rẹ Ilaija vẹ obo rọ chọn rọ uko wan. Ọmraro yena rọ fuevun diarọ vwẹ ọke rẹ ihwo rẹ Izrẹl vwo hirharoku egbabọse egangan. Ọke yena, ihwo rehẹ ẹdia ride  vwẹ Izrẹl muẹkpahen ihwo rẹ Ọghẹnẹ, ayen tobọ guọnọ hwe Ilaija. (1 Ivie 19:1, 2) Vwọba, Ilaija rorori nẹ ọyen ọvo yen ọmraro ri Jihova ro chekọ, ọyena sa dia emu ọfa rọ nẹrhẹ ofu dje. (1 Ivie 19:10) Jihova da vwẹ ukẹcha kẹ kpakpata. O de ji amakashe rọyen ra vwẹ imuẹro kẹ nẹ ọ dia ọyen ọvo yen chekọ-ọ, ihwo rẹ Izrẹl efa buebun je herọ re je fuevun ga Jihova!—1 Ivie 19:5, 18.

4. Mavọ yen eta rehẹ Mak 10:29, 30 vwo djephia nẹ Jihova roro kẹ idibo rọyen rẹ igbeyan vẹ ihwo rẹ orua se chukoku?

⁴ Jihova riẹnre nẹ evo usun rẹ avwanre ri brorhiẹn ra vwọ vwẹ ẹga kẹ na, vwẹ ekuakua buebun vwo ze. Igbeyan sa yanjẹ ohwo vwo, ihwo rẹ orua sa sen avwanre. Ọ sa dianẹ ọdavwẹ nana yen nẹrhẹ ọyinkọn Pita nọ Jesu onọ nana: “Nighe, avwanre jẹ emu na ejobi vwo vwo nene uwe re: Kidie avwanre se vwo vwọ?” (Matiu 19:27) Jesu da vwẹ imuẹro kẹ idibo rọyen nẹ ayen che vwo orua rode rẹ idibo rẹ Ọghẹnẹ. (Se Mak 10:29, 30.) Jihova rọ dia Ọgbuyovwin rẹ orua na veri nẹ ọyen che bicha ihwo re guọnọ vwẹ ẹga kẹ. (Une 9:10) E gbe jẹ a ta ota kpahen erọnvwọn evo wo se ru rere Jihova sa vwọ chọn wẹ uko vwo yerin ghene ẹdia ọruvwohwo.

5. Erere vọ yen se norhe siẹrẹ wo de roro kpahen ukẹcha rẹ Jihova vwọ kẹ wẹ?

⁵ Roro kpahen ukẹcha rẹ Jihova vwọ kẹ wẹ. (Une 55:22) Ọnana cha chọn wẹ uko vwọ vwẹ ẹro abavo vwo ni ẹdia wẹn na. Oniọvo aye ọvo re se Carol, * rẹ ihwo rẹ orua rọyen hẹ ukoko na-a, da ta: “Mi de roro kpahen oborẹ Jihova nabọ chọn vwẹ uko ọke mi vwo hirharoku ebẹnbẹn sansan, ki mi ghwe vwo imuẹro nẹ ọ dia ọmẹvwẹ ọvo yen herọ ọke yena-a. Ọ je nẹrhẹ mi vwo imuẹro nẹ Jihova je cha chọn vwẹ uko vwẹ ọke rọ cha obaro na.”

6. Mavọ yen 1 Pita 5:9, 10 sa vwọ dia ọbọngan kẹ iniọvo rehẹ ẹdia ọruvwohwo?

⁶ Roro kpahen oborẹ Jihova biẹcha idibo rọyen rehẹ ẹdia ọruvwohwo. (Se 1 Pita 5:9, 10.) Oniọvo ọshare ọvo re se Hiroshi,  rẹ ọyen ọvo dia Oseri ri Jihova vwẹ orua rọyen vwẹ ikpe buebun da ta: “O vwo ohwo vuọvo vwevunrẹ ukoko na ro jẹ ebẹnbẹn evwo-o. Iniọvo sansan rẹ ihwo rẹ orua rayen hẹ evunrẹ ukoko na-a, da karophiyọ nẹ ihwo eje rehẹ ukoko na davwẹngba vwọ ga Jihova, ọyena sa dia ọbọngan vwọ kẹ ayen.”

7. Mavọ yen ẹrhovwo vwọ chọn wẹ uko?

⁷ Nẹrhovwo, se Baibol, ji kpo uyono ọkieje. Vuẹ Jihova ọdavwẹ wẹn ejobi. (1 Pita 5:7) Oniọvo aye ọvo re se Massiel da ta: “Ọvo usun rẹ obo re ma ghanre kparobọ rọ chọn vwẹ uko vwo phi ẹdia ọruvwohwo kparobọ yen ẹrhovwo ro nẹ otọ rẹ ubiudu rhe.” Massiel ọyen eghene aye rọhẹ ẹdia ọruvwohwo kidie ihwo orua rọyen ga Jihova-a. Ọ da je ta: “Jihova ghini ọsẹ mẹ, me nẹrhovwo rhe abọ buebun kẹdẹ kẹdẹ me vwọ vuẹ kpahen ebẹnbẹn mẹ.”

8. Mavọ yen isese ri Baibol vẹ eroro kpahọn sa vwọ chọn wẹ uko?

⁸ Se Baibol na kẹdẹ kẹdẹ, wo mi ji roro kpahen udje rẹ ihwo evo vwẹ Baibol na ri dje oborẹ Jihova vwo ẹguọnọ wẹ te. Oniọvo aye ọvo re se Bianca rẹ ihwo orua rọyen ta eta ebrabra kẹ kọke kọke, da ta: “Isese vẹ eroro kpahọn rẹ ikuegbe rẹ idibo ri Jihova ri chirakon rẹ ẹdia tiọna wanre, ghene chọn vwẹ uko mamọ.” Iniọvo evo se ẹkpo ri Baibol kerẹ Une Rẹ Ejiro 27:10 kugbe Aizaya 41:10 kuyovwin, kidie ayen riẹnre nẹ ẹkpo ri Biabol tiọyena sa bọn ayen gan. Efa kerhọ rẹ uhworo rẹ ẹbe re vwo ruẹ uyono ọke rẹ ayen de muegbe rẹ uyono yẹrẹ ruẹ uyono romobọ, ọyena nẹrhẹ ayen karophiyọ nẹ ọ dia ayen ọvo yen herọ-ọ.

9. Erere vọ yen wọ mrẹ siẹrẹ wo de kpo uyono ọkieje?

⁹ Davwẹngba wẹn eje rere wo kpo uyono ọkieje. Wọ cha mrẹ ọbọngan siẹrẹ wo de ru ọtiọyen; vwọba, uyono ẹra je cha nẹrhẹ wọ nabọ vughe iniọvo wẹn. (Hib. 10:24, 25) Massiel ra ta ota kpahen siẹvure da ta: “Dede nẹ mẹvwẹ ohwo rẹ oma vua, mi brorhiẹn mi vwo kpo uyono ọkieje je kpahenphiyọ onọ. Ọyena nẹrhẹ mi se ni oma mẹ kerẹ ẹbẹre ọvo rẹ ukoko na.”

10. Diesorọ o vwo fo nẹ a vwẹ ugbeyan vwo mu iniọvo rẹ ukoko na ri fuevun?

¹⁰ Vwẹ ugbeyan mu idibo rẹ Ọghẹnẹ ri fuevun. Guọnọ igbeyan vwẹ ohri rẹ iniọvo wo se yono mie, ọ da tobọ dianẹ asan rẹ ayen dia ghwanre fẹnẹ ọwẹn, yẹrẹ ayen kpako nọ wẹ. Baibol na karophiyọ avwanre nẹ “ekpako na ri vwo aghwanre.” (Job 12:12.) Ihwo re kpakore ji se yono emu buebun mie ighene ri fuevun.  Jonatan vien Devid shesheri, dedena ayen ihwo ivẹ na riavwerhen rẹ oyerinkugbe rọ kpẹkpẹre. (1 Sam. 18:1) Devid vẹ Jonatan chọn ohwohwo uko vwọ fuevun kẹ Jihova ọke rẹ ayen vwo hirharoku ebẹnbẹn egangan. (1 Sam. 23:16-18) Irina rọ dia oniọvo aye rẹ ihwo rẹ orua rọyen dia Iseri ri Jihova-a, da ta: “Iniọvo rẹ avwanre sa ghene dia esẹ vẹ ini kugbe iniọvo evun rẹ avwanre. Jihova sa reyọ ayen vwọ chọn avwanre uko.”

11. Die yen e che ru siẹrẹ a da guọnọ vwo omamọ rẹ igbeyan?

¹¹ Ọ lọhọre e vwo vwo igbeyan kpokpọ-ọ, ma rho siẹrẹ wọ da dia ohwo rẹ oma vua. Ratna rọ dia oniọvo aye rẹ oma vua mamọ ro ji hirharoku ẹvwọsuọ fikirẹ esegbuyota rọyen, da ta: “Me rhe mrẹvughe nẹ me guọnọ obicha vẹ ukẹcha rẹ iniọvo rẹ ukoko na.” Ọ sa dia bẹnbẹn wọ vwọ vuẹ ohwo ọfa kpahen ebẹnbẹn wẹn, ẹkẹvuọvo wo de ru ọtiọyen, ọyena sa nẹrhẹ ovwẹ vẹ oniọvo na rhe dia igbeyan re kpẹkpẹre. Iniọvo na ghene guọnọ bicha wẹ je chọn wẹ uko, ẹkẹvuọvo wẹwẹ yen cha vuẹ ayen ukẹcha wọ guọnọre.

12. Mavọ yen aghwoghwo sa vwọ chọn wẹ uko vwo vwo omamọ rẹ igbeyan?

¹² Ọvo usun rẹ idjerhe ro me yovwin ra sa vwọ vwẹ ugbeyan vwo mu iniọvo rẹ ukoko na, ọyen re vwo nene ayen wian vwẹ aghwoghwo. Carol re djunute siẹvure da ta: “Me vwẹ ugbeyan vwo mu iniọvo eya buebun ri mi nene wiankugbe vwẹ aghwoghwo yẹrẹ ruiruo efa vwẹ ukoko na. Jihova ghene vwẹ iniọvo nana re rhe dia igbeyan mẹ na, vwọ chọn vwẹ uko.” Erere herọ dẹn siẹrẹ wọ da vwẹ ugbeyan vwo mu iniọvo rẹ ukoko na ri fuevun. Jihova reyọ igbeyan tiọyena vwọ chọn wẹ uko siẹrẹ wọ dahẹ ẹdia ọruvwohwo.—Isẹ 17:17.

13. Oghwa vọ yen iniọvo rẹ ukoko na eje vwori?

¹³ Avwanre eje vwo oghwa re vwo toroba ufuoma vẹ ẹguọnọ rọhẹ ukoko na, rere ohwo vuọvo vwo jẹ ọruvwohwo ẹ dia. (Jọn 13:35) A sa bọn iniọvo rẹ avwanre gan womarẹ ota vẹ uruemu! Oniọvo aye ọvo da ta: “Me vwọ mrẹ uyota na vughe, iniọvo rẹ ukoko na da rhe dia ihwo rẹ orua mẹ. Me cha sa dia Oseri ri Jihova ababọ rẹ ukẹcha raye-en.” Die yen wo se ru rere iniọvo sansan rẹ ihwo rẹ orua rayen dia Iseri ri Jihova-a sa vwọ riẹn nẹ iniọvo rẹ ukoko na vwo ẹguọnọ rayen?

14. Die yen wo che ru rere wọ sa vwọ vwẹ ugbeyen mu ihwo kpokpọ?

¹⁴ Vwẹ ugbeyan vwo mu ihwo kpokpọ vwevunrẹ ukoko na. Owọẹjẹ rẹsosuọ ọyen re vwo dede ayen sasasa. (Rom 15:7) Ẹkẹvuọvo, avwanre guọnọ ru vrẹ e di vwo yeren ayen. Avwanre guọnọ vwẹ ugbeyan vwo mu ayen. Ọtiọyena, gbe dje ẹguọnọ kẹ ayen. Davwẹngba vwọ riẹn ebẹnbẹn rẹ ayen hirharoku, ẹkẹvuọvo wọ nọ enọ re cha nẹrhẹ oma vo aye-en. Evo sa mrẹ bẹnbẹn rẹ ayen vwọ vuẹ ihwo efa oborẹ ayen hirharokuẹ, ọtiọyena wọ gba ayen vwọ ta ota-a. Ukperẹ ọtiọyen, vwẹ aghwanre vwọ nọ ayen enọ, wọ me je kerhọ rẹ ekpahọnphiyọ rayen vẹ odirin. Kerẹ udje, wọ sa nọ ayen oborẹ ayen wan mrẹ uyota na vughe.

15. Mavọ yen iniọvo ri tedje sa vwọ vwẹ ukẹcha kẹ ihwo efa?

¹⁵ Esegbuyota rẹ ihwo eje vwẹ ukoko na cha ganphiyọ siẹrẹ iniọvo ri tedje, ma rho kẹ ekpako na, de vwo oniso rayen. Melissa rọ vẹ oni rọyen hẹ ukoko na da ta: “Unu che se gbe oborẹ oma vwerhen  ovwẹ te-e, fikirẹ iniọvo eshare re vwẹ oma vwo ru esẹ kẹ vwẹ, vwẹ ikpe buebun rhire na. Me mrẹ ohwo nene ta ota kọke kọke me da guọnọ ta ẹwẹn mẹ phia.” Eghene ọshare ọvo re se Mauricio muomaphiyọ ọke rẹ oghwoghwota ro yono Baibol na vwo she nẹ ukoko na, ọ da ta: “Ekpako na nabọ bicha vwẹ, ọnana chọn vwẹ uko dẹ-ẹn. Ọkieje yen ayen vwo nene uvwe ta ota. Ayen nene uvwe wian vwẹ aghwoghwo, ayen vuẹ vwẹ oborẹ ayen mrẹre vwẹ isese ri Baibol romobọ rayen, ayen je tobọ nene uvwe heha ọke sansan.” Melissa vẹ Mauricio ga vwẹ Bẹtẹl enẹna.

16-17. Erhọ yen idjerhe evọ ra sa vwọ chọn ihwo efa uko?

¹⁶ Vwẹ ukẹcha kẹ ayen. (Gal. 6:10) Leo rọ dia imishọnare rọ ga vwẹ ẹkuotọ ro sherabọ kẹ ihwo rẹ orua rọyen da ta: “Ọke buebun na, ukẹcha tutuno yen ihwo de guọnọ vwẹ ọke ro fori. Me karophiyọ ẹdẹ ọvo rẹ imoto mẹ vwo vwo asidẹnti. Mi rhi vwo te uwevwin jẹ oma ghwọrọ ovwẹ mamọ re. Oniọvo ọvo vẹ aye rọyen de durhie uvwe kpo uwevwin rayen vwọ kẹ emuọre. Oborẹ avwanre rere chọrọ ovwẹ ẹro re, ẹkẹvuọvo me karophiyọ nẹ ayen nabọ kerhọ mẹ. Ukuotọ rọyen oma da rhe vwerhen ovwẹ!”

¹⁷ Avwanre eje riavwerhen rẹ irueru rẹ ukoko na, kerẹ eghwẹkoko kugbe isikoko, kidie ọke tiọyena, avwanre vẹ iniọvo sansan sa ghwọrọ ọke kugbe, je ta ota kpahen eta sansan ra vwọphia. Ẹkẹvuọvo, Carol ra ta ota kpahen siẹvure da ta: “Ofu rẹ eghwẹkoko vẹ isikoko dje vwe.” Diesorọ? Ọ da je ta: “Dede nẹ iniọvo buebun riariẹ ovwẹ phiyọ, jẹ ọke buebun na, ayen ejobi vẹ ihwo rẹ orua rayen yen chidia asan ọvo yẹrẹ ruẹ kuẹgbe. Ọke tiọyena, ke me mrẹ nẹ me hẹ ẹdia ọruvwohwo.” Efa rẹ ọshare yẹrẹ aye rayen ghwuru o krinọ-ọ, mrẹ bẹnbẹn rẹ ayen vwo kpo ọghwẹkoko yẹrẹ osikoko rẹsosuọ rẹ ayen ọvo cha ra. Wo vughe oniọvo ọvo ro hirharoku egbabọse tiọna? Wo se durhie nẹ ọ vwomaba wẹ vẹ orua wẹn vwo kpo ọghwẹkoko yẹrẹ osikoko tiọyen?

18. Mavọ yen a sa vwọ reyọ 2 Kọrẹnt 6:11-13 vwo ruiruo ọke re de nene ihwo efa ghwọrọ ọke kuẹgbe?

¹⁸ Nene ayen ghwọrọ ọke kugbe. Davwen wo nene iniọvo sansan ghwọrọ ọke kugbe,  ma rho kẹ e rehẹ ẹdia ọruvwohwo. Avwanre guọnọ “rhie udu rẹ [avwanre] phihọ,” ma rho vwọ kẹ ihwo tiọyena. (Se 2 Kọrẹnt 6:11-13.) Melissa ra ta ota kpahen siẹvure da ta: “Oma vwerhen avwanre kọke kọke rẹ iniọvo na de durhie avwanre kpo uwevwin rayen yẹrẹ reyọ avwanre ba orua rayen kpo akpọẹriọ.” O vwo oniọvo ọvo vwẹ ukoko wẹn rẹ wo se durhie?

19. Ọke vọ yen oma cha vwọ nabọ vwerhen iniọvo na siẹrẹ avwanre vẹ ayen da ghwọrọ ọke kugbe?

¹⁹ O vwo ọke evo rẹ oma cha vwọ nabọ vwerhen iniọvo na siẹrẹ avwanre vẹ ayen da ghwọrọ ọke kugbe. Iniọvo evo mrẹ bẹnbẹn rẹ ayen vẹ ihwo rẹ orua rayen re dia Iseri ri Jihova-a vwọ ghwọrọ ọke kugbe vwẹ ọke rẹ ayen da re orẹ rẹ ẹga rẹ efian. Efa muomaphiyọ mamọ siẹrẹ ẹdẹ rẹ ohwo rẹ ayen vwo ẹguọnọ kpahen ro ghwuru de te vwẹ ukpe ọfa. Avwanre de nene iniọvo tiọyena ghwọrọ ọke kugbe, ke se djephia nẹ avwanre “vwẹ ẹro te” ayen.—Fil. 2:20.

20. Mavọ yen ota ri Jesu rọhẹ Matiu 12:48-50 sa vwọ chọn avwanre uko ọke ra dahẹ ẹdia ọruvwohwo?

²⁰ O vwo erọnvwọn buebun re sa nẹrhẹ Onenikristi no nẹ ọyen hẹ ẹdia ọruvwohwo. Ẹkẹvuọvọ, jẹ o muwẹro nẹ Jihova riẹn ẹdia wọ hepha na. Ọ kẹ avwanre oborẹ avwanre guọnọre, ma rho womarẹ iniọvo rẹ ukoko na. (Se Matiu 12:48-50.) E se djephia nẹ avwanre vwo ọdavwaro kpahen ọrhuẹrẹphiyotọ rẹ ukoko na siẹrẹ avwanre da davwẹngba vwo bicha iniọvo rẹ avwanre ọkieje. O toro ẹdia rẹ avwanre da mrẹ oma rẹ avwanre ọke evo-o, jẹ o mu avwanre ẹro nẹ Jihova vẹ avwanre herọ.