1. Parché che arquanti servi de Geovà i se sente soli?

DELE VOLTE, tanti i se sente soli. Par arquanti questo sucede e suito va via, par altri ghe vol de pi tempo par restar meio. E tanti i se sente soli anca quando i ze in meso a tante persone. Ma parché che i se sente cossita? Arquanti i ga cambià de congregassion, altri i ze ndati de star distante dela so fameia, e altri i sofre parché l’è morto qualchedun che i amea. Ancora altri i se sente soli quando la so fameia e i so amighi che no i serve a Geovà no ghe bada o i ghe dise su.

2. Cossa che ndaremo veder in questo stùdio?

² Geovà el sa quel che sentimo e el ne capisse tanto ben. Lu anca el sa quando semo drio sentirse soli, e el vol giutarne. Come che lu el ne giuta? Cossa che podemo far par sentirse meio? E come che podemo giutar i fradei e sorele che i se sente cossita? Vederemo le risposte in questo stùdio.

3. Come che Geovà el ga mostrà che el se preocupea con Elia?

³ Geovà el vol che tuti i so servi i sìpia felici. Lu l’è darente de tuti noantri e el vede quando semo desanimadi. (Sal. 145:18, 19) Par esémpio, Geovà el ga mostrà che el se preocupea tanto col profeta Elia. Elia l’era un omo fedele che el ga vivesto nte una època tanto difìcile. Tanti i odiea a quei che i servia a Geovà e arquante persone de poder le volea tanto coparlo. (1 Rè 19:1, 2) Ma Elia l’è restà ancora pi desanimà parché el pensea che ghen’era sol lu come profeta de  Geovà. (1 Rè 19:10) Alora, Geovà el ga suito mandà un àngelo par assarlo sicuro che no l’era lu sol e che ghen’era tanti altri israeliti fedeli. — 1 Rè 19:5, 18.

4. Come che Marco 10:29, 30 mostra che Geovà el se preocupa con quei che i se sente soli?

⁴ Geovà el sa dei cambiamenti che ghemo fato par servirlo. Pol esser che la nostra fameia e i nostri amighi i ze restadi disgustadi con noantri. Anca el apòstolo Piero el pensea sora questo parché el ga dito a Gesù: “Ghemo abandonà tute le robe par ndar drio a ti, e adesso, cossa che ndaremo ricever?” (Mat. 19:27) Con amor, Gesù li ga assà sicuri che i servi de Dio i saria la so fameia. (Ledi Marco 10:29, 30. *) E Geovà, el nostro Pare, el ga prometesto che el ndarà giutar a quei che i vol servirlo. (Sal. 9:10) Ndemo veder arquante robe che podemo far quando se sentimo soli.

5. Parché l’è bon pensar in quel che Geovà l’è drio far par ti?

⁵ Proa pensar in quel che Geovà l’è drio far par ti. (Sal. 55:22) Pensar sora questo ndarà giutarte a veder che mai te sì sol. Una sorela de nome Carol, * che no la ze maridada e la so fameia no la serve a Geovà, la ga dito: “Quando vardo quel che ga belche sucedesto nela me vita, e come Geovà el me ga giutà, resto ancora pi sicura che no son mai sola e che Geovà sempre el sarà con mi.”

6. Come 1 Piero 5:9, 10 pol incoraiar a quei che i se sente soli?

⁶ Proa pensar in come che Geovà l’è drio giutar anca altri fradei che i infronta dificoltà. (Ledi 1 Piero 5:9, 10. *) Hiroshi, un  fradel che fà ani che serve a Geovà lu sol, el ga dito: “Tuti nela congregassion i infronta le so dificoltà. Veder questi fradei far el meio che i pol par a Geovà incoraia a quei che no i ga la fameia nela verità, come mi.”

7. Come che pregar a Dio pol giutarte?

⁷ Seita a pregar a Dio, leder la Bìblia e ndar ale riunion. Ghemo de parlar a Geovà pròpio quel che semo drio sentir. (1 Pie. 5:7) Varda el esémpio de una sorela gióvena de nome Massiel. Ela la se sentia sola parché sol ela nela so fameia la era Testimònia de Geovà. Ela la ga dito: “Una dele robe che me ga giutà a dàrghene fora con questo sentimento l’è stà parlar pròpio quel che mi sentia a Geovà. Lu l’è stà un Pare par mi. Mi preghea a lu tuti i giorni, tante volte al giorno e parlea come che mi me sentia.”

8. Parché che leder la Bìblia e pensar sora pol giutarte?

⁸ Leder la Bìblia tuti giorni e pensar sora versìcoli che i mostra che Geovà el te ama, pol giutarte quando te te senti sol. Una sorela de nome Bianca la resta disgustada par causa de quel che la so fameia la ghe dise. Ela la ga dito: “Leder e pensarghe sora i esempi che ghen’è nela Bìblia sora servi de Dio che i ga infrontà le medèsime dificoltà che mi, me giuta tanto.” Arquanti fradei anca i proa sempre ricordarse de versìcoli come Salmo 27:10 e Isaia 41:10 parché i ghe dà consolo. Altri fradei che, dele volte, i se sente soli i ga dito che scoltar el àudio dela Bìblia e dele publicassion che se stùdia nele riunion li giuta tanto.

9. Come che le riunion le pol giutarte?

⁹ Fà sforso par ndar a tute le riunion. Le riunion le ne incoraia e ne giuta a cognosser ai fradei. (Ebr. 10:24, 25) Massiel, che ghemo parlà vanti, la ga dito: “Anca che mi gavesse tanta vergogna, mi go dessidio ndar a tute le riunion e far anca comentari. Questo me ga giutà a sentir che fao parte de una granda fameia.”

10. Parché che l’è bon esser amighi dei fradei?

¹⁰ Sìpia amigo dei fradei. Ghemo de sforsarse de esser amighi de bravi fradei, anca che i sìpia de altre culture, pi gióveni o pi veci che noantri. La Bìblia la dise che i pi veci i ga tanta sabedoria. (Giò 12:12) Ma anca i pi veci i pol imparar coi pi gióveni. Davi l’era tanto pi gióveno che Gionatan e lori i era veri amighi. (1 Sam. 18:1) Lori due i ga infrontà brute dificoltà e i ga giutà un al altro a servir a Geovà. (1 Sam. 23:16-18) Irina, che sol ela la ze Testimònia de Geovà nela so fameia, la ga dito: “Nostri fradei e sorele i pol deventar come pare e fradei par  noantri. Geovà el pol farli deventar la fameia che ghemo de bisogno!”

11. Cossa che te ghè de far par gaver veri amighi?

¹¹ Se noantri ghemo vergogna, pol esser fadiga cognosser meio i nostri fradei. Ratna, che la ga tanta vergogna e che arquanti no i volea che la studiesse la Bìblia, la ga dito: “Mi go capio che gavea bisogno del aiuto dei fradei.” Fursi ne fà fadiga parlar quel che sentimo ai altri, ma l’è questo che ne giutarà a gaver veri amighi. Quando parlemo quel che sentimo, i nostri amighi i sarà boni de incoraiarne e giutarne.

12. Come che la predicassion la pol giutarte?

¹² Predicar insieme dei nostri fradei la ze una bela maniera de far novi amighi. Carol, che ghemo parlà prima, la ga dito: “Predicar e far altre robe nel laoro a Geovà insieme cole sorele me ga giutà tanto a gaver veri amighi. Geovà el ga sempre doperà questi amighi par giutarme.” Sarà tanto bon par noantri se femo sforso par gaver amicìssie coi nostri fradei. Geovà el dopera questi amighi par giutarne a infrontar le dificoltà, par esémpio, quando se sentimo soli. — Pro. 17:17.

13. Cossa che tuti nela congregassion i ga de sforsarse par far?

¹³ Tuti i ga de sforsarse par la congregassion esser un posto che ghen sìpia pace e amor e che nissun se sinta sol. (Gioani 13:35) Quel che femo e parlemo pol giutar i fradei! Varda quel che una sorela la ga dito: “Quando mi go imparà la verità, i fradei dela congregassion i ze deventadi la me fameia. Mi no saria una Testimònia de Geovà sensa el aiuto de lori.” Tanti che i scomìnsia a ndar ale riunion no i ga el aiuto dela fameia. Alora, cossa che te pol far par giutar questi fradei a sentirse ben nela congregassion?

14. Come che te pol far amicìssia con quei che i va nela to congregassion?

¹⁴ Sfòrsate par cognosser a quei che i va nela to congregassion. Ghemo de ricever tanto ben quei che i va nela nostra riunion. (Rom. 15:7) Ghemo de saludarli, ma volemo anca deventar so amighi. Alora, ghemo de mostrar bontà e che ghe volemo ben. Podemo proar capir quel che i ze drio infrontar. Podemo far domande con bontà e scoltar quel che lori i parla. Ma ghemo de ricordarse che arquanti no i ghe piase parlar quel che i sente. Alora, ghemo de star atenti par farli sentirse ben. Par esémpio, podemo domandarghe come che el ga imparà sora Geovà.

15. Come quei che i serve a Geovà a de pi tempo i pol giutar i altri?

¹⁵ Tuti i pol giutar la congregassion a restar pi unida e pi forte. L’è tanto bel quando quei che i serve a Geovà a de pi tempo e i ansiani i mostra che i se preocupa coi altri. Varda el esémpio de Melissa. Ela la ga imparà la verità da picinina cola so mare. Ela la ga dito: “Mi son tanto grata parché i fradei i me ga sempre tratà come una fiola. Lori i se preocupea con mi e restéino tanto tempo insieme. Mi savea che i ndaria sempre giutarme quando mi gavesse de bisogno.” Mauricio, un gióveno che el se ga sentio lu sol quando el so istrutor el ga abandonà a Geovà, el ga dito: “I ansiani i ga mostrà che i se preocupea tanto con mi, e questo me ga fato tanto ben. Lori sempre i parlea con mi e laoréino insieme nela predicassion. Lori  anca i parlea de robe interessante che i gavea imparà nel so stùdio dela Bìblia e i me convidea par far qualche diversion insieme.” Adesso questi due fradei i laora in Betel.

16-17. Che altre robe podemo far par giutar i nostri fradei?

¹⁶ Giuta i altri in quel che i ga de bisogno. (Gàl. 6:10) Leo, che l’è un missionàrio e l’è de star distante dela so fameia, el ga dito: “Dele volte qualchedun el te fà una roba bona e l’era pròpio quel che te gavei de bisogno in quela ora. Me ricordo de un giorno che go bio un assidente de auto, e son rivà casa tanto cativo. Alora, un casal el me ga convidà par magnar qualcossa insieme. No me ricordo de quel che ghemo magnà, ma me ricordo che lori i me ga scoltà atenti. Dopo de questo, me go sentio tanto meio!”

¹⁷ A tuti noantri ne piase ndar ale assemblee e ai congressi parché podemo star insieme coi fradei e parlar sora quel che ghemo imparà. Ma varda cossa che Carol, che ghemo parlà vanti, la ga dito: “L’era pròpio fadiga ndar ai congressi e assemblee. L’è vera che me sentia ben de esser insieme a sentene o anca miliari de fradei. Ma no l’era fàcile veder tuti cole so fameie. In quele ore, mi me sentia tanto sola.” Altri anca i pensa che l’è fadiga ndar ai congressi e assemblee lori soli parché el so omo o la so dona i ze belche morti. Te cognossi qualchedun che l’è drio infrontar queste dificoltà? Cossa pénsito de convidarlo par ndar insieme nela pròssima assemblea o congresso?

18. Come che podemo meter in pràtica 2 Corinti 6:11-13 quando semo insieme coi nostri fradei?

¹⁸ Sfòrsate par torte el tempo par star insieme coi fradei. Proa star insieme con tuti, ancora de pi con quei che i se sente soli. Volemo esser pròpio amighi de questi fradei. (Ledi 2 Corinti 6:11-13. *) Melissa, che ghemo parlà prima, la se ricorda: “Mi restea tanto contenta quando i fradei i me  convidea par ndar ala so casa o far un viaio con lori e le so fameie.” Sito bon de ricordarte de qualche fradel che te podarissi far robe cossita?

19. Quando che i nostri fradei i ga pi bisogno de qualchedun insieme?

¹⁹ Arquanti dei nostri fradei i ga bisogno de aiuto par causa dele dificoltà che i infronta. Par esémpio, pol esser difìcile restar insieme cola so fameia nei giorni che la fà le selebrassion. Arquanti anca i se sente tanto triste nela època del ano che l’è morto qualchedun dela so fameia. Alora, podarìssino doperar el nostro tempo par restar insieme con lori. Cossita, ndaremo mostrar che lori i ze importanti par noantri. — Fil. 2:20.

20. Come Mateo 12:48-50 pol giutarne quando se sentimo soli?

²⁰ Alora, ghemo visto in questo stùdio che ghen’è arquante robe che le pol farne sentirse soli. Ma, mai ghemo de desmentegarse che Geovà el capisse quel che sentimo e el ne giuta. Tante volte, lu el dopera i nostri fradei par giutarne. (Ledi Mateo 12:48-50. *) Noantri mostremo a Geovà che semo grati che lu el ne ga dato una fameia de fradei quando restemo insieme con lori. Ghemo de ricordarse che anca se, dele volte, se sentimo soli, Geovà l’è sempre dela nostra banda!