1. Ikwaha ikina arumeyi a Yehova heeni aniisoonaaya okhala meekhaaya?

ANTXIPALE a hiyo, ninnakhalano muupuwelo woowiisona okhala meekhaahu. Wa atthu akina mupuwelo ola onnavira moowaakuveya, nto akina mupuwelo ola pooti okhala ehuhu yintxipale. Pooti okhala nipuro noowattiwa atthu, nto naamwi vareene hiiho, pooti wiisona okhala meekhaahu. Asinnihu akina onnavila okhovelela muloko munyowani. Akina ankhuma emusi yoowiiraana, nto mwaha woothaamela nipuro nikina annisona okhala meekhaaya. Atthu akina annikheliwa nuule yaamusivelaaya okhwiiye. Nave-tho, otepaxawene ale aneera oxutteraru ekhaikhai, annawanano muupuwelo wa omeekha emaara ankhoottiwaaya ni osondiwa ni amusi aya ni asinthamwene aya ahikhale makristu.

2. Makoho heeni anrowa waakhuliwa yoosoma ela?

² Yehova onnanisuwela nnenesene. Owo onnasuwela naaisonaka okhala meekhiihu ni ontthuna onikhavihera ovilela muupuwelo ntoko owo. Yehova onnikhavihera hayi? Eheeni nikhanlaahu oopaka weera niikhavihere? Ni ninrowa waakhavihera hayi asinna akina a mmulokoni anisoona okhala meekhaya? Ninrowa woona waakhuliwa wa makoho ala.

3. Yehova oonihenre hayi weera annanpwattha Eliya?

³ Yehova ontthuna weera arumeyi awe ootheene ekhaleke oohakalala. Owo ori vakhiviru wa hiyo ni owo onnasuwela emaara hiyo ninttettheyaahu. (Nsal. 145:18, 19) Nwehe moota Yehova onihenrawe ompwattha mprofeti Eliya. Mulopwana ola oororomeleya aakhala ehuhu yooxupa mwa soowereya sa ana a Israeli. Arumeyi a Yehova a ehuhu ele, yannahawa osondiwa vantxipale. Nto Eliya annasondiwa ni amwittani a Yehova. (1 Mam. 19:1, 2) Opwaha wa yeeyo, Eliya  oona weera ohanle meekhawe ntoko mprofeti a Yehova. Mene wuupuwela eyo, yannamuttettheiha. (1 Mam. 19:10) Moohipisa Muluku amukhavihera Eliya. Yehova aaruma nlaika weera nimulipihe mprofeti Eliya weera khaakhanle meekhaawe—wIsraeli yaakhala ana a israeli akina yaamukokhorela Muluku moororomeleya!—1 Mam. 19:5, 18.

4. Moovarihana ni Marko 10:29, 30, onoonihera hayi weera Yehova onnapwattha arumeyi awe aniisona okhala meekhaya?

⁴ Yehova osuwela weera akina a hiyo, noohiya itthu sintxipale weera mimukokhorele. Pooti weera noohiya okhaviheriwa ni amusi vamoha ni asinthamwene ahikhanle makristu. Apaale mwaha wooxupeya murummwa Pedru aamukoha Yesu: “Òná, hiyo nòhiya sothesene, nnòtthara. Vano ninrowa wakhela xeni?” (Math. 19:27) Moowarerela murima, Yesu aharoromeliha atthareli awe weera muloko waarowa okhala ntoko emusi aya. (Mmusome Marko 10:29, 30.) Yehova Tiithi ahu a wiirimu, ororomeliha weera onimwakhavihera ale anrowa othanla omukokhorela. (Nsal. 9:11) [9:10 Tradução do Novo Mundo] Nrowe noone itthu mukhanlaanyu opaka sinrowa wookhaviherani owanano omeekha.

5. Heeni oraaya wooreera wuupuwelela moota Yehova onookhaviheraaweni?

⁵ Muupuweleleke moota Yehova onookhaviheraaweni. (Nsal. 55:23) [55:22 Tradução do Novo Mundo] Mwapaka eyo, munoowera okhalano moonelo wooreera voohima sa ele enooxupani. Murokora mmoha muttiye oniitthaniwa Carol, * yoowo okhanle mweekhaikhaini meekhawe, onnathaliha: “kuupuwelaka sa muttuli ni otthokelela moota Yehova okikhavihenrawe ehuhu yooxupa, eyo ennakiroromeliha weera nkikhanle meekhaaka ni tho weera Yehova onookhala ni miyo.”

6. Moota heeni 1 Pedru 5:9, 10, onnaalipihawe ale anwanano omeekha?

⁶ Muupuwele moota Yehova onaakhaviheraawe asinna akina aniisima okhala meekhaaya. (Mmusome 1 Pedru 5:9, 10.) Hiroshi munna ovirinhe ehuhu yiintxipale anvarelaka  muteko Yehova meekhaawe veemusini vawe. Owo ohimme ha: “mmulokoni onnakhweya woona weera khaavo ori okwanela. Osuwela weera ootheene mmulokoni animwiilipihera weera emuhakalalihe Yehova, onnalipiha ale ari mweekhaikhaini meekhaaya ntoko miyo.”

7. Nivekelo ninrowa wookhaviherani hayi?

⁷ Mukhaleno mukhalelo wooreera woomunepani. Eyo enhela mpuwa omuleela Yehova yeeleenexa munuupuwelaanyu. (1 Ped. 5:7) Moone ele ohimmaawe mwali namoona a Yehova onitthaniwa Massiel. Mwaha wooweera owo aari meekhaawe veemusini alakenle omukokhorela Yehova, Massiel anisoona okhala meekhaawe. Owo nave onnavirelela othaliha: “etthu etempe okikhavihera miyo oviriha omeekha, waari onvekela Yehova ni murima wootheene. Yehova aari Tiithi ekhaikhai wa miyo. Miyo kannavekela ikwaha sintxipale vanihikuni kimulelaka ele yaakixupa.”

8. Osoma masu a Muluku ni otthokelela onnookhaviherani hayi?

⁸ Osoma masu a Muluku veeli-veeli ni otthokelela sooweereya sa Biblyani, otepaxa wene iye sinhima weera Yehova onnoosivelani. Bianca, murokora onvilela wuulummwa woohireerela ni amusi awe. Owo onnathaliha: “Osoma sooweereya sa arumeyi a Yehova yaawo yaavirinhe maxupo anlikana ni awaka ni otthokelela yeeyo onnakikhavihera vantxipale.” Makristu akina annahela mmuru soolepa sa mBiblyani, otepaxa wene soomaaliha, ntoko Nsalmu 27:10 ni Yesaya 41:10. Akina anoona weera omwiiwelela Biblya oogravariwa ni ibuukhu sinsomwa omuthukumanoni onnakhavihera ohiisoona okhala meekhaaya.

9. Heeni oraya wooreera nyuwo woonela mithukumano?

⁹ Mwiilipiherweke weera moneleke mithukumano soothesene. Nyuwo munookhala oolipa ni eprograma ya omunepani ni munimwaasuwela nnene asinna. (Aheb. 10:24, 25) Messiel yoole ohimwale woopatxerani ohimme ha: “naamwi kireene mutthu owisuka, kaalakela woonela mithukumano ni ovaha ikomentariyu. Eyo yaakikhavihera woona weera miyo kannerela empari ya muloko.”

10. Mwaha wa heeni oraaya wootthuneya waapaka asinna asinthamwene a mmulokoni?

¹⁰ Mwaapakeke asinthamwene asinna a mmulokoni. Mwaasaase opaka onthamwene nasinna a mmulokoni arinono ntakihero nooreera, awo pooti okhala amiravo naari oowuunuwela woopwahani nyuwo, apaale tho pooti okhala a makhalelo oovirikana ni awiinyu. Biblya onnanuupuxera weera ‘miruku simphwanyaneya ni atthu oowuuluvala’. (Yobi 12:12) Atthu tho oowuuluvala pooti oxuttera  itthu ni amiravo a mmulokoni. Davidi aari mmiravo ompwaha Jonatã nto eyo khayaawootxelinhe okhala asinthamwene. (1 Sam. 18:1) Awo yannakhaviherana mukina ni mukhwaawe omukokhorela Yehova naamwi yaaviriha maxupo. (1 Sam. 23:16-18) Irina murokora yoowo ori mweekhaikhaiyini meekhaawe veemusini vawe, onnahima ha: “Asinnihu ni asirokorihu mmulokoni pooti okhala asitithihu ni asinnihu. Yehova pooti waavarela muteko weera ekhale amusi ahu nnaahaawelaahu.”

11. Eheeni nyuwo muntthuneyaanyu opaka weera mukhaleno asinthamwene olipa?

¹¹ Pooti okhala wooxupa waapaka asinthamwene anyowani, otepaxa wene wakhala weera nyuwo toowisuka. Ratna murokora mmoha owiisuka oxuttenre ekhaikhai naamwi asonttiwaka. Owo onhima ha: “miyo kannatthuna nikhavihero na emusi aka ya omunepani.” Mene pooti okhala wooxupa omuleela mutthu mukina etthu munuupuwelaanyu, nto omuleela mutthu ele munuupuwelaanyu murette wa okhalano onthamwene wa ekhaikhai. Asinthamwene anyu annatthuna woolipihani ni wookhaviherani. Mene nyuwo muntthuneya waaleela nipuro muntthunaanyu nikhavihero.

12. Muteko woolaleera onrowa wookhaviherani hayi waapaka asinthamwene ooreera?

¹² Moota mukina woowaapaka asinthamwene, ori ovara vamoha ni akristu ororomeleya wa Yehova muteko woolaleera. Carol ohimmwale woopatxerani, ohimme ha: “ovara muteko woolaleera ni miteko mikina sa omunepani vamoha ni asinna, wookikhavihera waapaka asinthamwene oreera.” Mweekhaikhai, wiilipihera wahu wootheene nimpakaahu weera nikhaleno onthamwene ni asinna ororomeleya a Yehova khaiyono ti wamahala. Yehova onnavarela muteko asinna ala weera enikhavihere owanano soovalaveliha sahu, ntoko omeekha.—Mir. 17:17.

13. Mwiritti heeni atthu ootheene ammulokoni araayano?

¹³ Atthu ootheene a mmulokoni akhalano muritti wookhavihera okhala murettele mulokoni ni nsivelo, mwemmo mutthu ohinisonaawe okhala meekhaawe. (Yoh. 13:35) Malove ni soopaka sahu, pooti omukhavihera mutthu! Moone ele murokora mmoha ohimmawe: “kixutterakaru ekhaikhai, muloko tori emusi aka. Miyo nkarowa owera okhala namoona a Yehova nihikhanle nikhavihero na muloko.” Nyuwo munrowa opaka eheeni weera mwakhavihere ale ari mekhaaya mwekhaikhaini mweemusini mwaya, woona weera anneerela empari ya muloko?

14. Munoonihere hayi weera nyuwo nthamwene ooreera?

¹⁴ Mukhale asinthamwene wa ale ampatxera woonela mithukumano sahu. Pooti opatxeriha niwaakhelaka ni nsivelo ale anrwela woonela mithukumano. (Arom. 15:7) Ekhaikhai weera khanintthuna oweerela paahi “oi, salama?” Nintthuna weera moovirani ehuhu ekhale asinthamwene ahu. Nto mwareereleke murima ni moonihereke weera munnapwattha. Mweerereke osuwela maxupo anvirihaaya, nto muhakohexexeke itthu sohiphwanela okoha. Nto murima, musuweleke weera akina pooti waavila ohima ele anuupuwelaaya. Weera musuwele moota anoonelaaya mpakeke makoho ni nsivelo ni mwaawiriyaneke moopixa murima moota anaakhulaaya. Apaale pooti waakoha há: “muxuttenre hayi ekhaikhai?”

15. Asinna arinono sokumanano sintxipale anrowa waakhavihera hayi akina mmulokoni?

¹⁵ Asinna arinono sookumanano sintxipale vamoha ni asitokweene a muloko yooniheraka weera annapwattha akina, muloko onkhala  woolipa. Melissa ohuwale mwekaikhaini ni ameyawe, ohimme weera: “Nkaano malove a moota woowaaxukurela asinna mwa iyaakha sintxipale akhanle ntoko asitithaka. Awo yannakipwattha ni yannaviriha ehuhu ereene ni miyo. Emaara miyo kahawelaaka wuuluma etthu, kaasuwela weera awo yaamukiwiriyana.” Mauricio mmiravo mmoha aisoone okhala meekhaawe, emaara mulipa amusomiha Biblya aahiñyaawe okhala namoona a Yehova. Nto owo ohimme há: “asitokweene a mmulokoni yahoonihera weera yannakipwattha, nto eyo yannakilipiha. Ikwaha sintxipale awo yannatthekula ni miyo, ni nannavara vamoha muteko woolaleera. Yannakileela itthu exuttenraaya emaara yaamusomaaya Biblya meekhaaya mpakana yannamweetta joogo ni miyo.” Nto Melissa ni Maurisio, olelo va awo anvara muteko wa ehuhu yootheene.

16-17. Nnakhavihere hayi asinna ele anhawelaaya?

¹⁶ Muhooneke wuulumaru, mmukhavihereke ele onhawelaawe. (Agal. 6:10) Leo onvara muteko wa omissionario elapo yoorakamela owannyawe, ohimme ha: “mweekhaikhai etthu yootthuneya, nikhavihero ninrwa ehuhu yooreerela.” Miyo kinnuupuwela nihiku kampankaka acidente ni ekaarro. Kiphiyakaru owani miyo kaari estressado, nto yaari ehuhu ene yeeyo ntheli nimoha naakiwompaya orowa otxa owannyaya. Miyo nkinuupuwela etthu natxiiyaahu, nto nkinttuwala moota awo yaakiwiriyannaya moomaleleya. Vahoolo vaya, kaahisoona okhala nnene.

¹⁷ Ootheene hiyo ninnatthuna mithukumano mitokweene ntoko assembleya ni akongresu. Ehuhu ya mithukumano iya, pooti otthekula ni asinna voohima sa ele nixuttenraahu ni nyaha saapakiwa. Maxi nwehe ele Carol oromoliwe woopatxerani ohimmawe. “Assembleya ni akongresu yaari mahiku ookixupa vantxipale.” Mwaha wa heeni? “Ekhaikhai weera kaakhala variyari va asinna antxipale, nto waaweha asinna ereene ni imusi saya wannakixupa vantxipale. Yaari ehuhu ene yeeyo kaaisonaaka okhala meekhaaka.” Akina onnaxupa woonela mithukumano iya mitokweene yakhweliwa amwaraya naari aiyaya. Moomusuwela mutthu onviriha maxupo ntoko ala? Munoonela hayi onwopa mutthu owo weera mwamoonele kongresu naari assembleya onaattamela ni emusi anyu?

18. Naawakhelaka aletto ninrowa ovarihela hayi muteko yoolepa ya 2 Akorinto 6:11-13?

 ¹⁸ Nviriheke ehuhu naawo. Mweerereke oviriha ehuhu yintxipale ni asinna ni asirokora, otepaxa wene yaale anisoona okhala meekhaaya. ‘Nintthuneya waahulela murima ahu’ otepaxa wene asinna aniisoona okhala meekhaaya. (Mmusome 2 Akorinto 6:11-13.) Melissa, oromoliwe woopatxerani onnuupuwelela: “wannasivela vaavo asinna yanniwopaya orowa owannyaya naari weetta ekhwaya vamoha ni emusi saya.” Okhala munna mummupuwelaanyu a muloko anyu mukhanlaanyu omwaakhela owannyinyu?

19. Ehuhu heeni eri yootepa otthuneya oviriha ni asinna?

¹⁹ Ehuhu ekina asinna ni asirokora anoorowa otthunaka okhala vamoha ni awo. Mwa ntakihero, mahiku a iferiado awo pooti waaxupa okhala ni amusi aya ehikhanle Anamoona a Yehova. Apaale akina onnaripa murima naaphiyaka nihiku okhwiiyaawe ole yaamusivelaaya. Naivahereraka okhala ni asinna awo ehuhu eyo yooxupa, ‘ninnoonihera weera ninnapwattha.’—Afil. 2:20.

20. Masu a Yesu ampwhanyeya va Matheyo 12:48-50, anrowa onikhavihera hayi naaisonaka okhala meekhaahu?

²⁰ Ntoko noonaahu, aakhala mathowa mantxipale aniweeriha makristu wiisoonaka okhala meekhaaya. Mene nihittuwale weera Yehova onnasuwela ele ninvirihaahu. Opwaha mwa yeeyo, owo onnanivaha nikhavihero nihawelaahu, moorwela mwa asinna ororomela. (Mmusome Matheyo 12:48-50.) Ni weera nimoonihere Yehova weera ninneera asantte mwaha wa muloko, ontthuneya weera nipakeke ele ninweraahu weera nikhavihere emusi ahu aya omunepani. Moohixikha maxupo anoophwanyani, muittuwale weera khamukhanle meekhaanyu. Yehova onookhala ni nyuwo emaara yootheene!