1. მუშენ შილებე მინშა იეჰოვაშ მსახურეფ ხვალახეთ გინაფლენდან დუდის?

ჩქინდე უმენტაშ მინშა დუდის ხვალახეთ ბგინაფლენთ. ნამთინეს ხეთეშე ეთხიებ თე გრძნობა, მარა რენა თიცალეფ, მიდგას თეშო ბრელ დრო ოსაჭირნა. დუდის შილებე ხვალახეთ თიმწკუმა ხოლო ბგინაფლენდათ, მუჟამსით ბრელ ხალხწკუმა ვორეთ. ნამთინეშო ძნელ რე მეგობრეფიშ გორუა ახალ კრებას. შხვეფს მანგარ ხოლოშიან ურთიერთობა უღნა ოჯახიშ წევრეფწკუმა დო დუდის ხვალახეთ გინაფლენა, მუჟამსით თინეფშე შორს რენა. მინს მანგარო ონატრჷ ურთიერთობა თი საჸოროფო ადამიანწკუმა, მიდგაქ შხვადო გინორთჷ ოცხოვრებშა. ნამთინე ქრისტიან, განსაკუთრებულო თინეფ, მიდგაქ ამარდე გეგეს ჭეშმარიტება, შილებე იეჰოვაშ მოწმე ვა რენ ფერ ოჯახიშ წევრეფშე დო ჯვეშ მეგობრეფშე დუდის გიშალაფირო გინაფლენდას, მუჟამსით თინეფ მანგარო ოწინააღმდეგნა ახალ რწმენაშ გურშენ.

2. ნამ კითხვეფშე მიბღენთ პასუხეფს?

² იეჰოვას ირფელ უჩქჷ ჩქინ გურშენ დო არჩქილე ჩქინ. მუჟამსით დუდის ხვალახეთ ბგინაფლენთ, თის უჩქჷ თენა დო ოკო, მიმეხვარან, ნამდა მივერუათ თეცალ გრძნობეფს. მუჭო მოხვარნა იეჰოვა? ჩქი მუშ კეთება შემლებნა? დო მუჭო მივეხვარათ კრებას თიცალეფს, მით დუდის ხვალახეთ გინაფლენს? მორთ ქიგებგათ პასუხეფ.

3. მუჭო გიმირჩქინ იეჰოვაქ ყურადღება ელიაშ მიმართ?

³ იეჰოვა მანგარო რე დაინტერესებულ მუშ თაყვანიშმცემელეფიშ ჯგირობუათ. თინა ხოლოს რე თითოულწკუმა დო ორწყე, მუჟამსით ხიოლ მაფნა დინაფილ (ფსალმ.  145:18, 19). გუვარჩუათ, მუჭო გიმირჩქინ იეჰოვაქ ყურადღება მუშ წინასწარმეტყველ ელიაშ მიმართ. თე ართგურ კოჩ ისრაელიშ ისტორიაშ რთულ პერიოდის ცხოვრენდჷ. იეჰოვაშ მოწინააღმდეგეეფ, მიდგას ძალაუფლება უღუდ ისრაელს, ღორონთიშ თაყვანიშმცემელეფს მანგარო თხოზუდეს. თინეფ განსაკუთრებულო ელიაშ ჸვილუას ოცადდეს (1 მეფ. 19:1, 2). ელიას შილებე გურ თიქ ხოლო გუტახკო, ნამდა ფიქრენდ, ხვალე მუ რდჷ დოსქილადირ იეჰოვაშ წინასწარმეტყველეფშე (1 მეფ. 19:10). ღორონთიქ ხეთეშე ქიმიაქცუ თის ყურადღება. იეჰოვაქ მუშ წინასწარმეტყველშა ანგელოზ გოუტუ, თიშა დარწმუნებელო, ნამდა ხვალე ვა რდჷ — ისრაელს დიო ხოლო რდჷ ღორონთიშ ბრელ ართგურ მსახურ! (1 მეფ. 19:5, 18).

4. მუჭო იძირე მარკოზიშ 10:29, 30-შე, ნამდა იეჰოვა ოხვარ თინეფს, მიდგას ოჯახიშ წევრეფქ დო მეგობრეფქ ოჭიშ ქურთინეს?

⁴ იეჰოვას ჯგირო უჩქჷ, ნამდა მუჟამსით თიშ მსახურებას გიშებგორუნთ, ნამთინეს შილებე ბრელ მუდგარენქ მაჸუან დათმებელქ. შილებე იეჰოვაშ მოწმე ვა რენ ფერ ოჯახიშ წევრეფქ დო მეგობრეფქ ოჭიშ ქომრთინუან. ალბათ თენა აწუხენდჷ მოციქულ პეტრეს დო ათეშენ კითხჷ იესოს: „ჩქი ირფელ ქიდიბტეთ დო სი ქეგკაჸუნით. მუს მიბღენთ თეშ მანგიორო?“ (მათ. 19:27). იესოქ ჸოროფათ უწუ მუშ მოწაფეეფს, ნამდა თინეფ დიდ სულიერ ოჯახის მიღენდეს (წეკითხით მარკოზიშ 10:29, 30). იეჰოვა, თე სულიერ ოჯახიშ დუდ, მოპირნა, ნამდა მეხვარებ თინეფს, მიდგას თიშ მსახურება ოკო (ფსალმ. 9:10). გუვარჩუათ მუსხირენ პრაქტიკულ მხარე, მუდგაშ საშვალებათ იეჰოვა მიმეხვარებნა, მუჟამსით ვობრძოლუთ ხვალახეობაშ გრძნობას.

5. მუ ჯგირობუა მოუღ თიშე ფიქრის, მუჭო მოხვარნა იეჰოვა?

⁵ დეფიფქრათ, მუჭო მოხვარნა იეჰოვა (ფსალმ. 55:22). თენა მიმეხვარებნა სწორას შევაფასათ ჩქინ სიტუაცია. ართ დაუქორწინებელ და, კეროლი, * მიდგაშ ოჯახიშ წევრეფ ვა რენა იეჰოვაშ მოწმეეფ, იჩიებ: „მუჟამსით იფშინანქ, მუჭო მიმეხვარ იეჰოვაქ განსაცდელეფიშ დროს, ვორწყექ, ნამდა ვართ ასე ვორექ ხვალე დო ვართ მომავალს იპჸუაფუქ“.

6. მუჭო შეულებ 1 პეტრეშ 5:9, 10-ის, გურშა ელუკინას თინეფს, მით ხვალახეთ გინაფლენა დუდის?

 ⁶ დეფიფქრათ, მუჭო ოხვარ იეჰოვა თი თანამორწმუნეეფს, მიდგას პრობლემეფ უღნა (წეკითხით 1 პეტრეშ 5:9, 10). ართ ჯიმა, ჰიროში, ნამუთ წანეფ რე, ოჯახშე ხვალე მუ ომსახურ იეჰოვას, იჩიებ: „კრებას ძნელ ვა რე თიშ ძირაფა, ნამდა მითინს ვა უღჷ სრულყოფილ მდგომარეობა. თიშ რჩქინა, ნამდა ჩქი, არძა, მუთ შემლებნან ირფელს ვორთუთ იეჰოვაშ მსახურებას, გურშა ელუკინანს თინეფს, მიდგაშ ოჯახიშ წევრეფ ვა რენა იეჰოვაშ მოწმეეფ“.

7. თქვა მუჭო გოხვარნა ლოცვა?

⁷ ვა ვოდინუათ ჯგირ სულიერ განრიგ. თეშა მიშურს გურგინოფაჩილო ქივეჩუათ იეჰოვას, მუდგას ბგინაფლენთ (1 პეტ. 5:7). ართ ახალგაზრდა და, მასიელი, იჩიებ: „ართ-ართ არძაშ უმოს მნიშვნელოვან, მუდგაქ მიმეხვარ, გივორჯგინკო ხვალახეობაშ გრძნობას, მთელ გურით ლოცვა რე“. თინა ხვალახეთ თიშენ გინაფლენდჷ დუდის, ნამდა ოჯახშე ხვალე მუქ გედირთჷ ჭეშმარიტებაშ მხარეს. მასიელი აგრძელენს: „იეჰოვა ჩქიმო ნამდვილ მუმა რდჷ, მა თის ირდღას მუსხირენშა ვურაგადუდ ლოცვათ ჩქიმ გრძნობეფიშ გურშენ“.

8. თქვა მუჭო გოხვარნა ღორონთიშ სიტყვაშ კითხირ დო ფიქრ?

⁸ რეგულარულო იბკითხათ ღორონთიშ სიტყვა დო იფიფქრათ თი შემთხვევეფშე, სოვრეშეთ იძირე, ნამდა იეჰოვას ვუჸორთ. ბიანკა, ნამდგას ოჯახიშ წევრეფ მუნეფიშ სიტყვეფით გურს უტახნა, იჩიებ: „მა მანგარო მოხვარ, მუჟამსით ბკითხულენქ ბიბლიას მოჩამილ შემთხვევეფს დო ჩქიმცალ მდგომარეობა უღუდუნ ფერ თანამორწმუნეეფიშ ბიოგრაფიეფს დო ფიფქრენქ თინეფშე“. ნამთინე ქრისტიან გურიშემაქექაფალ ბიბლიურ მუხლეფს იმახსოვრენს, მაგალთო, მუნერით რე ფსალმუნიშ 27:10 დო ესაიაშ 41:10. შხვეფ კრებაშ შეხვალამეფშო მომზადებაშ ვარდა ბიბლიაშ კითხირიშ დროს ურჩქილენა აუდიო ჩანაწერეფს, მუთ ოხვარ თინეფს დუდ ნაკლებო იგინან ხვალახეთ.

9. თქვანდა მუ ჯგირობუა მოუღ შეხვალამეფიშ დასწრებას?

⁹ ქივეცადათ, რეგურალურო ქიდვესწრათ შეხვალამეფს. ჩქი სარგებელს მიბღენთ გურიშემაკინალ პროგრამაშე დო, თეს გეძინელ, შემალებენა უჯგუშო გეფჩინებაფუათ და დო ჯიმალეფ (ებრ. 10:24, 25). ჟიშე მოშინაფილ მასიელი იჩიებ: „მართალ რე, მანგარ მორდებუან ვორდჷ, მარა გინოჭყვიდილ მაფუდ, არძა შეხვალამას ქიდვესწრიკო დო კომენტარ ხოლო გუვაკეთკო. თექ მიმეხვარ, დევეახლოვკო და დო ჯიმალეფს“.

10. მუშენ რე მნიშვნელოვან, გუვავითარათ მეგობრობა ართგურ თანაქრისტიანეფწკუმა?

¹⁰ გუვავითარათ მეგობრობა ართგურ თანაქრისტიანეფწკუმა. დევემეგობრათ კრებას თიცალ და დო ჯიმალეფს, მიდგაშე  ბრელ მუდგარენიშ გურაფა შემლებნა, თიშ უმკუჯინუო, მუ ასაკიშ ვარდა წარმოშობაშ რენა თინეფ. ბიბლია გუმოშინანა, ნამდა „სიბრძნე მოხუცებულეფს უღნა“ (იობ. 12:12). მოხუცებულეფს ხოლო ბრელ მუდგარენიშ გურაფა შეულებნა ართგურ ახალგაზრდეფშე. იონათან ბრელით უმოს უნჩაშ რდჷ დავითშე, მარა თეს ვა უცილებ თინეფშა, გეხარესკო ართიანწკუმა მეგობრობათ (1 სამ. 18:1). თინეფ ოხვარდეს ართიანს ბრელ სირთულეშ უმკუჯინუო, ემსახურესკო იეჰოვას (1 სამ. 23:16—18). ართ და, ირინა, ნამუთ ოჯახშე ხვალე ომსახურ იეჰოვას, იჩიებ: „თანამორწმუნეეფს შეულებნა გინირთან ჩქინ სულიერ მშობლეფო დო და დო ჯიმალეფო. იეჰოვას შეულებ გიმირინუას თინეფ, მუჟამსით მოხვარა მოსაჭირნა“.

11. მუ ოკო ვაკეთათ, ნამდა გუვავითარათ მეგობრობა?

¹¹ შილებე ადვილ ვა რდას, დევემეგობრათ პიროვნებას, განსაკუთრებულო თიმწკუმა, მუჟამსით მორდებუანეფ ვორეთ. ართ მორდებუან და, რატნა, მით წინააღმდეგობაშ უმკუჯინუო აგრძელენდჷ ჭეშმარიტებაშ გურაფას, იჩიებ: „ოკო ვაღიარკო, ნამდა სულიერ ოჯახშე მოხვარა დო ელარნა მოსაჭირუდ“. შილებე ადვილ ვა რდას, შხვას ქივეჩუათ ჩქინ გრძნობეფიშ გურშენ, მარა თენა ხეს უნწყუნს ნამდვილ მეგობრობას. ჩქინ მეგობრეფს ოკონა, გურშა ელამკინან დო ქელამდირთან, მარა საჭირო რე, ქიმეფჩათ თინეფს საშვალება, ქიგეგან, მუჭო აკეთან თენა.

12. მუჭო შემლებნა დევემეგობრათ შხვეფს?

¹² ართ-ართ არძაშ უჯგუშ საშვალება, ნამუთ მიმეხვარებნა, დევემეგობრათ შხვეფს, თინეფწკუმა ართო მსახურებაშა ულა რე. ჟიშე მოშინაფილ კეროლი იჩიებ: „დალეფწკუმა ართო მსახურებათ დო შხვა თეოკრატიულ საქმეეფს მონაწილებათ ბრელს დევემეგობრჷ. იეჰოვა წანეფიშ დინახალე მოხვარუდ თე მეგობრეფიშ საშვალებათ“. ართგურ თანაქრისტიანეფწკუმა დამეგობრება ღირჷ მონდომაშა. იეჰოვა თეცალ მეგობრეფიშ საშვალებათ მოხვარნა, გივორჯგინათ თიცალ გრძნობეფს, მუნერით რე ხვალახეობაშ გრძნობა (იგავ. 17:17).

13. მუ პასუხიშმგებლობა უღჷ კრებას არძას?

¹³ კრებას არძას უღჷ პასუხიშმგებლობა, ხე ქეშუნწყუას მოჸოროფე დო მშვიდობიან გარემოს, სოდეთ მითინ ვეგინანს ბოლოშა დუდის ხვალახეთ (იოან. 13:35). ჩქინ საქმეეფ დო სიტყვეფ გურშა ელუკინანს შხვეფს! ყურადღება ქიმვაქცუათ, მუს იჩიებ ართ და: „მუჟამსით ჭეშმარიტებას ბგურაფლენდჷ, კრებაქ ჩქიმ ოჯახო გინირთჷ. თანამორწმუნეეფიშ მოხვარაშ უმშო ვეშმალებედ იეჰოვაშ მოწმეთ გინიფრთიკო“. მუშ კეთება შემლებნა თინეფიშ მახვარებელო, მით ოჯახშე ხვალე ცენა იეჰოვას თაყვანს, ნამდა კრებაშ ნაწილო ქიგინან დუდ?

14. მუჭო შემლებნა დევემეგობრათ თინეფს, მით ახალ რე კრებას?

¹⁴ გეგმიფრჩქინათ ინიციატივა დო დევემეგობრათ თინეფს, მით ახალ რე კრებას. თეშ კეთება ჩქი შემლებნა თინეფწკუმა გემუან მისალმებათ დიბჭყათ (რომ. 15:7). მარა მოკონა, თეშე უმოს გუვაკეთათ დო ჭიე-ჭიეთ დევემეგობრათ. თაშ ნამდა, პირად ინტერეს დო ყურადღება გეგმიფრჩქინათ თინეფწკუმა, მით ბიბლიას გურაფლენს, ახალ ნანათა რე ვარდა ამარდე გინორთჷ ჩქინ კრებაშა. უხერხულობას ვენვოჸოთათინ თეშ, ვეცადათ, ქიგებგათ, მუ სირთულეეფ უღნა. ნამთინეს შილებე უჭირდას მუშ გრძნობეფიშ გიმოხანტუა, ათეშენ პატიცემა ოკო გეგმიფრჩქინათ დო ვადვანძალათ ჩიება. თეშ მანგიორო, ქუდვუსვათ თინეფს თავაზიან კითხვეფ დო მოთვინებათ ქოვურჩქილათ პასუხეფს. მაგალთო, შემლებნა ბკითხათ, მუჭო გეგეს ჭეშმარიტება.

15. მუჭო შეულებნა სულიერო მოწიფულ ქრისტიანეფს ქიმეხვარან შხვეფს?

 ¹⁵ კრებას არძა მირდუ სულიერო, მუჟამსით მოწიფულ ქრისტიანეფ, განსაკუთრებულო უხუცესეფ, ყურადღებას გეგმირჩქინანა თინეფიშ მიმართ. მელისა, ნამდგას მუშ დიდაქ ბაღანობაშე დაგურუ ჭეშმარიტება, იჩიებ: „ნინათ ვეკმარაგადე, მუჭო ვაფასენქ თი ჯიმალეფს, მით ჩქიმო წანეფიშ დინახალე სულიერ მუმაცალო რდეს. მუჟამსით მიდგაინწკუმა ჩიება მოსაჭირუდ, პჸუნდჷ თიცალ ხალხ, მით მირჩქილედ“. ახალგაზრდა ჯიმა, მაურისიო, ნამდგაქ დუდ მეტებულო იგინ, მუჟამსით მუშ ბიბლიაშ მასწავლებერქ არააქტიურო გინირთჷ, იჩიებ: „მანგარო ელამკინ გურშა უხუცესეფიშ გიმორჩქინელ პირად ინტერესიქ. თინეფ ირიათო გიმურთუნდეს დროს ჩქიმწკუმა ჩიებას. ჩქიმწკუმა ართო მსახურენდეს, მირაგადდეს თი ძვირფას აზრეფს, მუდგას ბიბლიაშ პირად გურაფაშ დროს გებულენდეს დო ოლაჸაფშა ხოლო მიშეს ჩქიმწკუმა ართო“. მელისა დო მაურისიო ამდღა სრულ დროთ მსახურეფ რენა.

16, 17. მუჭო შემლებნა პრაქტიკულო ქიმვეხვარათ შხვეფს?

¹⁶ პრაქტიკულო ქიმვეხვარათ (გალ. 6:10). ართ ქრისტიან, ლეო, ნამუთ ოჯახშე შორს მისიონერო მსახურენს, იჩიებ: „ხშირას, მუთ არძაშ უმოსო გოსაჭირ, რე უბრალოთ დროულო კეთებულ კეთილ საქმე. ფშჷ, ართშა ავარიას მოფხვად. ჸუდეშა ქიმეფრთინ, მანგარ სტრესის ვორდჷ. ართ წყვილქ სადილშა ქუდმაპატიჟ. მართალ რე, ვა ფშჷ, მუ ბჭკუმ, მარა ჯგირო ფშჷ, მუნერ ყურადღებათ მომრჩქილუეს. საბოლათ, ბრელით უჯგუშო ბგინაფლენდჷ დუდის“.

¹⁷ ჩქი ხიოლს ბღებულენთ თიცალ თეოკრატიულ ღონისძიებეფშე, მუნერით რე რაიონულ დო რეგიონულ კონგრესეფ, მუშენდა მოსიამოვნუნა და დო ჯიმალეფწკუმა ურთიერთობა დო თინეფწკუმა მორჩქილაფირ მოხსენებეფიშ გურშენ ჩიება. მარა ჟიშე მოშინაფილ კეროლი განსაკუთრებულო კონგრესეფს გინაფლენდჷ დუდის ხვალახეთ. მუ რდჷ თეშ მიზეზ? თინა იჩიებ: „მართალ რე, ოშობით დო მინშა ანთასობით და დო ჯიმას აშვუხედ, მარა თინეფ, ცალკე, მუნეფიშ ოჯახწკუმა ართო, რდეს. ჩქიმო თე გრძნობაშა გერჯგინა ადვილ ვა რდჷ“. შხვეფშო რთულ რე მეუღლეშ ღურაშ უკულ პირველო კონგრესიშ დასწრება. ხომ ვეჩინენთ მითინს, მით თეცალ მდგომარეობას რე?  ჯგირ იჸუაფ, თეცალ პიროვნებას ქოვუწუათ, ჩქინწკუმა ართო მოლართას ანწიან კონგრესშა.

18. მუჭო შემლებნა გიმიბრინუათ 2 კორინთელეფიშ 6:11—13-ს მოჩამილ რჩევა, მუჟამსით გიმიფრჩქინანთ სტუმარიშ ჸოროფას?

¹⁸ დრო გეგმვურთათ ართიანს. ურთიერთობა მიღდან შხვადოშხვა და დო ჯიმაწკუმა, განსაკუთრებულო თინეფწკუმა, მით ხვალახეთ გინაფლენა დუდის. ჩქი მოკონა, ფართას გოვუნჯათ ჩქინ გურიშ კარ შხვეფს, არძაშ უმოსო თეცალ და დო ჯიმალეფს (წეკითხით 2 კორინთელეფიშ 6:11—13). მელისა, ნამუთ ჟიშე მიფშინეთ, იშინანს: „ირო მოხიოლდეს, მუჟამსით და დო ჯიმალეფ მაპატიჟენდეს მუნეფიშ ჸუდეშა ვარდა მირაგადდეს, სოდგაინ ართო მიდამრთუმდესკო“. თქვან კრებას ხოლო ხომ ვა რე მითინ თიცალ, მიდგაშ მიმართ შეილებნა სტუმარიშ ჸოროფა გეგმირჩქინათ?

19. განსაკუთრებულო მუჟამ რე ჯგირ თანაქრისტიანეფშა დროშ გიმორთუალა?

¹⁹ მინშა, რე თიცალ სიტუაციეფ, მუჟამსით თანაქრისტიანეფ განსაკუთრებულო აფასენა ჩქინწკუმა ურთიერთობას. ნამთინეშო შილებე რთულ რდას, იეჰოვას ვამსახურუნ ფერ ნათესეეფ შქას რინა დღესასწაულეფიშ პერიოდის. შხვეფ შილებე საჸოროფო პიროვნებაშ ღურაშ თარიღის მანგარ გლახათ გინაფლენდან დუდის. მუჟამსით ჩქი თეცალ და დო ჯიმალეფს გიმურთუნთ დროს, ვოძირანთ, ნამდა შურდოგურით ბზრუნენთ თინეფშე (ფილ. 2:20).

20. მუჭო მოხვარნა მათეშ 12:48—50-ს მოჩამილ სიტყვეფ, მუჟამსით დუდის ხვალახეთ ბგინაფლენთ?

²⁰ ბრელნერ მიზეზიშ გურშენ შილებე ქრისტიანქ დუდ ხვალახეთ იგინას. მარა ჩქი დღას ოკო ვაგმოჭყორდან, ნამდა იეჰოვას ჯგირო არჩქილე ჩქინ გრძნობეფ. უმენტაშო, თინა თანამორწმუნეეფიშ საშვალებათ ზრუნენს ჩქინ საჭიროებეფშო (წეკითხით მათეშ 12:48—50). ჩქი ხოლო შემლებნა გეგმოფხანტათ იეჰოვაშ მარდულობა თით, ნამდა ირფელ გუვაკეთათ ჩქინ სულიერ ოჯახშა ხუჯიშ დაკინებელო. ვა უღჷ მნიშვნელობა, მუჭო ბგინაფლენთ მინშა დუდის, ჩქი ხვალე დღას ვა ვორეთ, მუშენდა იეჰოვა ირიათო ჩქინწკუმა რე!