1. Ana ligongo chichi ndaŵi sine ŵakutumichila ŵa Yehofa mpaka alipikaneje kuti ali jikajikape?

NDAŴI syejinji tukusalipikana kuti tuli jika. Ŵane pakusapita ndaŵi jamnono kuti atandilesoni kusangalala. Nambo ŵane pakusapita ndaŵi jelewu. Mpaka yikomboleche kulipikanaga kuti tuli jikajikape atamose patuli pa gulu. Yikusaŵasoni yakusawusya kwa abale ni alongo ŵane kuti apate achimjawo mumpingo wasambano. Ŵane akusatyochela m’maŵasa gakutenda yindu mwakamulana mnope, nambo akusatanda kulipikana kuti ali jikajikape palekangene ni ŵachibale ŵawo. Pele ŵanesoni akusaganichisya mnope ya jwakunonyelwa jwawo juŵawile. Abale ni alongo ŵane ŵalijiganyisye usyesyene pachangakaŵapa akusalipikana kuti ali jikajikape pandaŵi jakulagasidwa ni achimjawo kapena ŵamwiŵasa mwawo ŵangakusamtumichila Yehofa.

2. Ana chitupate kwanga kwa yiwusyo yapi?

² Yehofa akusamanyilila soni kupikanichisya yiliyose yayikututendechela. Patukulipikana kuti tuli jika, jwalakwe akusamanyilila mwatukupikanila mumtima soni akusaŵa jwakusachilila kuti atukamuchisye. Ana Yehofa akusatukamuchisya chamtuli? Ana mpaka tutende chichi kuti tukalipikanaga kuti tuli jikajikape? Nambi mpaka twakamuchisye chamtuli ŵane mumpingo ŵakusalipikana kuti ali jikajikape? Kwende tupate kwanga kwa yiwusyoyi.

3. Ana Yehofa jwalosisye chamtuli kuti ŵamganichisyaga Eliya?

³ Yehofa akusasaka kuti ŵakutumichila ŵakwe wosope aŵeje ŵakusangalala. Jwalakwe akusaŵa chiŵandika ni jwalijose soni akusamanyilila mwatukupikanila mumtima patutengwiche. (Sal. 145:18, 19) Aganichisye yaŵatesile pakumkamuchisya jwakulochesya  Eliya. Jwalakwe jwakwete chikulupi chakulimba atamose kuti jwatamaga mundaŵi jakusawusya mnope. Ŵakutumichila ŵa Yehofa ŵalagasidwaga mnope mundaŵi jeleji, mwamti achimmagongo ŵa Yehofa ŵasachililaga mnope kuti amwulaje Eliya. (1 Ayi. 19:1, 2) Yine yayamlagasyaga Eliya yaliji yakuti jwaganisyaga kuti pa ŵandu ŵaŵamtumichilaga Yehofa, agambile kusigala jwalakwe jika. (1 Ayi. 19:10) Nambo mwachitema Yehofa ŵatumisye lilayika kuja kumlimbikasya Eliya kuti nganaŵa jika, panasoni Aisalaeli ŵane ŵali ŵakulupichika.—1 Ayi. 19:5, 18.

4. Ana lilemba lya Maliko 10:29, 30, likusalosya chamtuli kuti Yehofa akusaŵa jwakusachilila kwakamuchisya ŵakutumichila ŵakwe ŵakusosechela chikamuchisyo?

⁴ Yehofa akusamanyilila kuti patusagwile kumtumichila jwalakwe nikuti mpaka tusosekwe kuchenga yindu yine. Mwine ŵandu ŵamwiŵasa mwetu ŵangakusamtumichila Yehofa mpaka aleche kutukamuchisya. Kapena achimjetu ŵatwakungulukaga nawo pandanda mpaka aleche kunguluka ni m’weji. Petulo jwaŵechete maloŵe gakulosya kukwayidwa paŵamwusisye Yesu kuti, “Uwetu twalesile yosope ni kwakuya ŵalakwe, ana sambano ni kuti tuchipochela chichi?” (Mat. 19:27) Mwachinonyelo Yesu ŵasimichisye ŵakulijiganya ŵakwe kuti chachipata abale ni alongo mumpingo ŵachachiŵa mpela ŵa m’liŵasa mwawo. (Aŵalanje Maliko 10:29, 30.) Yehofa jwali Atati ŵetu ŵakwinani jwasasile kuti chachakamuchisya ŵandu ŵakusamtumichila jwalakwe. (Sal. 9:10) Kwende tukambilane yindu yampaka atende kuti Yehofa ŵakamuchisyeje kumalana ni nganisyo syakulipikana kuti ali jikajikape.

5. Ana kuganichisya yakusatenda Yehofa pakutukamuchisya kukwete umbone wamtuli?

⁵ Aganichisyeje yakutenda Yehofa pakwakamuchisya wawojo. (Sal. 55:22) Yeleyi mpaka yakamuchisye kuti akoleje nganisyo syakuŵajilwa ni mwayiŵelele yindu paumi wawo. Mlongo Carol * jwali jwangalombela soni ŵachibale ŵakwe nganaŵa ŵa Mboni jwatite, “Panguganichisya yatesile Yehofa pakungamuchisya kumalana ni yakusawusya yangu, yikusangamuchisya kuti ngalipikanaga kuti ndili jikajikape. Yeleyi yikusandendekasya kuŵa jwakusimichisya kuti Yehofa chapitilisye kungamuchisya pa yakusawusya yachisimane nayo kusogoloku.”

6. Ana lilemba lya 1 Petulo 5:9, 10, mpaka lyalimbikasye chamtuli ŵandu ŵakusalipikana kuti ali jikajikape?

 ⁶ Aganichisye yakusatenda pakwakamuchisya abale ni alongo ŵakusalipikana kuti ali jikajikape. (Aŵalanje 1 Petulo 5:9, 10.) M’bale jwine lina lyakwe Hirosh jwele mu liŵasa lya kumangwakwe ŵaliji jwa Mboni jikape, ŵatite, “Yikusaŵa yangasawusya kumanyilila kuti mumpingo jwalijose pana yakusawusya yakusimana nayo. Kumanyilila kuti wosope tukusatendaga yampaka tukombole pakumtumichila Yehofa yikusaŵa yakulimbikasya kwa ŵanewe ŵanganitukola ŵachibale ŵali ŵa Mboni sya Yehofa.”

7. Ana kupopela kukusakamuchisya chamtuli wawojo?

⁷ Atendeje yindu yausimu ndaŵi syosope. Yeleyi yikupwatikapo kumsalila mwagopoka Yehofa mwakupikanila mumtima. (1 Pet. 5:7) Mlongo Messiel jwasasile kuti, “Kupopela kwa Yehofa mwakutyochela pasi pamtima kwangamuchisye kumalana ni nganisyo syakulipikana kuti ndili jikajikape.” Mlongoju pajwatandite kumtumichila Yehofa jwalipikanaga kuti ali jikajikape ligongo lyakuti ŵandu ŵamwiŵasa mwakwe nganamtumichilaga Yehofa. Jwalakwe jwasasile kuti, “Pandaŵi jinalagaga mnopeji namwonaga Yehofa kuti ali Atati ŵangu ŵasyesyene, soni napopelaga kwa jwalakwe kejinji pa lisiku kumsalila yanguti pakulaga mumtima mwangu.”

8. Ana kuŵalanga Maloŵe ga Mlungu soni kugaganichisya kwakamuchisye chamtuli wawojo?

⁸ Aŵalanjeje Maloŵe ga Mlungu ndaŵi syosope soni kuŵalanga ngani sine syasikulosya kuti Yehofa akusiŵanonyela wawojo. Mlongo jwine jwele ŵamwiŵasa mwakwe ŵamŵechetelaga yindu yangalimbikasya, jwatite, “Kuŵalanga ni kuganichisya ngani sya m’Baibulo soni sine sya ŵakutumichila ŵa Yehofa ŵaŵasimene ni yakusawusya mpela ya une, kungamuchisye mnope.” Aklistu ŵane akusajinjisya mumtwe malemba gakulimbikasya mpela lya Salimo 27:10 soni Yesaya 41:10. Ŵanesoni ayiweni kuti pakukosechela misongano, kupikanila mabuku gane gakulijiganyila gejambule maloŵe, kapena kuŵalanga Baibulo kuli kwakamuchisya kuti akalipikanaga kuti ali jikajikape.

9. Ana kusimanikwa pamisongano mpaka kwakamuchisye chamtuli?

⁹ Atendeje yakomboleka kuti asimanikweje pamisongano. Misonganoji jichalimbikasya soni kwakamuchisya kuti ŵamanyilile chenene abale ni alongo. (Aheb. 10:24, 25) Mlongo Messiel jwatumkolasile jula jwatite, “Atamose kuti naliji jwasooni nambo nalingagalingaga kusimanikwa pamisongano josope jampingo soni kupeleka ndemanga. Yeleyi yangamuchisye kulipikana kuti ndili jwakusosekwa mumpingo.”

10. Ligongo chichi tukusosekwa kukola achimjetu ŵakulupichika mumpingo?

¹⁰ Akungulucheje ni abale ni alongo ŵali ŵakulupichika. Atende yakuti apate achimjawo mumpingo ŵakwawona kuti mpaka alijiganye yejinji kutyochela kwa jemanjaji atamose kuti mpaka aŵe ŵakulekangana yaka soni ndamo. Baibulo  jikusasala kuti lunda “luli ni ŵandu ŵachekulupe.” (Yob. 12:12) Nombenawo ŵachekulupe mpaka alijiganye yejinji kutyochela kwa ŵachinyamata ŵali ŵakulupichika. Atamose kuti Daudi ni Yonatani ŵalekanganaga mnope yaka, nambo nganiyalepelekasya kuŵa paujakwe. (1 Sam. 18:1) Jemanjaji ŵakamusyanganaga paŵamtumichilaga Yehofa atamose kuti papali yakusawusya yejinji. (1 Sam. 23:16-18) Mlongo Irina jwali jikape jwa Mboni m’liŵasa lyakwe jwatite, “Abale ni alongo mpaka aŵe achinangolo ŵetu soni ŵachibale ŵetu mwausimu. Yehofa mpaka atukamuchisye kupitila mwa jemanjaji.”

11. Ana tukusosekwa kutenda uli kuti tuŵe paunasi wambone ni achimjetu?

¹¹ Kupata achimjetu mumpingo mpaka kuŵe kwakusawusya mnopemnope naga tuli ŵasooni. Mlongo Ratna juŵalijiganyisye usyesyene atamose kuti ŵandu ŵane ŵamsisyaga, jwasasile kuti, “Namanyililaga kuti ngusosechela chikamuchisyo chakutyochela kwa abale ni alongo.” Nambo ndaŵi sine yikusaŵa yakusawusya kuti amsalile mundu jwine mwakupikanila mumtima. Nambope kutenda yeleyi kukusakamuchisya kuti aŵe paunasi wambone ni mundujo. Achimjawoŵa akusaŵa ŵakusachilila kwalimbikasya soni kwakamuchisya wawojo. Nambope kuti ŵakamuchisye akusosekwa kuti wawojo asaleje kaje yakusosechela.

12. Ana kulalichila mpaka kwakamuchisye chamtuli kuti akole achimjawo ŵambone?

¹² Litala lyampaka litukamuchisye kuti tukole achimjetu lili kulalichila yimpepe ni abale ni alongo. Carol jwatumkolasile jula jwatite, “Mbatile achimjangu ŵajinji ligongo lyakulalichila yimpepe soni kutenda nawo mautumiki gane. Yehofa aŵele ali mkungamuchisya kwa yaka yosopeyi kupitila mwa achimjanguŵa.” Kukola achimjetu ŵa Chiklistu kukusakamuchisya mnope. Yehofa akusakamulichisya masengo achimjetuŵa kuti atukamuchisye kumalana ni nganisyo syakutengusya mpela sya kulipikana kuti uli jikajikape.—Mis. 17:17.

13. Ana jwalijose mumpingo akwete udindo wapi?

¹³ Jwalijose mumpingo akwete udindo wakamuchisya kuti ŵandu aŵe ŵakamulana. Yeleyi mpaka yikamuchisye kuti pakasimanikwa jwine jwakulipikana kuti ali jikajikape. (Yoh. 13:35) Yatukusatenda soni kuŵecheta mpaka yalimbikasye mnope ŵane. Mlongo jwine jwatite, “Panagambile kulijiganya usyesyene, abale ni alongo niŵaŵaŵele mpela ŵa muliŵasa lyangu. Yikaliji yakusawusya kuti mbe jwa Mboni sya Yehofa yikaŵe kuti jemanjaji nganangamuchisya.” Ana mpaka ŵakamuchisye chamtuli abale ni alongo ŵakusalipikana kuti ali jikajikape ŵelesoni achalongo achimjawo nganaŵa ŵa Mboni, kuti alipikaneje kuŵa ŵakusosekwa mumpingo?

14. Ana mpaka tutende uli kuti tuŵe paujakwe ni ŵandu ŵalijiganyisye kwene usyesyene?

¹⁴ Alinjejelinjeje kuŵa paujakwe ni ŵandu ŵagambile kulijiganya kwene usyesyene. Mpaka tutende yeleyi mwakwapochela mwachinonyelo ŵandu ŵalijiganyisye kwene usyesyene ŵayiche ku Nyumba ja Uchimwene. (Alo. 15:7) Nambope tukusosekwa kutenda yejinji mmalo mwagamba kwakomasya. Tutendeje yakuti aŵe achimjetu. Kuti yikomboleche, tuŵeje ŵachinonyelo soni kulosya kuti tukusitwaganichisya ŵandu ŵalijiganyisye kwene usyesyene. Patukunguluka nawo tuŵambaleje kwawusya yiwusyo yakutesya sooni. Nambosoni twapikanichisyeje pakutusalila yakusawusya yakusimana nayo. Ŵandu ŵane yikusiyasawusya kuti asale mwakupikanila mumtima. Myoyo ngakusosekwa kwakanganichisya kuti aŵechete. Mmalo mwakwe ŵawusyeje mwalunda soni kwapikanila mwakuwusimana mtima pakuŵecheta. Mwachisyasyo, mpaka ŵawusye mwaŵalijiganyichisye usyesyene.

15. Ana abale ni alongo ŵakomangale mwausimu mpaka ŵakamuchisye chamtuli ŵandu ŵane mumpingo?

¹⁵ Naga achakulungwa ŵamumpingo soni ŵandu ŵakomangale mwausimu akuŵa ŵagopoka ni mundu jwalijose mumpingo, mpaka  yikamuchisye wosope mumpingomo kuti akuleje mwausimu. Melissa juŵalijiganyisye usyesyene kutyochela kwa mamagwe jwasasile kuti, “Nganimba ngombwele kulondesya mwangupikanila mumtima ligongo lya yindu yaŵele mkutenda abale pakungamuchisya kwa yaka yosopeyi. Pandaŵi jangusaka kuŵecheta yineyakwe, ngayikusaŵa yakusawusya kuti nampate mundu jwampaka namlondechesye.” Nombe Mauricio jwalipikanaga kuti ali jikajikape pandaŵi jele m’bale juŵamjiganyaga Baibulo ŵalesile usyesyene. Jwalakwe jwatite, “Achakulungwa ŵamumpingo paŵalosyaga kuti akusanganichisya, yangamuchisyaga mnope. Jemanjaji ŵaŵechetanaga ni une ndaŵi syosope. Twajawulaga yimpepe kukulalichila, kukutenda maseŵela gane, soni ŵasalilaga mfundo syakamuchisya syapatile pakulijiganya Baibulo pajika.” Apano Melissa ni Mauricio akutenda utumiki wandaŵi syosope.

16-17. Ana ni matala gane gapi gampaka twakamuchisye achimjetu?

¹⁶ Twakamuchisyeje mmatala gakulekanganalekangana. (Agal. 6:10) M’bale jwine jwakutenda umishonale ku chilambo chakutalikangana ni kumangwakwe, jwatite, “Ndaŵi syejinji yatukusasaka ŵanduwe yili yakuti mundu jwine agambe kutulosya chinonyelo pandaŵi jakuŵajilwa. Ngusakumbuchila yayatendekwe lisiku line panatesile ngosi ja galimoto. Panakopochelaga kunyumba nganisyo syangu syaliji sili sisokonechele. Nambo liŵasa line lyambilasile kumangwawo kuti tukalye yakulya. Apano naliŵalile yakulya yanalile palisikuli, changusakumbuchila chili chakuti ŵambikanilaga pandaŵi jinaŵechetaga. Mwamti patwalekanganaga lisiku lyeleli naliji jwakusangalala.”

¹⁷ Tukusaŵaga ŵakusangalala patusimene ni abale ni alongo kumisongano. Yikusaŵa myoyo ligongo tukusakungulukaga yimpepe soni kukambilana yatupikene mungani sya pamsonganopo. Nambope, Carol jwatumkolasile jula jwatite, “Pandili kumsongano ngusalipikanaga kuti ndili jikajikape. Atamose kuti kukusapagwa ŵandu ŵajinji, nambo abale ni alongo ŵajinji akusaŵa ali atemi ni ŵamwiŵasa mwawo. Myoyo panguyiwona kuti une ndili jika, yikusambweteka mnope.” Ŵane yikusaŵa yakusawusya kuti ajawule kumsongano panyuma pakuti ŵamkwawo ajasiche. Ana pana mundu jwakummanyilila kuti akulaga ni chakusawusya chelechi? Naga yili myoyo, mpaka amsalile kuti pamsongano ŵakuyichisya chayiche kuti chatame yimpepe soni kulya najo yimpepe yakulya.

18. Ana mpaka tukamulichisye masengo chamtuli maloŵe ga pa 2 Akolinto 6:11-13, patukwaŵilanjila ŵane kumangwetu?

 ¹⁸ Akunguluchileje yimpepe. Pakukunguluka ŵaŵilanjeje abale ni alongo ŵakulekanganalekangana, mnopemnope ŵakusalipikana kuti ali jikajikape. Tukososekwa ‘kuwugula mitima’ jetu kwa ŵandu mpela ŵeleŵa. (Aŵalanje 2 Akolinto 6:11-13.) Mlongo Melissa jwatumkolasile jula jwatite, “Naŵaga jwakusangalala pandaŵi jele abale ni alongo atuŵilasile kuti tukakunguluche yimpepe ni maŵasa gawo kapena kwawula kumalo ganegakwe.” Ana mumpingo mwawo mwana mundu jwampaka amŵilanjile kunyumba jawo kukunguluka kapena kutenda najo yindu yine yimpepe?

19. Ana ni ndaŵi japi jampaka yiŵe yakamuchisya mnope kunguluka ni Aklistu achimjetu?

¹⁹ Pana ndaŵi jine jele abale ni alongo ŵetu mpaka ayamichile mnope naga tuli mkukunguluka nawo. Mwachisyasyo, ŵane yikusaŵa yakusawusya kuti asimanikwe pamlango pandaŵi jele ŵachibale ŵawo ŵanganaŵa ŵa Mboni akutenda yisangalalo yine yakutindana ni malemba. Pele ŵane yikusaŵa yakupweteka mnope pakukumbuchila lisiku liŵawile ŵamkwawo. Patukunguluka ni abale ni alongo ŵakusimana ni yakusawusya mpela yeleyi tukusalosya kuti ‘tukusasamala’ ya jemanjajo.—Afil. 2:20.

20. Ana maloŵe gaŵaŵechete Yesu pa Mateyu 12:48-50, mpaka gatukamuchisye chamtuli patukulipikana kuti tuli jikajikape?

²⁰ Pana magongo gejinji gampaka gamtendekasye Mklistu kulipikana kuti ali jikajikape. Nambo tukaliŵalila kuti Yehofa akusamanyilila mwakusapikanila jemanjaji. Paja jwalakwe akusatukamuchisya kupitila mwa abale ni alongo. (Aŵalanje Mateyu 12:48-50.) Patukwakamuchisya abale ni alongo tukusalosya kuyamichila dongosolo jiŵaŵisile Yehofa jakuti tukamusyanganeje. Myoyo mwangasamala kandu ni mwatukusalipikanila ndaŵi sine, tumanyilileje kuti nganituŵa jika, ligongo Yehofa ali jwakoseka kutukamuchisya ndaŵi jilijose.