Paulo ngma ke: “Kɛ gu mlaa nɔ ɔ, i gbo ngɛ mlaa blɔ fa mi, konɛ ma hi wami mi ngɛ Mawu blɔ fa mi.”—Gal. 2:19.

Nɔ́ nɛ Paulo ngma a kɛ oti nɛ e kɛ asafohi nɛ a ngɛ Roma nɔ yemi he nɛ ji Galatia a ngɛ he munyu tue ɔ kɔ. Lakpa tsɔɔli ngɛ Kristofohi komɛ a nɔ he wami náe. Lakpa tsɔɔli nɛ ɔmɛ tsɔɔ kaa loko nɔ ko ma ná yi wami hemi ɔ, jã e ye Mose Mlaa a nɔ, titli ɔ, nɔ́ nɛ kɔɔ nɔ pomi he ɔ. Se Paulo le kaa Mawu mlaa nɛ tsɔɔ kaa e sa nɛ a po nihi nɛ a ba he ye ɔ tsu we ní hu. E kɛ mɛ susu níhi a he kɛ ya tsitsaa kɛ tsɔɔ mɛ kaa tsɔɔmi nɛ ɔmɛ ji lakpa tsɔɔmihi. Nɛ e ye bua nyɛmimɛ ɔmɛ nɛ a ná hemi kɛ yemi ngɛ Yesu Kristo kpɔmi afɔle sami ɔ mi.—Gal. 2:4; 5:2.

Baiblo ɔ tsɔɔ kaa ke nɔ ko gbo ɔ, e li nɔ́ ko nɔ́ ko, nɛ e li níhi nɛ yaa nɔ ngɛ je ɔ mi ɔ a he nɔ́ ko hu. (Fiɛlɔ 9:5) Benɛ Paulo de ke: “I gbo ngɛ mlaa blɔ fa mi” ɔ, nɔ́ nɛ e ngɛ tsɔɔe ji kaa Mose Mlaa a be e nɔ he wami hu. Paulo tsɔɔ kaa kɛ gu hemi kɛ yemi nɛ e ngɛ ngɛ kpɔmi afɔle sami ɔ mi ɔ nɔ ɔ, e maa “hi wami mi ngɛ Mawu blɔ fa mi.”

Mlaa a nɛ ha nɛ níhi tsake ngɛ Paulo si himi mi. Ngɛ mɛni blɔ nɔ? E sɛ hlami tsɔɔ nya kaa “a buɔ adesa ko dalɔ, pi kɛ gu mlaa nya ní tsumihi a nɔ, se mohu kɛ gu hemi kɛ yemi ngɛ Yesu Kristo mi ɔ pɛ nɔ.” (Gal. 2:16) Ngɛ anɔkuale mi ɔ, Mlaa a tsu nɔ́ ko nɛ he hia wawɛɛ he ní ta. Paulo de Galatia bi ɔmɛ ke: “A ngɔ kɛ piɛɛ he konɛ a kɛ ha nɛ mlaa nɔ tɔmihi nɛ je kpo heii kɛ yaa si be nɛ nina a nɛ a wo si ngɔ ha a maa ba.” (Gal. 3:19) Niinɛ, Mlaa a ha nɛ e pee heii kaa adesahi nɛ a yi mluku nɛ a peeɔ yayami ɔ be nyɛe maa ye Mlaa a nɔ pɛpɛɛpɛ, nɛ a hia nyagbe afɔle sami nɛ ye mluku. Lɔ ɔ he ɔ, Mlaa a tsɔɔ nihi blɔ kɛ ya “nina a,” nɛ ji Kristo ɔ ngɔ. Mawu ma nyɛ maa bu nɔ ko dalɔ ke e ná hemi kɛ yemi ngɛ Yesu Kristo mi. (Gal. 3:24) A bu Paulo dalɔ ejakaa kɛ gu Mlaa a nɔ ɔ, e ba kplɛɛ Yesu nɔ, nɛ e ná e mi hemi kɛ yemi. Enɛ ɔ he ɔ, Paulo “gbo ngɛ mlaa blɔ fa mi,” nɛ e ba “wami mi ngɛ Mawu blɔ fa mi.” Mlaa a be e nɔ he wami hu, se Mawu lɛ ngɛ e nɔ he wami.

Paulo tu nɔ́ ko kaa kikɛ he munyu ngɛ sɛ womi nɛ e ngma kɛ ya ha Roma bi ɔmɛ ɔ mi. Paulo de ke: “Ye nyɛmimɛ, nyɛ hu a ha nɛ nyɛ gbo kɛ ha Mlaa a kɛ gu Kristo nɔmlɔ tso ɔ nɔ, . . . a ha nɛ wa ye wa he kɛ je Mlaa a he, ejakaa wa gbo kɛ ha nɔ́ nɛ e tsi wa nya a.” (Rom. 7:4, 6) Ngmami nɛ ɔ kɛ ngmami nɛ ngɛ Galatia Bi 2:19 ɔ tsɔɔ kaa pi gbomi nɛ nɔ ko ma gbo kaa yayami peelɔ ngɛ Mlaa a sisi ɔ he munyu nɛ Paulo ngɛ tue, mohu ɔ, he yemi he munyu nɛ e ngɛ tue. Mlaa a be Paulo kɛ Kristofo kpahi a nɔ he wami hu. Kristo gbenɔ afɔle sami ɔ mi hemi kɛ yemi nɛ a ná a ha nɛ a ye a he.