Enyɔbiɔse Ciwo Yí So Yi Hlɛntɔwo Gbɔ
Nyɔ ci apotru Pɔlu jikɔ anu ci emɔ: “Sɔ kudo Ese lɔ dokplɔkplɔ mɛ ɔ, ŋ ku. Ese lɔ yí wu ŋ” ɔ?—Gal. 2:19.
Pɔlu ŋwlɛ mɔ: “Sɔ kudo Ese lɔ dokplɔkplɔ mɛ ɔ, ŋ ku. Ese lɔ yí wu ŋ. Ŋ ku nɔ Ese lɔ, yí a tɛnŋ le agbe evyɛ nɔ Mawu.”—Gal. 2:19.
Enu ci Pɔlu ŋwlɛ sɔ koɖo enyɔ vevi ɖeka ci enu nɔ hamɛ ciwo yí le Galati ci yí le Rɔma cɛkpakpa gɔnmɛ. Ŋsukankan nukplamɛtɔwo kpɔ ŋsɛn do Kristotɔ ɖewo ji le nɔ. Nukplamɛtɔ cɛwo kpla amowo mɔ gbɔxwe mɛɖe akpɔ hwlɛngan ɔ, éɖo awa do nyɔ ciwo wonu le Moizi Se lɔ mɛ ji vevitɔ éɖo aso vo. Vɔ Pɔlu nya mɔ Mawu degbebiɔkɔ so jixɔsetɔwo shi mɔ wo le so vo o. Koɖo ezolelanmɛɔ, éɖe nu gɔnmɛ nɔ wo yí dasɛ nɔ wo koɖo kankandoji mɔ, nukplamu cɛwo denyi nyɔnɔnwi o keŋ do ŋsɛn lanmɛ nɔ nɔviwo nɔ woaxɔ Yesu Kristo tafɛnvɔnsa lɔ ji se.—Gal. 2:4; 5:2.
Bibla dasɛ petii mɔ nɔ mɛɖe kuɔ, degbenyanɔ enu ciwo yí jɔjɔ le axa ni o yí wodatɛnŋ agbewa ŋɖe ni o. (Ŋun. 9:5) Ci Pɔlu nu mɔ: “Sɔ kudo Ese lɔ dokplɔkplɔ mɛ ɔ, ŋ kuɔ,” éjikɔ anu mɔ Moizi Se lɔ degbeɖo ŋsɛn yí awa ŋɖe nɔ ye o. Vɔ Pɔlu kando ji mɔ ci yexɔ tafɛnvɔnsa lɔ ji seɔ, ye “le agbe evyɛ nɔ Mawu.”
Pɔlu nɔnɔmɛ trɔ “sɔ kudo Ese lɔ nu.” Lé enyi ahan doɔ? Éɖe mɛ doŋkɔ mɔ, “agbetɔ de nyinɔ amɛjɔjɔɛ le Mawu gbɔ toto Ese dokplɔkplɔ mɛ o. Oo! Kankando Yesu Kristo ji yí wanɔ amɛ yí wo nyinɔ amɛjɔjɔɛ le Mawu gbɔ.” (Gal. 2:16) Nyɔnɔnwi yí enyi mɔ, Ese lɔ wa dɔ vevi ɖeka vayi. Pɔlu ɖe mɛ nɔ Galatitɔwo mɔ: “Wo do Ese lɔ yí a sɔ dasɛ afɛn ciwo yí agbetɔwo wanɔ. Ese lɔ kpɔtɔ li keke nanɔ hwecinu Abraxamu Vivi vevi lɔ va. Mawu gbeɖu lɔ so Vivi lɔ, ci yí nyi Kristo, nu.” (Gal. 3:19) Ɛɛ, Ese lɔ dasɛ petii mɔ, agbetɔ makpemakpe ciwo yí nyi nuvɔnmɛwo datɛnŋ awa do Ese lɔ ji pɛpɛpɛ o, woʒan vɔnsa ci nu afɛn ɖekɛ dele o. Eyi taɖo Ese lɔ kplɔ amowo yi “Vivi” ci yí nyi Kristo gbɔ. Nɔ mɛɖe xɔ Yesu Kristo ji seɔ, Mawu atɛnŋ yɔɛ mɔ amɛjɔjɔɛ. (Gal. 3:24) Pɔlu nu ahan, ɖo Ese lɔ yí na evalɔn yí xɔ Yesu ji se. Eyi taɖo Pɔlu mɔ “sɔ kudo Ese lɔ dokplɔkplɔ mɛ ɔ, ŋ ku” yí va “le agbe evyɛ nɔ Mawu.” Ese lɔ degbeɖo ŋsɛn ɖekɛ do Pɔlu ji o, vɔ Mawu yí ɖo ŋsɛn do ji.
Pɔlu nu enyɔ cɛ han do wema ci eŋwlɛ ɖaɖa Rɔmatɔwo mɛ. Émɔ: “Nɔviwo, le emɔ ɖeka lɔ ke ji ɔ, míwo gbe xoxwi ku, yí mí kpɔ vovo le Ese lɔ nu toto Kristo ŋcilan ji . . . Ese lɔ bla mì shigbe gamɛnɔtɔwo ɛnɛ. Vɔ mìwo gbe xoxwi ku yí wo na vovo mì so Ese lɔ nu.” (Rɔm. 7:4, 6) Denyi eku ci nuvɔnmɛ ciwo yí le Ese lɔ gɔnmɛ aku nu yí Pɔlu xokɔ nuxu so le kpukpui cɛwo koɖo Galatitɔwo 2:19 mɛ o. Vɔ vovokpɔkpɔ nu yí exokɔ nuxu so. Ese lɔ degbeɖo acɛ ɖe do yɛ koɖo mɛ ciwo le shigbe yɛ nɛ ji o. Wona vovo wo sɔ to xɔse ci woɖo do Kristo tafɛnvɔnsa lɔ nu.
