Pablo feipi: ‘Iñche am tati ley dungu ñi duam la reque felen tati ley dungu meu, fei ñi mongeletual ta Ngünechen meu’ (Gál. 2:19).

Galacia mapu meu, quiñeque cristiano quimeltuquefuingün coilaque dungu, femngechi ñi hueluraquiduamelafiel ti trahunche. “Mülei ñi inangeal Moisés ñi Ley”, ca “mülei tamün circuncidangeal” piquefuingün. Huelu Pablo cüme quimniefui chem ñi ayünieel ta Jehová, duamniengehuelai pu cristiano ñi circuncidangeal. Feimu cüme quimfalcünui ñi coila quimeltuqueel engün ca quellufi ti trahunche ñi feyentuleal Jesús ñi lan tañi montulaeteu (Gál. 2:4; 5:2). Petu quimeltulu chumngelu duamfalhuelai ñi inangeal Moisés ñi Ley, Pablo huirintucui ñi feipin Gálatas 2:19.

¿Chumngelu feipi Pablo ‘la reque felen tati ley dungu meu’? Biblia cüme feipilei lale quiñe che quimhuetuquelai chem no rume, chumhuelai rume, ca inei no rume ngüneniehuelayafeyu (Ecl. 9:5). Feimu Pablo cüpa feipi Moisés ñi Ley ngüneniehuelaeyu, la reque felei tati ley dungu meu. Doi mai Pablo feyentulefui Jesús ñi lan meu, feimu feipi ‘ñi mongeletual ta Ngünechen meu’.

Pablo quimniefui pu che perdonangelayafui tañi culpan meu inaniefiel mu tati ley, “huelu mai tañi feyentun meu ta Cristo Jesús meu” (Gál. 2:16). Huelu tati ley falin-ngefui. Pablo feipi tati ley ‘hulngei femngechi tañi quimngeal tañi feyentuquenon tati pu che, fei cüpale hula ti Cristo’ (Gál. 3:19). Tati ley quimfalcünui pu che ñi culpafe chengen, inei no rume inalayafui com ñi feipilen ti ley, duamniengefui inei tañi montulaeteu. Feimu tati ley quellufi pu che ñi quimtucual Jesús ñi Cristongen. Pu che feyentule Jesús meu, lifreletuai tañi culpan meu (Gál. 3:24). Tati ley quellufi ta Pablo ñi feyentuleal Jesús meu, feimu perdonangei tañi culpan meu ca lifreletui. Feimu Pablo ‘la reque felei tati ley dungu meu, fei ñi mongeletual ta Ngünechen meu’. Mai, tati ley ngüneniehuelaeyu, Chau Dios müten.

Pablo ca femngechi huirintuculelfi pu romano, feipi: “Iñche ñi pu peñi ca lamngen. Feichi lalu ta Cristo, eimün ca femngechi laimün reque ta Moisés ñi ley dungu meu [...]. Tati ley dungu ñi pepiluhun ngüneniequefeiñmeu, huelu feula laiñ reque tati ley dungu meu” (Rom. 7:4, 6). Ñi feipilen Romanos ca Gálatas mu, ¿Pablo cüpa feipi tañi culpafe chengen mu mülefui ñi layal tati ley dungu meu? Femlai, Pablo ca com pu cristiano ngüneniehuelaeyu ti ley, feimu la reque felefuingün tati ley dungu meu. Lifreletuingün tañi feyentulen mu Jesús ñi lan meu.