Paul a tila le: “Ni njel mbén, me bi wo inyu mbén, le ndi me témb i niñ inyu Nyambe.”​—Galatia 2:19.

I yom Paul a tila hana i bé kiha ni i jam a bi kal makoda ma Rôma ma ma bé i Galatia. Ngim bikristen i bé emble biniigana bi baniiga bitembee. I bôt ba ba bé niiga le, inyu kôhna tohi, mut a bé lama noñ mbén Môsi, téntén i i bé kal le bôt ba nlama kweeba. Ndi Paul a bé yi le Nyambe a nyégsa ha bé bagwélél bé i kweeba. Jon, a bi gwélél Bitilna inyu kwés lôk kéé nkaa le biniigana bi, bi bé bé bi téé, a ti ki bo makénd le ba hémle sesema i Yésu Kristô.​—Galatia 2:4; 5:2.

Bibel i nkal le ngéda mut a nwo, a nyi ha bé yom yo ki yo. (Ñañal 9:5) Ngéda Paul a nkal le, “me bi wo inyu mbén,” a bé sômbôl kal le mbén Môsi ha bé yon i bé éga niñ yé. Ndi, le kiki a bé hémle binoñ, a bi “témb i niñ inyu Nyambe.”

“Ni njel mbén,” niñ i Paul i bi héñha. Lelaa? A ntoñol le: “Mut a nkéla bé le a téé sép ni njel minson mi mbén, ndi ndigi ni njel hémle a nhémle Yésu Kristô.” (Galatia 2:16) Mbén i bi boñ jam li nlôôha mahee. Paul a toñle lôk kéé i Galatia i jam li ni bini bibuk le: “I bi kôndba inyu yelel bibéba letee mbôda i lo, nyen a bi kôhna mbônga.” (Galatia 3:19) Ñ, Mbén i bi tibil unda le di yé bikwéha bi bôt, inyu hala nyen di nla bé nôgôl Mbén i nya i yôni, di bééna toi ngôñ ni sesema i i yé peles. Jon Mbén i bi kena bôt bobasôna yak i nwet a bé “mbônga,” hala wee Kristô. Inyu boñ le i kéla le di téé sép, di nlama hémle Yésu Kristô. (Galatia 3:24) Paul a bi kal hala inyule ni njel mbén a bi neebe Yésu, a hémle ki nye. Hala a boñ le kunda yada, Paul a bi “wo inyu mbén,” a “témb i niñ inyu Nyambe.” Mbén i bééna ha bé kunde i ngii yé, ndik Nyambe nyemede.

Paul a bi tilna bilôk bikéé bi Rôma nlélém jam. A kal bo le: “Jon a lôktata, ni bi wo inyu mbén Môsi ni njel nyuu i Kristô . . . Di mal pam i mok mi mbén Môsi inyule di mal wo inyu jam li kéñék bés njel.” (Rôma 7:4, 6) Minlôñ mi, ni u kaat Galatia 2:9, mi ñunda le Paul a bé pôdôl bé kogse mut a nkôs inyule a nkwo Mbén. Ndi a bé unda le, a bi yila ngwélés tole a bi kobla i mok mi Mbén. He ndik nyetama bé, ndi yak bôt bape kiki nye. Hémle yap inyu sesema i Kristô i bi kobol bo.