Isinurat ni Pablo: “An katugunan mismo an dahilan kaya ako nagin gadan kun mapadapit sa katugunan, tanganing ako magin buhay para sa Diyos.”—Gal. 2:19.

An isinurat na iyan ni Pablo konektado sa mahalagang marhay na puntong ipinapaliwanag niya sa mga kongregasyon sa probinsiya nin Galacia na sakop kan Roma. May mga Kristiyano diyan na iniimpluwensiyahan nin palsong mga paratukdo. Itinutukdo kan mga lalaking iyan na tanganing maligtas kaipuhan nin saro na sunudon an mga kahagadan kan Katugunan ni Moises, partikular na an pagturi. Pero aram ni Pablo na dai na hinahagad nin Diyos sa mga Kristiyano na magpaturi. Paagi sa mapuwersang pangangatanusan, pinatunayan niyang palso an mga katukduan na iyan asin pinakusog an pagtubod kan mga tugang sa atang na pantubos ni Jesu-Cristo.—Gal. 2:4; 5:2.

Malinaw na sinasabi kan Bibliya na pag an saro nagadan, dai na siya nag-aaram o dai na siya apektado kan mga nangyayari sa palibot niya. (Par. 9:5) Kan sabihon ni Pablo: “Ako nagin gadan kun mapadapit sa katugunan,” an buot niyang sabihon mayo nang kapangyarihan saiya an Katugunan ni Moises. Imbes, sigurado si Pablo na paagi sa pagtubod niya sa atang na pantubos, nagin “buhay [siya] para sa Diyos.”

Nangyari an pagbabagong iyan sa sitwasyon ni Pablo ‘dahil mismo sa katugunan.’ Paano? Ipinaliwanag niya pa sana na “an sarong tawo ipinapahayag na matanos, bakong paagi sa paggibo kan mga kahagadan sa katugunan, kundi solamente paagi sa pagtubod ki Jesu-Cristo.” (Gal. 2:16) Siyempre, may mahalagang marhay na naisagibo an Katugunan. Sinabi ni Pablo sa mga taga Galacia: “Idinagdag iyan tanganing mahayag an mga pagbalga, sagkod na umabot an panahon na dumatong idtong banhi na iyo an pinapanungdan kan panuga.” (Gal. 3:19, nota sa ibaba) Iyo, malinaw na ipinahiling kan Katugunan na dai kaya kan bakong perpekto asin makasalan na katawuhan na perpektong masunod an Katugunan asin na kaipuhan ninda nin sarong pinal saka perpektong atang. Kaya nakatabang an Katugunan para maaraman kan mga tawo na si Jesus an “banhi.” Paagi sa pagpahiling nin pagtubod ki Jesu-Cristo, puwedeng maipahayag nin Diyos na an saro matanos. (Gal. 3:24) Nasabi idto ni Pablo huling dahil mismo sa katugunan kaya inako niya si Jesus asin nagtubod siya digdi. Huli kaiyan, si Pablo “nagin gadan kun mapadapit sa katugunan” asin ‘nabuhay para sa Diyos.’ Mayo nang kapangyarihan saiya an Katugunan, pero an Diyos igwa.

May kaagid man na sinabi si Pablo sa surat niya para sa mga taga Roma. “Mga tugang ko, paagi sa hawak kan Cristo kamo man nagin gadan kun mapadapit sa Katugunan . . . Nakatalingkas na kita sa Katugunan, huling nagadan na kita may koneksiyon sa bagay na iyan na nakakapugol sa sato.” (Roma 7:4, 6) An sinasabi diyan ni Pablo saka sa Galacia 2:19 bako an manungod sa pagkagadan bilang kinondenar na parakasala sa irarom kan Katugunan. Imbes, an sinasabi niya iyo an manungod sa pagigin pinatalingkas. Siya asin an iba pang arog niya bako nang kontrolado kan Katugunan sa ano man na paagi. Pinatalingkas sinda paagi sa pagtubod sa pantubos ni Cristo.