Paulo alembele ukuti: “Mu mafunde e mo nafwilile ukuti nitekwa ku mafunde, pa kutila mbe uwa mweo kuli Lesa.”—Gal. 2:19.

Ifyo Paulo alembele fyalyampene sana ne cishinka cikalamba ico alelandapo ilyo alembele ifilonganino ifyali mu citungu ca bena Roma ica Galatia. Abena Kristu bamo abali muli ici citungu balekonkelela bakasambilisha ba bufi. Aba bakasambilisha ba bufi balesambilisha ukuti pa kuti umuntu akapusuke, alingile ukulakonka Amafunde ya kwa Mose, maka maka ifunde lyalelanda pa kusembululwa. Lelo Paulo alishibe ukuti pali ilya nshita Lesa talandile ukuti abamupepa bafwile fye ukusembululwa. Alondolwele mu nshila ya kutila caishibikwa ukuti ifyo balesambilisha fya bufi, kabili alilengele aba bwananyina bacetekela sana mwi lambo lya kwa Yesu Kristu.—Gal. 2:4; 5:2.

Baibolo yalilanda ukwabula no kupita mu mbali ukuti umuntu nga afwa teshiba akantu nangu kamo. (Luk. Mil. 9:5) Ilyo Paulo alandile ukuti “mu mafunde e mo nafwilile,” aloseshe mu kuti Amafunde ya kwa Mose tayakwete amaka pali ena. Lelo alishininkishe ukuti ukucetekela mwi lambo lya kwa Yesu, kwalilengele ‘aba uwa mweo kuli Lesa.’

“Amafunde” e yalengele ukuti Paulo aluke. Cinshi twalandila ifi? Paulo umwine alondolwele ukuti “umuntu talungamikilwa ku kusunga amafunde, lelo alungamikilwa pa kutetekela Kristu Yesu.” (Gal. 2:16) Ca cine ukuti Amafunde yalibombele umulimo uukalamba nga nshi. Paulo alondolwelele abena Galatia ukuti: “Yalundilweko ku kulenga bumpulamafunde bumoneke, mpaka umwana akese uo balaile.” (Gal. 3:19) Amafunde yalilengele caishibikwa ukuti abantunse abashapwililika te kuti bacite filya fine fye Amafunde yalanda, kabili balekabila ilambo ilyapwililika. Kanshi Amafunde yalyafwile abantu ukwishiba ukuti Yesu e wali umwana wali no kwisa. Umuntu nga acetekela muli Yesu Kristu, Lesa amumona ukuti mulungami. (Gal. 3:24) Icalengele Lesa alemona Paulo ukuti mulungami, ni co Amafunde yalengele asumina muli Yesu no kumucetekela. E ico ‘mu mafunde e mo Paulo afwilile kabili aishileba uwa mweo kuli Lesa.’ Kanshi amafunde yalilekele ukukwata amaka pali Paulo, lelo Lesa e wakwetepo amaka pali ena.

Amashiwi Paulo alembele abena Galatia yalipalana na yo alembele abena Roma. Atile: “Bamunyinane, na imwe mwalifwile ku Mafunde mu mubili wa kwa Kristu. . . . Twalilekwako ku Mafunde, apo twalifwa kuli cilya twaiketweko.” (Rom. 7:4, 6) Amashiwi yaba pali ili ilembo na yaba pa Abena Galatia 2:19, yalangilila ukuti Paulo talelanda pa mfwa iyo abaletoba amafunde balefwa, lelo alelanda pa kulubuka. Kanshi Amafunde tayakwetepo amaka pali Paulo na pa Bena Kristu bambi abalubwike nga ena, pa mulandu wa kutetekela mwi lambo lya kwa Kristu.