Paulus fyas radine, ”Yamar kwar faro sasoser agama anna -- inja sasoser anna naiso ḇemun aya -- insa yakenem kuker Allah.”​—Gal. 2:19.

Paulus wos ḇyena ine nefesepen kuker roi ḇefnai fa fyas surat ḇe snonggaku Kristen ḇero Galatia sya. Snonggaku Kristen ro diwa sawninyan si kukro farkarkor ḇekakuḇa. Guru-guru ḇekakuḇa ono sisya sbuk farkarkor ḇo soḇo imbe sismai fasarpar ido, fandun fa sisouser Sasoser Moses, isoine faro sofakfuk ya. Ḇape, Paulus fyawi snar Allah dor kawasa Ḇyesi ḇa kwar fa sismai sofakfuk. Paulus byuk wos kakyar ḇe si, ḇefasnaibos snar farkarkor ani nsasar. I kako syambraḇser naek srar sya kakyar sena faro Yesus Kristus farsarser fasarpar ḇyena.​—Gal. 2:4; 5:2.

Refo byuk farkarkor ḇesnai kaku snar snonggaku ḇemar kwar sya sakfawi royoḇaḇeri ma roi ḇejadi ro ris sena nawyae si ḇa. (Pkh. 9:5) Inja fafisu Paulus ikofen, ”Yamar kwar faro sasoser agama anna,” ro Paulus ikofen kaku ro dine Sasoser Moses ani fyesepen i ḇa. Ḇape, snar ikyar faro farsarser fasarpar, Paulus ikyar snar ’ikenem kuker Allah’.

Sasoser Moses iso ḇefarwe Paulus kenem ḇyedi. Nyan ya rarso? Snar ikofen ḇepon kwar ”snonkaku osero ḇaḇeri sbuk napnapes faroi snar ḇyeuser sasoser Refo Yahudiya, ḇape snar kakyar faro Yesus Kristus monda.” (Gal. 2:16) Imbo, Sasoser Moses ḇyefandun kaku ḇae. Paulus ikofenḇair faro snonggaku Kristen ḇero Galatia sya ḇo doḇe, ”Sasoser anna nafnoḇek snar ḇaḇeyuk -- sasoser anna nambran isof fafisu kpu ro asas ani ryama.” (Gal. 3:19) Snar Sasoser Moses ine isya, ḇesasar sya sifawi sifandun farsarser ḇenapes snar sipok fa simbranser sasoser anna nakam ḇa. Inja, Sasoser Moses fyarkin snonggaku sya faro Kristus, ”kpu ro asas ani”. Oso ikyar faro Yesus Kristus ido, na Allah myam i ḇe snonggaku ḇenapes. (Gal. 3:24) Paulus smam i ḇe snon ḇenapes imnis sasoser anna snar ikyar faro Yesus Kristus i. Rarirya, Paulus ’imar kwar faro sasoser anna’ ma ’ikenem kuker Allah’.

Paulus i kako ikofen fasnai roi anna ro surat ḇyedi faro snonggaku Kristen ḇero Roma. Fyas radine, ”Rarirya kuker mko, naek srar ayesi. Faro sasoser agama Yahudi naek srar mkomar kwar, snar mkoḇe oser kwar kuker Kristus baken ḇyedi. . . Koḇe ḇefesepen kuker sasoser agama Yahudi anna werḇa. Komarbur papoik ro sasoser randakya ḇeyaḇek ko kwar.” (Rm. 7:4, 6) Ro mnuk ine ma mnuk ro Galatia 2:19, Paulus ikofen ḇa snar simar ḇe snonggaku ḇesasar snar simbranser Sasoser Moses ḇyena kam ḇa. Ḇape, ’Simarbur papoik ro sasoser’ ine nfasnaiḇair simkei kwar ro sasoser anna. Paulus ma snonggaku Kristen ḇesesya kako sroro ḇaḇ Sasoser Moser wer ḇa. Bisa simkeibur na snar sikyar faro farsarser fasaspar Kristus.