Si Paulus mangkatahon, “Ai domma matei ahu bani titah in marhitei titah in, ase manggoluh ahu bani Naibata.”​—Gal. 2:19.

Surat ai ibahen si Paulus hu kuria-kuria na i Rom na dong i Galatia. Ijia dong halak na mangajarhon ajaran palsu i kuria. Ihatahon sidea do, ase boi sidea maluah maningon idalankon sidea do Titah ni si Musa, tarmasuk ma pasal sunat. Tapi ibotoh si Paulus do lang iparentahkon Naibata be sidea ase isunat. Jadi salah do ajaran ai. Ai ma na sihol ipatorang si Paulus bani suratni ai, janah sihol do ia patoguhkon haporsayaon ni sanina botou bani tobusan ni Jesus.​—Gal. 2:4; 5:2.

Bibel mangkatahon anggo halak na matei seng ibotoh age aha pe na masa. (Par. 9:5) Jadi sanggah ihatahon si Paulus, “matei ahu bani titah”, lang marlaku be Titah ni si Musa bani. Tapi, ibotoh ia do anggo porsaya ia bani tobusan ni Jesus, boi ma ia “manggoluh bani Naibata.”

Sasintongni halani Titah ai do homa si Paulus boi maluah hun Titah ai. Mase sonai? Ihatahon ia do, “Na so dapotan hapintoron jolma marhitei na mangkorjahon titah, tapi marhitei haporsayaon bani Jesus Kristus do.” (Gal. 2:16) Dong do tujuan ni Titah ai. Ipatorang si Paulus ma ai bani halak Galatia, “Itambahkon do in halani panlanggaron, paima roh Ginompar, simada bagah-bagah in.” (Gal. 3:19) Marhitei Titah, taridah ma ganup do jolma mardousa, janah lang dong na boi mandalankon ganup Titah ai. Halani ai porlu tumang do dong galangan na sempurna laho manasap dousa ni sidea. Marhitei Titah ni si Musa, iurupi ma halak laho mambotoh Jesus Kristus do “ginompar” na ijanjihon ai. Anggo porsaya sidea bani Jesus, gabe ihatahon ma sidea halak na pintor. (Gal. 3:24) Halani porsaya si Paulus bani Jesus Kristus, gabe boi ma ia ihatahon halak na pintor. Ai ma na mambahen ase ihatahon ia ‘matei do ia bani uhum’, tapi ‘manggoluh bani Naibata’. Maksudni lang markuasa be Titah ni si Musa bani, tapi Naibata do.

Ihatahon si Paulus do homa pasal ai bani halak i Rom. Nini do, “Ale hasoman, domma matei nasiam bani titah in marhitei daging ni Kristus, . . . sonari domma sirang hita humbani titah in, matei bani sipanjolomi hita hinan.” (Rom 7:4, 6) Jadi na ihatahon ia bani ayat ai, pakon na isurat ia bani Galatia 2:19, sedo maksudni matei sidea halani manlanggar Titah ni si Musa. Tapi maksud ni si Paulus, ai ma domma ipaluah sidea humbani Titah ni si Musa. Halani ai lang porlu be ia pakon halak Kristen na legan mangihutkon Titah ni si Musa. Sidea boi maluah halani porsaya bani tobusan ni Jesus.