Itulis Paulus bagenda: “Undang-undang e si erbanca aku mate bas undang-undang, alu bage banci aku nggeluh guna Dibata.”​—Gal. 2:19.

Kai si ikataken Paulus e lit hubungenna ras tujunna nulis surat man kalak Kristen i Galati. Piga-piga kalak Kristen si tading i je enggo ipengaruhi guru-guru palsu. Guru-guru e ngajarken maka sekalak jelma banci selamat adi patuhina Undang-Undang Musa, terutama kerna sunat. Tapi teh Paulus maka lanai iarusken Dibata gelah umatNa isunat. Ibuktiken Paulus alu cara si tepat maka pengajaren e salah janah ipegegehina kiniteken turang seninana man korban tebusen Jesus Kristus.​—Gal. 2:4; 5:2.

Jelas ikataken bas Pustaka maka adi mate sekalak jelma kai pe lanai tehna janah kai pe lanai banci mpengaruhi ia. (Peng. 9:5) Sanga ikataken Paulus, “Aku mate bas undang-undang,” maksud Paulus eme Undang-Undang Musa lanai erkuasa nandangi ia. Tapi perban erkiniteken man korban tebusen, tek Paulus maka ‘banci ia nggeluh guna Dibata.’

Paulus banci bebas arah Undang-Undang Musa perban “undang-undang” e sendiri. Engkai maka bage? Pernah ikatakenna maka “sekalak jelma ikataken benar adi erkiniteken man Jesus Kristus saja, labo perban ndalanken undang-undang.” (Gal. 2:16) Memang arah Undang-Undang Musa lit si penting si enggo ihasilken. Bagenda nina Paulus man kalak Galati, “Undang-undang e itambahken guna ncidahken perbahanen si salah seh asa reh keturunen si ngaloken janji e.” (Gal. 3:19) Perban lit Undang-Undang Musa, teh manusia si erdosa me maka perlu kalak e korban si sempurna, perban la kalak e ngasup ndalanken kerina undang-undang e. Emaka, Undang-Undang Musa nampati kalak meteh maka Jesus me “keturunen si ngaloken janji e.” Alu erkiniteken man Jesus Kristus banci kalak ikataken benar i lebe-lebe Dibata. (Gal. 3:24) Paulus banci ikataken benar menurut Undang-Undang Musa perban erkiniteken ia man Jesus. Alu bage, Paulus “mate bas undang-undang” janah “nggeluh guna Dibata.”

Bagenda nina Paulus bas suratna man kalak Roma, “Bage ka pe kena o turang senina. Perban pengorbanen Kristus, kena lanai i teruh kuasa Undang-Undang Musa. . . Kita enggo ibebasken arah Undang-Undang Musa, perban kita enggo mate bas undang-undang si nguasai kita.” (Rom. 7:4, 6) Bas ayat e bage pe bas Galati 2:19, Paulus labo sangana ncakapken kerna kalak si mate perban la ndalanken kerina Undang-Undang Musa. Tapi maksudna “mate bas undang-undang” eme ibebasken arah undang-undang e. Undang-Undang Musa lanai erkuasa man dirina bage pe man kalak si deban. Kalak e enggo bebas perban erkiniteken man korban tebusen Kristus.