Abürühati apostolu Pábulu: “Luéigiñe lilurudun Moisesi, hilaadina lun lúrudu lun gayara lan nabagaridun lun Bungiu” (Gal. 2:19).

Le meha labürühabei Pábulu aban meha fánreinti lídangiñe aban afuranguagüdüni le súdiniti le meha líchugubei lun damuriguaü le Galasiabei fulasu le uágubei lariha Roma. Añahein meha hádangiñe kristiánugu ha ígiraguagüdatiña houngua houn máisturugu yéetiña, ha meha arufudahabaña lun lan gayara lan lesefurun gürigia mosu lan gaganbadiwa lan lun Lilurudun Moisesi, luma luáguti lichugúniwa seini tuagu hóustarun wügüriña. Gama lumoun, subudi lumuti meha Pábulu mamuriahan hali lan Bungiu lun líchuguniwa seini tuagu hóustarun lubúeingu. Lau aban saminaü le derebuguti larufudei, iyeeniti lan arufudahani lira ani derebugugüda lumuti giñe hafiñen íbirigu lun hafiñerun luagu sákürifisiu le ladügübei Hesukrístu (Gal. 2:4; 5:2).

Afuranguagüda tumuti Bíbülia, dan le lan lounwen gürigia ibidiñe lan ni kata lun, ani mefentiña lan lau ni kata (Apur. 9:5). Dan le lariñagun Pábulu luagu “hilá lan lun lúrudu”, le labusenrunbei lariñagun lau mabafuhali lan Lilurudun Moisesi luagu. Ani chouru lumuti, ladüga lan lafiñerun luagu esefuruni, gayara lan “labagaridun lun Bungiu”.

Ánheinti le gádanbalin Pábulu chülüti “luéigiñe Lilurudun Moisesi”. Ida? Sun liña lafuranguagüdüni “subudi wamuti luagu úabei lan ni aban aricharaguti luagu ladügüni le lubeibei lúrudu; láurügübei lafiñerun luagu Hesukrístu laricharagua” (Gal. 2:16). Ítara liña, gúnfuli hali meha Lilurudun Moisesi lau aban isuuni súdiniti. Ariñagati Pábulu houn galasiana: “Ñǘbuinti lúrudu ligía lárigiñe lun larufuduni hamaganbadin gürigia; darí liabin ladügawagun Abüraámü, le giñe unbei lichugúa füramasei ligía” (Gal. 3:19). Furanguti lariñaguni, Lilurudun Moisesi siñabei lan gaganbadi hamá charatiña ani gafigountiña hagía lun Lúrudu ligía san luagu san. Ani mégeibaña lan meha aba sákürifisiu le úaraguati luma le úati mégeiti luagu. Ábati líderaguniña Lilurudun Moisesi lubúeingu Bungiu lun híchugun fe Hesusu lan “adügawagünibei”. Anhein larufuda somu gürigia afiñeni luagu Hesukrístu, gayaraabei lariñagun Bungiu luagu richagua lan (Gal. 3:24). Richati meha Pábulu ladüga luéigiñe Lilurudun Moisesi lánhara lun Hesukrístu ani afiñe ligía luagu. Ítara liña meha “hilaali lan lun lúrudu” lun gayara lan “labagaridun lun Bungiu”. Mabafu hali meha Lilurudun Moisesi, gama lumoun gabafubei meha lilurudun Bungiu luagu.

Ariñagati Pábulu aban katei ítara tidan ligaradan houn Rómana: “Niduheñu, lau lounwen Kristu, furihadün lábugiñegiñe lagumadihan Lilurudun Moisesi [...]. Ánheinti guentó, hilaadiwa lun lúrudu le meha gámabaliwa lábugiñe lubafu” (Rom. 7:4, 6). Dandu bérusu burí le luma le lariñagubei Galasiana 2:19, afuranguagüda lumuti mama lan layanuhaña Pábulu luagu lounwen aban gürigia kei afigouhati o luéigiñe lasiadiruni Lilurudun Moisesi. Lubaragiñe lira lariñaguña mama lan mosu, lagunfulirun lau Lilurudun Moisesi. Mabafuhali meha Lilurudun Moisesi luagu, ni hawagu amu kristiánugu ha ítarabaña kei ligía ani guentó séfuhaña seremei hafiñerun luagu esefuruni le ladügübei Hesukrístu.