Ngö ṙô tī Pôl nö kūich: “Pò chu lökten im chööngö kapah im chööngö, pò chu hòṅ aṅ im Tēv.”—Kal. 2:19.

Ṙô Pôl nun në nö kūichtö chitri yik Kristīön aṅ Kalatī, ik sā ò nö mikahtö elnang cha tö inlahen më Kristīön nö öt köpsöṙen nö elkatòh chööngö Môsös. Pön ōt yik Kristīön ṙamātö ellōnre in nuk tövaich inköphöti, yēḵ cha nyin nö hòṅ hayöökaṙen ngaich hòṅ tunyīnyi cha-a tö ṙô ngam chööngö. Lökten Pôl nö halēnö cha pön akahakūö töm inköphöti angu-ö nö vaich. Hangönlö ngam ṙinātö ellōn cha inrē nö in Yēsū Kristu.—Kal. 2:4; 5:2.

Vënyu nang in töm Paipöl tö inlahen ngòh tökapah tarik nö öt hēngö mikahlōn öt ōt inrē nup tölökngöre tī tö ò. (Mum. 9:5) Ik sā Pôl nö ngö ṙô “Kapah [chin] im chööngö,” ngaich tö ngö manah angu-ö tö ò nöt köpsören nö elkatòh ngam chööngö. Yēḵ ò pöri nö ṙātö ellōnre nö im tökitaknyu mahām Yēsū ngaich ‘aṅ anga-aṅ nö im Tēv.’

Sitih inlahen ang Pôl nö aṅ nö imat ngam Tēv kūö ò nö kapah nö im chööngö? Ngö ṙô anga-aṅ, “öt lööklö [tarik] tö kūö tī ngam chööngö, höng lökten im mikah in Yēsū Kristū” pöri. (Kal. 2:16) Kô-en ngam chööngö nö laklen hī irò-òl talöökö hī sölta im ṙamānyen hī. Ngö ṙô tī Pôl nö kūichtö chitri yik aṅ Kalatī: “Kētu an kūö tökööl, hanöng saha ngam lamökngörit nö yih, ngam lööṙö ngam kinlēḵngô.” (Kal. 3:19) Haköpkö lōn hī ngam chööngö tö hī öi töthet öi tarik lökten öi öt teungten kēkö kaha ngam chööngö. Lökten inrē öp ṙamānyen hī nö ötkô nö aṅhavin tö tökööl. Yēḵ hī ṙātö ellōnre in Yēsū Kristū möl ayī-ö lööklö imat ngam Tēv. (Kal. 3:24) Halööklöngö ang Pôl kūö ò nö ṙātö ellōnre nö in Yēsū. Ngatī inlahen anga-ṅ nö ‘kapah nö im chööngö, aṅ pöri nö ikūö ngam Tēv.’ Öt köpsören anga-aṅ nö elkatòh ngam chööngö, elkatòh ngam Tēv pöri.

Ngatī ṙô tī hēk ang Pôl nö kūichtö chitri yik aṅ Rōma. “Hol chu, tö ngaich yin yī-ö inrē kapah im chööngö löktö alaha Kristū . . . Ngaich öi pöchöh ṙānyu ṙā-ang elkatòh ngam chööngö, ngaich öi kapah im chūök kinṙāpö hī misī.” (Rōm. 7:4, 6) Kòtökūö in ngaich lökten im Kalatī 2:19 tö Pôl nö rö-ö nö ṙôtö kinpaha kūö töt hināngö ngam chööngö. Ṙôtö ngam inlahen hī pöri anga-aṅ öt köpsöṙen elkatòh ngam chööngö, kūö hī ngaich ṙānyu tö Kristū ṙāi tö ngam tökitaknyu mahām.