Mpostoli Paulo a bhate tiya: “Ngu mhaka ya Mlayo, ni fite ka wona kasiku ni hanyela Txizimu.”—Vag. 2:19.

Ati Paulo a nga txi ti womba ka Vagalatiya 2:19 ti txi yelana ni ti a nga txi ti txhamusela ka mabanza ya Vagalatiya aya ma nga txi maneka Roma. Makristu mamwani ma txi kanganyiswa ngu vagondisi wa makuhu. Vagondisi vonevo va txi gondisa ku, ti to m’thu e hulukiswa a ti fanete kuveketa Mlayo wa Mosi ngutu-ngutu awu wo yiswa wukwerani. Paulo a txi ti ziva ti to Txizimu txi si sinzisi ti to vathu ve yiswa wukwerani nga ti wu nga txi wombisa tona Mlayo. Ngu mapswi o tsanisa a lambile tigondo toneto e tsanisa likholo la vanathu ka mtirulo wa Jesu Kristu.—Vag. 2:4; 5:2.

Bhiblia yi womba ti to ngako m’thu a ti fite kha zivi txilo ni txatximwetxo ka ati ti mahekako. (Ekl. 9:5) Mbimo yi Paulo a nga khene: “Ni fite ka [Mlayo]” a txi lava kuwomba ti to a si nga hahatshi ka Mlayo wa Mosi. Paulo a txi tsaniseka ti to likholo lakwe ka mtirulo li ti mu mahile e “hanyela Txizimu.”

Kutxitxa ka txiemo txa Paulo ku di ta maheka ngu “mhaka ya Mlayo.” Ti mahisa kutxani toneto? Paulo a ti ngadi kutxhamusela a txi khene “m’thu kha si koti kumana wululami ngu mhaka ya mithumo ya Mlayo, aniko a mana wululami ngu mtamo wa likholo dwe ka Jesu Kristu.” (Vag. 2:16) Ditshuri ti to Mlayo wu hetisisile timhaka ta lisima. Paulo a txhamusete Vagalatiya a txi khene: “Wu ningilwe msana ka mbimo ngu mhaka ya wuhambunyeti, kuza ku humelela lixaka li, txithembiso txi nga mahelwa lona.” (Vag. 3:19) Mlayo wu ti vekile hakubasani ti to athu kha ha hetiseka, se kha hi na kuveketa Mlayo ngu kuhetiseka ngu toneto ku txi laveka digandelo do hetiseka, i nga ti Jesu. Se Mlayo wu kongomisile vathu ka “lixaka” i ku Kristu. Ti to m’thu ava wo lulama masoni ka Txizimu a fanete kukombisa likholo ka Jesu Kristu. (Vag. 3:24) Paulo i ti wo lulama masoni ka Txizimu nguko a ti ni likholo ka Kristu ngu kona ha ka Mlayo wa Mosi. Se Paulo a “fite ka [Mlayo]” ni ku a tshumete e “hanyela Txizimu.” Ene a swi si e fumwa ngu Mlayo, kambe ngu Txizimu.

Paulo a txhamusete mhaka ayi yi fanako mbimo yi a nga txi bhalela Varoma. Ene a bhate tiya: “Vanathu, mi fite mlayoni ngu didhawa da mmidi wa Kristu . . . Konkuwa hi txhatxhilwe ka mlayo, hi maneka hi di fite ngu didhawa da ti hi nga ti sungilwe ngu tona.” (Var. 7:4, 6) Ka m’bhalo wuwa kumweko ni Vagalatiya 2:19 Paulo hi nga a txo womba-womba ngu kufa kota txigohi hahatshi ka Mlayo. Kambe ene a txo womba-womba ngu kutxhatxhiswa. Ene ni vamwani va sa sungwa ngu Mlayo. Vona va ti txhatxhilwe ngu kona ha ka likholo lawe ka digandelo da Jesu Kristu.