Paul nih hitin a ti: “Nawlbia kong ti ahcun, kei cu a thimi ka si ko cang—nawlbia nih khan a rak ka thah cang—cucu zeicahdah a si ti ahcun Pathian ca i ka nun khawh nakhnga caah a rak si.”—Gal. 2:19.

Paul chimmi bia cu Rom kuttang ah a ummi Galati Khrihfabu hna sinah a chimmi a biapimi a kong he aa pehtlaimi a si. Cheukhat Khrihfa hna cu a hmaan lomi cawnpiaknak nih an rak iap hna. Annih nih mi pakhat nih khamhnak a hmuh khawh nakhnga a hleiin cuarpar tannak ti bantuk Moses Nawlbia kha a zulh a hau tiah an cawnpiak hna. Asinain Paul nih Pathian nih zumtu pawl kha cuarpar tan dingin a hal ti hna lo ti kha a hngalh. Cucaah zumhawk a tlakmi a ruang he mah cawnpiaknak cu a palh ti kha a rak langhter i unau pawl cu Jesuh Khrih tlanhnak man cungah an zumhnak a rak fek chin.—Gal. 2:4; 5:2.

Baibal nih mi pakhat cu a thih ahcun a pawngkam ah a cangmi thil kha zeihmanh a hngal ti lo tiah fiang tein a chim. (Pct. 9:5) Cucaah Paul nih “kei cu a thimi ka si ko cang” tiah a ti tikah Moses Nawlbia cu a cungah huham a ngei kho ti lo a ti duhnak a si. Man canah Paul nih tlanhnak man a zumhnak thawngin “Pathian ca i ka nun khawh” hi a si ti kha a zumh.

“Nawlbia” nih Paul sining kha a rak thlen. Zeitin in dah? Paul nih “minung hi Pathian he an i remnak cu Jesuh Khrih an zumhnak thawng lawnglawng in a si” tiah a ti. (Gal. 2:16) Nawlbia nih a biapi tukmi thil cheukhat zong a liim. Paul nih Galati mi hna kha hitin a ti hna: “Zei hi dah palhnak a si ti langhtertu caah khan pek a si i cucu Pathian nih bia aa kammi Abraham tefa a phak hlan tiang kha rak um seh ti caah khan pek a si cu a si.” (Gal. 3:19) A si, a tlinglomi le sualnak a ngeimi minung nih a tlingmi Nawlbia cu zulh khawh peng a si i a donghnak ah a tlingmi tlanhnak man an herh ti kha Nawlbia nih a langhter. Cucaah Nawlbia nih mi kha Khrih “tefa” a siter hna. Mi pakhat cu Jesuh Khrih a zumh a langhternak thawngin Pathian he remnak a hmu kho. (Gal. 3:24) Paul zong Nawlbia thawngin Jesuh kha a cohlan i a zumh caah cutin a hung si ve. Cucaah Paul cu ‘nawlbia ah a thi’ nain ‘Pathian caah a hung nung’ ṭhan. Nawlbia cu a cungah caan saupi huham a ngei ti lo nain Pathian nih cutin a rak tuah.

Paul nih Rom mi hna sin i a cakuat ah mah thil sining kha a rak langhter. “Nannih zong nan si ve, ka naule hna. Nawlbia lei in ti ahcun nannih cu a thimi nan si cang, zeicahtiah Khrih pum chungah nan i tel cang . . . atu cu thihnak in thawhtermi pa ta kha nan si cang.” (Rom 7:4, 6) Mah Baibal caang lengah Galati 2:19 zongah Paul nih Nawlbia tangah a ummi misual pakhat in thihnak kong kha a phuanmi a si lo. Mah canah luatnak kong tu kha a chim duhmi a si. Nawlbia cu amah le amah bantuk a simi hna cungah caan saupi huham a ngei kho ti lo. Annih cu Khrih tlanhnak man an zumhnak thawngin luatnak an hmu.