Pablo tiʼ tsʼijbu: «Tiʼ caj tsaʼ c jacʼʌ jiñi mandar, joñon tsaʼ chʌmiyon tiʼ tojlel jiñi mandar chaʼan miʼ mejlel j cʼʌn j cuxtʌlel chaʼan mic melben i yeʼtel Dios» (Gá. 2:19, TNM).

Jiñi tsaʼ bʌ i tsʼijbu Pablo añʌch chuqui woli (choncol) i tsictesʌbeñob jiñi congregación tac am bʌ ti Galacia. An xñoptʼañob woli (yʌquel) bʌ i yʌcʼob i bʌ ti lotintel ti jiñi xlotob woli bʌ i pʌsob chaʼan mi yomob i tajob i coltʌntel yom miʼ laj jacʼob jiñi i mandar Moisés, ñumento chaʼan bʌ jiñi tsep pʌchʌlel. Pero Pablo yujil chaʼan Dios maʼañix miʼ cʼajtin jiñi tsep pʌchʌlel. Jamʌ tsiquil tsiʼ pʌsʌ chaʼan mach i sujmic jiñi woli bʌ i pʌstʌl i tsiʼ pʼʌtʼesʌbe i ñopoñel jiñi hermanojob tiʼ tojlel Jesús cheʼ tsiʼ yʌcʼʌ i cuxtʌlel (Gá. 2:4; 5:2).

Jiñi Biblia miʼ yʌl chaʼan cheʼ bʌ an majqui miʼ chʌmel (sajtel) maʼañix chuqui yujil yicʼot maʼañix chuqui miʼ yubin (Ec. 9:5). Cheʼ bʌ Pablo tsiʼ yʌlʌ chaʼan tsaʼ chʌmi tiʼ tojlel jiñi mandar woliʼ yʌl chaʼan jiñi i mandar Moisés maʼañix i pʼʌtʌlel tiʼ tojlel. Pero yujil chaʼan cuxul chaʼan miʼ melben i yeʼtel (troñel) Dios come tsiʼ ñopo ti jiñi i tojol laj coltʌntel.

Pablo tsiʼ taja iliyi tiʼ caj tsiʼ jacʼʌ jiñi mandar. ¿Bajcheʼ? Pablo tsaʼix i tsictesa chaʼan «cheʼ miʼ ñopob Cristo miʼ ñusʌbentelob i mul. Dios miʼ yotsañob tiʼ wenta chaʼan tsiʼ ñopoyob, mach chaʼanic i jacʼol mandar» (Gá. 2:16). Weno, jiñi mandar tsaʼʌch cʼʌjñibʌyi. Pablo tiʼ sube jiñi añoʼ bʌ ti Galacia: «Dios tsiʼ yʌqʼueyonla jini mandar chaʼan miʼ tsictesʌbeñonla lac mul. Pero maʼanix i cʼʌjñibal jini mandar cheʼ tilemix i Pʼolbal cheʼ bajcheʼ wʌn albil» (Gá. 3:19). Jiñi Mandar tsiʼ pʌsʌ chaʼan jiñi lac piʼʌlob maʼañic miʼ mejlel i jacʼob ti tsʼʌcʌl, i chaʼan yom jumpʼejl majtañʌl toj bʌ. Jin chaʼan, jiñi mandar tsiʼ colta i cʌn jiñi tejclum chaʼan Jesús jiñʌch jiñi pʼolbalʌl. Mi an muʼ bʌ i yʌcʼ i ñopoñel ti Jesucristo, Dios miʼ mejlel i qʼuel ti toj (Gá. 3:24). Pablo tsaʼ qʼuejli ti toj come tiʼ coltaya jiñi Mandar tsiʼ ñopo Jesús. Cheʼ bajcheʼ jiñi, tsaʼ chʌmi tiʼ tojlel jiñi Mandar i tsiʼ yʌcʼʌ i cuxtʌlel chaʼan miʼ melben i yeʼtel Dios. Jiñi Mandar maʼañix i pʼʌtʌlel tiʼ tojlel, pero Dios añʌch.

Pablo an chuqui lʌcʼʌ lajal bʌ tsiʼ yʌlʌ ti Romanos: «Quermanojob, jilemix i pʼʌtʌlel jini mandar ti laʼ tojlel come tsaʼ chʌmiyetla yicʼot Cristo chaʼan mi laʼ loqʼuel tiʼ wenta jini mandar [...]. Wʌle tsaʼix loqʼuiyonla tiʼ wenta jini mandar. Tsaʼix chʌmiyonla quicʼot Cristo. Librejonixla chaʼan maʼanix mi lac jacʼben jini tsaʼ bʌ i cʌchʌyonla» (Ro. 7:4, 6). Ti ili versículo tac yicʼot ti Gálatas 2:19, Pablo maʼañic woliʼ taj ti tʼan chaʼan miʼ chʌmel bajcheʼ juntiquil xmulil tiʼ caj jiñi Mandar, woliʼ yʌl chaʼan jiñi Mandar maʼañix i pʼʌtʌlel. Maʼañix i pʼʌtʌlel tiʼ tojlel Pablo yicʼot tiʼ tojlel yambʌ xñoptʼañob librejix bʌ añob come tsiʼ yʌcʼʌyob i ñopoñel chaʼan Cristo tsiʼ yʌcʼʌ i cuxtʌlel.