Pɔdhö ˗ya ˗pö: «˗Zlan ˗bha ˈtɔng˗ ˗zë ˈma ga ˈnu˗ ˗gɔ, ˈˈkɛɛ ˈsa ˈtɔng˗ bha yöö ꞊dede ꞊në˗ ˗kë ˈˈdhʋ̈ ˈyö ˈa ga bha˗ wo, kë ˈˈdhʋ̈ kö ˈa ˗tosɛa kë ˗Zlan ˗bha kë ˈgü.»​—Ga. 2:19.

ˈWɔn ˈö Pɔdhö ˗ya ꞊blɛɛ bhë ˗yö ˗gban ˈwɔn gaga ˈbha ˈö kun ˗a ˈgü ˈˈpʋ ˗ni ˈgü ˗zlanwokɔdhi ˗nu ˗dhɛ, ˗a ˗bha. ˗Zlanwokɔdhi ˗nu bhë ˗wo ˗kun Wlɔmö ˗bha ˈˈkwipö do ˈwo˗ ˗dhɛ Gadhatö bhë, ˗a ˈgü. ˗A ˈˈtʋ̈ŋ bhë˗ ˈka kö kletiɛn ˈbha ˗nu ˗wo wo ˈˈtʋ ˈto ˗ni ˈgü mɛn ꞊klaŋ ˗kë ꞊sua ˈka mɛn ˗nu ˗bha. Mɛn ꞊klaŋkëmɛn ˗nu ˈwo bhë, ˗wo ˗kun ˗a pö ˗ni ˈgü ꞊dhɛ mɛn ˈö˗ ˈˈpiʋ̈ kö ˗yö dha, ˗a dua ˗mü kö pë ˈö ˗Zlan ˗bha ˈtɔŋ˗ ˈsëëdhɛ ˈö Moizö ˗ya ˗bɛn zë ˈö˗ pö ˈö˗ do ˗gban ˗dho ˈgbannën ˈgü ˗sü ˗bha bhë, ˗a ˈkun. ˈˈKɛɛ ˗a ˗wɔn ˗kun Pɔdhö ˈˈɲaan ꞊dhɛ ˗Zlan ˈyaa˗ pö ˈzü ꞊dhɛ ˗a ˗dhɔkëmɛn ˗nu ˗wo ˈdho ˈgbannën ˈgü. ˗A ˗wɔn ˈgü ˗yö ˈwɔn ˗yökodhiʋ̈ ˗së ˈka kö ˗ya ˗zɔn mɛn ꞊klaŋkëmɛn ˗nu ˈwo bhë ˗an ˗dhɛ ꞊dhɛ pë ˈwo˗ pö bhë ˈyaa ˈˈdhʋ̈ ˈzü, ˈgo mü ˈzü kö ˗yö ö ꞊dhegblü ꞊faan dɔ kö ˗wo ˈdhaŋ bho Yesu Klito ˗bha ˗gɔtadhɔ ˈˈsaa˗ ˈˈdhiʋ̈.​—Ga. 2:4; 5:2.

Biblö ˗ya ˗pö ˈˈpuu ˈka ꞊dhɛ mɛn ˈbha ꞊ya ga kö ˈyaa pë ˈˈwɛɛ ˈbha ˈwɔn dɔ ˈzü, ɛɛnˈˈ kö pë ˈˈpɛpɛ ˈwo˗ ˗züzü ˈwaa ˈˈyɛ˗ ˗bha ˈzü. (Eccl. 9:5) ˗Dhɛ ˈö ˈˈdhʋ̈, Pɔdhö ꞊yaa˗ pö «˗Zlan ˗bha ˈtɔng˗ ˗zë ˈma ga ˈnu˗ ˗gɔ,» kö pë ˈö˗ ˈˈpiʋ̈ ˈö˗ pö ˈyö ˗tɔ ˗Zlan ˗bha ˈtɔŋ˗ ˈsëëdhɛ ˈö Moizö ˗ya ˗bɛn zë bhë ˗a ꞊faan ˈbha ˈyaa˗ ˗ta ɛɛnˈˈ ˈyaa ˈˈyɛ˗ ˗bha ˈzü. ˗A ˗wɔn ˗kun ˗a ˈˈɲaan ꞊dhɛ ö ˗bha ˈdhaŋ˗ ˗bho Klito ˗bha ˗gɔtadhɔ ˈˈsaa˗ ˈˈdhiʋ̈ ˗sü ˗dho ˗a kë ˈö «˗tosɛa kë ˗Zlan ˗bha kë ˈgü.»

«˗Zlan ˗bha ˈtɔng˗» ˗yö Pɔdhö ˗bha ˗tosɛta ˗slëë ˗a ˈgü. ˗Kɔ ˗kë ꞊dhɛ? Pɔdhö ˗yö ˗go ˗a pö ˗dhɛ ˈgü ꞊dhɛ «za ˗yö ˗dhi mɛ ˗gɔ ˗Zlan ˗kuu ˈˈdhiʋ̈ ˈdhang ˗bho Yesu Klisi ˈˈdhiʋ̈ ˗sü doseng ꞊në˗ ˈgü, ˈy[ii] dɔ ˗a ˗bha ˈtɔng˗ ˗kun ˗së ˗sü ˗bha.» (Ga. 2:16) ˈKö ˗kë ˈˈdhʋ̈ ˗Zlan ˗bha ˈtɔŋ˗ ˗yö yö ˗së ˈbha kë ˗sü ˈka. ˗A yö ˈö ˈˈdhʋ̈ Pɔdhö ˗ya ˗wɔn ˗blɛɛ Gadhatö ˗mɛn ˗nu ˗dhɛ. ˗Ya ˗pö: «ˈTɔng˗ dɔ ˈö˗ wo bha ˗ya ˗wo ˈˈdhʋ̈ kö [...] ˈwɔn ˈdhɛ ˈö ˈyaa˗ ˗dhidhɛwɔn ˈka bha mɛ ˈˈbhɩɩ˗ ˗nu ˗wa dɔ ꞊në˗ wo, kö ˗yö ˈto˗ ˈka ˈˈdhʋ̈ ˗yö zun˗ ˈka Klisi ˈö Ablaamö suu ˈka ˈö ˗Zlan ˗ya ˗dhiang zë bha˗ nu ˗sü ˗bha.» (Ga. 3:19) ꞊Ii, ˗Zlan ˗bha ˈtɔŋ˗ ˗ya ˗zɔn ˈˈpuu ˈka ꞊dhɛ mɛnbhɩɩdhe ˗nu ˈö ˈwɔn yaa ˗dhii ˈdhö ˗an ˗bha bhë ˈwaa ꞊mɔɔn˗ ˗bha kö ˗wo ˗Zlan ˗bha ˈtɔŋ˗ ˗nu ˈkun ˈkpakpadhö. ˗A ˗wɔn ˈgü, ˗an ˗bhawɔn ˗yö ˈˈsaa˗ ˗së ˗bha. ˗Zlan ˗bha ˈtɔŋ˗ ˗yö mɛn ˗nu ˗takun kö ˗wa ˈwɔn dɔ ꞊dhɛ Klito ˈnën ˗tɔ «Ablaamö suu.» Mɛn ˈö ˗dho ˈdhaŋ bho Yesu Klito ˈˈdhiʋ̈, ˗yö ˗dho ꞊mɔɔn˗ ˗bha ˈö ˗kë ˈˈslʋ̈ʋ̈slʋ̈ ˗Zlan wëëdhö. (Ga. 3:24) Pɔdhö ˗ya ˗pö ˈˈdhʋ̈ ˈyö ˗tɔ ꞊dhɛ ˗Zlan ˗bha ˈtɔŋ˗ ˈnën˗ ˗takun ˈö ˗we Yesu ˗wɔn ˗bha, ˈö ˈdhaŋ bho ˗a ˈˈdhiʋ̈. ˗Dhɛ ˈö ˈˈdhʋ̈ Pɔdhö ˗yö «˗ga» ˗Zlan ˗bha ˈtɔŋ˗ ˗gɔ, ˈˈkɛɛ Klito ˈˈsaa˗ ˈgü ˈö «˗tosɛa kë ˗Zlan ˗bha kë ˈgü.» ˗A ˗kë ˈˈdhʋ̈ ˗sü bhë˗ ˈgü ˗Zlan ˗bha ˈsëëdhɛ ˈö Moizö ˗ya ˗bɛn zë bhë, ˗a ꞊faan ˈbha ˈyaa˗ ˗ta ˈzü, ˈˈkɛɛ ˗Zlan ˗zë ꞊ii.

ˈWɔn ˈö Pɔdhö ˗ya ꞊blɛɛ Gadhatö ˗mɛn ˗nu ˗dhɛ bhë, ˗ya suu ˗blɛɛ ˈpö ˈsëëdhɛ ˈö˗ bɔ Wlɔmömɛn ˗nu ˗dhɛ, ˗a ˈgü. ˗Ya ˗pö ˗an ˗dhɛ: «N dheebhang ˗nu, [...] ˈka ga ˈtɔng˗ bha˗ ˗gɔ ꞊naa bha, ˈyii ˈdho ka ˈkun ˈzü, ˗a ˈklɔɔ˗ ˗mü ꞊dhɛ ga ˈö Klisi ˗ya wo bha ˗ya ˗wo kaa˗ wo ˈgü [...] ˈKwa ˈgo ˈtɔng˗ ˗gɔ ꞊dhuëngdhɛ ˈgü, ˗a ˈklɔɔ˗ ˗mü ꞊dhɛ pë ˈö gun kwa ˈkun ˗sü ˈka ˈyö kwa gun˗ ˗gɔ ˗kaso ˈgü bha ˈkwa ga˗ ˗pë ˗gɔ.» (Wlɔ. 7:4, 6) Biblö ˈˈɲan ˈö bhë waa Gadhatö 2:19 ˗wa ˗zɔn ꞊dhɛ Pɔdhö ˈyaa kun ˈˈwɩ ˗ni ˈgü ga ˈö mɛn ˗nu ˈwo˗ wo ˈyö ˗tɔ ꞊dhɛ ˗Zlan ˗bha ˈtɔŋ˗ ˗ya ˗an zë za ˈka bhë, ˗a ˈka. ˗Abin, ˗yö ˗kun ˈˈwɩ ˗ni ˈgü ˗go ˈtɔŋ˗ bhë ˗a ˗gɔ ˈˈgan ˈgü ˗sü ꞊nën˗ ˈka. ˗A ˗dhɛ ˈyaa kun˗ ˗bha ˈzü kö waa ö ꞊dhegblü ˗nu ˗wo ˈtɔŋ˗ bhë ˗a ˈkun. ˗An ˗bha ˗zoyö Klito ˗bha ˗gɔtadhɔ ˈˈsaa˗ ˗dhɛ ˗sü ˗ya ˗an ˗gba ˗yadeflëëgüsü ˈka.