Öni Paulo: “Hnene la wathebo, ka meci hë ni thenge la wathebo, qa ngöne lai, mele hë ni göi Akötresie.”—Gal. 2:19.

Tro sa pane ce wang la hna cinyihane hnei Paulo kowe la itre ekalesia ne Galatia (Roma). Ame la itre xaa Keresiano, hna ajojezi angatr hnene la itre atre hamë ini ka thoi. Hna ini angatr ka hape, maine tro la itre Keresiano a trongëne la Wathebo i Mose göi xötrehatren, tro ha amele angatr. Ngo atre hi Paulo laka, tha Akötresieti hmaca kö a musinëne la itre hlue i Nyidrë göne lai. Celë hi matre, hnei angeic hna qaja amamane ka hape, itre trengathoi lai. Hnei angeic hna acatrene la lapaune la itre trejin kowe la thupene mele i Iesu Keriso.—Gal. 2:4; 5:2.

Öni Tusi Hmitrötr ka hape, thatre hmaca kö la itre ka mec la itre ewekë hna kuca xötreithi angatr, nge pëkö thangane koi angatr. (Ate cai. 9:5) Celë hi matre, öni Paulo: “Meci hë ni thenge la wathebo.” Kolo lai a hape, pëhë thangane la wathebo koi angeic. Xecie hnyawa koi Paulo laka, “mele hë [angeic] göi Akötresie” ke, hnene la lapaune i angeic kowe la thupene mele i Iesu.

“Hnene la wathebo” matre hnei Paulo hna saze. Tune kaa? Öni angeic: “Kola jelemekötine la atr hnene hmekuje hi la lapaune koi Iesu Keriso.” (Gal. 2:16) Nyipici, ka nyipiewekë ekö la Wathebo. Öni Paulo koi angetre Galatia: “Kolo matre mama jë la itre ngazo uti hë traqa pi lo matran kowe la itre hna thingehnaeane kow.” (Gal. 3:19) Kolo fe a amamane hnene la Wathebo laka, thatreine kö la itre atr troa trongëne hnyawa la itre hna qaja. Nyipiewekë troa tro fë la huuje ka pexej thatraqane la nöjei ngazo asë. Celë hi matre, hnene la Wathebo “hna eatrongë së koi Keriso.” Ijije hi troa jelemeköti së hnei Akötresie, e hne së hna lapaune koi Iesu. (Gal. 3:24) Eje hi, hna jelemeköti Paulo ke, jëne la Wathebo hnei angeic hna kepe Iesu me lapaune koi nyidrë. E cili, hnei Paulo hna ‘meci thenge la wathebo’ me ‘mele göi Akötresie.’ Pëhë mene la Wathebo koi angeic, ngo Akötresieti pe.

Öni Paulo ngöne la tusi angeic koi angetre Roma: “Itre trejin, hna hane fe othi nyipunieti ekö hnene la Trenge Wathebo, ngo jëne la huuje i Keriso, . . . ase hë thepe së qa ngöne la Wathebo, ke tha eje hmaca kö a hnöthi së.” (Rom. 7:4, 6) Ame ngöne la xötr celë me ngöne Galatia 2:19, tha Paulo kö a qaja ka hape, hnei nyidrëti me itre trejin me nyidrë hna meci tune la itre ka ena la Wathebo. Kolo pe a qaja ka hape, hna amele angatr. Eje hi, tha kolo hmaca kö a hnöthe la mele i Paulo me itre xaa Keresiano hnene la Wathebo. Ngo hnene laka, hnei angatr hna lapaune kowe la thupene mel, matre ase hë thepe angatr.