Paulo a tili ná: “Ebanja o njo̱m a mbenda nde na wedino̱, na domno̱ dinde na mbenda, ná na be̱ longe̱ ońola Loba.”—Gal. 2:19.

Nje Paulo a tilino̱ e ta mulatako na to̱ti diwo̱ la mweńa a tano̱ a mátele̱ye̱ myemba ma Galatia, mi ta o mundi ma Roma. Balēdi ba lobango ba ta ba nibe̱ne̱ ngińa omo̱ń a kriste̱n iwo̱. Ba balēdi ba ta bokwe̱le̱ ná moto a mapula te̱ sungabe̱, angame̱n bupe̱ Mbend’a Mose, tobotobo mbenda ni mombweye̱ jendabe̱. Nde Paulo a ta a bia ná Loba a si ta pe̱ engane̱ baboledi bao ná bendabe̱. A bolane̱ beteledi ba ngińa o te̱nge̱ne̱ be belēdi ba mpoṅ, ongwane̱ pe̱ bonasango o be̱ne̱ye̱ jabea la diko̱ti la Yesu Kristo dube̱ di bam.—Gal. 2:4; 5:2.

Bibe̱l e makwala ná bwē ná moto a wedi te̱, a si bi pe̱ to̱ lambo. (Mul. 9:5) Ponda Paulo a kwalino̱ ná: “O njo̱m a mbenda nde na wedino̱,” a ta nde a pula kwala ná Mbend’a Mose e si ta pe̱ e be̱ne̱ ngińa to̱ po̱ omo̱ń ao. O diwengisan, Paulo a ta mbaki ná dube̱ a lee̱le̱no̱ diko̱ti, di boli ná a “be̱ longe̱ ońola Loba.”

Mbenda nde e boli ná bete̱medi ba Paulo be tukwe. Ne̱ni nika e? Paulo a ta nde a wa teleye̱ ná “moto a si mate̱se̱be̱ na sim ońola bebolo ba mbenda, buka te̱ ońola dube̱ lao la Kristo Yesu.” (Gal. 2:16) Ye mbale̱ ná Mbenda e boli ebolo ende̱ne̱. Paulo a tele̱ye̱ bato ba Galatia ná Mbenda “e timbi nde batabe̱ o njo̱m a bebula natē̱ muladi mu kusi dikaki mu po̱.” (Gal. 3:19) E, Mbenda e lee̱ ná bato ba benama bena ba titi ke̱nge̱nge̱ na bena ba sango bobe, ba si wusa bupe̱ mo̱ ná te̱ite̱i, na ná o sukan ba me̱nde̱ be̱ne̱ ńo̱ng’a jabea le ke̱nge̱nge̱. Mbenda e die̱le̱ so̱ nde bato omboa “muladi mu kusi dikaki,” nika ńe nde Kristo. Moto a dube̱ so̱ te̱ Yesu Kristo, Loba a wusa langa mo̱ ka nute̱m ná sim. (Gal. 3:24) Paulo a ta so̱ a langabe̱ ka nute̱m ná sim ońolana tongwea na Mbenda emedi Yesu, a lee̱le̱ pe̱ mo̱ dube̱. Na ni mbadi so̱ nde Paulo a wedino̱ “o njo̱m a mbenda ” na mo̱ a timba “longe̱ ońola Loba.” Mbenda e si ta pe̱ so̱ e be̱ne̱ ngińa omo̱ń ao, nde Loba mo̱ e.

Paulo a kwaledi mulemlem ma lambo o leta lao a tiledino̱ bato ba Roma ná: “A bonate, lo wedi, lo dom dinde na mbenda tongwea na ńol’a Kristo . . . Di wunjabe̱ o mbenda, kana di wedino̱, di domno̱ dinde na nje e ta e kaka biso̱.” (Rom. 7:4, 6) Yen epas’a Bibe̱l na ya Galatia 2:19 be malee̱ ná Paulo a si ta a kwalea kwed’a mubole̱ bobe nu kusi mbako a kwedi owas’a Mbenda. Nde a ta nde a kwalea ońola te̱se̱be̱ lao la wonja. Mbenda e si ta pe̱ e be̱ne̱ ngińa to̱ po̱ omo̱ń ao na omo̱ń a bape̱pe̱. Dube̱ ba lee̱le̱no̱ jabea la diko̱ti la Kristo di te̱se̱ babo̱ wonja.