E korea aei Bauro: “I mate ni kaineti ma te tua rinanon te tua, bwa I aonga ni maiu ni kaineti ma te Atua.”​—IKar. 2:19.

E irekereke te baere e koreia Bauro ma te reirei ae kakawaki are e katuruturua nakoia ekaretia ake a mena n aonon Rom ae Karatia. A iraraang tabeman Kristian ikanne irouia taan angareirei ni kewe. A angareirei nakanne bwa e kona n reke te kamaiuaki man te ongeaba n te Tua Rinanoni Mote, moarara riki te korotobibi. Ma e ataia Bauro ae e a aki tangiriia taan onimaki te Atua bwa a na korotobibiaki. E reireinia Bauro n te aro ae mataata ao ni kaotia raoi bwa a kewe reirei akanne, ao e kakorakoraa irouia taari onimakinan ana karea ni kaboomwi Iesu Kristo.​—IKar. 2:4; 5:2.

E kamatataaki n te Baibara bwa ngkana e mate te aomata, e bon aki ataa te bwai teuana ae riki i rarikina ke n rotaki iai. (TeMin. 9:5) Ngke e kangai Bauro: “I mate ni kaineti ma te tua rinanon te tua,” e nanonna iai bwa e a aki tauaki arona n te Tua Rinanoni Mote. Ma e kakoauaa Bauro bwa rinanon onimakinan te karea ni kaboomwi, e a “maiu ni kaineti ma te Atua.”

Te bitaki nakoni Bauro anne e bon riki “rinanon te tua.” N te aro raa? E a bon tibwa tia ni kabwarabwaraa ae “e aki atongaki te aomata bwa e raoiroi ni karaoan are taekinaki n te tua, ma tii rinanon onimakinan Iesu Kristo.” (IKar. 2:16) Ni koauana, e a tia te Tua ni kakororaoa te bwai ae kakawaki. E kabwarabwaraa ni kangai Bauro nakoia I-Karatia: “E ikotaki ibukini kaotan taiani bure, ni karokoa rokon te kanoa are e taekinaki te berita nakoina.” (IKar. 3:19) Eng, e kaotaki raoi n te Tua bwa a aki kona aomata aika aki kororaoi ao a bubure n ongeaba n te Tua n te aro ae kororaoi, ao a kainnanoa te karea ae te kabanea ae kororaoi. Ngaia are e kairiia aomata te Tua nakon “te kanoa” ae te Kristo. Rinanon onimakinan Iesu Kristo, e a kona te aomata n atongaki bwa e raoiroi iroun te Atua. (IKar. 3:24) E atongaki Bauro bwa e raoiroi ibukina bwa rinanon te Tua e a butimwaea Iesu ao n onimakinna. Ngaia are e “mate ni kaineti ma te tua” Bauro ao e “maiu ni kaineti ma te Atua.” E a aki tauaki arona n te Tua, ma ai iroun te Atua.

E taekina naba te iango ae aron anne Bauro n ana reta nakoia kaain Rom. “Ao ai aromi naba taari bwa kam a mate ni kaineti ma te Tua rinanon rabwatan te Kristo . . . Ti a tia ni kainaomataaki ngkai man te Tua, kioina ngkai ti a tia ni mate ni kaineti ma te Tua are tutukira ngkoa.” (IRom 7:​4, 6) E oti n te kibu aei ao n I-Karatia 2:​19, bwa Bauro e aki taekina taekan te mate ae katuuaaean te tia bure i aan te Tua. Ma e bon taekina te kainaomataaki. E a aki manga tauaki arona n te Tua ma Kristian ake tabeman ake ai arona. A a kainaomataaki rinanon onimakinan ana kaboomwi Kristo.