Pọ́ọ̀l beè emí kọ́ọ̀: “Nda nè Log tõoà belí íí nen e bè á géná kè bá Log, vaá é Log ní e a beè fẹ́m̄ é. M̀ dú íí kilma kĩ e Log dì, kọ bé m̀ láá tõo dùm nè Bàrì.”—Gàl. 2:19.

Bel e Pọ́ọ̀l ló kĩí géè loá bel nyòòmà bõ̀ònatõ̀ò ea beè di Gàlésìà, ea di deè bálá sĩ́ Róm̀. Sìgà gbò níí Kráìst e bà di kĩá beè dààmà togó gè ziga ló kyáá nòòmànù. Gbòa géè noòmà kọọ̀ nen é íè ge zẹ́ẹ́ ziga ló gbò log e Bàrì beè nè tenmá bá Mózìsa, èlmà tõ̀ò ge kọọ̀ nen é íè ge zẹ́ẹ́ kòòà besĩ́ á kálá dùùà. Sõò Pọ́ọ̀l beè nyimá kọọ̀ Bàrì náa ẹbna dẽe sĩ́ kọọ̀ gbò níí Kráìst é íe ge zẹ́ẹ́ kòòà besĩ́ bà kálá dùùà. A beè zọ̀ va loá bel boo belí mm̀ sĩ́deè ea náa kọ bàá nyimá kọọ̀ gbò nòòmà núá náa lelà, nè ge naa kọọ̀ bàá íe agẹ zìgà mm̀ ú vààa gyọ́ọ̀ Jíízọ̀s Kráìst.—Gàl. 2:4; 5:2.

Kpá Káí tẹ́lẹ bàlà kẽ kọọ̀ nen ea ú, náa nyímá ná tọ́ọ̀ nú ea gé nááá. (Ẹ̀klì. 9:5) Tṍó e Pọ́ọ̀l kọ́ọ̀: “M̀ dú íí kilma kĩ e Log dì,” à géè kọọ̀ Log Mózìs náa íè nàèe tọ́ọ̀ kà lẹ̀ẹ̀là bel ló. Pọ́ọ̀l beè àgala boo kọọ̀ tení dú ló gè ié zìgà mm̀ ú vààa gyọ́ọ̀ Jíízọ̀s, nen é “láá tõo dùm nè Bàrì.”

Lógá ní ea beè naa kọọ̀ dìtõ̀ò Pọ́ọ̀l á nyaaá ẽ́. Mósĩ́ deè e? A beè baatẽ́ kọọ̀, “è nyímà kọ níì bé e nen láá sẹlẹ Log naa ní e a é náa vaá Bàrì léevèe bel é nì. Tãa vó, áá gè kọ nen dẹlẹ nyíe boo Jíìzọ̀s Kráìst ní e a é náa kọ Bàrì á leevèe bel é.” (Gàl. 2:16) Mm̀ kà kà, Logá a náa nú ea palàge dì bíi. Pọ́ọ̀l beè baatẽ́ nè gbò e bà di Gàlésìà kọọ̀: “Bàrì beè nè Log, boo tṍó e a ni zigà nu lọ̀l, kọ bé tṍó e gbò nen é sí pọ́lọ́ bà nyímá kọ bà a gbáàlàè Log Bàrì. Vaá a è kọ Logí é dí kẽ dọ̀mà tṍó e nvín e ba è zìgà nu nè, e a é mea kúúlí Ébràhàmi, é dú.” (Gàl. 3:19) Logá beè tẹlẹ bàlà kẽ kọọ̀ gbò nen e bà náa gbõoma náa é láá sẹlẹ logá mm̀ sĩ́deè ea gbõoma, boo béè vó, bà íe bíi ló vààa gyọ́ọ ea gbõoma. Logá géè nvèè bá naa kọọ̀ gbò nen á nyimá kọọ̀ Jíízọ̀s ní ea dú “nvín” e ba beè zìgà nu nè kọ àé meà aa kúúlí Ébràhàm ẽ. Bàrì é láá tenmà kọọ̀ nen dú lé lab dògò be à íe zìgà mm̀ Jíízọ̀s Kráìst. (Gàl. 3:24) Pọ́ọ̀l beè àgala boo naa vó, boo béè kọọ̀ tení dú ló Logá ní e ẹlẹ beè ié zìgà mm̀ Jíízọ̀s e. Vóà naa, Pọ́ọ̀l beè “dú íí kilma kĩ e Log dì” vaá “tõo dùm nè Bàrì.” Lógá náa beè iénáe kói ló, sõò áá Bàrì ní ea beè iée kói ló é.

Pọ́ọ̀l beè lo nágé tẽ̀ènè kà belá tṍó ea géè emí kpá má pá vígà e bà di Róm̀. A beè kọọ̀: “Níí bé e a dì naa ló boolo, e pá nà vígà m Kráìst e . . . É géná kẽ lẹ̀ẹ̀là Log, boo bée kọ e beè ú kilma kĩ e Log e a beè bọvii ene tṍóá dì.” (Róm̀ 7:4, 6) Dọ̀ Kpá Káíá nè nú ea di mm̀ kpá Gàlésìà 2:19, tẹ́lẹ bàlà kẽ kọọ̀ Pọ́ọ̀l náa géè ló bel kilma ló ge kọ à úè dì belí nen ea dọ Logá. Tãa vó, à géè ló bel kilma ló gè dì pọ́ì aa bá Logá. Logá náa beè ié ná kói ló ẹlẹ nè gbò e bà bélí ẹlẹ. Ba beè di pọ́ì tení dú ló gè ié zìgà mm̀ ú vààa gyọ́ọ̀ Kráìst.