Anuu nünüiki Pablo: «Müshi aka ouktakai taya suulia [tü nuluwataakat anain Moisés] saaʼu nnojolüin kasain saamüin tamüin süpüla anajirawaa nümaa Maleiwa» (Gal. 2:19).

Tia nümakat Pablo shia süpüshi wanee pütchi nikirajakalü anain na nuwalayuukana chejeʼewaliikana Galacia. Noʼutku naya anoujashiikana nanouja anainrü nanüiki waneinnua anoujayaashiikana ekirajaka sünain alawaa. Naashin nayakana süpüla nuʼttaainjachin wanee wayuu choʼujaasü noonooinjatüin sümaa tü Pütchi Aapünakat nümüin Moisés, maʼaka saaʼin naʼyoteʼerüinjatüin nata. Nütüjaapejeʼe aaʼu Pablo nnojoluin choʼujaain naaʼinrüin tia wanee anoujashi süpüla nuʼttaainjachin. Sünainjee tü nümakat Pablo, nükatchinrüin nanoula na nuwalayuukana nünain Jesuu jee nayaawatüin saaʼu alawaain tü namakat na anoujayaashiikana (Gal. 2:3, 4; 5:2).

Saashin tü Bibliakat outule wanee wayuu nnojorüleesia kasain nütüjaain aaʼu (Ecl. 9:5). Nütüjaa aaʼu Pablo nnojolin anajiraain nia nümaa Maleiwa sutuma tü Pütchi Aapünakat nümüin Moisés, müshijeseʼe nümüin: «Müshi aka ouktakai taya suulia». Tü nüküjeekalü achiki Pablo shia nnojoluin choʼujaain noonooin sümaa tia pütchikat. Müshi katakai noʼu nüchikuaʼa Pablo sünainjee nunoujain sünain naapajiraain nikii Jesuu naaʼu.

Anuu tü nümakat Pablo: «Wayaawatüitpa aaʼu jooluʼu sünain anajiraain wayuu nümaa Maleiwa, nnojotsü sünainjeejatüin aaʼinraa tü nuluwataakat anain Moisés, aluʼujasa sünainjee anoujaa nünain Jesucristo» (Gal. 2:15, 16). Nüküjapejeʼe Pablo jamüin choʼujaaka tü Pütchi Aapünakat nümüin Moisés. Anuu tü nümakat: «Süpüla shiiʼiyatüinjatüin sümüin wayuu sünain shiimüin sünain aainjalaain tü kasa mojusü saaʼinrakat. Nücheküin Maleiwa süpüleerua shikettaajünüin sütüma wayuu tü nümakat Moisés sünainmüinreʼeya nüntüin Cristo chi nuuʼuliwoʼukai Abraham aküjünakai achiki paala» (Gal. 3:19). Sükajee tü Pütchi Aapünakat nümüin Moisés ayaawatünüsü saaʼu nnojoluin suuntuin wayuu soonooin sümaa süpüshuaʼa tia Pütchikat süka kaainjaraliin naya otta nnojoluin lotuin nakuwaʼipa. Müsüjeseʼe choʼujaain naapajiraainjachin nikii wanee wayuu eekai maainjalain. Atüjaana aaʼu sükajee tia Pütchikat niain Jesuu «chi nuuʼuliwoʼukai Abraham». Kanourale wanee wayuu nünain Jesukürisüto eeshi süpüla anajiraain nia nümaa Maleiwa (Gal. 3:24). Anajiraashi Pablo nümaa Maleiwa sutuma niyaawatüin saaʼu sükajee tü Pütchi Aapünakat nümüin Moisés niain Jesuu chi Mesíaskai otta niʼitaain naaʼin nünain. Müsüjeseʼe nnojoluin choʼujaain noonooin sümaa tia Pütchikat, shiapejeʼe noonooinjatüin sümaa tü nümakat Maleiwa.

Meematsü tü nüshajakat Pablo namüin na nuwalayuukana chejeʼewaliikana Roma. Anuu tü nüshajakat: «Akaajaa jiakana tawalayuwaa, müshii aka ouktakai jia suulia tü nüshajakat Moisés sükajee ouktüin Cristo saaʼu waainjala. [...] Aluʼusa jooluʼu, müshii aka ouktakai waya suulia tü nüshajalakat Moisés, süka jutatüitpain wakuaippa suulia tü suluwataakat anain» (Roma 7:4, 6). Sükajee wetsiikulokalüirua tüüirua jee suluʼu Galacia 2:19, wayaawatüin saaʼu nnojoluin nüküjeein Pablo outuinjachin nia maʼaka naaʼin wanee kaainjarai sutuma nnojoluin noonooin sümaa tü Pütchi Aapünakat nümüin Moisés. Tü nüküjeekalü achiki shia taashinjachin nia suulia tia Pütchikat sükajee kanoulain nia sünain naapajiraain nikii Jesuu saaʼu saainjala wayuu.