Pablokwe tikabare: “Ye medenbätä, kukwe biani ye köböire ti krütani kukwe biani ye kräke, ne kwe tikwe nünandre Ngöbö kräke” (Gál. 2:19, TNM).

Pablokwe kukwe tikabare yebiti tö namani kukwe ruäre ütiäte mikai gare konkrekasion roma Galacia yete ie. Nitre dirikä ngwarbe nämäne kukwe driere ye ie nitre kristiano ruäre ja töi kwitamana. Ni rabadre kwäre yekäre kukwe biani Moisés ie ye jökrä mikadre täte, metrere ja tarei kwata tikadrekä drie nämäne nitre dirikä ngwarbe yekwe. Akwa nitre Ngöbö mikaka täte käkwe ja tarei kwata tikadrekä ye Ngöbö ñaka nämäne ribere ie ye nämäne gare Pablo ie. Kukwe metre ererebiti Pablokwe kukwe driebare yebiti nitre dirikä ngwarbe nämäne kukwe ngwarbe driere bämikani kwe. Aune nitre kristiano nämäne tödeke Jesukristo ja nire biani ni ütiäre yei ye mikani bäri dite kwe (Gál. 2:4; 5:2).

Nita krüte ye ngwane ni töi ñaka niena aune dre tä nemen bare ni bäre ye ni ñaka gain, ye mikata gare metre Bibliabätä (Ecl. 9:5). “Ti krütani kukwe biani ye kräke” niebare Pablokwe ngwane, kukwe biani Moisés ie ye ñan nämäne mikakäre täte ie, ye meden gärä nämäne kwe. Akwa ni kökanintari ye ie niara nämäne tödeke yebätä nämäne nüne Ngöbökrä nämäne gare metre ie.

Pablo namani nüne kore mada “kukwe biani ye köböire”. ¿Dre gärä nämäne kwe? Käne niarakwe niebare “nita tödeke kwatibe Jesukristobti ye abko bäri kuin, amne ñan Kukwe Biani Ngöbökwe Moiséye mikabtä täte ni ngite ñakare mda Ngöböta niere nibtä” (Gál. 2:16). Erametre, kukwe biani ye köböire kukwe ütiäte namani bare. Pablokwe niebare nitre gálatas ie: “Ni jökrä ngite Ngöbö ngwärekri, ye rabadre gare metre nie, abkokäre Ngöbökwe ja kukwei biani Moiséye” (Gál. 3:19). Ye medenbätä, ni kä tibienbätä töi ngite ñan raba kukwe biani ye mike täte metre ta, ye namani gare kukwe biani yebiti. Aisete kukwe kwin aune metre nuaindre ni kökatarikäre ye ribe nämäne jai. Jesús ye abokän bükün käbämikani ye namani gare nitre ie kukwe biani ye köböire. Nireta tödeke Jesukristobiti ye Ngöbö raba kädeke kukwe metre nuainkä (Gál. 3:24). Kukwe biani ye köböire Pablokwe Jesús kani ngäbiti aune tödekabarebiti yebätä kädekani ni kukwe metre nuainkä yebätä “krütani kukwe biani ye kräke” aune ‘namani nüne Ngöbö kräke’ nie raba. Kukwe biani ye ñan namani mikadre täte ie akwa Ngöbö namani mikadre täte ie.

Pablokwe kukwe tikabare nitre Romano ie ngwane kukwe ye kwrere bäsi tikani kwe: “Ti mräkätre, mun ngämi tödeke Jesubti, känenkri mun nämane mäkäninte Kukwe Biani Ngöbökwe Moiséye yebe amne mun nämane mike täte kärekäre [...]. Akwa Jesukristo krütani angwane, mun nämane ketetibe ben abko erere mun krütani kwrere arato [...]. Akwa mtare Ngöbökwe ni tikaninte Kukwe Biani Kwe Moiséye ye kisete amne ni ñan tä kukwe ye mike täte mda” (Rom. 7:4, 6). Pablo ja mikani ngite yebätä krütani kukwe metre ye köböite ye ñan ai gärä nämäne kwe bersikulo nete aune Gálatas 2:19 yekänti ñakare aune namani kwäre kukwe biani yebätä, yebätä nämäne blite. Niara aune nitre kristiano mada ye ie kukwe biani ye ñaka namani mikadre täte. Tödekabare kwe Jesukristo ni kökanintari ie ye köböire namani kwäre.