Paulo aliyandikire ntya: “Kugerera esheriya, nafire oku biyerekere esheriya, yi ndama oku biyerekere Mungu.”​—Gal. 2:19.

Ebi Paulo ayandikaga bifarhene n’amawazo m’akamaro aliri abwira ebibaga by’aliri omu eneo ye Galatia yalirhegekerwe ne Roma. Bakristu baguma b’eyolamunda baliri bashumikwa n’abalimu b’obubeshi. Abola balume baliri bayigiriza oku, y’omuntu ayokolwa, alikwanene akenge Esheriya ya Musa, ahanene erhegeko ly’okukatwa changwa kuchibwa. Aliko Paulo alimenyere oku Mungu arhalichihemere mpu Abakristu bakatwe. Aganira nabo n’okubayemeza bwinja-bwinja oku ezola nyigirizo zaliri za bubeshi anakomeza obwemere bwa bene-babo omu nterekero y’enchungu ya Yesu Kristu.​—Gal. 2:4; 5:2.

Ebiblia eyerekene wazi oku amango omuntu amafa, arhakachimenya changwa kurhegera ebintu bili eburhambi bwage. (Muh. 9:5) Amango Paulo aderhaga: “Nafire oku biyerekere esheriya,” alilonzeze kuderha oku Esheriya ya Musa erhakachikolere omu kalamo kage. Aliko Paulo alichizerere oku obwemere bwage omu nterekero y’enchungu, bwabaga “bwamujirire alame oku biyerekere Mungu.”

Ehali ya Paulo yahindamukaga “kugerera esheriya.” Nka gurhe? Abaga amamala kufasiriya oku “omuntu anahamagalwa w’okunali, arhali kugerera ebijiro by’esheriya, s’aliko kugerera obwemere mu Yesu Kristu konyine.” (Gal. 2:16) Aliko, Esheriya yaliyeneze chintu chilebe ch’akamaro bwenene. Paulo afasiriya Abanyagalatia ntya: “Yayongerwaga y’amagosa mabonekana wazi mpaka oluburho luhike lwabaga lwahabirwe echilagane.” (Gal. 3:19) Nechi, Esheriya yaliyerekene bwinja oku abantu barhashinganene banali banya-byaha barhakagalire kukulikira Esheriya oku bushinganyanya, n’oku buzinda balikenere enterekero eshinganene. Bobola, Esheriya yaliyerekeze abantu oku “luburho,” k’okuderha, Kristu. Mungu akahamagere omuntu oku ali w’okunali omu kuyerekana obwemere bwage mu Yesu. (Gal. 3:24) Paulo aderhaga ntyo, bulala Esheriya ye yamurhabalaga ahikire kuyemera n’okuyerekana obwemere bwage mu Yesu. Echola charhuma Paulo “afa oku biyerekere esheriya” n’okushuba “kulama oku biyerekere Mungu.” Esheriya erhalichiherhe emisi oku bimuyerekere, s’aliko Mungu yewe nechi.

Paulo aliganirire oku mawazo mali nk’amo omu maruba mage ayandikiraga Abaroma. Aderha ntya: “Bene-berhu, nenyu mwajirirwe bafu oku biyerekere Esheriya kugerera omubiri gwa Kristu . . . Rhwashwekwirwe kurhenga omu Sheriya, bulala rhwafire oku biyerekere echalirhushwekere.” (Ro. 7:4, 6) Olula lwandiko n’olwa Wagalatia 2:19, mayerekene oku Paulo arhaliri aderha oku bilolere okufa nka munya-byaha wachirirwe olushinja n’Esheriya. Aliko, aliri aderha eju y’okushwekulwa changwa kuyokolwa kwage. Esheriya erhalichiherhe misi kuye n’oku bandi baliri nka yewe. Babaga bashwekwirwe kugerera obwemere omu nchungu ya Kristu.