Paulus sau hais tias: “Thaum kuv tseem coj raws li [Mauxes] txoj kevcai, kuv zoo li tus neeg uas tuag lawm. Tiamsis nimno txoj kevcai [ntawd] tsis kav kuv lawm, kuv thiaj tau kev ua kuv lub neej raws li Vajtswv lub siab nyiam.”​—Kalatias 2:19.

Paulus sau ntawv mus rau cov koom txoos hauv Kalatias vim muaj cov xibhwb cuav qhia tias yog lawv xav tau kev cawm dim lawv yuav tsum ua raws li Mauxes Txoj Kevcai xws li ua kevcai txiav. Tiamsis Paulus paub hais tias Vajtswv tsis hais kom lawv ua kevcai txiav thiab coj Mauxes Txoj Kevcai lawm. Nws thiaj cam tias qhov uas lawv qhia li no tsis yog lawm thiab nws txhawb cov kwvtij txojkev ntseeg rau Yexus Khetos tus nqi txhiv.​—Kalatias 2:4; 5:2.

Thaum Paulus hais tias: “Thaum kuv tseem coj raws li [Mauxes] txoj kevcai, kuv zoo li tus neeg uas tuag lawm.” Qhov no Paulus qhia tias nws txojkev sib raug zoo nrog Vajtswv tsis yog vim nws ua raws li Mauxes Txoj Kevcai tiamsis vim nws txojkev ntseeg rau Yexus Khetos tus nqi txhiv nws thiaj ua tau nws “lub neej raws li Vajtswv lub siab nyiam.” Nws thiaj hais tias Mauxes Txoj Kevcai tsis kav nws lawm.

Ua ntej Paulus sau cov lus hauv Kalatias 2:19, Paulus sau tias “peb yeej paub hais tias tus uas Vajtswv suav hais tias ncaj ncees, tsis yog tus uas xyaum coj raws li [Mauxes] txoj kevcai, tiamsis yog tus uas ntseeg Yexus Khetos.” (Kalatias 2:16) Qhov uas Paulus ntseeg tau Yexus tus nqi txhiv los twb yog vim nws paub Mauxes Txoj Kevcai zoo. Paulus piav rau cov Kalatias tias: “Twb yog Vajtswv xav kom neeg paub hais tias muaj kev txhaum. Vajtswv twb xav tseg lawm hais tias tsuas pub neeg coj [Mauxes Txoj Kevcai] mus txog thaum Anplahas tus xeebntxwv uas Vajtswv lo lus cog tseg hais txog los xwb.” (Kalatias 3:19) Mauxes Txoj Kevcai qhia tias tibneeg uas muaj kev txhaum yeej ua tsis tau raws li Vajtswv txoj kevcai tag tag. Thiab tsis muaj ib yam dabtsi uas lawv yuav coj mus fij tau rau Vajtswv daws lawv lub txim mus ib txhis mus txog thaum Anplahas “tus xeebntxwv” uas yog Yexus Khetos muab nws txojsia theej lawv lub txhoj xwb. Yog li ntawd Vajtswv thiaj xam hais tias cov uas lawv ntseeg Yexus Khetos tus nqi txhiv yog cov uas ncaj ncees. (Kalatias 3:24) Vim Paulus ntseeg Yexus tus nqi txhiv Vajtswv thiaj suav tias nws yog ib tug neeg ncaj ncees. Twb yog vim li no Paulus thiaj hais tias Vajtswv yog tus uas kav nws tsis yog Mauxes Txoj Kevcai.

Paulus los kuj hais rau cov kwvtij nyob hauv Loos hais tias: “Mauxes txoj Kevcai yeej tsis kav nej cov uas nrog Yexus Khetos. . . . Tiamsis nimno peb twb dim txoj kevcai uas khi peb, rau qhov peb zoo li cov neeg uas tuag lawm.” (Loos 7:4, 6) Nqi Vajlugkub no thiab nqi Vajlugkub hauv Kalatias 2:19, Paulus qhia rau peb tias Yexus Khetos tus nqi txhiv twb cawm cov Khixatia dim ntawm Mauxes Txoj Kevcai lawm.