Paulo ia gwau: “Taravatu amo lau be taravatu dekenai lau mase, unai amo Dirava dekenai lau mauri diba.”​—Gal. 2:19.

Paulo ena revareva ai, Galatia kongrigeisen idauidau dekenai mai anina bada gauna ta ia herevalaia lalonai, unai hereva ia torea danu. Unuseniai Keristani taudia haida be hahediba koikoi taudia ese idia hakaua kerere. Unai koikoi herevana ta be, bema ta ia ura mauri ia abia, namona be Mose ena Taravatu hegeregerena kopina ia utua. To, Paulo ia diba Dirava ia ura lasi abidadama taudia be kopina do idia utua. Paulo ese ia hahedinaraia unai hahediba herevadia be koikoi, bona tadikaka ia hagoadaia Iesu Keriso ena mauri davalaia boubouna idia abidadama henia totona.​—Gal. 2:4; 5:2.

Baibel ese ia hahedinaraia goevagoeva, bema ta ia mase, ia be gau ta ia laloa lasi eiava diba lasi. (Had. 9:5) Paulo ena hereva, “taravatu dekenai lau mase” ena anina be Mose ena Taravatu ese ena mauri ia biagua lasi. To, ia abia dae mauri davalaia boubouna abidadama henia karana amo ‘Dirava dekenai ia mauri diba.’

“Taravatu badinaia karana amo” Paulo ese ena lalohadai ia haidaua. Edena dala ai? Paulo ia gwau: “Ta be Keriso Iesu ia abidadama henia karana sibona amo Dirava ese ia gwauraia maoromaoro, to taravatu badinaia karana amo lasi.” (Gal. 2:16) Momokani, Taravatu ese mai anina bada gauna ta ia hagugurua. Paulo be Galatia taudia ia hamaoroa: “Taravatu ia noho kara dika ia hahedinaraia totona, ela bona natuna ia ginidae, ia be unai gwauhamata ia abia tauna.” (Gal. 3:19) Oibe, Taravatu ese ia hahedinaraia, goevadae lasi taudia be idia hegeregere lasi Taravatu idia badinaia namonamo totona, unai dainai boubou gauna goevadaena ia noho be namo. Taravatu ese taunimanima be “natuna,” Keriso dekenai ia hakaudia lao. Bema ta ese Iesu Keriso ia abidadama henia, Dirava ese unai tauna ia gwauraia maoromaoro. (Gal. 3:24) Dirava ese Paulo ia gwauraia maoromaoro, badina Taravatu amo ia be Iesu ia abia dae bona abidadama henia. Unai amo, Paulo be ‘taravatu dekenai ia mase’ bona ‘Dirava dekenai ia mauri.’ Oibe, Taravatu ese Paulo ia biagua lasi, to Dirava ese ia biagua.

Paulo be Roma taudia ia tore henia neganai, unai bamona lalohadai ia gwauraia danu. Ia gwau: “Egu tadikaka e, Keriso ia bouboulaia tauanina amo umui be Taravatu amo ia ruhaia. . . . Ita be Taravatu ese ia guia noho lasi, badina ita ia dogoatao auka gauna dekenai ita mase vadaeni.” (Roma 7:4, 6) Unai siri bona Galatia 2:19 amo Paulo ese ia hahedinaraia, Keriso ena boubou gauna amo Keristani taudia be Mose ena Taravatu amo ia ruhadia vadaeni.