Phaul hot kexrip: “Torich tas Kesets sin ich fer tas Kesets kextorep, tas ich soo fer Kot lepeentich wëre teet.” (Kal. 2:19)

Was Phaul too kexrip hot, waar ticht ferpunt mit een wichtich phunkt woo eyer fer ti kemaynte in Kalasya — een romaanix prowins — am aus leye waar. Es waare falxe leerer kewees woo in kelërnt hon tas fer een krist retung kriin, must eyer tas Mosayx Kesets noo keen, hauptseechlich mit was ti pexnaytung se tuun hat. Etliche kriste sin fon tiise falxe leerer influentsiirt kep. Awer Phaul hot taytlich aus keleet un pewayst tas tiise inlërnunge falx waare. Tee wust tas Kot net mee ferlangt hot tas sayn tiiner pexnit weyere. Tan, hot eyer ti priiter sayn klaape aan tëm fray khaaf opfer ferxtërkt. (Kal. 2:4; 5:2)

Ti Piipel saat was mit een persoon pasiirt wën se xtërpt: tii tuut kaar niks wise un wërt net petrof fon was um rom se pasiirt. (Ekl. 9:5) Tan, was wolt Phaul saan mit te wërter: ‘Ich sin fer tas Kesets kextorep’? Tee wolt tsayche tas tas Mosayx Kesets khont net mee sayn leepe petrefe. Xtats tas, waar Phaul sich sicher tas torich sayn klaape aan tëm fray khaaf opfer, is eyer “fer Kot lepeentich” woer.

Tiise ënerung is “torich tas Kesets” pasiirt. Wii soo? Phaul hat aus keleet “tas te man is kerecht aus kexproch, net weeche aktsyoone woo tas kesets xikt, awer ploos torich te klaape aan Yeesus Kristus”. (Kal. 2:16) Kewis hot tas Kesets was wichtiches kemacht. Was? Phaul hot fer ti kalater aus keleet: “Tas [Kesets] is kep woer fer ti iwertretunge se tsayche un tas teet kile pis tas te nookhomer khemt iwer weem tas ferxpreche kemacht woer is.” (Kal. 3:19) Tas Kesets hot was taytlich kelos: imperfekte sintiche mënxe khente net tas Kesets in een perfekt aat noo keen; tii praychte een perfekt opfer kriin. Tes weeche, hot tas Kesets ti layt pis “te nookhomer” kelënkt: Yeesus Kristus. Tan, wën yemant klaape aan Yeesus Kristus tsaycht, khan Yeehoowa tëm kerecht aus xpreche. (Kal. 3:24) Phaul is kerecht aus kexproch kep wayl torich tas Kesets hot eyer Yeesus aan kenom un aan tëm keklaapt. Tes weeche, is Phaul “fer tas Kesets kextorep” un is “fer Kot lepeentich” woer. Weer tëm yets influentsiirt hot, waar Kot, net tas Kesets.

Phaul hot was eenliches in sayn priif fer ti romaaner kexrip: “Mayne priiter, teyer sayt aach fer tas Kesets kextorep, torich Yesus sayn khërper. (...) Yets sin mer fon tëm Kesets fray kemacht kep, wayl mer kextorep sin fer tas woo uns um kehal hot.” (Rom. 7:4, 6) Te tekst too un fon Kalater 2:19 tsayche tas Phaul net am xpreche waar iwer yemant woo kextorep is wayl eyer tas Kesets iwer treet hot. In woerheet, waar tee am xpreche iwer pefrayt wëre. Yets, teet tas Kesets tëm un anere kriste net mee influentsiire. Yets, waare se fray weeche sayn klaape aan Yeesus sayn fray khaaf opfer.